2010年9月15日 星期三

陪產?不陪產?

之前跟一些新任媽媽的朋友交流過
佢地都話:如果可以的話,最好老公可以陪產
雖然好似幫唔到o的咩,但精神上的支持,對產婦是很重要的

我也有同感 ~ 雖然我覺得生仔o既過程,
有少少恐怖又有少少核突 (我估 ... 對男人o黎講
)
老婆面容又扭曲 ... 又勁發脾氣 ...
但係,笨 C 出世咁重要o既時刻,我都好想笨 B 爸爸可以在場
一起分擔生育過程的痛苦 ,一起分享第一手的喜悅

笨 B 爸爸最初是拒絕的 ...   仲搵左 n 咁多個藉口
但最終在我軟硬兼施之下 ... 屈服-ed
希望佢陪完之後,覺得"不枉此行" 喇

不過仲要睇下到時好唔好彩,入唔入到產房
(因為太繁忙的話,有時一間產房會開兩張床,就不能陪產了)


(以下為網上圖片)



我的 facebook 專頁,緊貼每天心情 + 芝麻綠豆大小事 ~



21 則留言:

  1. 我反而唔比老公陪,自己都已經痛到顛時仲要安慰叫佢唔駛驚,邊分到心理佢啫!

    回覆刪除

  2. 我果是都係老公﹐同媽咪陪我 ( NZ 可以有 2 個人陪 ) ﹐不過臨到緊要關頭個死佬驚到差 D 出左產房門口 LOR ﹐係我媽咪真係全程係我身邊。 到亞女出左世先識行返埋黎剪臍帶。

    回覆刪除
  3. 我老公都係好驚青嗰D人,打針都怕,不過佢到依家十二年後,都好記得叫我用力嘅時刻,因為佢已經見到D頭髮,好想快D見到個仔一面。佢話嗰時都唔記得驚。

    回覆刪除
  4. 有得陪最好,陣痛時可以爪住佢,等佢深深感受生兒養女之過程。我老公全程都有陪我,但最可憐他最後睇唔到最關鍵一刻,真慘! 激死!

    回覆刪除
  5. 快喇....快喇....就快見到肥肥白白嘅Baby.....也替你開心! 加油呀!

    回覆刪除
  6. 陪產好呀,可以比d支持你,雖然我老公本身唔驚,但係到依家佢仲可以好清楚個仔出世既情形,同埋啱啱生完後佢好興奮架!

    回覆刪除
  7. 陪產好....
    肉體痛楚分擔唔到...
    精神上撐你一把都好呀....
    加油~

    回覆刪除
  8. 陪好d, 可能我係開刀啦, 更加需要佢陪, 因為我本身太驚呀! 就係佢陪我, 所以我完住好輕鬆

    回覆刪除
  9. 緊係要陪啦! 你陀左咁耐, 而家重唔到佢真係實質參予同支持你呀!
    而且佢可以只係床頭陪你, 唔一定要面對血淋淋的場面.
    祝一切順順利利! 大小平安.

    回覆刪除
  10. 哈哈..如果係我... 我會陪架... 仲會拎埋相機影老婆個樣 真係要好好記錄...

    回覆刪除
  11. 其實陪係好好多架~一來自己會冇咁驚,二來佢見到你生小朋友生得咁辛苦,佢會錫你多D架~(我見有個BLOG友係咁呀! )



    回覆刪除
  12. 老公都有陪我~~真係好d!
    雖然痛楚沒有減少,但個心真係定d,感覺唔係孤軍作戰~~到宜家我偶爾都問下佢我生時的情景,佢都仲記得!

    回覆刪除
  13. 我老公好驚打針好驚見到血淋淋既場面~ 但佢話一定會陪產~ 希望佢到時可以鎮定d啦~~ 我就交左個任務比佢, 就係生完後提醒姑娘, 比個bb我, 等我可以快d開始喂人奶呀~~ 佢話驚我生完攰得濟喂唔到, 我話所以要你幫手啊~ 就算我攰到訓著左, 你都要幫我扶住bb, 等佢啜下, 先會快d有奶出~ 唔知咁做, 佢會唔會鎮定d呢? 係呢, 你有冇叫你老公睇下discovery果d生bb既節目呀? 我老公好驚睇架! 唔知到時佢頂唔頂得順呢?

    回覆刪除
  14. 朋友試過,當 BB 出世時,老公到最後暈咗。 所有護仕去咗扶佢老公(因為佢幾高大吓)。 返而老婆仲冷靜叫 護仕睇住佢老公。 笨 B 爸爸,媽媽加油呀!

    回覆刪除
  15. 陪生?我果時晚上六點幾要入產房,明明我老公話會在外邊等我生,點知個助產士話比佢聽我應該會響第二朝早至生得,佢就返屋企去訓教。之後我終於響零晨就生左,個助產士仲話幫我走出去通知我老公,誰不知道搵佢唔到,我當時真係有D唔開心咖。不過好彩果時個姑娘叫我睇下我個女響度賴尿,我一睇到就覺得好得意,好好笑 la。

    回覆刪除
  16. 二十年前我生嗰時我老公陪住入候産室.....
    但個時人己經痛到癲......
    老公在傍安慰......但我痛到好忟憎咁同佢講"你收聲啦!"跟住繼續狂吸我嘅止痛噴霧"笑氣"
    入去産房生嗰時......佢哋只會比老公企床頭方向.....唔係床尾.....依家唔知係咪lu

    回覆刪除
  17. I did it with my wife and I can tell it was a priceless experience. I was even the one who cut the umbilical cord and roll the baby out for vitamin K injection and weighing him. When the baby was coming out, I just read the monitor to look at the pressure reading and let my wife to breath the gas when the pressure is climbing. I also let my wife hold my hand and squeezed me when she feel the pain. So I felt the pain, partially, as well lor. Another thing I did was the cheerman, and remind her to "頭向心口" and "push the pain away" to deliver the bub. Hope these all help.

    回覆刪除
  18. 濃情朱古力碰上士多啤梨2010年9月17日 上午6:28

    陪產好呀..起碼佢可以現場支持你..等你冇咁緊張...加油呀

    回覆刪除
  19. 如果你先生係自願既就最好陪產,o係陣痛時佢係幫唔到手,但係o係果刻係好想佢o係我身邊默默咁支持我,到我開左10度果時,我先生聽完d故娘教我點樣方法生bb出黎,佢再o係我耳邊再重覆咁教返我,支持我,我唔使5分鐘就生左個女出黎,果刻真係幫助好大,我陣痛左3日先生到個女,我先生見到我咁辛苦同佢生bb,佢比以前仲錫我多左,生完仲可以影埋第一張全家福tim,叫你先生唔好唔陪產,有錢都買唔到bb出生果一刻ga

    回覆刪除
  20. 笨 B 媽媽 :
    唔好意是,我有D嘢想問 : 唔知你有否做孕前檢查呢?因我是高齡產婦,好擔心呀 .
    PS.記得要影產房全家福呀,好有記念價值.

    回覆刪除
  21. 我都想試下做媽咪的感覺

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: