2012年11月27日 星期二

防躁底之【整理整頓】

上次提到令我心情煩躁的
除左廣告來電之外
雜物都係我的死穴之一
唔知點解,我真係好怕o的野一堆堆、一箱箱
次次見到我都會覺得o的雜物好似壓住o係我頭頂咁

話說我住兩層村屋
話大唔大、話細絕對唔細
兩個人住時,相當開闊,又整整齊齊

自從多左兩個化骨龍
屋企就多左好多野
尿片啦、奶粉啦、玩具啦、衫仔啦
當然,呢o的全部都係必需品
但因為本來間屋o既 setting 冇預到足夠儲物空間
所以o的野就一堆堆咁堆晒o係度啦
(其實奶奶已經幫我整理得好整齊了,辛苦晒)



男人呢,好似對屋企裡面o的野唔多熱衷o既
對雜物都可以視若無睹 (當然啦 ... 其實好多時佢地都有份攪亂間屋 )
但對於一隻超重視家庭o既巨蟹座呢
屋企係佢地o既城堡
唔可以馬虎了事

卒之,經我請願再請願
笨 B 爸爸終於肯郁
去搵紀生整左個餐邊櫃了



之前本來係去左沙田中央廣場 (?) o的傢俬店睇o既
都有好多好靚
不過一問之下成千幾接近二千蚊呎
雖然係實木,又靚仔
但 ... 一個餐邊櫃成萬幾蚊,又唔多捨得
因為家有兩個小朋友,遲早都應該係破壞王
唔駛用太靚o既材料啦 ...

幸好多得街坊一言驚醒夢中人
原來而家有o的面料 (防火膠板?)
已經可以做到非常近似真木o既外觀和質感 
咁去搵紀生做一個普通廚櫃級數o既櫃
用番靚o的o既面料 (呢款係 Formica 富美家 Wood Grains 系列)
內籠普通o的冇所謂,反正都會塞滿晒野 

做左個五呎半o既餐邊櫃,用左呢款凹凸紋o既面料
睇落相當唔錯呢
話時話,旁邊o既衣帽架係淘寶寶,圍起三百零蚊港紙,抵玩



個餐邊櫃一o黎度,即刻已俾我塞滿晒了  
難怪笨 B 爸爸話唔想整咁多櫃o係屋企
佢話我無論有幾多個櫃我都係會塞滿晒,我先係雜物製造者喎
歪理


又話時話,有左個邊櫃,有位放我o的「玩具」(整野食o既工具,例如檯面呢部日版 P 仔同埋咖啡機)
我即刻開心番晒   
o的野唔放出o黎,係唔會用架
所以檯面位置好珍貴,一定係放o的常用o既玩具



同場加映
為配合餐邊櫃o既設計
我地o係上海街街頭行到街尾逐間搵
終於搵到o的中國風o既拉環同埋手抽
好鍾意



說真的,雖然我買的通常不是甚麼貴野
但我真的對屋企有點要求架
例如我需要放一個拖板o係餐邊櫃o既檯面
我真係特登去搵一個黑色o既拖板o黎買架



嗱嗱嗱 ... 真架
個餐邊櫃一抵埗
真係已俾我塞滿了





另外推介大家的
係整理鞋子的方法
女人開心時候買鞋、唔開心時候又買鞋
應該個個都一屋鞋
成日都摷唔到想著o既鞋、又或者完全唔記得自己有咩鞋
可以幫o的鞋影番張相,貼o係鞋盒出面
咁就一目瞭然啦



就係咁啦 ~ 係咪好清楚呢?



而家有左笨 B 笨 C
雖然我地已經係少買衫之人
但朋友送的禮物、轉贈o既二手物資
都已經攪到成屋都係衫

因為唔想攪咁大動作
所以o係實惠買左個四層膠櫃桶頂住先
遲下佢地大個少少先裝修呢間房喇!



周屋都係雜物 
電器、用品、衣服鞋襪、擺設咩都有
執執埋埋,五。大。袋!
誇張!我都唔知點解

好在救世軍舊物回收服務
如果有五大袋以上,可以 call 佢地上門收 (按此觀看舊 blog)
o個日佢地o黎收左五大袋野之後
我真係開心到想跳舞架 ~~~ yo



如果有o的超新淨、或價格較貴
你唔捨得就咁捐左佢o既話
可以考慮下用拍賣網或者 trade 物網
拍賣網而家好多都要俾交易費用
最近o係電視廣告見到一家新o既叫 Kijiji
就標榜唔駛交易費用o既
可以 trade 野又可以賣野云云
係咁咦睇過,真係咩都有
傢俬雜物自不然有,但竟然連賣車賣樓都有
哈 ~

如果你地想 trade 野可以研究下 ==> 按此觀看







笨 B 媽媽生活記事

宣傳你的專頁

6 則留言:

  1. 我都開始大掃除啦~Kijiji唔駛交易費, 有咩唔等駛, 放上去TRADE都好喎! Thx!!

    回覆刪除
  2. b媽, 一個冇雜物的屋企真的好緊要!!
    (當然啦 ... 其實好多時佢地都有份攪亂間屋 )
    好認同!!
    我今年搬屋, 都做過晒d櫃, 將所有雜物收起晒!
    不過老公都係話多多櫃都唔夠我放!

    回覆刪除
  3. 我昨天都執書房,執完看見清爽的書房,心情都好舒泰!

    回覆刪除
  4. 我老公成日同我講..."你知唔知香港一呎街磚幾多錢?",屋企地方唔容許有雜物﹗

    回覆刪除
  5. 請問你個櫃做左幾多錢? 同埋係邊度做?

    回覆刪除
  6. 實惠果個膠柜桶幾錢呀?大約係幾尺乘幾尺架?我想買黎放bb衫仔

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: