2012年8月30日 星期四

笨 C 有禮

尋日公公入o黎探笨 C
o係客廳玩緊時
突然收到速遞電話,話有個花籃送過來
咦 ... 花籃?中秋節花籃乎?邊個送架呢

哈!原來係奶粉品牌呢
笨 C 好醒,一睇就知關佢事
即刻飛身撲埋去坐o係個花籃上面
喂喂喂o個o的真花o黎架
笨 C 你咪一個屁股坐落去辣手摧花先得架



好 grand 的禮物籃
多謝晒
不枉笨 C "支持"左你地咁耐



一向都係自費購買呢個品牌o既奶粉o黎食的
因為笨 C 一直食得唔錯
老實講隻隻奶粉都話自己配方最好
我就冇太仔細研究
最緊要小朋友o岩食肯食
食落又「三得」(食得訓得屙得 )
咁我就 OK 了
之前無啦啦爆出某o的奶粉含碘量低的事件
都有o的擔心,因為最初 Friso 都在名單上
好在後來再澄清其實係合格的

今次送禮係咩名堂?
哦 ... 原來係轉新包裝
呢幾日o係電視已經開始見到廣告了



仲有一罐媽媽奶粉
最近各大品牌都力推媽媽奶粉
但實不相瞞,我試過診所派的幾款試用裝
都頂唔順o的味道 ...
呢款寫住話適合懷孕期媽媽增加營養
我怕我會太肥了
但佢又有寫有助餵哺母乳媽媽谷奶
好,為左呢點,我即管試試
因為實在好想餵母乳餵得耐少少
上次餵笨 C,日日飲魚湯,產量都係少
如果呢罐奶粉有效,我一定會大肆報導  



新裝和舊裝的比較
哈 ... 冇錯,屋企呢罐係 4 號仔
因為 4 號仔易買過 3 號仔,所以我地買到邊罐就食邊罐架啦
有時買唔到,甚至會買其他牌子添  
好在我家笨 C 不挑吃,俾咩牌子佢都食o既
我地都唔係亂o黎,食緊 1 號仔 2 號仔時唔會亂咁轉
因為始終 bb 仲細,腸胃冇咁容易適應
但過左一歲就冇咩所謂了,外國 bb 直頭轉飲鮮奶添啦 ~
 

話時話 ... 丫 ... 新裝高左o既?莫非大罐裝?



no lar ... 而家o的奶粉只會改細容量,唔會改大架
原來呢個新罐o既設計,多左一個隔放量匙
用起上o黎方便o的又衛生o的
都不失為一個細心o既新設計



除左兩罐奶粉,禮物籃裡仲有好多野
包括 4 個布藝儲物箱
好硬淨,笨 C 坐o係上面都冇問題



笨 C 又o係度扮搬運工人啦 ...



仲有口水肩
笨 C 同其他 bb 唔同
佢唔流口水o既,又唔食奶咀、唔食手指
所以我自己買的口水肩都冇咩用過
留番俾細佬用喇!(雖則都希望細佬似家姐咁唔流口水唔食手指 ~)




好靚o既插花
如果係盆栽仲好,插花始終不耐放,有點浪費呢
不過確係好靚,多謝晒



另外有一盒港姐冠軍陳倩揚o既懷孕心得分享卡



背面全是食譜,有懷孕期湯水、小食、bb 食物等
等我試下先,好味o既再分享俾大家



另外,之前收到一套 Bioderma 專為 BB 和懷孕媽媽而設o既護膚品系列 - ABCDerm
Bioderma 都係我自己常用的牌子
所以呢份禮物都好合用
但實不相瞞,我仲未試過呢條 BB line
但因為屋企開左o既護膚品未用完
我好少會突登為宣傳而開過晒o的新o既o黎用
雖然有點對不起 PR 姐姐,但怕浪費是我的性格嘛
放心,笨 B 仲有半個月就出世了
到時用量激增,一定會開o黎逐隻試架啦!

而家 post 上o黎,係因為我覺得呢兩款禮物籃好可愛
Bioderma 出品又向來好用
溫和得o黎清潔效果又好

所以想推介俾大家
如果有朋友生 bb
都可以考慮下呢兩款禮物籃呢 ~
價錢已經包括送貨到各大醫院了,唔錯呢
詳情可以瀏覽 http://www.bioderma.com.hk/abcderm/delivery2.php
 

【ABCDerm 小寶寶禮物籃】$428
內容:
嬰兒潔膚水 100ml
嬰兒洗髮沐浴啫喱 200ml
嬰兒保濕潤膚乳 200ml
嬰兒換片護理霜 75ml
小禮物
心意咭
禮物籃
【ABCDerm 小天使禮物籃】$970
內容:
嬰兒潔膚水 1L
嬰兒洗髮沐浴啫喱 200ml
嬰兒保濕潤膚乳 200ml
嬰兒礦物防曬霜 SPF50+  50g
嬰兒換片護理霜 75ml
產後修身緊緻霜 200ml
小禮物
心意咭
禮物籃



我咪話我o的護膚品未用完o既
咪就係呢o的囉
其實我有時去完 event、或試過o的贊助品
覺得幾好用、價錢又o岩自己消費能力的
都會 keep 住用架
Physiogel 係一個唔錯o既系列
保濕能力相當好
雖然佢賣廣告係話特別適合濕疹肌膚
慶幸我家無人有濕疹
但我喜歡佢溫和無香料
大人小朋友都搽得呢
Physiogel 產品介紹:http://www.physiogel.com/



謝謝各大品牌對我咁好
成日俾o的好野我試 ~
滿足我的八卦心理

雖則,有時我未必即刻可以撰文介紹
(冇理由用完一個星期就讚到飛起架?)
(如果唔o岩用的,石沉大海也不是沒可能 ...)
(因為我失憶症發作而忘掉也有機會
...)
但若然好用的,我幾耐都會摷番出o黎寫,仲會不斷咁提住,煩到你嘔o個隻
仲會自己 um 荷包買完再買
(我o的朋友就知"我籠野",好用o既野會不斷 loop 帶播放 務求身邊全部人都知為止)

所以,希望各位俾o的耐性 ...
做生意都係望長做長有
所以我雖然有時遲左少少,但最緊要對其他用家起到參考作用
唔係昆人買完一次就算
係咪咁話先

對於各位 blog 友
都係o個句,大家o岩用的資訊,可以作為參考
如果我幫大家 R 到電視框就話趕住幫襯啫
否則,就視乎自己需要、消費能力去決定
做個精明消費者呀




笨 B 媽媽生活記事

宣傳你的專頁

2012年8月28日 星期二

蕃茄蟹醬大蝦長通粉

前幾日提到去 Ikea 瑞典美食廊上倉 (按此重溫)
提到我常做的一款蕃茄蟹醬長通粉
(哈哈其實以前間唔時都有提下,提過好幾次了)
講到幾咁好食,撩起左大家條筋
又遲遲未寫食譜,真抵打呢



o係電腦摷番o的相出o黎
原來真係幾乎成年前拍的照片
太懶了成日話寫但又未寫!

講起蕃茄蟹醬長通粉
一定要向街坊 sasa 致敬一番 (按此觀看)
因為 sasa 實在太有創意了
最初佢o係 Ikea 買支蟹醬回家時係諗住搽麵包吃的
但因為覺得效果不太好
丟掉又浪費
所以左溝右溝用來煮長通粉
點知效果出乎意料咁好,變成佢o既 signature dish ~

其實 sasa 唔止一次發明食譜的
我覺得佢對於醬料特別有天份呢!
有幾款醬料佢都整得好好食 (esp 沙律、涼拌)
但因為我自己冇做過
又忘記詳情
所以要遲o的跟佢重溫完先可以再o係呢度分享啦  

今次主角o既蟹醬,就係呢支啦!
o係 Ikea 瑞典美食廊有售
不過有時會斷貨架呢


全部用料一覽
平時我成日煮的蕃茄蟹醬長通粉
因為有其他配料,所以是沒有再落大蝦的
但有大蝦的版本,醬汁中就會有埋蝦膏和蝦汁
係好味好多好多的!!!
強烈建議大家試試呢!!!

材料中的豚骨湯塊都係 optional,但落左又係好味好多
牌子是「牛頭牌」,台灣產品
o係大型百佳或【新台場】這些有售賣台灣食品的店舖好易搵到

丘比沙律醬,又稱 bb 醬 (因為 logo 是一個 bb),又係一絕
用來整沙律固然好味
但原來都可以用o黎整意粉 sauce
可以令個汁更濃稠更 creamy
個個教你整意粉汁係落淡忌廉
但平常家庭,平時淡忌廉用量不多
買一盒來用,往往用了一兩次後,還剩餘很多時便要丟棄
(因為奶品儲存期很短)

至於現成的蕃茄意粉醬,是用來"加色"的
也可以用普通蕃茄醬代替的



這些大蝦,我是在兒興泰買的
好像是 $75 一盒,大概 10 隻
呢度有兩盒份量了

百佳有時都有越南草對蝦做特價
可以趁機買些存倉
不過質素不及兒興泰



大蝦洗淨後,先蒸到八成熟 



剝殼備用
剝殼時用碟盛著,因為蝦頭裡會流好多蝦膏蝦汁出來啊!



剝好的蝦
蝦頭其實不要的,所以要把蝦頭中的蝦膏和蝦汁全擠出來



好肥美!真係好想偷食的



長通粉煮熟,隔水備用
每人份量 100克 (未煮前的乾品重量)



準備好材料,先用鑊炒香洋葱
(紫色洋葱較黃色的香甜)
再落蕃茄炒勻





加入蝦膏蝦汁



擠適量的蟹醬
(每人份量約 1/4 支)



加半粒豚骨湯塊



再加適量的蕃茄醬/ 意粉醬
除了色彩,也添加酸酸甜甜的味道
每人份量約 1 湯匙



bb 醬呢,最後差不多煮好才加
否則怕高溫下分解出油份
到時 creamy 不成反變油淋淋
每人份量約 1 湯匙

其實醬料呢家野,一邊加一邊試味便可
以上都是大約份量而已
總之調到自己覺得好味就得啦



煮好了蕃茄蟹醬 sauce 後,將大蝦和長通粉加入
煮多半分鐘便可上碟了

可以灑些乾香草和黑椒碎
呢碟蕃茄蝦醬大蝦長通粉
絕對好味過出街食啊



好快咁打個食譜

【蕃茄蟹醬大蝦長通粉】(2人份量)
蕃茄                     大 2 個切粒
洋葱                     半個切絲
大蝦                     10-12 隻
長通粉 (乾品)      200 克
意粉醬                 2 湯匙
Ikea 蟹醬             半支
豚骨湯塊             半粒
丘比沙律醬          2 湯匙
油                         適量
黑椒碎、乾香草   隨意

做法:
(1) 洗淨大蝦,蒸約 5-6 分鐘至蝦殼剛轉紅色,熄火取出放涼
(2) 剝蝦殼,在蝦頭擠出蝦膏蝦汁
(3) 長通粉煮 10-11 分鐘至熟,瀝乾水份
(4) 鑊中下油,炒香洋葱,加入蕃茄
(5) 加入蝦膏蝦汁、蕃茄醬、蟹醬、豚骨湯塊。可酌量加水。
(6) 醬汁差不多煮好時,加入丘比沙律醬撈勻。
(7) 最後加入大蝦及長通粉,再煮半分鐘。
(8) 上碟,並灑上黑椒碎、乾香草。





笨 B 媽媽生活記事

宣傳你的專頁

Linkwithin

你可能對以下文章有興趣: