2011年11月30日 星期三

表妹仔的滿月酒

多謝大家留言提示,原來海運大廈o個邊都有好正o既育嬰室
我上次錯過了,下次要識得去先得

前幾日去旺角,其實係去飲宴,笨 C 做表姐了
笨 C 對表妹仔很有興趣喔



因為現場不是很多小朋友,所以其餘時間都係自己玩手指



突然俾佢發現到o的新野



自己o係度傻笑



呵 ~ 原來天花有塊鏡啊!笨 C 見到自己,好開心



然後又攞我個電話去玩
扮有來電

來電:喂 ~ 小姐你好呀 ~ 請問你係咪 9xxxxxxx o既機主?
笨 C:係呀,有乜關照?



來電:哦 ~ 係咁o既 ~ 小姐你貴為我地銀行o既特選客戶,我地準備左十萬九千七免息貸款俾你呀!



笨 C:免息咁筍?
(媽媽:笨 C,我想提提你 ... 你將電話反轉左來用了喔 ...)



來電:哦 ~ 係呀!真係好抵借架!每一萬蚊每個月俾番百零二百蚊手續費就得架啦



笨 C:車 ~ !!! 咁咪即係要利息!你唔好呃我讀書少唔識字呀 ~~~ 阿媽教落邊有咁大隻曱甴隨街跳架
來電:............................
(媽媽:笨 C ... o個隻係"蛤乸" 唔係 "曱甴" 喎 ...)


我的 facebook 專頁,緊貼每天心情 + 芝麻綠豆大小事 ~


2011年11月28日 星期一

旺角遊

做女時逛商場,係揀邊個商場o的服裝店多鞋店多
做左人地老婆,去o既商場最好有家品睇有埋超市更妙
做埋人地阿媽,而家去邊?首選就梗係交通便利、鐵路可達 (一入站開始已可推車仔) 同埋育嬰設施齊全

所以,以前我好日都唔逛o既旺角新世紀廣場,最近已逛了幾次!

上個周末,因為要去飲笨 C 表妹o既滿月酒,所以又去左旺角啦



笨 C 最近都行得好穩陣了,但信心還是有點點不足
所以要拖住一隻手
呀,呢條桃紅色o既裙仔又係陳師奶車架



笨 C 比較少出城,有o的大鄉里   咩都要指一餐



仲好鬼開心添



你咁鍾意行街,媽咪得閒多o的帶你出o黎威啦



頭先講到,商場o既育嬰設施,對於我地呢o的湊住bb o黎講o既父母好重要
笨 C 食完奶冇耐就疴臭臭啦!即刻飛奔入育嬰室 



呢間育嬰室相當寬敞啊,水龍頭唔駛調較,出來的就是暖水了,細心



有暖奶器啊,不過我用唔著



竟然仲有哺乳間,好難得!好多商場o既育嬰間都冇架



今次其實係第一次幫襯新世紀廣場裡的育嬰室
但滿意度 100 分,大大加強了我下次再來逛街的意欲
話時話,海運大廈係咪冇育嬰室?
o個次去完 ToysRus,笨 C 食完奶又係疴臭臭
但搵唔到有育嬰室,只搵到一間內設摺起左換片格o既傷殘人士廁所一個
水龍頭只係得凍水 (!!) 同埋始終係廁所,始終有點核突
emmmmmmm ... 真係感覺唔太好囉!如非必要都唔想去


同場加映,呢兩個禮拜在瘋狂尋找的 Combi 4 學習杯
終於有貨了
一個杯仔 $129,即時反應係覺得幾貴下
不過返到屋企笨 C 又真係好鍾意,揸到唔肯放手喎!
哎吔我早o的知就好啦!咁就唔駛o徙左之前買o個三隻杯啦 (雖然較便宜但都五六十蚊個架 )





我的 facebook 專頁,緊貼每天心情 + 芝麻綠豆大小事 ~





2011年11月25日 星期五

媲美鵝肝的金鼓魚肝

唔識我o既朋友,可能以為我煮野食好叻
靜靜雞話你地知,我經常俾人恥笑大麥韭菜都分不清的
(邊個咁衰恥笑我?... 我屋企仲有邊個丫 )


我認架,我唔知魚肝係食得o既,我淨係知魚肝油係飲得o既
(事實上唔係所有魚的魚肝都可以食,有o的有毒的 )


原來好味o既魚肝,o個種甘香程度係同鵝肝有得揮


如果大家有機會o係街市見到呢種「金鼓」魚,一定要買o黎試下
最近唔知係咪盛產,所以價錢便宜不少
淡季時要逐兩 (tael) 計,每兩七蚊,一條圖中大小的,動輒便五六十了
但最近常見一份份的賣,一份兩條才五六十!



重點重點,一定要 mark 低
因為好多人唔識食
你唔出聲,魚販會私下留下副魚肝架
所以買金鼓時,記住搭句「唔該留番副膶俾我丫!」
即刻會引來魚販賞識的目光,仲要讚你識食!

魚肝呢,可以蒸魚時放入魚肚一齊蒸的
蒸金鼓呢,最正係用果皮蒸,蒸熟後淋熟油
果皮o既香味會吊出金鼓o既豐腴鮮香
喜歡食魚o既人會為之瘋魔



今次副魚肝爭少少,仲有少少血絲,應該蒸多一分鐘
睇落係咪有o的似鵝肝呢?
嗒落咀o個下,真係想擠起感動的星星眼



同場加映,金銀蒜粉絲蒸扇貝
粉絲索晒o的汁,極品



炒豆角,用左蔡瀾o既鹹魚醬炒
好爽脆!不過鹹魚醬其實唔太鹹魚味。賣六七十一樽真是貴了一點喔。
另一選擇係用老干媽o既脆油辣椒炒。街市凍肉店 (施培記、佳寶之類) 有售,十多元一樽
非常勁惹味,真有四川麻辣風味,值得推介



路人甲笨 C
最近喜歡拿著奶咀啜
但明顯上,咁啜係啜唔到野的
我想買隻 Combi 4 俾佢
但竟然全線斷貨,有冇咁好賣?!!



呢個妹頭好鍾意食橙,成日攞住個橙同你講 "mum mum"
即是叫你切俾佢食呀



但有時佢又會將o的橙四圍碌,攪到我成日要o係梳化底撈番o的橙出o黎啊



我的 facebook 專頁,緊貼每天心情 + 芝麻綠豆大小事 ~


2011年11月22日 星期二

笨C拉筋

要笨 C 企定定影相真係好難
唯有o係佢睇電視時影佢啦

最近頭髮終於長出來了,避過剃頭一劫 (笨 B 爸爸成日話要剃光佢個頭!) 



真係睇到入晒神咁喎



其實我冇裝到 NOW 的,呢隻係 Disney Junior 寄給我的 VCD,是 Disney Junior 頻道節目的 sampler
一向都抗拒迪士尼,係因為覺得佢地好商品化
但不得不讚下佢地o的教學性卡通又真係做得幾好
內容吸引又益智,難怪好多家長都會俾小朋友睇

村姑界朋友們,如果想裝 NOW,點裝呢?(sorry 我好背,我以為要裝隻鑊 ... 其實駛唔駛架?)



睇睇下電視,佢又走去望部 iPad (其實 idle 緊,冇畫面的)
睇下條褲丫,又係陳師奶搵o的布頭布尾拼湊車出o黎的,係咪好型



車得大左少少,所以踩左腳,要幫佢摺一摺先得
最近終於學識多少少操控 NEX-5 o既技巧 (其實都係一知半解中)
近距離影o的腳趾好得意啊



影影下,笨 C 無啦啦o係度拉筋!真係俾佢笑死 ...
到底佢o係邊度學番o黎架???





我的 facebook 專頁,緊貼每天心情 + 芝麻綠豆大小事 ~

2011年11月20日 星期日

村姑飯局

好多朋友問我近年係咪好少煮野食,點解成日都唔見我 post 新煮意上 blog 了
其實唔係,我地一個星期至少有五晚o係屋企食o既
不過家常便飯o黎o黎去去蒸魚蒸排骨炒菜
要寫o既都寫過晒,冇理由 repeat and repeat 吧

好難得今日約到村姑街坊們食個便飯,主題係大家最喜歡的海鮮
(大家都沒有對海鮮敏感,太感動鳥)
一人負責一o的,有冷有熱
因為在我家舉行,主場的我們就負責熟食部分吧

今早跟笨 B 爸爸去街市,見到好肥美o既象拔蚌仔
同益街市始終抵過大橋街市,呢度 $48/斤,大橋要 $58/斤
買了 10 隻,共 $100



本來想買條魚、又想整砂鍋雲吞雞的
但巧遇海花螺,就改變主意了
好勁勁勁大隻的海花螺,一隻成四五斤重!買了一隻 $200



檔主幫我地去左殼,返屋企再清洗處理
呢部分遲o的再開個 blog 寫 (哈哈哈我終於有新題材可寫了!)
大家留意下右上角,原來海花螺的血係藍色的!blue blood 啊



今日的備料和下廚功夫,都係由笨 B 爸爸主理
事關佢煮餸係叻過我的
呢樣我承認架,所以逢親有人讚我煮野食叻,我都會答笨 B 爸爸叻過我 (事實上我真係唔叻)



好 ~ 開餐了
超鮮美的淮山芡實嘉美雞海花螺湯!街坊們大讚有燉湯風味



呢o的合桃飽,係其中一位街坊小魚兒親手做的
可惜要留番o的 quota 食海鮮,否則我一定狂吃



街坊 sasa 負責買凍海鮮



有松葉蟹、翡翠螺、日式甜蝦刺身、泰式虎蝦刺身



泰式虎蝦刺身,配合我秘製o既泰式青檸汁,食到大家 lam lam 脷



今次的翡翠螺好鮮甜 (唔知同季節是否有關,有時買到的冇咩味)



日式甜蝦刺身唔夠甜,有些失望



呢支係班主盛讚的白酒,食完海鮮嗒一口,果香味躍然而出,超 ~ 正 ~ !!!!



食完冷盤,開飯了 ~ 這碟是湯料,好好味!



金銀蒜粉絲蒸象拔蚌仔



好甜呀呀呀



咁大隻海花螺,大部分拿了去煲湯,小部分切片炒蒜心了



笨 B 爸爸出手,炒得剛好,爽脆爽脆的



最後食埋松葉蟹的蟹身,原來都勁多肉
大感動



我地玩 AA 制,可以買多o的好料
今晚呢餐每人才 $200,但可以食到好好好好味o既野了

喜歡小型飯局,不會冷落了參與者,主場又不會太辛苦
一班小村姑聚埋就話題不斷,講下點改善間屋、點砌個天台
不知不覺又過了幾個鐘
真係好愉快喔 ~



我的 facebook 專頁,緊貼每天心情 + 芝麻綠豆大小事 ~

 



Linkwithin

你可能對以下文章有興趣: