2011年12月15日 星期四

地殼移動事件 + 藍色企鵝笨 C

話說我得到一家亞太區的公關公司 Nuffnang 邀請
出席他們在吉隆坡舉行的2011亞太區博客大獎頒獎典禮
但大家唔駛讚我叻,因為我個 blog 雖然"曾經"在最後遴選中出現過在評審眼前
但最終敗給好勁o既新加坡馬來西亞菲律賓澳洲 bloggers
入唔到親子組最後五強,不能為港爭光了

但可能 Nuffnang 見我生性八卦,所以照樣邀請我出席觀禮
順道認識下其他地區o既 bloggers,交流一番
明天便要出發了,心情緊張嗎?
emmmm ... 其實不緊張
我雖然現役村姑一名,但其實我都有見過少少世面o既   
但反而有點擔心,我點介紹自己好
因為觀乎一眾入圍 bloggers,好多都在自己的界別獨當一面 (e.g. 攝影/ 旅遊/ 飲食/ 時事評論)
真係當自己係一個專欄咁寫,寫得好專業好深入
睇番自己個 blog,立立雜雜咩都有,仲要係日常生活瑣碎事
柴米油鹽醬醋茶有咩特價都會攞出來講架喎
(即刻心諗:好在冇入圍,否則人比人比死人要搵窿捐) 
哇哈哈哈哈哈哈

我諗我唯有講
emmmm ... 其實我寫 blog 真係分享日常大小事
不求高深,只求開心
因為好多睇開我 blog o既朋友都真係當我朋友咁,日日o黎八下我發生左咩事
可能睇開有感情,所以咪儲落左o個過千萬次點擊率囉
令大會評審"曾經以為" 我係一個好勁o既 blogger,真係有點慚愧
哇哈哈哈哈哈哈

如果夾硬要講,我可以講番我開 blog o既典故o既
就係想記錄低小屋仔o既建造過程
因為身為香港城市人,真係無咩幾可有咁o既機會
所以真係一段美好o既回憶o黎架
想當年呢個主題都呃左唔少觀眾入o黎收睇
講開又講原來係 2006 o既事了,5 年啦!咁就 5 年啦

入左伙四年,其實都住得好愉快
因為小屋仔冇咩新事,我地又未有時間去持續發展佢
(雖然我極為非常想整靚間屋!!!!! 可惜暫時真係冇呢個精力和時間) 
所以而家都好少寫有關小屋仔
但今次有野寫了,仲好靈異
唔知住村屋o既朋友,有冇曾經有咁o既經歷?
我奶奶話嚇左佢一大跳喎


話說前幾日,奶奶在天台收衫
突然聽到三樓主人房有怪聲傳出
係好大聲o個種,似係有人搬重野
笨 C 在隔離房訓緊晏覺
奶奶心諗係咪有賊入屋?佢一個女人仔,點抵抗?唔知點算
有一秒念頭閃過,想衝入房抱起個孫然後速逃
(我問佢:唔係入廚房擸把菜刀自衛先咩?)

不過奶奶最終都鼓起勇氣,踮起腳尖靜靜落番三樓
佢話佢仲特登先開燈,等個「賊」知道屋內有人,速逃又好匿埋又好啦
總之俾佢有少少時間入房抱走個孫先

奶奶屏息靜氣,悄悄地走落三樓
心諗會唔會有人衝出o黎?冇喎
主人房漆黑一片,又無動靜
鼓起勇氣入房,開燈
然後見到 ............
..........................
..........................
..........................
..........................
..........................

嘩蟹 !!!!!!! 地殼移動事件 !!!!!!!
主人房o的地磚,無端端拱左起o黎
仲不斷有o的 cracking o既聲音,好似要裂開咁 !!!!!!!



呢幾張相,係我夜晚返到屋企
奶奶繪形繪聲地同我講左之後,我入房影的
老實講,我都 O 晒咀,真係第一次見到咁情況



見到我放在地面的間尺嗎?可顯示地磚拱起的幅度
都咪話唔犀利



太驚訝了,將之列為 2011 壓軸靈異事件,post 上 facebook 公告友人
但竟發現村姑界朋友們,都聽過/ 見過咁o既情景
多數係西斜情況嚴重o既屋先會發生
因為西斜實在太太太狠毒,冷縮熱脹之下,連磚都撬起了

其實小屋仔的手工已經很不錯
可能師傅都沒有估計到西斜的嚴重性,沒有留足夠的磚罅供冷縮熱脹用
(因為正常不會把磚鋪得很疏落的罷)

唉,呢個十大靈異事件,又攪到我地要破財了
唔知救唔救得番o的磚呢 (而家睇係冇裂開的)
磚錢事小,買唔到同款磚配番就好頭痕

+++++

上星期好凍,笨 C 著左件藍色羽絨背心
剛放手自己走的她依然好喜歡四圍騰
所以成隻藍色企鵝仔咁,超攪笑





笨 C 走得太快了,我的相機追唔切
又未識用快門優先功能,所以o的相變左鬆郁濛 



呢隻傻企鵝,唔知做咩覺得攞住個吉樽一邊啜一邊走好好玩



為食的企鵝



我的 facebook 專頁,緊貼每天心情 + 芝麻綠豆大小事 ~

16 則留言:

  1. 哈哈, 笨 c 真係好得意

    回覆刪除
  2. 笨C拎住嗰樽扮電話行好攪笑呀^0^妳快d整番間房嗰地呀, 如果唔係好容易"cake"到笨c架

    回覆刪除
  3. 見到個小朋友由bb到自己懂得自己食野, 就有種莫明的感動~

    回覆刪除
  4. 住村屋係零舍多古怪野, D 磚鋪得唔好就會, 唔太關西斜事, 我樓上 2/F 咪又係咁! 你要快 D 整番好佢, 唔係範圍會越黎越大, 而且 CAKE 到都好危險.......
    你住二三樓加天台已經好好多, 我住地下, 試過化糞池爆左, 已經搵人番黎抽完, 點知唔夠兩個月, 發現沖水又開始慢, 已經好奇怪啦! 點知樓上每次用完厠所, 我個馬桶都會有野湧上黎!!! 就算蓋上馬桶蓋, 都勁到個蓋會彈起! 真係明乎其實 "爆屎"!!!!!!!! 整到地下又有, 浴缸又係咁, 真係 "尼 HAIR" 到我都唔知點講!
    再通知上次黎抽便便果班人黎, 原來佢話我地個化糞池 D 喉因為長年累月有 D 油倒落去, 形成 D 喉位積左一層好似發泡膠咁嘅油, 我親眼見証果層類似愛泡膠狀嘅油已經 "擎" 到有成 2 寸厚, 仲 "mon" 住成條喉嘅內部, that's why d 便便去唔到, 佢地要特別去抽呢層野, 係唔 include 係抽便便範圍內, 所以上次抽便便係冇做到......
    呢件事令到我一定一定唔會倒任何廚餘去馬桶!!!!!!

    回覆刪除
  5. 下次叫你奶奶小心啲﹗我老爺屋企都試過,啲磚仲爆開咗﹗你地依家都要小心啲,未整之前最好攞啲地墊COVER佢先,如果佢爆開飛出嚟,都唔會介親﹗

    回覆刪除
  6. 笨C 對襪仔好型喎 ^o^

    回覆刪除
  7. B媽啊,你明天係未會在機場出現?你會什麼時候出現呢?我未見過你,想係機場撞下你,唔知得唔得呢呵^^

    回覆刪除
  8. 咁二樓天花有無出現裂痕呀?真係估到冷縮熱漲會咁利害…

    回覆刪除
  9. 有年過年,返左大陸外婆屋企,個晚好凍,當成家人係廳睇電視之際,迫力拍勒.....個地下就係我地面前,由遠到近咁裂過嚟,個畫面好震撼,好似睇緊啲災難片,地震咁......

    回覆刪除
  10. 好谦厚的笨妈,我系你头号粉丝啊。虽然唔入围,你系我心目中已经是冠军!(真心的)

    回覆刪除
  11. Blogger媽媽你好!原訂於明天(12月18日)星期日在灣仔小童群益會舉行之J&J blogger gathering 將改址於同為港島區的「灣仔港灣道18號中環廣場35樓」,不便之處,敬請見諒!

    回覆刪除
  12. 有聽過爆地磚事件, 佢係住三樓, 因二樓掉空所以成日爆地磚, 後來重鋪過兩次之後就無事.

    回覆刪除
  13. 天氣乾燥, 我地住樓都會有呢d"靈異事件". 我屋企d木地板都叫到架架聲. 不過就只係裂開唔係谷起. 另外屋同窗台都會出一大條裂紋. 不過天氣無咁乾就無野啦. 你個case會唔會潮濕番又無事架?

    回覆刪除
  14. 笨b媽媽你好呀,
    我朋友現住錦田, 是朋友租給他的, 他現在想買樓, 心儀也是錦上路一帶, 請問可否介紹k 先生, 預約睇樓? 謝謝!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: