2010年4月8日 星期四

超鮮美梭羅魚湯

最近街坊小魚兒教我煲左個超鮮美的魚湯,材料是梭羅魚 (俗稱貓魚)
這種魚非常便宜 (笨 B 爸爸今次才買了 $8 一斤!) 每條只有手指尾大小,估唔到咁好味
我覺得簡直仲好味過用大眼雞煲湯
正正正正正



魚太小了,都唔知點劏
笨 B 爸爸話我知唔駛劏架,唔信佢,上網查下又真係喎
用盆子盛水浸洗一下,然後晾乾水就可以煮了



先煲好一煲熱水,另外在煲裡用薑油先煎香梭羅魚



香味溢出後,就灒滾水 (重點:一定要用滾水)



開始煲了 ~ 我用 2 度火 (細火) 煲了 45 分鐘,再轉 1 度火煲多 45 分鐘,共 1.5 小時



1.5 小時後,水份蒸發不少,湯色極為奶白



其實魚肉還有少少味道的,但因為太小太碎,還是隔掉罷
點解唔用魚湯袋?ummmm ... 因為我覺得唔用好似出味o的



再落薯仔蕃茄,滾起後轉 1 度火煲多 30 分鐘
(我預先已用微波爐先把薯仔粒叮到半熟的,否則咁短時間一定煲唔爛呢) 
加胡椒粉和鹽調味
我喜歡大量胡椒粉啊,正



因為今次用普通煲來煲,水份蒸發了很多
最後只剩 2 大湯碗的湯 (約 4-5 飯碗吧)
所以很濃很鮮甜啊!

不過太耗費時間和能源了,下次再用高速煲睇下效果如何先



【後記】

我們今次買了 1 斤魚,加了 3 公升熱水煲,煲完剩番 1 公升多少少 (淨湯)
但中途是用極細的 1 度火煲,避免水份蒸發太多
若大家個爐沒有極細火這個選擇,要留意水量變化
如中途需要加水,記緊要加熱水啊,千萬不要加凍水
因為凍水會令本來熱辣辣的材料蛋白質凝固,就煲不出味了

謝謝小魚兒教識我呢個超美味的魚湯啊 ~

35 則留言:

  1. 厲害!我只知煲魚湯一定要加滾水,如果用凍水,就點都煲唔出奶白的魚湯,但就從來都無去研究過原因呢!
    我尋日用咗個新煲(係好似LC的琺瑯煲,不過係國產貨),先用1度火煲半小時(因為水太滿,唔可以太大火),之後再用2度煲多半小時,因為個蓋夠晒重,所以唔係蒸發好多水,都仲有4大湯碗飲,同用高速煲差不多,味道真係濃啲喎,不過小魚公飲到第二碗時,話用呢個煲,煲出來有金屬的味道喎?但我又唔多覺?

    下次試試加長高速煲嘅時間,煲夠20分鐘,睇睇有無唔同先?

    回覆刪除
  2. 點解...睇相都嗅到香味既? 奶白色既魚湯,好想飲呀!!!

    回覆刪除
  3. 不過咁煲會唔會有魚骨?

    回覆刪除
  4. 原來煲湯都得架 ! 我只係用黎整比狗狗做零食架 :P 一定要學妳咁整一次先 , THX !

    回覆刪除
  5. 我媽子都中意煲呢個湯, 不過佢用白菜 instead of 蕃茄薯仔.

    回覆刪除
  6. 我小時候最愛飲梭羅魚湯, 超好味!! 但現在已很少見到梭羅魚了. ....呀, 梭羅魚好似唔喺貓魚, 貓魚好似喺另一種魚, 但忘記了

    回覆刪除
  7. 下次試下買d石九公魚,包你一次愛上

    回覆刪除
  8. 點解蕃茄同薯仔唔一齊煲,或者遲過魚落?個渺湯用來煮麵仲正
    坐月時蕃茄煲大眼雞或梭law魚湯係上奶架!

    回覆刪除
  9. 梭羅魚湯我成日煲,因為貪佢夠平,其實用嚟煲冬瓜都會好甜!

    回覆刪除
  10. 個湯好白, 睇到都覺得好味呀! 睇完今晚知道買咩送了, 嘻嘻~!

    回覆刪除
  11. 好味呀! 我比較賴,通常煲完後加栗米湯就算啦!

    回覆刪除
  12. 唔使 , 好易架咋
    http://hk.myblog.yahoo.com/carlong2002/article?mid=59965
    自製 貓 狗 小食 - 高鈣魚乾仔
    妳決定左養狗仔未呀 ?

    回覆刪除
  13. 其實梭羅魚經常有,只係你冇為意到,通常都係十蚊兜!有冇試過用沙鯭魚滾湯,一樣咁好味!

    回覆刪除
  14. 梭羅魚我記得我媽媽係話要剪架,不過我都係未學過佢煲呢個湯。我們小時常飲,說對小朋友骨質好。 你竟然咁快煲咗,真令我回味

    回覆刪除
  15. 梭羅魚湯我又係成日飲ge~!
    不過我媽鐘意煎魚時加少少米酒(因為我起怕魚腥,少少都唔得0個隻 )
    會香D嫁~!
    呢排我媽成日滾梭羅魚紫菜湯,正~!!

    回覆刪除
  16. 成日係街市見到啲魚仔,原來係梭羅魚,見到你個湯好正,等我都整返個先,多謝你啲分享, Thank !

    回覆刪除
  17. 梭羅魚係我媽媽經常煲既湯呀,好好味!我記得配過,白菜/紅蘿蔔(好清甜)/蕃茄/豆腐等 佢有時會買幾斤煲埋攤凍變左做一壺湯啫喱,想飲湯就加水翻熱 或用黎做湯底煮粉,好方便

    回覆刪除
  18. 我從來無試過用這些小魚煲湯, 一直以為只是給貓吃的, 這次看了你的做法, 我會嘗試去買來試下, 看樣子應好好味, 有時見鯇魚檔有魚骨時, 我會買來煲湯, 大約要買15-20元, 否則會太淡味, 也是先煎香, 拍一舊大薑, 先煲好滾水, 然後把煎香的魚骨加入滾水內, 再放入佛掌瓜大約煲20-30分鐘左右, 煮法跟你接近, 我也會喜歡用白菜, 白菜先炒一炒後加入已出味的湯內, 滾約5-10分鐘即可, 味道也很好的, 謝謝妳的分享....

    回覆刪除
  19. 你飲多點這類湯水是好的呀,有益呀!
    不過如果用高速煲,我怕魚會很爛。

    係呢,你懂看日文嗎?我要找幫忙啊!

    回覆刪除
  20. 好似好正咁WO!
    D魚魚咁細條,都可以煲得出魚味,都好勁WO!@@

    回覆刪除
  21. 呢個魚我成日煲, 其實中火20MINS+30中細火, 就已經OK, 隔起再放番茄同POTATO滾10MINS即成.
    又或者只加勝瓜也很好飲, 非常簡單~

    回覆刪除
  22. 個魚湯好正喎!下次我都要試下!

    回覆刪除
  23. 我屋企都有煲呢個湯 !! 好好飲 好鮮甜 ^^

    回覆刪除
  24. Jessica Tak Tak Lui2010年4月11日 上午9:07

    好介紹,今晚試下先。

    回覆刪除
  25. Jessica Tak Tak Lui2010年4月11日 下午3:06

    今晚已試咗喇,超好味 。

    回覆刪除
  26. 個湯好正, 一睇就知好濃

    回覆刪除
  27. 你好笨 B 媽媽想請教你一個問題關於電磁爐的,我跟用同一款式電磁爐(其實是我跟你買的嘻嘻),我發現用 1 度火時,佢既電源好似不停斷斷續續咁,好似一熄一著, d 湯就滾 3 秒然後又靜止 3 秒又滾 3 秒不停循環,你係咪都係一樣架?係因為電源問題定點呢?所以我一直都唔敢用 1 度火架?想請問你知道這是什麼原因嗎?

    回覆刪除
  28. 明白!thanks 笨B媽媽!

    回覆刪除
  29. 我都鍾意這樣煲, 好味..

    回覆刪除
  30. 多謝妳 ! 我今晚整左啦 ! 真係好鮮味 , THX !
    http://hk.myblog.yahoo.com/carlong2002/article?new=1&mid=62734

    回覆刪除
  31. 呢隻魚我由細食到大, 以前根本就唔值錢, 宜家要買十蚊兜~ 百物騰貴呀!!!

    回覆刪除
  32. 吓 ! 咁又係啊 !當時我又諗唔到 , THANK YOU 妳 !

    回覆刪除
  33. 你好 ^^
    剛在網上找緊煲魚湯的資料 , 看到你這個網 ^^
    我想問你 , 你煲小魚的那個是煲還是鑊呢 ?
    可否告訴我呢 ~ 謝 ~ !

    回覆刪除
  34. 咁..你都係用呢個煲煎小魚丫 ?
    呢個煲你响邊樹買0家 ?

    回覆刪除
  35. 好神奇丫 , 我一直以為魚只可以用鑊煎.....原來用煲都可以呢 , 你好勁丫 (欣賞的聲音 )
    那 , 如果我屋企有一個美亞不鏽鋼煲 , 平時會用來滾滾湯咁 , 唔知好似你咁試下煎 d 小魚得唔得呢 ......

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: