2011年9月29日 星期四

布尿片 + Fitti 褲仔試著報告

之前咪提過俾笨 C 試著環保尿褲o既 (按此重溫)
有 blog 友都留言問我著成點
我覺得還可以吧,但其實我又唔會特別去推薦大家改用布片
雖則我覺得在生活中可以環保一點是好
不過大家知道我係一個超實際型人士
如果我覺得對大部分人來講,實用性唔強的話
就不要大肆吹噓,免得大家買一大堆布片返屋企又唔用仲o徙啊



嗱,我覺得適合用布片o既人要有這些條件
(1) 有充裕時間可以密密換片 (因為布片吸水量不多,1-2 小時便要換一次)
(2) 有戶外晾衣位置 (因為一天下來用的布片量不少,洗完要速晾速乾,否則要買 n 咁多條來備用)

以下是使用布片時的一些建議
(1) 最好在 bb 的大便已有規律時開始使用,減少因為屙了大便在布片上的狼狽情況 (因為黏了便便很難洗,又要用很多的水)
(2) 可以每天開一桶水,如只是沾濕了小便,就把換下來的便便丟進桶裡浸,可以儲幾條才洗一次,慳時間慳水。當然,若有迷你洗衣機的話會便利許多
(3) 傳統紗布實在太薄,索唔到好多尿,好易透底。就算新式的布尿墊,大 bb 的尿量多,才能勉強應付
(4) 每次換片最好幫 bb 洗屁屁或用濕綿花抹,而不是用又厚又柔軟但即棄那種 bb 濕紙巾 ... 否則想環保反不環保,因為一天下來換很多次片,每次也使用濕紙巾,唔環保程度極高

哈哈 ~ 睇完以上,我諗不少躍躍欲試的媽媽們熱情應該冷卻了不少罷 ...
但無疑,用布片確實有它的好處
如長期適當使用,真係可以做到環保o既 ~
而且對容易患尿疹o既 bb 有好處 (因為要密密換片,減少"醃住"的機會)
另外 bb 將來又容易o的戒片云云 ~
不過因為笨 C 無尿疹煩惱、又未到戒片期
所以呢兩項優點未能親身驗證 ~

但都係o個句,我係超級實際型人士
所以我都唔係次次俾笨 C 著布片
訓覺、出街、落雨天和腸胃不適o既情況下
我都會俾佢著番紙尿片或者學習褲

不過最近o的尿片真係貴到飛起,真係飛得起o個隻
每次換片都好肉赤
所以我都研究緊有咩牌子o既片又平又好用 (大家如有好野請介紹!)

最近見 Fitti 新出左學習褲,特價 $29.9 有成 26 條 (中碼)
咁抵就買o黎試下



C 係苗條型 bb,而家大概 8.5kg,著 M 碼剛好
呢個橡筋褲頭好似幾舒服,好柔軟唔會箍得好緊




側邊位,有好闊
o既彈性褲邊
感覺有
o的似我生完著o個條網褲,哈哈


其實 Fitti 呢隻褲邊都設計得相當唔錯

脾位包得好貼但又唔係好緊好箍o個隻

唔知係咪因為咁o岩呢個 cutting o岩晒笨 C 身型



之前買過 H 牌那款,佢成日攪個褲頭



唔知係咪箍得佢唔舒服



定係個魔術貼攪到佢有o的敏感



Fitti 呢款冇魔術貼,就冇左呢個問題




不過有個相當大o既問題,就係好少地方有得賣
超市冇、萬寧冇、係某o的藥房先有
(要睇番佢地 facebook 個藥房 list ==> 按此觀看)
我之前睇,元朗竟然係得兩間囉
不過睇才睇過多番o的啦 ~ 希望遲o的再多o的啦

話時話我試完之後先發現原來 Fitti 個 facebook 有得攞試用裝 ...
如果你地未買又想試,可以去登記啦 ~
同埋我見到有個 bb 攝影比賽
贏左有一年免費褲仔架 ~
http://www.facebook.com/pages/Fitti-HK/102663286502536

我的 facebook 專頁,緊貼每天心情 + 芝麻綠豆大小事 ~


2011年9月26日 星期一

笨 C 如何學識坐馬桶

最近睇到一個奶粉廣告,個小朋友成日o係度講 "便便"
哈 ~ 證明 "便便" 呢個話題o係父母界幾 hit

講開便便,有o的朋友知道笨 C 而家已經識得在馬桶便便
都問我點樣 train 的
等我簡單地介紹下啦

記得第一次幫笨 C 換 "屎片" (真係有"屎"的片)
都真係幾難忘
因為我一向都好怕屎屎尿尿,亦好怕去公廁
所以要咁近距離同o的便便玩遊戲,真係唔講得笑
不過我覺得換"屎片"都唔係戲肉,因為換左出o黎就即丟架啦
但條片包唔晒、肚瀉、爆到成身都係時
真係攪到你一手都係 ... 仲要搓洗返o的被屎屎沾污o既衫
咁先係最精彩部分 ... 哇哈哈哈哈

以下呢張相係 笨 C 三個月大
嫲嫲已開始訓練佢去 ng ng 了
方法比較 primitive,純粹抱住笨 C,然後一邊 "ng ~ ng ~ ng ~"
ng 到笨 C 有便意,開到大或小都好
總之等佢知道 "ng ~ ng" 呢個發音等於去廁所



呢個訓練毋須任何工具,但非常考耐性
因為最初 bb 係唔知你發生咩事的
但你要持之以恆日日咁 ng (真係要多謝嫲嫲咁有耐性!)
每個 bb 接受能力不同
大概兩星期後,笨 C 終於在 100 日大那天 ng 左第一篤金出來慶祝



一直以來,嫲嫲都是用雙手"逗"住笨 C 來 ng 佢的
但這個動作太費勁了
所以某一天,嫲嫲不在家時 (即是輪到我做 training 時)
我就帶左笨 C 去坐馬桶
當然我要雙手扶住佢喇
哈,發現佢咁都屙到喎 ~

如是者,又過左幾個月,笨 C 都好習慣坐馬桶了

每次我地見佢 "ng~ng" 聲,表情又有o的"谷屎" 時

就會嗱嗱臨抱佢入廁所,除左條尿片坐馬桶

我覺得坐馬桶仲好過買 bb 便盆 (那些好得意公仔造型呢)
連朋友話要送俾我都唔要 (我真係好實際型 )
因為我覺得o個o的一大舊好阻椗
同埋 ... 我唔想洗便盆呀  
不如直接屙落馬桶沖左去乾手淨腳

不過最近我在淘寶看到這個東西
心諗好喎,遲早都要買兒童廁板架啦
不如早o的買呢個,笨 C 可以坐上去
雖然現階段都要大人扶住,但至少可以借下力
同埋個廁板洞口細左 + 配合體型o既弧位,笨 C 坐得舒服o的丫嘛 ~



我覺得教笨 C 坐馬桶呢樣野
都算係我誤打誤錯之下發現到的心得
當然也要多得嫲嫲前期下的工夫

話時話,坐馬桶樣樣都好,但有樣唔好,就係馬桶太接近廁紙架
笨 C 每次去便便都好鬼開心,因為可以玩廁紙啊




我的 facebook 專頁,緊貼每天心情 + 芝麻綠豆大小事 ~


2011年9月24日 星期六

抓周(度晬)

不是陳師傅提我,我也不知道原來昨天是笨 C 的農曆周歲了
嘩嘩嘩,咁就一年!

中國人傳統有個習俗,稱為「抓周」
(我家鄉叫 "度晬" --- tōo-tsè)
就在嬰孩滿周歲那天,祭佛祭祖
一來"報喜" (因為那個年代夭折率很高,滿周歲是值得慶祝的)
二來祈求佛祖和祖先保佑小孩子健康成長

除了祭神祭祖,周歲那天也會做一個特別的儀式
就是拿十來樣物件放到嬰孩面前
看他會選哪一種,用來"預測"他將來的喜好/ 技能

至於放甚麼讓 bb 去選
一般來講,都是一些有代表性的東西
例如糖果/ 零食 (如果選了這些,這個 bb 長大後可能很"為食")、
紙筆/ 錢幣/ 書籍 / 算盤等等,每種都有其含意
當然,時代唔同左,找個算盤不容易,用計數機代替了



我們也沒有特別準備甚麼,因為只看作是一種傳統遊戲
拿個意頭而已

隨手在家裡找些東西,我拿了
頸鍊、化妝品 --- 睇下笨 C 貪唔貪靚
書籍、紙筆 --- 睇下笨 C 鍾唔鍾意文學
計數機 --- 睇下笨 C 計數叻唔叻、有冇商業頭腦
零食 --- 睇下笨 C 為唔為食
金幣 --- 這是陳師奶送笨 C 的周歲禮物,寓意富貴,就拿來睇下佢攞唔攞
玩具琴/ 象琪 --- 睇下笨 C 鍾唔鍾意音樂/ 下棋
間尺 --- 睇下笨 C 對工科有冇興趣

後來在網上睇番傳統抓周要放些甚麼
原來我都唔夠認真 ... 哈哈
都話我有咩攞咩,遊戲一場啦

 




我起初以為笨 C 第一樣攞邊樣就算係
陳師傅話攞住唔放先係
不過笨 C 第一樣攞o既係條珍珠頸鍊 (就手)
但都攞實唔放
陳師傅將個金幣俾埋佢,佢又係揸到實

哈哈,睇o黎呢個係拜金女 (弊)
陳師傅解說,佢話係佢將來富貴咁解喎
好好好,係好o既我就照單全收啦
都係o個句,意頭o黎o即 ~ 當然我都想承你貴言啦

最後,多謝陳師傅陳師奶同埋奶奶o既大利是啊



我的 facebook 專頁,緊貼每天心情 + 芝麻綠豆大小事 ~






2011年9月21日 星期三

剝提子餵 bb 好方法

笨 C 好喜歡食水果
不過佢都好識食
特別鍾意o的又甜又林的水果
首選係車厘子,可惜已過左季節
次選係提子,四季常有
我地經常買o既,係呢種好似笨 C o既腳趾咁圓碌碌又細細粒o既無核紅提
最近超市常特價,大約 10 蚊磅,抵食啊



嫲嫲在剝提子皮時,笨 C 已經猴擒到伸手入碗摷 ...



以前剝提子皮,總覺得好麻煩
攪到隻手黐立立,一邊剝一邊猛用紙巾抹手指,浪費
有一日忽發奇想,用一個湯碗裝住o的凍滾水
剝完一粒提子,就把手指浸一浸水捽一捽
將黏在手指上的果皮和果汁弄掉
雙手不會黏答答,又唔駛猛咁用紙巾
奶奶試左一次之後都讚好



沒有開電視的話,為食笨 C 會捉實嫲嫲對手
擺出一副猴擒樣等食
但若果有電視睇,雙眼方向就一定向電視了



但提子送入口時,一樣猴擒唔顧儀態



半粒半粒咁食,因為無核,所以只須把提子辧開便成,好方便 



一邊扭 pat pat,開心得佢



得得戚戚咁



食完提子,就輪到o黎玩我相機啦 ... 走為上著



同場加映,笨 C 最近對反光物體裡的自己特別感興趣
仲會走去錫錫添 ~
哈 ~ 唔知佢以為係另一個 bb,定係知道係自己呢?




我的 facebook 專頁,緊貼每天心情 + 芝麻綠豆大小事 ~



2011年9月19日 星期一

洗手盆遊樂場+第一次修髮

我諗好多 bb 都鍾意玩水,同埋閃令令會反光的東西
笨 C 都一樣,所以佢最鍾意坐o係洗手盆度玩
次次扭計,一帶佢入洗手間,佢就開心晒



有時佢仲會望住鏡裡個 bb
哈哈,唔知佢知唔知o個個係自己呢?



樓下客廁塊鏡掛得比較高 ... 帶佢上去三樓個主廁先



嘻嘻嘻 ... 有得玩水龍頭就最開心
(唔敢開水俾佢,因為佢會用隻手捉住個出水位,攪到o的水四圍噴!)



冇得玩水,笨 C 改行玩我o的護膚品
唔係我俾佢架,佢自己擸左擺入個洗手盆度玩咋



睇下,笨 C 同「鏡裡的 bb」玩得幾開心 ~
(哎吔塊鏡好污糟   拍完先知)



由於笨 C 超鍾意o係洗手盆玩的關係
上星期幫佢修髮時 (係笨 C 人生的第一次修髮!)
我都係帶佢去坐洗手盆
果然如我所料 ~ 非常順利!
佢掛住玩個水龍頭,完全冇理會我做緊乜
哇哈哈哈 ~~~~~

笨 C 頭髮還是很薄很少,但兩鬢位置長了些
所以幫佢修一修
竟然都剪左一執出來呢 ~
等我珍而重之幫佢收起先



我的 facebook 專頁,緊貼每天心情 + 芝麻綠豆大小事 ~





Linkwithin

你可能對以下文章有興趣: