2011年8月31日 星期三

牙 ~ 喂喂喂呀喂 ~

記唔記得好早期、笨 C 三四個月大時
我見到佢牙床有o的白色野,仲以為佢出牙?
原來食咋糊,佢攪到 10 個幾月先o黎出

8 個月大、9 個月大時都試過發燒和屙臭屎 (大家話係"吽牙屎")
不過都未見動靜



終於,今個月突然見到o的野啦



要引佢大笑,又要揸穩相機,真不容易



好 ~ 見到了 ~ 下面原來已標左兩隻啦
笨 C 呢排胃口唔好,唔知關唔關事呢?
幾乎餐餐都食唔晒喔 (無論奶定粥)
本來已經唔肥o既佢,仲瘦左,抱住都覺得輕左呀



最近笨 C 好好唱口,成日o係度o依o依哦哦唔知唱乜
嗱呢首我就聽得明啦,叫做「牙 ~ 喂喂喂呀喂」丫嘛
唔知係咪佢為左慶祝自己出牙所以 rap 番首歌呢

<按此觀看影片>

我的 facebook 專頁,緊貼每天心情 + 芝麻綠豆大小事 ~


2011年8月28日 星期日

廚房外望

我家的廚房外望,景色都蠻開揚的 (暫時)
某天看到了黃昏美景,忽地想起個念頭
不如每日影番張相,睇下唔同時段唔同天氣,個天有咩唔同丫

呢張係黃昏 look,不過o個日個天唔夠紅,冇咩太特別
呢日係好天,之後o個日都係好天



某日個天好藍,好多種唔同o既藍,好多層次好靚
唔記得左o個日o既天氣,好似都冇落雨的



呢日好明顯係烏雲蓋頂仲好大風 ... 影完無幾耐就o黎料了



滂沱大雨中,成座山唔見左!



前o個排熱到爆燈,非常藍天與白雲的一天
我淨係影左一陣子,已拍到咁多唔同o既景色
好似中學時某課文一句「四時之景不同,而樂亦無窮也」
其實只要細心欣賞,香港並唔係淨係得石屎森林的啊



但上星期某一天再影,突然之間發現有o的野唔同左 ...
咦?!!那棵高高的樹呢?!!!!
竟然被砍了   原來因為有間新村屋起緊
我估因為呢棵樹阻住左個地盤
真可惜喔 ~ (咁以後咪冇得睇風向囉 )

話時話,這幾年的地產建設真係非常極其咁蓬勃
廚房外望呢個咁開揚o既景色,唔知仲可以享受幾耐呢?




我的 facebook 專頁,緊貼每天心情 + 芝麻綠豆大小事 ~


2011年8月26日 星期五

唔同左樣 (+ Oi Apple 抽獎活動)

就快 11 個月大的笨 C
最近個樣好似大個左好多
已經開始脫離 bb look
有點小女孩樣了



尤其是當佢認認真真時



好聚精會神咁 ... 唔敢煩住你



但當見到佢伸晒脷,又擺隻腳上 iPad 時
個 bb 樣又出番o黎



同埋呢個七情上面o既「嘟」咀樣



阿囡,正正經經影番張啦



其實笨 C 唔鍾意影相,好少肯望鏡頭
要捉到一張正面望鏡兼笑樣的
都唔知要用幾多格菲林
好在而家有 DC 咋



另外,今日o係 Oisix 網頁見到佢地推廣緊 Oi Apple
其實係陸奧大玉蘋果
我一向唔係特別鍾情日本蘋果,因為以前只食過日本一
嫌佢香得o黎口感係「粉」的,我只鍾意食脆o既蘋果
上年試過呢款蘋果之後,就另眼相看,因為好脆好甜好好味!

而 Oi Apple 最特別o既地方,係果身可以「印上」文字
當然唔係真係「印刷」上去喇
而係o係栽種過程中、蘋果未轉紅時,貼o的文字上去
咁蘋果變紅後,畀貼紙遮住o既地方就唔會變紅
睇起o黎好似印左字咁,好神奇!
聽講日本人好喜歡買 Oi Apple o黎送俾人,「憑果寄意」一番



一盒三個蘋果,售價 5000 日元
雖然不便宜,但用o黎送禮確實特別又得體
而家仲有個活動,登記參加左,每日會抽出一個得獎者
可以獲得一盒 Oi Apple 架!
我都o岩o岩登記左,大家都快o的登記喇
登記時填埋我個介紹人編號 00354,抽獎機會大o的架 (我都係)
截止日期係 9 月 2 日,愈早登記機會愈大 (因為未有咁多人知!) 哇哈哈哈 ~

活動詳情﹕

facebook: http://apps.facebook.com/oisix apple/

網頁﹕http://hk.oisix.com/free8.p hp?lang_id=zhtw



我的 facebook 專頁,緊貼每天心情 + 芝麻綠豆大小事 ~


2011年8月24日 星期三

婆婆的手作

這件小背心,相信大家都有點印象
因為出鏡率都好高下
原因之一,係因為涼爽,好薄好舒服
原因之二,係因為易著,一笠落去就得
原因之三,係因為個款簡單得o黎又有少少 details



哈哈哈,我並非在為甚麼童裝店宣傳
查實呢件衫係陳師奶縫的



仲要唔係特登去買乜布物布
純粹係幫人改衫裁出來的布頭布尾
(不過陳師奶專改名牌衫,我相信呢o的布應該幾靚)



我地細個時,陳師奶成日都車衫畀我地著
唔係貪得意,而係o個時屋企冇咩錢,唔可以下下都話出街買

而家就真係貪得意,得閒見到o岩o既布,就整一兩件俾個孫著下 



我諗而家都好少人會自己整衫了
(我承認我係絕對唔識的 補穿窿襪勉強可以)



事實上,我都好少買衫俾笨 C,主要買底衫
因為身邊太多朋友呢兩年生左,接收了許多新到好似未著過的衫
加上笨 C 契媽和其他朋友送的新衫仔
真係有排著了

有時心諗,我這等普通家庭,笨 C o的衫仔都可以多到著唔晒的
更何況經濟更好的一群?
難怪而家童裝生意如雨後春筍,好多大 brand 都趕著出埋一份了



我希望笨 C 懂得欣賞生活、享受生活
但更希望她會學懂欣賞物質以外的世界
婆婆的衫仔,不花一文錢
卻是婆婆不浪費物資、加上心靈手巧的車工為你而造的
希望尚未懂事的你,也會感受到一點點吧


我的 facebook 專頁,緊貼每天心情 + 芝麻綠豆大小事 ~






2011年8月21日 星期日

騎牛牛

o個晚食完飯,嫲嫲又和笨 C 玩騎牛牛了

~ 真係正 ~ 我都好懷念啊







唔駛行/ 爬就有得睇風景,睇下笨 C 個樣幾爽!







哈哈哈,笨 C 你咁鍾意騎牛牛

不如我買番條古老揹帶

畀嫲嫲揹你o係背脊周圍去丫



我的 facebook 專頁,緊貼每天心情 + 芝麻綠豆大小事 ~


2011年8月19日 星期五

感動之湯

冇獎問題遊戲,下面呢杯係咩?
(我飲左幾啖先記得要影相 ~ 本來是 full 的)



答 cappuccino 的,正常

我最初見到都以為係,不過冇理由開始食飯冇耐就上咖啡架嘛
原來係【黑松露泡沫忌廉湯】
尋晚同街坊小魚兒一齊去新天鵝堡食晚餐
因為小魚兒未試過佢地o既 a la carte

今次特登揀個閒日去試,問我有冇興趣一齊,我梗係有

今次試左呢個湯,$58 一客
絕對係人生一大享受
個湯香濃到呢 ~ 簡直令到味蕾醒晒,叮一聲
點解o的磨菇味可以咁濃,點解o的黑松露味可以咁香
比我o係叔婆買o個樽黑松露醬香好多好多
小魚兒之前因為我介紹買左叔婆o個樽黑松露醬
但覺得朕味麻麻所以用左一次之後畀左我
自此對黑松露呢樣野好感度一般
但尋晚佢同小魚公都強烈激讚呢個湯
我地一邊飲一邊讚,仲一邊研究點煮
結論係應該冇可能自己煮到,哈哈

其他食物,大致和我上次去食的 a la carte 差不多 (按此觀看)
所以沒有特別再影食物
特別報導一下小魚兒和小魚公的食評
因為他們味蕾特別敏感,而且經常周圍食
食評特別有參考價值
佢地話主菜中的果木炭燒牛柳、燴魚和普羅旺斯羊架都好出色,必試
至於果木炭燒西冷扒,牛味不及牛柳那碟,下次可以免了
而要特別預訂的黑毛豬扒,豬肉味不及他們返大陸玩時吃的土豬
今次咩都試,下次再去時,我地o既目標會更明確
順帶一提,大家一致公認伴碟的配菜係絕對唔可以放過的   一定要食清光

五個大人,人均約 $400 (我地有 VIP 咭 85 折)
在元朗的話消費算是較高
但比起去酒店扒房又平一截
(食物質素絕對有得揮,係環境冇咁豪啫)

不過話說回頭,呢度雖然食物好味
但上菜節奏仍有待改善
尋晚食完頭盤飲完湯好耐,才上主菜
但一次過就上晒五份主菜
我地 share 來食的所以食唔切
(噢 ... 查實我地應該講明 share 來食叫佢逐樣上
同埋甜品雖然好味但全都是 creamy 的種類,太膩了
因為現在夏天,而且全部主菜都啖啖肉
再食 cheese cake/ mousse cake/ 奶凍,真係太過 heavy 啦
呢個時候查實我想食青檸雪芭   或者青檸思樂冰都得



精明小村姑平時慳慳地,但久唔久都捨得食餐好o的

不過我地都好識食,真材實料的才會返頭再幫襯
暫時食過呢頭最正都係呢間,所以成日寫o黎寫去都係佢

因為舖租平 (我估),所以可以呢個價錢俾到o的靚野你

如果出城食中價西餐,好多次經驗都係好麻麻

我相信因為錢都花在舖租了,唯有在食物處慳成本呢

每次心諗付出的錢有一大部分入左大業主袋

真係相當不爽    呻完 ~


我的 facebook 專頁,緊貼每天心情 + 芝麻綠豆大小事 ~






Linkwithin

你可能對以下文章有興趣: