2010年5月31日 星期一

大肚回憶錄:媽媽的傻話

【大肚回憶錄:媽媽的傻話】

人地話,胎兒自四個月開始便能夠感應聲音,所以爸爸媽媽們可以多跟 bb 說話
不過,我發覺我自己好早已經對住個肚自言自語,唔理笨 C 聽唔聽到
例子包括:

【晨早起身】
喂喂 ~ 笨 C 你起左身未呀?我地要起身啦!好晏啦!咁晏起身會俾爸爸鬧架 ~

【想賴床時】
笨 C ~~~ 媽咪好眼訓呀 ~~~   你係咪都係好眼訓呀?係呀 (幫佢答埋)?咁我地不如訓多一陣咯 ~~~

【抬買餸車上樓時】
嗱 ~ 我地一齊用力呀下笨 C (以龜速逐級把買餸車拉上樓) 嗱小心呀下,我地一級一級o黎喎 ~ 千祈唔好急 ~ 
(抵達門口) 嘩 ~ 笨 C 你睇下我地幾叻叻?我地將架咁重o既車拉左上o黎喎 ~

【俾突如其來o既事嚇親時】
(一邊搓肚) 笨 C 笨 C,頭先有冇嚇親呀?唔驚唔驚,有媽咪o係度!  笨 C 好叻o既!唔驚o既!(其實自己嚇親 )

【想偷食時】
笨 C 你話我地開左包薯片o黎食好唔好呀?媽咪好想食呀 ~ 你係咪都想食呀? 我地食少少啦好唔好?

【便秘中】
笨 C 呀 ~ 媽咪疴得好辛苦呀 ~ 又唔敢用力驚整親你喎 ~ 不如你叫大腸叔叔幫下手丫 ~


(以下圖片來自 www.corbis.com)


以上例子係咪好好笑呢?  以上其實係輕鬆版 ~

其實我最早期係因為陀得唔太穩,日日擔驚受怕,所以先猛咁同笨 C 講野架咋 ...

【流血作小產時】
笨 B ~ 笨 B ~ (那時候未知男女) ~ 你點呀?你冇事丫嘛?媽咪流左好多血呀 ~ 唔好嚇媽咪呀 ~~~   你要爭氣呀 ~~~ 至多媽咪應承你,你健健康康出世,媽咪唔會逼你做功課同埋上興趣班丫 ~ (嘩咁早已經作出咁大讓步!)

【未知性別前】

bb ~ bb ~ 你係男仔定女仔呢?男仔女仔呢,媽咪同爹地都好鍾意架!一定唔唔重男輕女,你唔駛擔心啊

【子宮收縮時】(註:有一次半夜收縮得好厲害,好驚)
笨 C ~ 唔好嚇我呀 ~ 你有排都未夠期出世架!你識唔識數日子呀?我教你丫!你應該係 9 月 29 號出世喎 (重複數次驚佢聽唔清楚 ) 嗱今日係 X 月 X 號,咁即係你仲有 X 個月先出世架!唔好咁心驚呀知嘛 ~~~

【唔想早產】(註:因早期不穩定,實在太多胡思亂想
)
笨 C 笨 C,媽咪知你好心急想出世見下我,不過媽咪想你準時先好出世呀!嗱 ~ 如果你真係好心急,最少最少都要放埋暑假、八月底先好出o黎呀 ....



我的 facebook 專頁,緊貼每天心情 + 芝麻綠豆大小事 ~





2010年5月28日 星期五

大肚回憶錄:順其自然

【大肚回憶錄】
日期:2010年2月1日

話說上次的"失敗"是在 2008 年 8 月 (好記得入院當晚是奧運開幕式,因為在病床上看)
經過大半年的中醫調理,2009 年中又再開始研發笨 B
為了不"亂發子彈",在網上買了些排卵測試條來用
打算有排卵的日子才"做功課"

但幾個月都沒有中 ... 為甚麼呢?
可能有時結果不明顯,睇錯左 .... 有時 check 到排卵但又"唔得閒"、很倦各類原因,所以沒有做功課   這樣反而增加了壓力
所以幾個月後,決定不 check 排卵期了,順其自然罷 ~

估唔到,唔再計算的時候,就真係得左啦
都算是意外驚喜,因為農曆年前工作好忙好忙,心情煩燥
肥仔中醫個個星期幫我把脈,都話我應該未有,就算有都好難陀

咁點解無啦啦會驗孕呢?係因為咁o岩師姐 F 回港度假
我同佢講起正在研發笨 B 一事,最近周期過了 10 日未到應該是心情煩燥關係
師姐 F 就話驗下啦!冇壞o既!頂多係o徙支棒棒

反正屋企有平價萬寧驗孕棒 (之前幾個月都用它,個個月落空,我仲嘀咕唔知係咪平野 check 唔到
o徙左都唔肉赤,就驗下喇!
第二天早上起床就驗晨尿,嘩 ~~~ 即刻出呀條紅線!!! 

我心裡一喜,暗忖結果咁明顯,「呢個應該得啦卦」   果然係 .... 得左!



曾經滿懷希望想生老鼠仔 (夠靈活)、想生豬仔 (夠福氣)
仲計埋這些生肖哪個月份出生最好
但原來精密的計算,都抵不過命運的安排

不由我不信,萬般皆是緣啊!仔女都是緣份呢 ~

【後記】
原來萬寧驗孕棒係得架  我以前怪錯左佢了
大家唔駛用三倍錢買曼仔了   (以前每驗一次都好肉赤)



我的 facebook 專頁,緊貼每天心情 + 芝麻綠豆大小事 ~



2010年5月26日 星期三

好有趣的 IKEA 新網頁

自從開左個 facebook page 之後,呢幾日瘋狂咁上  
因為寫 blog 未必可以日日寫嘛 (邊得o黎咁多話題寫成篇文

但 facebook 寫句 status 就話咁易   可以得閒無事就 update 下

剛發現左原來我最鍾意逛o既 IKEA 都開左 facebook page (按此觀看)
仲開左個新網頁 www.lovewhereyoulive.com.hk



個網頁好得意的,有一家人 (叫 Tang Family ... 點解姓鄧呢下 ?)

最得意係可以 click 入佢地屋企參觀,click 落o的傢俬度呢,佢會彈個視寫出o黎介紹o個款傢俬架!  (下面呢張圖,我 click 左落布梳化度 ...)

好有心思啊!



呀仲有個問卷調查,填完之後有 coupon 攞番架   我填好之後即刻收到佢地電郵通知話有 $20 傢俬優惠券,6 月中會 e 俾我云云 ~ 仲有抽獎,抽中有 $5000 禮券添啊!都有成 10 個名額架 ...   如果抽中左,我就可以幫笨 C 瘋狂購物啦




我的 facebook 專頁,緊貼每天心情 + 芝麻綠豆大小事 ~



Linkwithin

你可能對以下文章有興趣: