2012年5月30日 星期三

"High Tea 式" 淮揚京式風味菜 @ 又一棧

經過左半個月閉關的埋首工作
(對呀我有工作的,只是我從不在 blog 裡寫工作詳情而已)
做到發癲的我終於可以出關了

之前忙到嘔血之際
都有諗過好唔好繼續寫 blog
因為快要成為兩子之母
我真係要發奮圖強努力工作了 (笨 B 爸爸當然也努力中)

但 ... 我對寫 blog 確是有一份情意結
因為我想日後有些回憶可以睇番
我份人,記性太差
好多野轉個頭就會忘記
大部分事情,忘記了就忘記了罷,沒所謂
但家裡小孩的成長點滴
我真要好好記下
而家笨 C 就好黏我啫
但有朝一日,佢有佢自己天地時
好可能我就要開住個電腦對住o的相呀 video 呀舊 blog 呀
日日翻炒呢o的回憶過日辰架啦 ...
(笨 C 笨 C ... 若然你長大後呢個 blog 仍然存在
你有睇到呢一句
唔該搵阿媽我飲下茶行下街丫 ... )


另一個想 keep 住寫 blog 的原因
係因為我生性八卦 (講過好多次了)
平時睇雜誌已經成日睇廣告 (哈哈我唔係飛廣告o既人o黎架)
因為 blogger o既身份,令我可以率先嘗試好多新產品 (仲要免費...)
對我呢o的又要八、又想慳o既人o黎講
真係好大吸引力
我係咪好老實呢 ...
咁當然,我都好小心選擇贊助商
真係o岩用、喜歡的才會接
分享時也盡量會加入多些自己的 input 啦 ~ 


今日又有試菜機會了
仲要係我最鍾意o既濃油赤醬
收到邀請第一時間應承喇!
笨 B 爸爸走唔開不能參加,妒忌得牙癢癢呀!
我呢個老婆好好o既 ... 一定會第一時間寫篇 blog 俾佢睇 ...


一大堆開場白,終於入正題啦
今日係去九龍塘又一城、美心旗下o既【又一棧】試食最新推出o既淮揚京式風味菜
好耐冇o黎啦,原來呢度剛裝修完
充滿中國特色得o黎又有好多摩登元素
好靚好舒服呢!



第一次見到用 high tea 點心架盛盤的中菜
有趣有趣



我想,新裝修的【又一棧】都是想走摩登格調路線罷
食物賣相和擺設都一絲不苟
這盤是《冷豔三拼》Appetizer Trio ($168)
最頂層係北京燻茶素鵝
中間係醬青瓜
底層係蘇州燻魚

難得兼顧到賣相和味道,最怕o的所謂 fusion 菜賣得貴貴但食之無味
呢三款都係我好鍾意o既小食啊



川北涼粉!嘩嘩嘩我至愛!
o係香港,好少食到做得好的
人人話紅磡有間小店做得好好
可惜位置比較吊腳,所以我仲未有機會去試
難得大集團出品,都冇將口味調到唔麻唔辣o既超大路味道
呢碟真係有麻有辣,辣度剛剛好,足夠吊起美味但又唔會搶晒鏡

川北拌涼粉 Chilled Bean Vermicelli in Spicy Sauce $68



蒜呢白肉,我諗左好耐想o係屋企試整,但尚未動手之物
呢o的濃油赤醬真係我和笨 B 爸爸最"飛佛"
不過要切到o的白肉咁薄,真係好考功夫

四川成都蒜泥白肉 Sliced Pork in Garlic & Chilli Sauce $78



阿里巴巴椒鹽羊小腿 Deep-fried Mutton Leg in Spiced Salt $108
有羊香味但不臊,比較大路



魚香蝦段蘿蔔糕 Braised Prawns in Shell with Hot Garlic Sauce & Turnip Cake in Casserole $158
真係唔講唔知呢鍋有蘿蔔糕,原來全墊在底
吸收上面o的味醬和蝦汁
超大隻的蝦啊 



魚湯桂魚片燴雲耳 Poached Sliced Mandarin Fish with Black Fungi in Fish Broth $138
用魚湯o黎浸熟o的魚片,好滑
千祈唔好浪費,記得飲埋o的湯



北京六必居炸醬麵 Noodles with Minced Pork & Shredded Cucumber $45
份量比較少啊。不過麵條彈牙,炸醬好惹味。



健康高纖炒紅米飯 Fried White & Brown Rice with Mushrooms $80
咦 ... 有 Mushrooms...?沒留意吃 ... 倒是吃掉不少琥珀合桃
紅米用來炒,效果不俗啊。



很喜歡這個甜品,桂花紅蘋果 Stuffed Purple Rice in Apple with Osmanthus Syrup $28



賣相西式,但內涵竟是紫米,桂花醬汁很香

有驚喜呢 



【又一棧】
地址:九龍塘又一城 LG1-29 號
電話:2180-8908
消費:午市每人約 $150,晚市每人約 $180





笨 B 媽媽生活記事

宣傳你的專頁

2012年5月28日 星期一

蹓 B 的日子

家裡沒傭人的我們
星期天的活動都很 standard 的
都係要做一堆家務、兼且出街補給物資
呢個時候,都係帶笨 C 去認識外界o既好機會

呢期成隻馬騮仔的笨 C
一出街就四圍走
多得餓底 Gigi 轉贈一條 bb 安全帶
用o黎「蹓 B」就最方便了



唔知其他 bb 係咪咁
笨 C 一直對書本都好有興趣
o係屋企,成日搶我地手中睇緊o既所有紙類製品如雜誌、書本、報紙、傳單 ... 
然後煞有介事咁一邊睇一邊講火星話
如果第時返學都對書本咁有興趣就好咯!

因為佢鍾意「睇書」,所以有時我地會帶佢去圖書館
佢一入到去就完全忘我,即刻 fing 開我隻手
然後自己衝去書架,好興奮咁摷書
摷完就放o係附近o既座椅度揭揭揭



我呢,就要追住佢尾做阿四
因為佢大小姐呢,o的書揭完兩揭,又要再返去書架再摷過
我就要即刻將o的書擺番o係原位
免得人地圖書館秩序大亂
(雖然我諗兒童圖書館o的書可能本來都係擺到亂晒 ... 因為太多小朋友了,好難控制) 



幾難先捉到佢乖乖坐o係度,「睇」左一陣 Mr.Men 系列o既公仔書
Mr.Men 呢 (即是 Mr.Happy, Mr. Clumsy, Mr. Funny 佢地呢),大家有冇童年回憶啊?
我細個時好鍾意佢地架!我覺得佢地個樣好得意呢 






br>

笨 B 媽媽生活記事

宣傳你的專頁

2012年5月24日 星期四

Miele 蒸爐:紅豆相思 (燉奶)

第一次用 Miele 蒸爐蒸水蛋時 (按此重溫)
發現水蛋表面有倒汗水
請教各位後
今次再挑戰一次先!
整番個甜品嘆下 ~

呢個甜品個名好靚,叫「紅豆相思」
其實係一個加了蜜紅豆的燉奶啦 ~

材料非常簡單,一眼睇晒
呢度係兩人份量

鮮奶 1 碗
蜜紅豆 半碗
雞蛋 1 隻
砂糖 2 湯匙



蜜紅豆呢,我本想偷懶去買現成罐裝的
但竟然周圍都買唔到囉 ... Jusco Living Plaza 都冇貨
唯有自己整
好簡單啫,用高速煲,15 分鐘攪掂
我順手煲紅豆沙,先撈起了一部分紅豆,其餘的繼續煲
一次過滿足兩個願望,哈哈!



做法亦極為簡單
打勻雞蛋,然後加糖加奶



重點係要過濾,咁燉奶才滑



在碗底放蜜紅豆
然後加入奶漿



用 100 度蒸 12 分鐘
較好時間,睇電視去也!
(備註:如果大家是用普通鑊蒸的話,請用中大火蒸 12 分鐘,緊記緊記要用筷子稍為托起鑊蓋,俾o的蒸氣走,否則會蒸到好老兼超多倒汗水的)



話咁快,蒸爐就叫了 (蒸好了)
為免有倒汗水,我用 9 秒 9 速度衝去開爐
今次應該只係有 0.1 秒誤差



老實講,表面係有一層薄薄o既水份的
咁我諗真係避免唔到
我覺得應該唔關個蒸爐事

比起用鑊蒸,係真係少好多水o既
(用鑊蒸,係多到我要用匙羮撇 ... )
遲o的畫幅圖解釋俾大家睇下    上返當初中 I.S.



最重要係,呢個燉奶,真係滑到好似豆腐花咁
有圖為證
可能係因為 Miele 個爐係純蒸氣,溫度可以完全掌握
唔似用鑊蒸,溫度較不平均
所以用蒸爐蒸蛋應該係最靚的呢 ~



同場加映,上次蒸飯太濕、三色椒又 overcook (按此重溫)
於是隔兩日又再照版煮碗
今次o的飯水量係   1:1.1  (米:水)
嘩嘩嘩蒸出o黎o的飯大成功!粒粒分明
笨 B 爸爸和奶奶都讚好好味呀



蒸魚,拿手小菜,永無失手
呢兩條比較薄,5 分鐘 very 吉



今次o的三色椒只蒸 2 分鐘
剛剛好!不失爽脆,正!



靜靜雞話俾大家知,本來之前對呢部爐嫌三嫌四的笨 B 爸爸
食左呢餐成功o既兩餸飯後
開始對部爐改觀了!
仲積極考慮緊多加利用
因為佢話覺得呢個蒸飯好味過電飯煲煲出o黎o既飯
(可能因為我地o個個係 cheap cheap 電飯煲 ...)
兼且佢唔鍾意電飯煲有塗層喎 ~~~

yeah yeah ~ 我又成功改變到屋企個死硬派了
我想望住鏡頭舉起 V 字手勢啊 呵呵呵呵呵






笨 B 媽媽生活記事

宣傳你的專頁

2012年5月22日 星期二

19個月的驚喜

不經不覺,笨 C 已經19個月差不多20個月了

雖然沒有像之前般,每個月寫下她的身高體重有甚麼不同

但我們還是很留意她的變化的

因為實在太多變化了

真難想像,不久之前她還是我懷裡蜷縮著甜睡的小BB

現在的笨 C,可說「膽大包天」

甚麼都想知、甚麼都想試
連高難度的樓梯都不斷去挑戰


我們做大人的,會擔心這樣擔心那樣
當然也會擔心在樓梯玩很危險
所以,一早已安裝了門欄,不讓笨
C 爬上樓梯

但笨 C 又點會甘於「蛋家雞見水」呢?
基本上,愈得不到的,她愈想嘗試

有時趁我們開了門欄到樓上

她明明在露台位置,也會九秒九颷到樓梯口

然後得意洋洋地爬上樓梯

真拿她沒法


陳師傅說,不用太過保護啦

我小時候的年代,根本沒有甚麼安全門欄

BB
們也是在祖屋的樓梯處上上落落的啦

我答,不是怕笨
C 上樓梯時危險
因為她是爬上去的,不是企起身行上去

基本上都很穩陣

只是見她爬到高處時怕怕,喊驚時碌落樓梯而已
~

後來發現,原來我的擔心是多餘的

BB
的學習能力真的超乎想像
一歲半的她們,竟然會自己「找方法」


一個月前的笨 C,在樓梯頂確是會驚驚

但最近竟發現她「研究」出落樓梯的方法

就是背著身子、慢慢一級一級地「爬」下去
看到這個轉變,覺得好神奇啊!

原來 BB 不是一味要大人教的 ~

我看到現在的 BB 個個都很精靈

想起以前自己小時候好像呆呆的

應該是因為營養比以前好的緣故吧?
也可能是外界刺激比以前多好多
~

看著笨 C 一天一天成長、每天學懂多一點

真是很有樂趣的一件事
很慶幸我有堅持經常為笨
C 拍照片、拍 video (雖然過相入電腦 + filing 真是很多工夫 …)
當我跟笨 B 爸爸攜手老去
當笨
C 亭亭玉立
這些片段,就是我們最寶貴的回憶

所以,我常常鼓勵身邊的朋友

一定要替小朋友多拍照、記錄每一個成長片段呢
~ 



 【同場加映】

小朋友的學習能力,總是超乎你的想像" 大家認唔認同呢? 

如果大家都已經錄好左小朋友嘅學習驚喜短片,就快
d
加惠氏金裝學習驚喜頻道(www.wyethnutrition.hk),上載小朋友嘅學習驚喜短片及其他資料,一齊分享喜悅啦! 成功分享更可以得到全港首推小朋友個人特別版卡片、上面有個 QR Code,掃一掃即播短片,好有趣架呢 ~



我都幫笨 C 參加左,大家喜歡的話都o LIKE 下喇 ~  

https://wyethnutrition.hk:443/wyethgold/default.aspx?sid=1a16cd7d-062e-4359-9732-6dae2d29bd88

  大家都可以欣賞一下主辦單位o既宣傳短片啊









笨 B 媽媽生活記事

宣傳你的專頁

Linkwithin

你可能對以下文章有興趣: