用 Miele 電蒸爐消毒奶瓶

廚房一隅
大家有冇發現有咩唔同左？
冇錯，之前屈居地板o既 Miele 電蒸爐"升左呢"
坐左電飯煲個位啦 ...

話說之前用緊o個個電飯煲
內膽係易潔塗層的
但大家都知，呢o的塗層用用下會甩
一開始甩就最好唔好再用
否則掉落o既塗層可能摻入飯裡，影響健康
(記得中學 Chemistry 教過，o個o的塗層係 carcinogenic ... 即是致癌的 )

本來，笨 B 爸爸想買番個新電飯煲
仲指明要明 XX 內膽 (即是唔會甩o個o的呢. .. 唔記得左係咩名)
但價錢都幾貴
我諗諗下，反正部 Miele 電蒸爐可以蒸飯
點解唔直接用埋佢o黎日日蒸飯呢？

如是者，我地就將部蒸爐升左上神檯 ... 噢 no ... 檯面啦
嘻嘻，今次我得米了
因為我向來主張o的野一定唔可以收收埋埋或攝埋灶罅
因為次次要用時才搬上搬落，用用下一定變懶甚至失憶，變成垃圾一件
部蒸爐咁正，點可以咁浪費呢！我一定要好好利用，要日日用先抵番
(雖則係贊助品，但我屋企都寸金尺土架嘛 .... )

考眼力圖二，今次有咩唔同左？
冇錯 ... 多左個笨 C
呢個囡，呢幾個月都鍾意行到邊坐到邊、訓到邊
有時大字型攤o係廚房地下添！冇佢符！

自從將個蒸爐升左上檯面，我地餐餐都用緊佢了
不過都係煮o的家常菜式
呀其實都多左一個用途
就係消毒奶樽啦！
因為我有用電奶泵，連埋平時用o既奶欂，日日都好多野要消毒
用奶煲裝唔晒，成日要分兩次蒸
用 Miele 就可以一次攪掂晒！
用 100 度蒸 15 分鐘就完全殺菌架啦！
一機多用，我最 like ~
(溫馨提示：唔好將有關 bb o既所有野塞入去"消毒" 啊 ~ 要睇清楚說明書講可以用攝氏100度高溫消毒的才可以呢)

附送笨 B 近照，佢開始圓碌碌了
感覺上佢比家姐當年增重o既速度快
唔知係咪男仔都會大隻得快o的o既呢

出世後一個禮拜，第一次返健康院時
我用條 sling 揹笨 B 去的
當時佢剛回復出世時體重 (6磅幾)
細細粒，成個塞晒入條 sling 都感覺鬆鬆動

差幾日就滿月，尋日又用 sling 揹佢返去健康院做聽力測試
哇蟹，點解咁逼o既   塞晒佢入去的話，佢會嘈嘈閉
卒之要突佢個頭出o黎 ~
同埋感覺佢"墜手" 左唔少呢 ~
(不過因為做聽力測試冇磅重環節，唔知笨 B 而家幾多磅 ~ 遲幾日見醫生就知喇 ~)

笨 B 媽媽生活記事

宣傳你的專頁