2010年6月7日 星期一

大肚回憶錄:第一次感受到笨 C



(上面的圖片當然不是我的肚子啦 ~ 應該是電腦合成圖,原出處已不詳
 
相信就算肚子很大、胎兒踼得很起勁時,也不會見到腳板仔吧
)

我的早孕期 (1-3 個月) 沒有孕吐,肚子不大,體重早期又上升得慢 (到 16 周時才升了 2 磅) 兼且有幾次作小產的經歷,所以我一直覺得好唔實在 簡直係度日如年

直至 16 周多的某天,晚上就寢前睡在床上,突然感到下腹一陣輕微的震動 ...   好似有一條魚在裡面翻了翻身
咦 ~ ~ ~ ~ ?
很肯定不是肚皮的脈搏、也肯定不是腸子蠕動
(點解咁肯定?因為我日日都摸個肚期待胎動的,摸左 N 咁多日,所以好清楚脈搏和腸動的感覺 )
就係這樣的一下,然後整晚就沒再動了 ~ 但我已經開心到飛起
終於第一次感受到笨 C 的存在了 ~

在親子網站,看到別人說第一胎是很遲才感受到胎動的 (一般是 18-22 周),第二胎媽媽有經驗,會較早感受到胎動 (早至 15-16 周)
我想是因為早期的胎動很輕柔而且不常有,所以不容易感覺到啊
我都係要訓o係床上,好安靜時才會感受到的

其後的每天,我都在期待笨 C 再郁
但如之前所說,早期的胎動都很輕微,所以有時是臨睡前感覺到一次半次,有時是沒有的 ~ 多數感到她在轉身 (有東西在滾動的感覺) 而不是踼,我想是因為那時候她的腿還不是很長吧 ~ 所以我常跟笨 B 爸爸說,笨 C 今天又在扭 pat pat 了

之後大概 19-20 周時,就感到較頻密的胎動了,但多數都係平敞時才感到,因為這個階段都還未很大力呢

然後,到了最近的 22-23 周,笨 C 又長大了,現在的她是屈著腳睡在子宮裡的,空間比以前少了,所以郁一郁我都感覺到了   連白天坐著時都感覺到呢 ~ 而動作款式也多了,有時是翻身,有時是打拳,有時是踼腿啊

人家說,胎動是一種很幸福的感覺,是媽媽們的專利
每天都在這樣溝通著玩耍著,所以媽媽跟 bb 先天感情就特別深厚
我覺得真是很對呢 ~   笨 C 你話係唔係啊 (我又在騷擾笨 C了)


我的 facebook 專頁,緊貼每天心情 + 芝麻綠豆大小事 ~





38 則留言:

  1. 好奇妙呀!

    回覆刪除

  2. 我第一次 FEEL 到小 B 郁﹐係 16 週既時候﹐係候機室等緊上機返 HK ﹐跟住係飛機大氣流既時候又郁左既下。

    回覆刪除
  3. 這幸福的感真的只有媽媽獨享...

    回覆刪除
  4. 我重以為係你個肚.

    回覆刪除
  5. 嘩哈哈,上次見到笨C訓醒時都好想感受下她玩踢腿 話時話我話比班主知你家有家庭暴力事件,衰嘢班主竟然話要封B爸做偶像。 佢咁衰,下次有好嘢食一於唔好比佢食,比晒我食

    回覆刪除
  6. 我嗰陣成日拖住佢哋隻腳仔行街,因為一日撐到黑!我試過睇中條裙仔問阿女鍾唔鍾意,佢申我一腳我就去比錢!wahahahahaha!

    回覆刪除
  7. 仲以為你犧牲色相添, 所以走0黎睇下 !
    其實唔一定睇唔到手腳架, 當日我陀住呀仔坐緊車, 佢忽然間一個拳頭由肚與胃之間伸出, 係伸手出拳咁, 成個拳頭伸出好誇張咁超出我個圓形肚, 好恐怖, 好似拍恐怖片, 我今時今日都仲記得好清楚.

    回覆刪除
  8. 仲有仲有peter 仔、蟹醬長通粉、薯片、茶果、牛油果醬餅干等等未能盡弟錄的小食,你唔好話比肥仔知你 全 部 食 晒 如果唔係實嚇死肥仔 我昨晚晚飯時都竟然仲食到嘢,我都唔輸蝕 可惜我食唔到班蘭蛋糕,唔知咩味。唔怕下次再食過^^

    回覆刪除
  9. 好sweet ah.. 媽媽加油

    回覆刪除
  10. 看你說得很期待似的,但我看來就好似好恐怖,個肚皮感覺好薄,俾個BB又踢又碌,聽落好似會好痛咁!
    再一次證明愛真的很偉大!

    回覆刪除
  11. 胎動既感覺真係好奇妙架 ^^ 我都要珍惜多D呢種感覺

    回覆刪除
  12. 生命真係奇妙呢...

    回覆刪除
  13. 我以前是懷孖b的, 那時的感覺更強烈呀! 試想過她們會不會正在打架.

    回覆刪除
  14. 我晌facebook見到你幅相,仲以為笨C咁誇添!

    回覆刪除
  15. 好多媽媽陀住bb 時都話bb 會踢踢同打拳,可能我陀孖b,佢地只會扭黎扭去,正如妳話齋,好似條魚咁,未試過出手出腳。

    回覆刪除

  16. 遲 D 仲誇張呀﹐我 34 週之後﹐次次我個女郁親都搞到我成個肚郁﹐好似異形噤。

    回覆刪除
  17. 第時仲要密d添呀~我個時食完野之後既胎動會好勁,可能多左d食物係肚入面,迫住亞b...哈哈~!你會見到有d野頂起你個肚皮,然後由左至右或者無定向咁掃過另一邊~不過其實到後期,會有少少唔舒服架...不過都會好開心架~祝你快d有哩個感受

    回覆刪除
  18. 嘩~~好勁呀!!影到 我果時都好想影,不過次次亞女都唔合作,只影到佢郁咋!!呢d相真係要好好keep住呀

    回覆刪除
  19. 我阿媽話唔好成日摸佢喎, 第時難揍 ... 可能係知你好鍾意佢, 會扭你多D瓜. 等佢再大D, 你可以試下播MJ 或 星戰, 佢即刻嚇到跳舞, 包你感覺到佢既存在, 然後忍唔住叫停D音樂, 好似我咁.

    回覆刪除
  20. 呢種感覺真係要有左BB先會知WO..@@
    不過我見我舅母有左果陣,個B真係郁黎郁去,仲見到佢個肚會有個位突起左架~(唔知係手定腳!@@"")
    不過輕輕摸下佢,佢就唔會撐得咁犀利呀!
    真係好神奇..=V="

    回覆刪除
  21. 隻腳仔好得意呀......

    回覆刪除
  22. 剛剛睇到的,住村屋多蚊呀 要小心啊~~
    孕婦使用含避蚊胺驅蚊產品對胎兒有害 一項調查發現,市面超過九成驅蚊產品含有化學物質「避蚊胺」,但絕大部分孕婦不知道會影響健康。負責調查的港九藥房總商會表示,「避蚊胺」會令細胞死亡及畸形,孕婦使用含「避蚊胺」產品,會有較大機會誕下畸胎,一般人長期使用,亦會出現嘔吐或神經中毒等情況,建議使用含天然成分的驅蚊產品。

    回覆刪除
  23. It's really amazing ya!!! BB 依家郁得多唔多呢?

    回覆刪除
  24. 我果時18週先開始有胎動

    回覆刪除
  25. 感受到你的喜悅! 差點比相片呃了, 以為是笨C腳印印哩 !

    回覆刪除
  26. 有無俾D胎教歌仔BB聽吓...我懷孕時BB, 有時聽聽吓, 動作都會大些, 同多些....希望你一切順順利利~~~ 期待BB健健康康出世 ~~~

    回覆刪除
  27. 呢排Emily好似有過度活躍症咁,由朝到晚都無停過,我愈話佢,佢愈踢得厲利。。。而最令我難頂的,係佢從來都唔俾我側睡,一打側個身佢就狂踢,我咁大個女都係側睡o架嘛!真係好唔慣!! 直到尋晚我至良心發現,同Emily認錯,因為之前鬧得佢太多,又唔體諒佢o係肚入面地方細,想郁下都俾媽媽鬧。。嘻嘻!佢今日好明顯斯文o左好多。。。有時我會諗,究竟佢係咪真係聽得明我講野既呢?好似行完雷之行果晚,佢又想大反翻,我不停搓佢同佢講唔洗驚,佢好快就訓左無晒動情喇! 係呢,而家BB成日郁,你夜晚訓得好唔好?

    回覆刪除
  28. 真係好神秘, 好奇妙

    回覆刪除
  29. 笨B媽媽,
    首先恭喜妳,祝妳同笨C都身體健康!
    我都覺得這種感覺好奇妙(當你摸著肚皮感覺到BB在動),因為有一次朋友大肚去探她,她已經差不多到要生的日子,當晚我們談天,她話我知BB在動,我看不到,於是她叫我摸吓她個肚皮,其實我唔知點解有D驚,怕自己唔小心會弄傷朋友,所以初初唔敢摸,於是我朋友捉住我隻手放在她的肚皮上,一會BB真是在動,我當時的感覺覺得好感動,有D想喊,但是真是好奇妙,非筆墨能夠表達得到最好。
    GW

    回覆刪除
  30. 你估你幾時煲薑醋?上次見面唔記得拎埋個光波爐過你玩,等下次房太話黎時,我帶埋黎先。

    回覆刪除
  31. 開始時我都覺得好新奇同埋幸福, 到最尾呢個月訓覺既時候簡直係攞你命.

    回覆刪除
  32. haha~~唔好意思,真係冇睇內文,因為俾左張相吸引左

    回覆刪除
  33. 完全感受到你果種幸福的感覺呢.....

    回覆刪除
  34. 只有媽媽才感受到的幸福, 我個時常常偷笑

    回覆刪除
  35. 沒來訪好一陣子了~原來笨b 媽媽快要改名笨 C 媽媽喔 ~ 恭喜恭喜

    回覆刪除
  36. 我都在16週多時有第一次應該是胎動的感覺,好期待再有真實D的感覺.現在剛剛20週,预產期是1月1日.祝天下的BB健健康康,快高長大.

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: