2012年8月28日 星期二

蕃茄蟹醬大蝦長通粉

前幾日提到去 Ikea 瑞典美食廊上倉 (按此重溫)
提到我常做的一款蕃茄蟹醬長通粉
(哈哈其實以前間唔時都有提下,提過好幾次了)
講到幾咁好食,撩起左大家條筋
又遲遲未寫食譜,真抵打呢



o係電腦摷番o的相出o黎
原來真係幾乎成年前拍的照片
太懶了成日話寫但又未寫!

講起蕃茄蟹醬長通粉
一定要向街坊 sasa 致敬一番 (按此觀看)
因為 sasa 實在太有創意了
最初佢o係 Ikea 買支蟹醬回家時係諗住搽麵包吃的
但因為覺得效果不太好
丟掉又浪費
所以左溝右溝用來煮長通粉
點知效果出乎意料咁好,變成佢o既 signature dish ~

其實 sasa 唔止一次發明食譜的
我覺得佢對於醬料特別有天份呢!
有幾款醬料佢都整得好好食 (esp 沙律、涼拌)
但因為我自己冇做過
又忘記詳情
所以要遲o的跟佢重溫完先可以再o係呢度分享啦  

今次主角o既蟹醬,就係呢支啦!
o係 Ikea 瑞典美食廊有售
不過有時會斷貨架呢


全部用料一覽
平時我成日煮的蕃茄蟹醬長通粉
因為有其他配料,所以是沒有再落大蝦的
但有大蝦的版本,醬汁中就會有埋蝦膏和蝦汁
係好味好多好多的!!!
強烈建議大家試試呢!!!

材料中的豚骨湯塊都係 optional,但落左又係好味好多
牌子是「牛頭牌」,台灣產品
o係大型百佳或【新台場】這些有售賣台灣食品的店舖好易搵到

丘比沙律醬,又稱 bb 醬 (因為 logo 是一個 bb),又係一絕
用來整沙律固然好味
但原來都可以用o黎整意粉 sauce
可以令個汁更濃稠更 creamy
個個教你整意粉汁係落淡忌廉
但平常家庭,平時淡忌廉用量不多
買一盒來用,往往用了一兩次後,還剩餘很多時便要丟棄
(因為奶品儲存期很短)

至於現成的蕃茄意粉醬,是用來"加色"的
也可以用普通蕃茄醬代替的



這些大蝦,我是在兒興泰買的
好像是 $75 一盒,大概 10 隻
呢度有兩盒份量了

百佳有時都有越南草對蝦做特價
可以趁機買些存倉
不過質素不及兒興泰



大蝦洗淨後,先蒸到八成熟 



剝殼備用
剝殼時用碟盛著,因為蝦頭裡會流好多蝦膏蝦汁出來啊!



剝好的蝦
蝦頭其實不要的,所以要把蝦頭中的蝦膏和蝦汁全擠出來



好肥美!真係好想偷食的



長通粉煮熟,隔水備用
每人份量 100克 (未煮前的乾品重量)



準備好材料,先用鑊炒香洋葱
(紫色洋葱較黃色的香甜)
再落蕃茄炒勻





加入蝦膏蝦汁



擠適量的蟹醬
(每人份量約 1/4 支)



加半粒豚骨湯塊



再加適量的蕃茄醬/ 意粉醬
除了色彩,也添加酸酸甜甜的味道
每人份量約 1 湯匙



bb 醬呢,最後差不多煮好才加
否則怕高溫下分解出油份
到時 creamy 不成反變油淋淋
每人份量約 1 湯匙

其實醬料呢家野,一邊加一邊試味便可
以上都是大約份量而已
總之調到自己覺得好味就得啦



煮好了蕃茄蟹醬 sauce 後,將大蝦和長通粉加入
煮多半分鐘便可上碟了

可以灑些乾香草和黑椒碎
呢碟蕃茄蝦醬大蝦長通粉
絕對好味過出街食啊



好快咁打個食譜

【蕃茄蟹醬大蝦長通粉】(2人份量)
蕃茄                     大 2 個切粒
洋葱                     半個切絲
大蝦                     10-12 隻
長通粉 (乾品)      200 克
意粉醬                 2 湯匙
Ikea 蟹醬             半支
豚骨湯塊             半粒
丘比沙律醬          2 湯匙
油                         適量
黑椒碎、乾香草   隨意

做法:
(1) 洗淨大蝦,蒸約 5-6 分鐘至蝦殼剛轉紅色,熄火取出放涼
(2) 剝蝦殼,在蝦頭擠出蝦膏蝦汁
(3) 長通粉煮 10-11 分鐘至熟,瀝乾水份
(4) 鑊中下油,炒香洋葱,加入蕃茄
(5) 加入蝦膏蝦汁、蕃茄醬、蟹醬、豚骨湯塊。可酌量加水。
(6) 醬汁差不多煮好時,加入丘比沙律醬撈勻。
(7) 最後加入大蝦及長通粉,再煮半分鐘。
(8) 上碟,並灑上黑椒碎、乾香草。





笨 B 媽媽生活記事

宣傳你的專頁

9 則留言:

  1. YEAH~第一次做第一~

    回覆刪除
  2. 解釋得好詳細~好~等我去宜家入貨試下先

    回覆刪除
  3. 平時好懶login, 所以有番說話想同你講但一直都未打(惰性難改)。
    我諗睇左你個blog應該有好大段時間,由你未結婚仲攪緊屋仔project到依家就快有第2個小朋友,應該有好幾年吧~追你個blog已成為我生活中的一部份。
    記得之前同你有差唔多的經歷,所以見你睇中醫睇得唔錯, 問你拎左肥仔中醫的資料。我有keep住睇左半年,不過真係太遠程,所以半年後就無睇lu~

    入返正題,其實我好想多謝你,因為你願意花時間同大家分享你覺得好的事,所以我都係其中中個得益者。睇完中醫,初初無咩大感覺,不過到今年初,我有左bb開始就發現用處好大。幸運地,一切順利到依家我懷孕六個半月了,真係多謝你的好介紹同無私的分享。亦都恭喜你有笨b,一仔一女剛好係個"好"字,好開心可以同你一樣生龍b呢!

    回覆刪除
  4. 而家海中虾 都好平,可以自己雪虾慢慢食 ?

    回覆刪除
  5. 但我係街市見海虾有好多蝦膏...只係40元一斤...你試下?

    回覆刪除
  6. 好正呀!
    啱啱去左IKEA買左個隻字母餅比亮亮!!
    佢超鍾意食呀! 一粒一啖, 好啱佢咀型!!
    多謝你之前既介紹!!
    (其實連我同老公都好鍾意食!! 所以下次去要入貨!)

    回覆刪除
  7. Hello,你好呀! 我成日都有睇你個blog架! 見到你地一家人成日都咁開心,真係幸福呀!

    唔知你有冇發覺愈黎愈多小朋友的抗壓力同心理素質好低,遇到好少事,俾屋企人話幾句,唔開心。D父母又成日俾人話唔識教仔,係直昇機家長,教左d港孩出黎..等等

    要提升小朋友的心理素質,父母的角色一定係最重要,要知道咩野係「必要知」、「必要行」同「必不要犯」,對仔女發揮最大既影響力。

    公司有個優質父母證書課程,由黃重光醫生精心設計同教授,佢積極推動提升成年人同兒童合o既「心理素質」培訓工作,最後有幾個免費位free出黎for promotion,俾d家長參加完之後寫番感受就ok架啦,個堂價值$4,800,我即刻諗起你想邀請你參加呀!

    個課程會教你點樣掌握優質父母錦囊,了解仔女特性,發揮父母心理「內功」,自己成為優質父母之外,仲可以培育優質子女,令佢地有優質巳o既人生。

    希望你上完堂可以學以致用有效咁培育子女,而自己也可以享受為人父母的快樂同滿足,成為影響仔女一生最重要既人。

    或者你可以去呢個網址到睇下個course既介紹先:
    http://www.ican.com.hk/pdf/leaflet_parenting_v42.pdf
    如果你真係有興趣,就回覆我啦! 或者可以打俾我,問多D資料,電話:2839 8903

    回覆刪除
  8. 你好~~想問你現在用那款鑊??因為剛剛用電磁爐所以想睇下那款好用??
    thanks

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: