2011年5月30日 星期一

未學爬先學企?

因為笨 C 是秋天出生的
三四個月大時,正好是冬天
每天都包到成隻粽咁
所以冇咩鍛練佢爬
但就成日俾佢跳 jumperoo

唔知係咪咁,笨 C 到今日為止都係未識爬
但就好有意欲想企起身
只要俾少少野佢扶住,佢就會好大膽地一趷趷起身



<觀看短片>

至於講野方面,笨 C 每日都o係度o依o依吔吔
上星期某一日,佢好清楚咁講左句 "阿 ~ 嫲 ~"
開心到嫲嫲飛起啊 ~
希望笨 C 快o的嗌埋爸爸媽媽啦


我的 facebook 專頁,緊貼每天心情 + 芝麻綠豆大小事 ~


2011年5月28日 星期六

女子都是愛鞋的?

以前某大商場的一個經典廣告
道出了:女人原來真係好鍾意買鞋
心情好買鞋 ... 心情唔好買鞋 ... 好天買鞋 ... 落雨又買鞋 ...


(來源:http://www.youtube.com/watch?v=n5jCq3d4TfE&NR=1)

呢個廣告膾炙人口
我諗大家都應該相當有印象
我已經唔係成日買野o既人
但屋企都有十幾對鞋
(比起大家,應該算很少罷 ...哈哈)

我家笨 C,雖然得o個七個多月人仔
但好似對靚鞋都有莫明o既喜愛 (大件事了 ...)
鍾意"玩鞋"多過玩玩具

佢對 Stride rite o個對豹紋特別有興趣
每次見到都係攞上手研究一番,甚至擺埋入口





俾多一對佢,睇下笨 C 有咩反應



咦,真係會攞o黎 "比較下" 喎



但佢最後都係情歸豹紋



小姐,唔該幫我包起呢對丫!



小姐,你對鞋呀 ...



笨 C 睇o黎好滿足



大家都知我性格並唔鼓吹消費
但有時總有些特別日子或場合,要著得好睇o的
駛錢都要駛得精明,希望買到o的值回票價o既野
我覺得 Stride rite o的童鞋確係幾靚
最重要係質料都好靚,我相信 bb 會著得幾舒服
所以值得推介俾大家 

話時話,Stride rite o係尖沙咀海港城開左間新店
明天 (5月29日,星期日) 1:30-2pm 會有盛大開幕活動
買野仲會有優惠添呀 ~ 大家有時間就去碌碌喇
http://www.striderite.com.hk/edm/20110527/email_chi.html




我的 facebook 專頁,緊貼每天心情 + 芝麻綠豆大小事 ~


2011年5月25日 星期三

阿伯睇信 (扮)

話說笨 C 的契媽這兩年住在英國
因利成便不斷遊走歐洲各地
去到每一個景點都會寄一張明信片俾我
兩年下來,我已收到幾十張 (!) 明信片

最近笨 C 大個左,對大人睇緊食緊玩緊o既任何事都感到興趣
對契媽寄來的明信片,當然唔放過



契媽見到佢將自己o既墨寶擰來擰去,no eye see ...



笨 C 攞住張咭睇左好耐 ...



佢個心諗緊 ... 點解呢棵樹同平時睇到o個o的唔同o既 (掉轉左 ...)



攪左一大輪,終於識反轉張咭o黎"睇下o的字"
但佢個樣,十足十o的金山阿伯睇信咁囉 ...   
阿伯,你睇得明冇?駛唔駛我讀俾你聽喔 ...



我的 facebook 專頁,緊貼每天心情 + 芝麻綠豆大小事 ~



2011年5月23日 星期一

笨 C 七個月成長簡報

哈 ... 眉精眼企的你們發現左我冇寫笨 C 七個月成長簡報
其實我係記得的,不過呢個月實在忙到頭昏腦脹
所以俾我拖下拖下拖到而家啫
話時話,Yahoo Blog 近來食相又食字,非常麻煩
一改野就冇晒o的相,又要再 post 過
攪到我有時發現打錯字都唔想改

芳齡 7.5 月的笨 C
身高 70 cm (依然是生長線 75%)
體重 7.5 kg (依然是生長線 50%)
三圍 ... 噢撈 ... 頭圍 43.5 cm (生長線 50% 多少少)
一切比例和之前都差不多,暫時尚未病過 (touchwood)
真是托賴了

行為性格方面,笨 C 愈大愈八卦
相信將來會同佢阿媽 (我) 一樣咁八卦 ... 哈哈哈哈哈
腳仔好有力,抱住佢時會跳過不停
扶住梳化都可以企成分鐘



坐得好穩,已經唔駛用 "青蛙式" 坐法,可以擰側身了



見到大人整緊咩,佢又要參與埋一份
呢日見到契媽寄來的明信片,即搶



對繩狀o既物體好有興趣,會去扯
呢方面真係要睇緊o的,驚會有家居意外



咩都想擺入口試下
飲食方面,一日食 4 餐奶 (210ml) 2 餐糊仔
間唔中俾o的果蓉佢嘆下



好鍾意打側身訓覺



見到佢個大屁屁 & 肥腳腳,引唔住要抽水   哈哈哈



我的 facebook 專頁,緊貼每天心情 + 芝麻綠豆大小事 ~




2011年5月20日 星期五

非誠勿擾 (菜田篇)


最近常常提到到菜田買菜的事,攪到大家都心郁郁
但我又唔肯披露資料,好似好自私咁
唉 ... 我都講過苦衷 ...
因為鄉下地方唔係咁易搵
一來驚你地搵唔到,二來驚你地當左菜田係景點、遊樂場
菜田姨姨都係個體戶
我又驚佢地應付唔到四面八方湧來的查詢和光顧
我好似好多憂慮,但都係 being considerate,希望大家明白

不過,最近其中一位姨姨家裡發生了點事
令她要變賣了貨車,不能把菜運出去賣了
之前見她整條田的唐蒿都摘唔切開晒花
雖然靚,但好浪費 (浪費了她的一番工夫)
而且我都想姨姨可以賺多少少錢

而家天氣熱,我見佢o的通菜生到嘭嘭聲
所以問准了她後,我決定幫她在這裡宣傳一下
看看你們有誰想直接去跟她買的,就趁這個機會啦

另一位姨姨,菜田裡的菜款式較多

但她也是個體戶

我跟她說起,她說最近的紅菜頭和甘筍全都長成了

也歡迎我介紹朋友去買,幫輕她不用搬菜出去賣





看,紅菜頭都長得超大了






我今早買的,全都是即採的,這裡買了 $53 (勁重秤)






雖然兩位姨姨都表明想我介紹朋友去買
我樂於幫忙,但我的原則不變
就是「非誠勿擾」
因為種田是非常辛苦的事
我不想姨姨再花額外時間精神應酬查詢或觀光團 
也不想在這裡公開披露她們的地址和聯絡資料
所以我只接受私人留言查詢
並且我會代為「揀客」

揀客的原則是:
  住在比較近的地方,比較熟知環境,同埋唔駛要用好多錢搭車先到
(所以請告訴我你住哪條村。如在半小時內不能去到菜田的,我會如實告知)
  在我 blog 有留過言我有印象的
(新開 account、無頭像或內容恕不回應)

有心的 blog 友們,在留言給我前,就先三思是否:
  認為自己會經常去買菜的,不是當作一次性的觀光遊覽
(如果想觀光遊覽,我諗你地去大棠荔枝園會更開心)
  不怕蚊叮蟲咬,也不怕踩到成腳泥
(即是要帶點 "村姑氣質",哈哈)
  有心理準備用比街市貴少少的價錢買菜的
(因為是有機種植而且人手少量耕作,所以價錢比街市的大陸菜貴。但基本上都是 $10/ 斤或以下的。又係o個句,種田好辛苦,希望大家不要跟姨姨討價還價了。) 
  有耐性講電話的
(有位姨姨是潮州人,另一位應該是廣東人,但跟她們談話時都要有點耐性,因為有時唔太容易明白的)
  愛護環境,崇尚自然的
(差o的唔記得講,請自備環保袋啊)

好似諸多要求,其實只是希望不會"做錯媒人"
如我覺得你是合適的"顧客"
我會回覆你的私人留言,把姨姨的聯絡方法告知
讓你們自己去聯繫 

重申
(1) 我不是要辦導賞團,也不是發言人,所以得到姨姨聯絡方法的朋友,請直接跟姨姨聯繫吧,我不會參與其中的喔
(2) 這次純為義務宣傳,我從中並無收到任何好處,包括電視框 (如果菜田剛好有葱,搭棵葱倒是會的)
(3) 這篇文章在適當時候會突然消失 ... 

 
我的 facebook 專頁,緊貼每天心情 + 芝麻綠豆大小事 ~






Linkwithin

你可能對以下文章有興趣: