2011年6月29日 星期三

【轉載】勞永樂醫生 - 一語道破猩紅熱

在網上看到這篇由勞永樂醫生撰寫的文章,覺得很有意思,拿來轉載一下。

我對醫學完全沒有認識,有時候也很受傳媒影響,對於一些被大加渲染的流行病,難免會有些擔心。以為自己已經很「精明」,對於那些誇大 n 倍的健康產品專題從來都免疫,但原來防不勝防,以為是很正路的題目,竟也存在不少偏頗誇張。

原來現在香港盛產的除了「政棍」,竟然還有「學棍」... 這些所謂專家,並不需要講大話,只要不講事實的全部,或故意強調某些事實,已足夠「昆」人了。就算沒有「昆」人之心的,都會 play safe 講番一句:有唔妥就好去睇醫生啦 ~ 難怪香港無論急症室或診所都是長期爆滿呢 :p 

以前的人太諱疾忌醫是弊病,現在的人太過份緊張是負累。真的很難拿到平衡點呢 ~

+++++

勞永樂醫生 - 一語道破猩紅熱

轉載自:http://hk.news.yahoo.com/blogs/lowinglok/一語道破猩紅熱.html


甲型鏈球菌感染致死非新事,絕非因為當今細菌「變種轉惡」所致。有微生物學教授聲稱在一株甲型鏈球菌細胞內發現多了一截前所未有基因,導致其傳播能力加強,坊間因而把導致當今猩紅熱流行的病菌標籤成「變種惡菌」。

有醫生代表強調不少甲型鏈球菌對紅霉素類抗生素有耐〈抗〉藥性,卻沒有同時指出最基礎級別抗生素,如盤尼西林仍然有效,坊間因而把導致猩紅熱流行的病菌標籤成「抗藥變種惡菌」。

圖片:星島日報

圖片:星島日報


對這些恐怖標籤,大教授、大醫生,以致衛生署及整個醫學界,不獨沒有挺身而出更正謬誤,反而火上加油,搬出一大堆科學名辭,有意無意營造問題艱深,恫嚇坊眾,故須具高深學問、坐擁先進科技者,方可為香港消災解難,連帶拯救地球的假象。

要不然,又為何今天說病菌多了一截基因,明天說emm12型,後天又說emm1型。未消幾天,又有微生物學家謂正在全港各普通科門診抽取樣本,以測試病菌的耐藥性。總而言之,搞作愈多,市民愈眼花撩亂、愈難掌握問題重心、愈不知所措,醫學界既得利益群體便得其所哉。

病菌變種古已有之,若非如此,這些微生物亦不能進化至今時今日;只不過是從前並未出現今時今日,靠扭曲事實、售賣驚恐混飯吃的假專家而已。步入「後現代時期」,文明社會須摒棄假意標榜科學的學棍及專業人士,因為他們只是害人害物的「現代時期」殘餘。學懂自我保護方為上策。

一語道破:「當今的猩紅熱仍是一如既往的猩紅熱,及時施以最基礎級別抗生素,如盤尼西林,便可痊癒。」


我的 facebook 專頁,緊貼每天心情 + 芝麻綠豆大小事 ~


2011年6月27日 星期一

環保布尿褲 (試驗篇)

之前稍稍提到笨 C 開始著環保布尿褲一事
原來不少媽媽們都有興趣
等我再講多少少先

其實我向來都希望在生活小節中盡可能環保一點的
始終地球我地都有份,我都希望笨 C 將來可以有個好o的環境生活
但我都要老實承認,我只係盡左少少綿力
例如買衫盡量揀o的款式大路o的、可以著多幾年o既
夏天出街可以帶手巾仔抹汗、帶支水去飲等
都係好微不足道,但就因為容易做到,可以持久地實行

至於布尿褲,我是有滿腔大志,在笨 C 未出世時已買定各種款式
(以下已有三款了:
左上角的是隔尿褲,配以左下角的布尿墊使用的;
右上角是預先車縫好的紗布尿巾,穿好後那個 Y 型膠勾固定;
右下角是最古老的紗布尿片) 



尿布的好處,除左環保又慳錢之外
聽講仲冇咁容易有尿布疹、同埋 bb 大個易o的戒片云云
(因為尿布濕左會唔舒服,bb 大個左會唔鍾意呢個感覺
就會快o的想自己去廁所唔再著尿片) 

其實最透氣最舒服o既,應該係傳統的紗布
不過同時地又好容易滲漏 (因為太薄了)
所以就出現左環保尿褲呢o的新產品
外面彩色那層是隔尿褲,防止滲漏
而裡面就可以搭配長條型布尿墊使用



但我發覺若只用一層的布尿墊,好容易便濕透了
所以我會「打孖」用,鋪兩層
可以再加多一塊好薄、可即棄的「隔尿紙」使用 
呢塊隔尿紙,其實說得明白一點,係「隔屎紙」
若 bb 大便了,便可把它丟棄,那尿墊就易洗好多了
若只是小便,就可把它洗乾淨再用,用多兩三次都無問題 



至於外面條隔尿褲,因為有魔術貼和啪鈕的關係
由剛出世著到戒片都應該冇問題的
但我地都係個多月前才開始給笨 C 著
原因是想笨 C 學識叫去大便先 (佢叫時,我地會帶佢去坐馬桶 ng ng) 
咁就唔駛要洗屎片咁大工程,哈哈



而家仲係試驗階段,所以用後感都未可以定論
暫時可以講係 so far so good
因為我家有天台可曬尿墊,半天便會乾
所以洗晾方面唔太大問題

至於傳統紗布和新式紗布
一開始便被我打入冷宮了,偶爾會摺起來替代尿墊使用
因為我比較遲才開始試用尿布
笨 C 都比較大個了,尿尿的份量較多
就算用隔尿褲都要把尿墊加孖上,兼且兩個鐘頭換一次
如果係傳統紗布,應該會漏到七彩



本文一開始便提到,我的環保生活都會同時平衡實用性
所以,能用布尿褲的時候便會用布尿褲
但有些時候,例如訓覺o個轉/ 落雨天/ 去街/ 或最近笨 C 「屙爛屎」
我都會用番紙尿片
以免攪到自己一頭煙

不過我計過,如果我平均一日慳 4 塊紙尿片
一個月都應該慳到一大袋紙尿片的用量的
都算係出左o的力丫

話時話,最近收到某媽媽會寄來的學習褲試用裝和折扣券
見到廣告片,o的 bb 都係學爬學行的階段,就開始著學習褲
話 bb 郁o黎郁去都唔怕漏云云
我想問下你地o的 bb 有改著學習褲嗎?good 嗎?定係著番大碼尿片呢?

 
我的 facebook 專頁,緊貼每天心情 + 芝麻綠豆大小事 ~



2011年6月23日 星期四

吽牙仔了?

一向飲奶飲得好爽快的笨 C,羨煞我的不少媽媽級朋友
最近竟然開始唔鍾意飲奶
一餐奶經常要分兩三次飲
有時仲只飲得三分之一

仲有,呢幾日都間歇出現發燒、肚瀉等現象
一向不主張過份緊張的我
只在家密切觀察她的情況
因為佢精神不錯又肯玩
就暫且不帶她去診所
(因為我們的看法是,診所是高危地方
病人多病菌多,反而有機會受傳染
當然,家長要密切留意 bb 狀況
如果情況有轉壞傾向就要去睇醫生喇)

我們先從她飲食著手,暫停她的粥仔 (排除因不適應某些食物引致肚瀉)
定期為她探熱,用濕布抹面抹身 (有助散熱)
盡量俾多o的水佢飲 (冇落葡萄糖了,佢唔肯飲就用針筒餵)

如是者笨 C 退燒了,肚瀉情況亦改善了
但依然唔肯飲奶
心諗莫非是厭奶期?

但剛才笨 C 扭計唔肯飲奶時
嫲嫲瞥見佢下顎牙肉正中有些白色
說笨 C 可能是吽牙仔了



因為有些 bb 吽牙仔時特別扭計,也可能會發燒
這幾天的爛便便,嗅起來的味道也"酸酸叔叔"
跟平時的好唔同

只是我家笨 C 唔鍾意咬牙膠,又唔流口水
真係唔知佢係咪吽牙仔呢
但都 8 個半月大、呢排又真係特別扭計
吽牙呢個可能性都相當大

各位媽媽s,你地o既 bb 當年吽牙仔時都係咁樣嗎?



我的 facebook 專頁,緊貼每天心情 + 芝麻綠豆大小事 ~



2011年6月21日 星期二

企梳化的大屁屁

8 個半月的笨 C,愈o黎愈手多多、腳多多、諸事八卦
坐得耐仲會唔耐煩
會伸對手俾你
唔係叫你抱
係叫你俾佢借力企起身

有時擺佢o係梳化坐
佢會擰轉身向椅背那邊
然後試圖掹住椅背咕o臣爬起身
真係大膽到呢 .... 睇少陣都唔得

當然,佢冇咁叻自己起到身喇 (雖則嫲嫲話佢成功過一次)
大部分時間都係我地幫佢
俾隻手佢扶住趷起身



如果佢企左起身,佢會企到成五分鐘

因為企起身可以望到好多野,佢心野唔肯坐返低



好似好忙咁,一陣攪下呢樣,一陣又攪下o個樣
見到佢呢個頭大身細o既樣,真係好攪笑



笨 C 最近變左大屁屁,因為開始俾佢著布尿褲
其實未出世前已購入
原因係聽說布尿褲好處比紙尿褲多
慳錢環保唔在講,bb 仲冇咁容易有尿疹
大個又容易o的戒片云云

最近才開始著,因為頭幾個真係忙到一頭煙
便便又未有規律,都係唔好增加自己工作負擔 (& 奶奶工作負擔)

so far so good,而家日頭都係俾佢著布尿褲
夜晚訓覺 & 出街時才用紙尿片呢 



我都係o係網上討論區睇到其他媽媽們的分享
大家有興趣都可以睇睇呢
http://www.baby-kingdom.com/forum.php?mod=viewthread&tid=2164817&extra=page%3D1&page=1



我的 facebook 專頁,緊貼每天心情 + 芝麻綠豆大小事 ~






2011年6月19日 星期日

父親節快樂

今天是父親節,祝天下的父親們都快樂 ~
沒啥節日意識的我們,一向不會特別慶祝
而且家中各人工作都不定時
很難得約得埋

今年多左個外孫,又適逢我妹轉工
終於俾左個大好機會我地



陳師奶仍在工作,不是經常見到笨 C
一見到就抱到唔願放手
最鍾意同佢數一二三

尋日我帶左個新玩具返去玩
陳師奶同笨 C 睇得好留神
<觀看影片>



哈 ... 冇錯,就係我新買那台 iPad2
未買之前以為是無謂的消費品
用落之後,不禁驚歎它的強大
簡直係大人細路都o岩玩
(查實唔淨止係玩,實用功能都太太太多了)
非常值得投資



哈哈 ... 睇下陳師傅
棋逢敵手了

知道陳師傅愛「足棋」
出門之前預先 search 定,下載左兩個較高評價的 apps
最初還擔心免費 apps 會否很「低 b」呢,原來都幾勁架喎



父親節的意義
並不在於消費或物質
陳師傅笑得最開心時,係見到我地

能孝順父母是一種福氣
不要只當成責任
要好好珍惜
祝大家父親節快樂!


我的 facebook 專頁,緊貼每天心情 + 芝麻綠豆大小事 ~



2011年6月15日 星期三

陳師傅私房荔枝酒

陳師傅每年都會自己釀造荔枝酒的
因為他說荔枝酒很補身,老人家每天飲用少量
會覺得精神百倍、筋骨靈活云云
對產婦產後補身亦非常有效
所以上年特地釀了幾斤給我

可惜我是開刀生的,傷口未完全復元前不敢飲酒
之後又有餵人奶,所以不不敢飲太多
所以絕大部分都益了笨 B 爸爸和前來探訪的親朋好友們
(其實這荔枝酒,是果酒的一種
味道馥郁芬香,入口甜美順喉
並不限於老人家和孕婦飲用)
嚐過的朋友們都讚不絕口,紛紛問我拿食譜

因為我自己少飲的關係,所以忘了要拍照
想拍照的時候,發現一大支的酒只剩下瓶底的少許
這些沉澱瓶底的比較混濁,看起來不漂亮
之前那些是很清澈的
下次問陳師傅拿了新酒再拍一張好看的





陳師傅私房荔枝酒
以下份量可釀出一斤荔枝酒 (約 600 毫升),如想釀多些,可按比例加大份量

荔枝 (淨肉) 1 斤
糖 半斤
高梁酒 (即是二鍋頭) 1/4 斤
*** 千萬不要加水 ***
*** 釀第二造時,再另加糖半斤 & 酒 1/4 斤 ***

做法:
(1) 將荔枝拆肉, 放進闊口瓶內
(2) 加入糖及酒
(3) 放在較高溫但不要被太陽直接曬到的地方 (e.g. 廚房) 發酵。建議在瓶上標記釀造日期,方便查閱。
(4) 釀20天即可濾出第一造酒 (類似釀豉油的 "頭抽")
(5) 再加一次糖和酒,釀第二造酒
(6) 20天後可收成第二造荔枝酒
(7) 將第二造酒混和第一造酒,攪掂

心得:
(1) 釀兩造酒係想盡用物資,第二造酒不及第一造咁濃咁好味,所以建議將兩造酒混成一樽享用。
(2) 用來釀酒的闊口瓶,請先高溫消毒及徹底抹乾才使用。水氣會令荔枝酒發霉。
(3) 釀完的酒是要倒出來的,荔枝肉不要,如果長期浸住,o的酒會愈來愈混濁,質素下降
(4) 釀好的荔枝酒,請放在雪櫃裡儲存,放一年也沒問題。飲用時可加冰,增添美味
(5) 陳師傅話用糯米糍效果較好,一來較香甜,二來果核少、果肉較多
(6) 飲用時可加冰或梳打水,變成特飲

*** 歡迎大家轉載,但請註明出處 ***

我的 facebook 專頁,緊貼每天心情 + 芝麻綠豆大小事 ~



2011年6月13日 星期一

笨 C 八個月成長簡報

今日竟然一連有兩個人問我點解咁耐都唔出 blog
噢 ... 被發現了 ><
其實我經常都有上網的,只係抽唔出時間寫 blog 之嘛
因為一篇 blog 要好幾張相,執相揀相好花工夫喔
大家如果想搭訕,去 facebook o個邊可能易o的見到我,哈哈

講番正題,笨 C 話咁快就 8 個月大了
今個月最大o既變化,就係跟外界o既 interaction 多左好多
參與性高左好多呢



開始變得"百厭",因為對所有事物都好奇
一見我攞相機,就會來扯我的相機帶
甩左手仲會翁鼻表示不滿



跟爸爸坐在梳化上,望到坐在飯檯邊上網的我
會整古做怪引我注意
如果我理佢,佢就會好開心



總之雙手能觸及的地方,佢都好有興趣摸下揸下



開始學爬但唔係好識,仲係會向後退
試過擺o的野o黎引佢,會發現佢用盡吃奶之力伸長隻手去擸
而唔係爬過去囉



雖然唔肯爬,但手仔都變得有力了
會大力掐我地o既手臂  =.=
也可以拿起紙扇來撥



手仔靈活不少,有時會把手擰來擰去,咁又玩一餐



非常喜歡模仿大人
對遙控器和手提電話都甚感興趣



亦都開始有少少理解能力
例如佢終於知道"拍"個玩具琴o既邊度就可以按著自動音樂



飲奶冇以前咁乖,最近唔知係咪厭奶
好多時都要分兩三轉飲,仲飲剩一o的
但擰開奶咀俾佢就咁飲
佢又會好猴擒,將個樽推向自己飲
但顯然控制得唔係幾好,所以有時會倒到自己一臉都係奶 =.=



講野方面,當然八個月人仔就梗係未識喇
但都好多唔同o既發音
例如 "打打打"、"阿 ~ 嫲 ~"、"媽媽" 都成日聽到
"爸爸" 就比較少聽到,攪到笨 B 爸爸醋意大發
哈哈

<觀看影片>



我的 facebook 專頁,緊貼每天心情 + 芝麻綠豆大小事 ~





2011年6月8日 星期三

鬼佬涼茶 vs 中國涼茶

前幾天菜田姨姨 call 我,話有百花蛇舌草,問我要唔要
梗係要啦,我成日買顆粒o黎沖架,而家有新鮮o既仲正!
$10 一斤,我買左一斤





我未試過自己買o黎煲,仲要唔係藥材舖o個o的乾品,而係新鮮o既
我以為一斤好多,姨姨話一次用晒架
佢話煲好之後加片糖調味就得架啦
(點解用片糖 ... 因為片糖解毒喎 ...我奶奶都係咁講)
一大煲水,煲左兩個幾鐘剩番一半  




哈,咁o岩之前換左個可樂杯
可樂係「鬼佬涼茶」
用o黎裝「中國涼茶」
妙哉 





我的 facebook 專頁,緊貼每天心情 + 芝麻綠豆大小事 ~


2011年6月7日 星期二

夏水禮

端午節假期,熱到人間蒸發咁滯
幾日都匿埋o係屋企做宅女
害笨 C 都做埋宅 b,真係唔好意思 ... 哈哈

應下節,o黎個下水禮先
朋友知我有天台,好早期就送左一個吹氣水池
在淘寶淘了一套火紅三點式給笨 C
順手淘多個腳踏氣泵
但竟然諗唔起要買對吹氣水袖



件泳衣好嬌俏架,坐o係水裡面,裙邊會浮起來



阿媽,呢舊咩o黎架?(泳帽囉 ...)



冇水袖,冇得趴o係度游游下
唯有就咁坐o係度 ... 變左好似坐沖涼缸





冇野好玩,兩個大男人 (笨 B 爸爸 + 舅父仔) 唯有o係度撥水 ... 哈哈



但好明顯笨 C 覺得阿媽準備不足,好不滿
係啦係啦,我會嗱嗱臨買番對水袖俾你架啦



話時話,最近笨 C 好多野講
前幾日嗌左 ma ma ba ba 了
不過我相信呢o的只係無意義的發音
佢應該未知爸爸媽媽呢o的名稱o既

其實佢嗌得最多係 "打打打打打"
得閒無事就會 "打" 一餐
<觀看影片>

尋晚仲攪笑,擺佢o係網床
佢打打打完一輪,隻手摸到叠紗巾
就摷左兩條o黎玩
正想話佢摷亂晒o的野
點知佢攞o個兩條紗巾o黎抹張床 ... 哈哈哈
<觀看影片>


我的 facebook 專頁,緊貼每天心情 + 芝麻綠豆大小事 ~





Linkwithin

你可能對以下文章有興趣: