2011年6月27日 星期一

環保布尿褲 (試驗篇)

之前稍稍提到笨 C 開始著環保布尿褲一事
原來不少媽媽們都有興趣
等我再講多少少先

其實我向來都希望在生活小節中盡可能環保一點的
始終地球我地都有份,我都希望笨 C 將來可以有個好o的環境生活
但我都要老實承認,我只係盡左少少綿力
例如買衫盡量揀o的款式大路o的、可以著多幾年o既
夏天出街可以帶手巾仔抹汗、帶支水去飲等
都係好微不足道,但就因為容易做到,可以持久地實行

至於布尿褲,我是有滿腔大志,在笨 C 未出世時已買定各種款式
(以下已有三款了:
左上角的是隔尿褲,配以左下角的布尿墊使用的;
右上角是預先車縫好的紗布尿巾,穿好後那個 Y 型膠勾固定;
右下角是最古老的紗布尿片) 



尿布的好處,除左環保又慳錢之外
聽講仲冇咁容易有尿布疹、同埋 bb 大個易o的戒片云云
(因為尿布濕左會唔舒服,bb 大個左會唔鍾意呢個感覺
就會快o的想自己去廁所唔再著尿片) 

其實最透氣最舒服o既,應該係傳統的紗布
不過同時地又好容易滲漏 (因為太薄了)
所以就出現左環保尿褲呢o的新產品
外面彩色那層是隔尿褲,防止滲漏
而裡面就可以搭配長條型布尿墊使用



但我發覺若只用一層的布尿墊,好容易便濕透了
所以我會「打孖」用,鋪兩層
可以再加多一塊好薄、可即棄的「隔尿紙」使用 
呢塊隔尿紙,其實說得明白一點,係「隔屎紙」
若 bb 大便了,便可把它丟棄,那尿墊就易洗好多了
若只是小便,就可把它洗乾淨再用,用多兩三次都無問題 



至於外面條隔尿褲,因為有魔術貼和啪鈕的關係
由剛出世著到戒片都應該冇問題的
但我地都係個多月前才開始給笨 C 著
原因是想笨 C 學識叫去大便先 (佢叫時,我地會帶佢去坐馬桶 ng ng) 
咁就唔駛要洗屎片咁大工程,哈哈



而家仲係試驗階段,所以用後感都未可以定論
暫時可以講係 so far so good
因為我家有天台可曬尿墊,半天便會乾
所以洗晾方面唔太大問題

至於傳統紗布和新式紗布
一開始便被我打入冷宮了,偶爾會摺起來替代尿墊使用
因為我比較遲才開始試用尿布
笨 C 都比較大個了,尿尿的份量較多
就算用隔尿褲都要把尿墊加孖上,兼且兩個鐘頭換一次
如果係傳統紗布,應該會漏到七彩



本文一開始便提到,我的環保生活都會同時平衡實用性
所以,能用布尿褲的時候便會用布尿褲
但有些時候,例如訓覺o個轉/ 落雨天/ 去街/ 或最近笨 C 「屙爛屎」
我都會用番紙尿片
以免攪到自己一頭煙

不過我計過,如果我平均一日慳 4 塊紙尿片
一個月都應該慳到一大袋紙尿片的用量的
都算係出左o的力丫

話時話,最近收到某媽媽會寄來的學習褲試用裝和折扣券
見到廣告片,o的 bb 都係學爬學行的階段,就開始著學習褲
話 bb 郁o黎郁去都唔怕漏云云
我想問下你地o的 bb 有改著學習褲嗎?good 嗎?定係著番大碼尿片呢?

 
我的 facebook 專頁,緊貼每天心情 + 芝麻綠豆大小事 ~



13 則留言:

  1. 我個B有著學習褲,因為要教他去噓噓時方便點嘛,好似除褲咁去廁所仔,大碼片片就唔多方便喇,所以只會係夜晚訓覺時著,但係而家H記尿片己經加哂價,大碼片片要$133才得60's,如果你有優惠券買學習褲仔可能仲便宜點啊,不過唔係間間藥房都收張券呀,買時問清楚先好>.<(不過唔知你係咪H記優惠券 :p)

    回覆刪除
  2. 我有一盒格尿紙,即係你講的格屎紙,只係用咗好少,因為我個工人話唔洗格都可以洗,所以用咗幾張之後一直都無再用,而家放在家中無人理,我唔想佢變成垃圾(用環保尿布都係唔想製造咁多垃圾啫!)見你原來又用緊環保尿布,唔知你用唔用得著,如果你唔介意開咗,我可以送俾你,如果你想接受佢,請回覆我呀!如果無興趣都唔緊要,不要介意!

    回覆刪除
  3. 睇見你呢d布片, 令我諗起我阿媽話我細個patpat勁易敏感, d尿布要燙過先用得. .

    回覆刪除
  4. B媽, 你用邊隻牌子呀? 我都幫我個b睇緊,不過太多種類有平有貴唔知點擇? 另你個款的尿墊是否只"放"在尿褲上, 著後有走位嗎? 你用邊隻隔尿紙呀? 我上網睇有好多款, 有d又話質地好硬, 有d又話聲稱可以與便便一齊放入馬桶沖走但最後攪到馬桶塞左。

    回覆刪除
  5. 我都想用尿布啊,阿b 8月出生了, 看網上媽咪推薦korea 的尿布,都是淘寶網的,34元人仔一條, 其實bb 幾時用尿布最好呢? 我都好怕d 便便洗不去, 會影響bb 的pat pat ^^

    回覆刪除
  6. marble 出街先用學習褲,平日係屋企都係用片片。

    回覆刪除
  7. 其實咁樣真係又環保又慳錢呀!
    不過就要做多少少野洗番乾淨佢~


    回覆刪除
  8. 我係bb一歲幾, 教佢學如廁時, 先轉著學習褲. 之前都係著大碼片, 都ok吖.

    回覆刪除
  9. I have some 隔尿墊, very cheap price to you, are you interested???

    回覆刪除
  10. 請問Y 型膠勾固定扣在那裏買的?

    回覆刪除
  11. 多謝B 媽指教^^ 我是昨日問妳第一胎是否大多數像父親的那個VINCE 啊 ^^ 請問bb 幾時會識得去便便? 大概什麼時間開始要訓練啊?祝妳同阿B 身體健康^^

    回覆刪除
  12. 其實我都覺得傳統沙布好好多喎 呢d 我去過three-sixty睇, 外面其實都好膠
    沙布依家重有得買咩?
    當然, 我認同係出街都係要用番尿片...唔係咁樣我唸會重死同嗅死....(d 濕尿布)

    回覆刪除
  13. 我的仔女要用片時大部份時間都是著尿片(不是學習褲)的.
    一來學習褲的吸尿量總覺得不夠片片勁, 二來學習褲通常貴D, 所以會比較少著學習褲.
    到BB大一點, 識得表達要去vee vee或poo poo, 在家/出街著學習褲會方便點. 不過睡覺那轉, 有時學習褲的吸量"頂唔住"會漏尿, 所以都係著番片片會好點.

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: