2011年10月12日 星期三

幸福兒童

笨 C 踏入一歲的最近,好像變了一隻小魔怪
非常地扭計,非常地扭抱,仲成日大發脾氣
但健康院o既姑娘話係正常架喎 ... 佢話一歲 bb 係咁 ><
因為佢地開始發展情感表達o既能力,但又唔識控制,所以經過會"過火"了

呢期笨 C 真係好扭抱,一放低就發脾氣
但成日抱住,對手就做唔到其他野
咁笨 C 又鍾意大人揹住佢o係背脊的
所以嫲嫲就買左呢條揹帶啦 ~


哇 ~ 哈哈 ~ 可能大家細個時,都曾經用過呢條揹帶
個設計簡直係百年經典,歷久常新
(估唔到而家仲有得賣呢 ~ 仲要個設計完全冇變過!)
係嫲嫲尋找左好耐先買到的 ~


條揹帶上面繡著「幸福兒童」
雖然 old school,但又好切合現實喎
而家o的小朋友,個個都幸福到爆
衣食住行樣樣不缺,耍樂應酬隨時仲多過大人
有時我都幾羨慕佢地
但有時我又戥佢地辛苦
真矛盾 ~ 



我那一代的童年,相對來講真係簡單好多
物質不多,玩具、零食都很珍貴
可能要生日或考試拿到高分先會得到
但反而令我們多了份從盼望、努力、擁有過程中的歡樂

最近聽返一首很舊很舊的歌,羅大佑的「童年」
真是每字每句都很寫實,就是我那一個年代的童年啊!
一邊聽,一邊好像回到自己的小時候
好懷念呢
我想,到了笨 C 長大後,她或許沒有這份共鳴感了
至少老師已不用粉筆啦 ... 哈哈





我的 facebook 專頁,緊貼每天心情 + 芝麻綠豆大小事 ~

21 則留言:

  1. 小心唔好成日噤用呢隻揹帶,聞說BB對腳會變O形腿的

    回覆刪除
  2. 而家呢 d 舊揹帶好難買架! 仲要係扭繩款真係勁呀!! 我啊婆係大陸買果條都已經變左做扣, 冇再用扭繩喇! 你地都搵到真係好勁呀!!

    回覆刪除
  3. 你家的窗是否安裝了隔蚊網, 我家育有一各2歲半小孩, 請問會否不透風? 及請報價給我知可以嗎? 謝謝!

    回覆刪除
  4. Long time no see! antie, two is terrible and three is horrible..........

    回覆刪除
  5. 我家媽媽又係用呢條"蟹爪" 咩帶咩我家小惡霸, 係隔離屋個婆婆借比佢, 每次睇見笨c, 就好似我家侄女一樣....因為佢地只係差個幾禮拜..所以每次都會由心笑出黎....^^

    回覆刪除
  6. 好同意笨B媽媽你呀 , 唔知係咪我哋嗰代D人易教定乖呢 , 依家D90後好多都好無禮貌咖 , 又着重物質主義 , 成日見到佢哋一身有品牌嘅服飾 , 手上一定拿着 iphone (仲時時轉款) , 真係想知佢哋何來有那麼多錢呢?以前我哋想買部walkman都不知要儲幾耐錢才「擁有」呀 , 仲要兄妹share添呀!物價膨漲對後生嘅媽似無乜影响 , 佢哋捨得洗錢過我們 !!
    BTW, 今日係笨B爸爸嘅生日呀 , (我記得係因為我都係同日生日嘛 haha ! ) Happy Birthday to 笨B爸爸 , 明年笨C會唱生日歌俾佢聽 lu,
    P.S. 笨B爸爸係幾年出世咖 , 我係1970 年咖 , 佢細過我嗎

    回覆刪除
  7. 可唔可以問吓笨C嫲嫲喺邊度買到呢﹖下次返去買條返來都好喎﹗好鍾意笨C個頭像,好得意﹗一歲小朋友係咁架喇﹗仲有有時佢地出大牙仲忟呀﹗好好享受呢個「小魔怪」期啦﹗人大咗,就連扭計嘅自由都無架喇﹗

    回覆刪除
  8. 苯c媽媽,想請問你點樣氹苯c瞓覺嘅呢?係咪要抱/揹住瞓呢?
    我家bb而家6個月大,仲係要人又抱又拍先瞓到,仲要好醒瞓,醒咗又唔識自己瞓番。健康院d人話而家可以訓練佢地自己入睡,但我地試過,佢喊到拆天,喊到成身汗,成9個字都係咁喊,真係唔知可以點做好…所以想請教下你。
    thx!

    回覆刪除
  9. Wow, Grandmum really loves 笨 C !

    回覆刪除
  10. 係咪出牙仔發脾氣呀???

    回覆刪除
  11. 你好~唔知點解我覺得你BB同我BB有DD似樣~我媽都係用呢隻"蟹爪",做野時方便D~

    回覆刪除
  12. 唔知你有無睇我上個留言寫 happy birthday to 笨B爸爸呢 ? 依家新版blog 留言好奇怪唔係一次過出晒 , 後面有個+ 字符號我諗笨B媽媽你應該未睇晒我之前個留言呀 , 個 + 字符號後仲有留言咖 , hehe , 因為好奇你未答我 , 再問過先 : 咁究竟笨B爸爸係唔係同我一樣都係1970年出世呢? hehe 同年同多同日嗎 hehe? waiting......

    回覆刪除
  13. 虎女係咁上下gar 喇,1歲已經開始難攪,terrible two 妳仲煩,妳最好開始俾個規律佢,唔好俾佢慣咗凡事一扭計就會攪得掂,good luck!

    回覆刪除
  14. 尤得笨c扭下啦. 抱慣左甩唔到身呀~

    回覆刪除
  15. 一歲bb一唔like就拗腰..踢腳..扔野..發皮4, 大喊, 扭抱.....哈哈..我直頭有感我阿女好似變壞左咁呀...

    回覆刪除
  16. 系呀, 細個時有d野5系成日都得到, 得到o既時候真系好開心, 而家隨時都可以買到, 雖然無左果陣時o既開心, 但就變成左補償....好似話比自己聽系補償比自已咁樣~

    回覆刪除
  17. 呢款咩帶真係好經典, 幾十年不變

    回覆刪除
  18. 各位:奶奶幫我問左了,佢買o個檔係青衣長發商場街市地下 40-41 號檔 (雅紅服裝) 電話:2449-9769 呢檔賣九十幾蚊。奶奶話你地去時唔好即刻去呢檔,可以在附近的檔問問先,因為佢上次問過有一檔只是七十幾蚊,但剛好沒貨要遲o的先有。奶奶因為唔想等,所以幫襯左九十幾蚊o個檔。

    回覆刪除
  19. 聽說我細個係唔俾抱, 應該係一歲時, 懂走路的時候. 仲要自己坐一個位, 唔係就扭計大喊..
    我開始懷疑自己係唔係自閉兒童, 到而家大個都同人唔太親密, 又鍾意自閉..

    回覆刪除
  20. 宜家都冇人玩萬花筒啦

    回覆刪除
  21. 嘩~ 而家仲有得賣呢款啊~~ 搞到我有D衝動想去買返條!! XDDD

    我諗呢款揹帶仲有一個用途, 就係可以COOL住BB係有椅背的櫈上面, 方便出街食飯時冇/唔坐BB櫈, 大人都可以食到野~ 用法類似TOTSEAT~ 當然, TOTSEAT好用D, 我而家出街一定帶住佢!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: