2012年3月27日 星期二

分享正能量

我是一個很容易開心的人
人地對我好少少,我已經覺得o個日係 lucky day
咁樣講,並非指我常遇到倒霉事
反而是我常遇到好人好事
所以我經常都覺得自己好 lucky
哈哈哈

你話我阿 Q 又好,簡單又好
我覺得做一個易氹的人
開心過做一個事事要求太高的人啦
(當然 ... 要做大事,就要凡事要求嚴謹了
所以我是不適合做女強人的)

近年,我進步了一點點
就是會把自己的快樂話番俾人聽
(以前我是很收藏的一個人)
希望把正能量散播
讓它不斷 loop 下去

哈 ... 說到這裡,其實我並不是做了甚麼驚天地泣鬼神的事
只是間中會花點時間寫番o的顧客意見書
當然,遇到唔好的事我也會照直寫
但遇到令人快樂的事,就算是小事
若時間許可,我都樂意花一點點時間
告訴那位讓我快樂的人知道
他/ 她令我快樂了
謝謝啊 ~



後記小事一樁:
今天跑到大埔超級城的顧客服務櫃檯
問那位小姐有沒有顧客意見書之類
很親切有禮的小姐,起初都有點驚弓之鳥
問我是否有甚麼需要協助,要不要找主管來幫幫我
我便笑說非也,我只是想讚一讚某洗手間的清潔姨姨
因為我已光顧那洗手間好幾次,次次都覺得好好
今天有點時間,想寫番份顧客意見書,向管理層讚揚一下那位姨姨

小姐聽後,即時笑容滿面
還問我想「落簿」或是寫在檯面那顧客意見冊裡
我很奇怪為何有這兩樣不同的東西?
小姐答曰「落簿」的話,管理層會每月兩次定期檢閱
還會跟進和致電回覆
而櫃檯那份顧客意見書,則是公開放在檯面
讓任何顧客翻閱的
我反正有空,就兩樣都做了 ~

後來回想,櫃檯小姐如臨大敵的表現
或多或少是反映了前來櫃檯查詢/ 投訴的人
應該比專程來讚揚好人好事的人少?
那或許有少少反映了,多年前劉華的優質服務廣告實在太深入民心
所以大家對顧客服務的期望都大大提高了
又或者,不少香港人都較內歛
就算開心都未必會四處講 ...
唔 ~ 希望我的小小行動
可以感染一下大家
如果遇上了好人好事
不妨花點時間告訴對方
你很高興啊

+++++

靜靜雞話俾大家知
我覺得唔知係咪心理影響,定係真係有「氣場」
成日覺得自己 lucky 的話,就真係會 lucky o的架
所以大家不妨將期望值降低o的,成日讚下自己 lucky
久而久之,你會發覺真係 lucky 左架
哇哈哈

 




我的 facebook 專頁,緊貼每天心情 + 芝麻綠豆大小事 ~


2012年3月26日 星期一

那些年,Amaroni's

上周六,跟好姊妹渣渣和糖糖吃飯
選了讀書時代最愛的 Amaroni's - Little Italy
在九龍塘又一城
闊別多年,環境冇變、食物冇變、連價錢都冇咩變
仲要一樣令我地咁滿足開心



讀書時代,零用錢不多
出街吃的多是快餐
像 Amaroni's 這種裝修華麗的西餐廳
我們不是經常去
頂多一年一次吧!
所以在回憶中,去 Amaroni's 吃飯總是令人期待的



笨 B 爸爸和笨 C 都有同行
環境太暗了,我唔識點樣 set 部相機至好
就得光線o黎,張相就鬆郁濛兼粗微粒了
我係 set 左 ISO 3200, 曝光補償 + 2.0
睇番當時光圈變左 f5.6



講番食物,我一向最鍾意 Amaroni's 餐前奉贈的香草包
蘸油醋汁吃,一流啊
讀書時代「吞吐量大」,我係會食好多好多
而餐廳又大方至極,任你添的
而家就心有餘而力不足了,一籃夠晒



笨 C 看著麵包籃,很有興趣的樣子
不過原來佢唔太鍾意o的香草味,所以淺嚐即止



Chopped Salad,非常新鮮爽脆,好開胃



每次必吃的 Rosemary Roast Chicken
正常版的已是全雞
加大版的是兩隻雞 (!!)
雞塊好厚肉,但很入味。不過咁厚當然有點鞋喇,但未至於柴,放心
整體來說是好味的



蒜蓉煎大蝦,好大隻,煎得很香口



呢個,經典咯 ... 有笨 C 個頭幾倍咁大
冇錯佢個名就係叫做「經典薄餅」
如果人唔夠多、或吞吐量唔夠大
千祈唔好企圖挑戰佢
我地五個大人,都食到剩了四分一,要打包帶走



本來還叫了白酒天使麵的
但食完燒雞和薄餅,已飽到有點暈暈地
即刻問侍應煮左未...好在未,所以可以取消柯打

下面呢個係麵包布丁,餐廳送的
因為 Amaroni's 有個傳統
如果在座有人生日 (訂檯時註明即可)
佢地就會送你一客甜品 (正常 size)
仲會成棚人 (冇錯!係成棚人!當時應該來了五人) 一齊過來圍著你張檯唱生日歌
好熱鬧架 ~



其實我以為係送 Tiramisu (我諗佢一期期唔同)
因為我地唔太欣賞厚重的 Bread Pudding
所以淺嚐即止
另外點了這個 Tiramisu
份量又係嚇親人的,五六人分享絕對沒問題
才 $85,真係自己買材料整都未必得



真懷念青葱歲月,敞開肚子狂吃,都不怕脂肪積聚
而家想吃胃納都容不下了

P.S. 開版提過價錢沒啥變
對啊真的還是很便宜
記得大學時代來,每人好像是百多元 (一百頭吧?$120 左右?)
今次吃,每人又係百多元!!!(今次係 $180 左右)
但吃得開心又暢快
這裡真是我們的歡樂天地呢 ~

我的 facebook 專頁,緊貼每天心情 + 芝麻綠豆大小事 ~


2012年3月22日 星期四

搽膏膏 & 聞臭腳

大家都說歲半的 bb,是好玩到不得了
因為佢地對一切都很好奇
又要學大人o既神情說話舉動
學o的唔學o的、說得蹩腳
令人忍俊不禁

當然,佢地都好鍾意搗亂啦 ...
笨 C 最近超喜歡幫自己搽潤膚膏 
上次竟然趁我唔覺
自己爬去床頭拿來玩
攪到成手都係 ... 



這支是用到尾聲的,把唧唧樽剪開了



我發現的時候,佢已經成手都係



整到成手都係,然後定左格望住
唔知笨 C 諗緊乜呢?



女仔o既語言天份似乎真是較高
笨 C 一歲前已經識叫嫲嫲、媽媽,而爸爸是最後剛過一歲才叫的 (令笨 B 爸爸好妒忌)
我們並沒有特別培訓,沒有上 playgroup
平日在家都是跟嫲嫲玩、睇下卡通 DVD 咁
笨 B 爸爸直頭會當佢大人,講完整大人話
我呢就會比較多疊字 (因為我對住大人我都成日講疊字 )

歲半的笨 C,近一兩月講多左好多字
會主動指住物件講「車車」、「花花」、「樹」(唔係樹樹,奇)、「魚」
也識得講「head」、「toe」(因為佢超鍾意 Head & Shoulders 呢首歌)
同埋佢好攪笑,聽歌時,有時會跟住唱 ... 每句最尾o個個字  
e.g. ABC song 裡的 "now I know my ABCs, next time won't you sing with me"
佢會靜待適當時機,然後大大聲嗌 "C" .... "me" ....   
一副自得其樂o既樣子
我地望住佢,都好自得其樂

今個月,佢最鍾意玩o既係「聞臭腳」
聞完之後會撥手,講「臭臭」
笑死我地呢




我的 facebook 專頁,緊貼每天心情 + 芝麻綠豆大小事 ~

2012年3月20日 星期二

海洋公園【香港老大街】率先睇

上次去海洋公園,好像是去【哈佬喂】的,但已是幾年前的事了
今天再去,是出席新景點【香港老大街】開幕式的邀請
估唔到幾年間海洋公園有咁大變化
大到 ... 我幾乎認唔到    (沒誇張 ... 連門口都改了要上一層 ...)




【香港老大街】在摩天輪附近
地方不算太大,但很有懷舊特色
好似去左民初街咁

今日可能是為了開幕式
特別多臨時演員,大家都非常投入呢!
引得我們哈哈笑




叮叮糖姐姐



樹下的講古佬



七情上面的鹹魚大叔





有幾個懷舊小食檔,有砵仔糕、麥芽糖夾餅、雞蛋仔、龍鬚糖等等





這個場景,像是入了拍戲的民初街咁 ~ 做得好逼真啊!



這種舊式戲院入口,我已不記得了 ... 只記得一定有個要入錢的磅!哈哈!



哈哈 ... 又遇上臨時演員了,個個都好認真,我以為拍緊戲 



連騎樓上的大姑都好入戲,一邊晾衫一邊跳舞 



路上巧遇死臭飛 ...   撩女仔?



仲有影緊相o既小龍大哥



【香港老大街】今日才第一次開放,只招待記者和嘉賓
明天就會正式對公眾開放

開幕式,當然會見到海洋公園主席盛智文先生
次次活動都扮鬼扮馬o既佢
大家都期待緊佢今次以甚麼造型出現
原來係人力車伕 ~ 哈哈哈哈哈真係無得彈啊!


在一片歌舞聲中,盛智文主席出場了,令現場氣氛推至高點




今日非常墟冚,連曾任權先生和林鄭月娥局長都來了,難怪這麼多記者呢





修哥和 Joe Junior 也有到場呢



謝婷婷



劉心悠



儀式完畢後,我們去逛紀念品店
這裡的紀念品都充滿香港懷舊特色
好吸引呢
特別是那個熱水壼型的筆袋和痰罐型的筆插,超攪笑!



【香港老大街】當然少不了兒時最喜歡玩的攤位遊戲
自從荔園關閉後,都沒有甚麼地方有得玩了
今日重遇,真係時光倒流三十年
不過我玩攤位遊戲好渣o既 ... 哈哈
但今日好好運,俾我贏左一個飛行棋型o既咕o臣呢



逛到倦了,試試這些懷舊特色小食啦!
全部都係香港最有特色o既街頭小食呢



另外,這裡有展出了香港最古老的兩架公交
這是五十年代的熱狗巴士
我只有在幼稚園時代,隱約在街上看見過 (那是七十年代末)
自己有否搭過,真係唔記得了





至於電車,因為我細個住港島區
所以係我地經常乘搭o既交通工具
自己記憶中最平好似搭過係一毫子 (小童價)
唔知大家仲記唔記得呢?



木製長椅,好懷念呢



上去上層的樓梯,好斜呢



我記得這個上層呀!那張椅,如果著短褲的話,坐完大脾會有一格格架
嘩這些都是已遺忘的珍貴回憶呢 ~



最後,謝謝大會送的紀念品
場內也有一家仿照幾十年前老店的奇華餅家
有幾款餅是為【香港老大街】特別設計的
只有在這裡售賣
就像這款茶味曲奇呢



因為相片太多了,所以我在 facebook 那邊開了個相簿
大家可到相簿瀏覽其他相片呢:https://www.facebook.com/media/set/?set=a.370627809637790.95522.120595634641010&type=1

謝謝大會的邀請,讓我好好回味了一下舊香港的風味
有好些景象,已是我非常年幼時的回憶
今日就一幕幕 recall 出來了~
這裡非常適合一家大小來逛逛呢
老人家又可以回味當年
小朋友又有得玩有得食

可惜今天不夠時間也不夠腳骨力

沒好好的遊園一番
我見到新建了好大好靚o既水族館、熊貓館
還有登山鐵路

希望下次有機會帶笨 C 入來,好好的玩一天吧 

我的 facebook 專頁,緊貼每天心情 + 芝麻綠豆大小事 ~



















Linkwithin

你可能對以下文章有興趣: