2010年4月30日 星期五

家有檸檬初長成

去年跟街坊去天水圍親戚家「劈柴」遊樂時 (按此重溫)
拿了幾枝檸檬樹枝回家 ~

插在泥裡最初幾個月,毫無動靜,真不知道它們是死是活
好在街坊已預告了它出根極慢,否則我可能一早已「做低」左佢地

好不容易長出第一片新葉子時,真的很興奮啊!
因為這種檸檬樹的葉子好香,跟泰國檸檬葉差不多
暗忖將來煮泰菜時可以自給自足,好開心

最近竟發現其中一棵有 BB 添啊   從它開花到結果,過程真是很有趣呢!
將來長大後,跟黃色皮的檸檬 size 差不多,不過這種檸檬的皮是深綠色的
極厚,而且沒甚麼果汁,所以用途不太大
還是它的葉子較有用



哈哈,為甚麼左邊那棵好似細咁多?



因為俾我剪左兩大枝落o黎呀!  (呢度係其中一枝)



因為今個星期六去街坊屋企 BBQ (超期待!要掛個晴天公仔出來!)
所以我就拿這新鮮的檸檬葉醃了好幾塊的豬頸肉
今次落足料,每塊豬頸肉都被醃料滿滿蓋著
嘩 ~ 好香!應該好好食!  超期待超期待
希望天公造美,我想吃 BBQ 版的豬頸肉啊啊啊 ~



同場加映:泰式豬頸肉的醬汁,也是落左檸檬葉的 



後記:豬頸肉食譜在大少奶 blog 裡可找到
http://hk.myblog.yahoo.com/Delicatessen-ivanbee/article?mid=47683

2010年4月26日 星期一

餓底之【魔鬼派對】

昨天餓底們聚會,今期主角壽星女定下的主題是【魔鬼食物】,即是邪惡但好味,唔係高膽固醇就高脂肪,又令到你忍唔住口欲罷不能o既 ... 總之食完要面壁思過的美食,哈哈哈!

由於太邪惡的關係,大家努力戰鬥完三個鐘都仲要打包埋番屋企食   

【日式意粉醬配西班牙豬腿車打芝士法國麵包】by 大少奶
呢個配搭看似簡單,但味道非常夾,烘完個包包之後又脆又香,食唔停口呀!



【蟹肉醬脆餅】by mini
黃色那些就是蛋黃醬,係 mini 自己用新鮮蛋黃打架!加左蒜末,辣辣地超好味,非常特別的味道!



【日式芝士蛋糕】by 我
哈哈,前幾日咪焗左我生平第一底日式芝士蛋糕o既 ~ 呢個就係第二底啦!



【膽固醇大雜會沙律】by 飛 e
toppings 有鵪鶉蛋、炸魷魚圈和炸鮮蘑菇,下面鋪滿沙律菜
一睇就知大製作,飛 e 好好心機咁o係廚房裡面炸 ~~~ 炸 ~~~ 炸 ~~~



【蟹籽吞拿魚醬釀蛋】及【BB 醬通心意粉】by GG
見到烏吱好認真咁整呢兩味小食,果然結左婚係唔同晒



【焗牛油雞翼】by 事頭婆
焗完之後太邪惡,所以事頭婆o係廚房用廚房紙索左好耐油呀



【黃金蝦】及【旺角肥媽馳名鹵味】by 茄
阿茄力戰狂彈油黃金蝦,雖然佢話好失敗,但其實都 ok 呀!



【銀鱈魚西京燒】by 繼繼子
銀鱈魚和京燒醬係好朋友,好夾呀!蘸 BB 醬吃,更加 creamy!
P.S. 京燒醬係繼繼子自己用日本白麵豉、味醂和清酒調的



【芝士焗帶子西蘭花】by Diana
Diana 做左媽媽之後復出之作   邪惡得o黎都好抗氧化架



【台灣邪惡腸】by Tan Tan
掛住食,竟然唔記得影相 ... o係黑橋牌網頁借住張相o黎用先



【無敵邪惡 Banoffee Pie】by 塵強

材料有忌廉、香蕉、焦糖拖肥、朱古力批底 ...仲有裡面o既朱古力果仁同埋朱古力脆脆!簡直係鑿左"邪惡" 兩個字o係頭殼頂!



【綠茶 Opera】by Vanlily
病左的 Vanlily 都特登為壽星女整左呢個綠茶 Opera,仲老遠拿出來,大家都好感動啊 ~ 餅神的蛋糕幾時都咁好食,笨 B 爸爸仲一口氣掃晒我攞返屋企o個幾件添呀



飲飽食醉,大家圍埋一齊玩新版大富翁 (呢 ... 冇地圖o個種 ... 淨係揸住o的牌o黎玩,好似玩 UNO) 我太 out 啦,所以睇極都睇唔明呀





2010年4月24日 星期六

我的第一底日式芝士蛋糕

很久沒有焗蛋糕了,我個焗爐就快封晒塵啦 ~
最近在另一位 blog 友【通之廚房】處看到一個日式芝士蛋糕食譜 (按此觀看)
材料和做法都不是太複雜,就試下佢先!

那個食譜做的份量應該是一磅蛋糕,但我沒有 size 剛好的模具
所以用個大模來做 ~



第一次就成功了,好開心啊



話說日式芝士蛋糕焗好後不是立刻吃的,要先雪一晚才吃
但剛剛出爐香噴噴,都係忍唔住切左一片o黎試   好好味啊!
質感很濕潤,合格   yeah ~




2010年4月20日 星期二

鹽燒三文魚骨

有時逛吉之島超市,也會留意到壽司部附近,經常有些三文魚頭和三文魚骨出售
很便宜的,一般來說都是十幾元而已,但係大大份架
最重要的,係非常新鮮,拿起來嗅嗅,完全沒有像急凍品那種腥味
我想應該是壽司部用拆原條三文魚來做刺身、壽司賣,剩下來的頭和骨呢

之前已經買過三文魚頭試過了,質素真的相當不俗
今天忍不住買了一包骨腩試下 ~ 看,三文魚的色澤,和新鮮刺身一樣啊



攞上手已經知好「墜手」,返到屋企拆開包裝,竟發現是四大塊!
沒有包裝阻擋,更加試出真章
拿近鼻子再嗅嗅,簡直就是刺身的新鮮味道嘛  (安全起見當然我不會拿它生吃喇 ...)

大手地灑椒鹽 (因為三文魚較肥膩,所以鹹香一點更惹味),份量幾多沒量度過,總之就薄薄地一層鋪滿肉面啦 ~ 然後醃了一個多小時



用光波爐燒,燒到兩邊微焦,灑點青檸汁吃
嘩 ~ 好味 !!!無得頂!!!
光波爐焗肉類真係好出色,可以做到表面焦脆但裡面 juicy 的效果
(因為我拿了其中一塊去煎 ... o的肉鞋晒  ...)

雖然是魚骨但其實附著很多肉
連魚骨一起燒好香口,而且不會太膩啊!
用來做小吃或做餸都很不錯呢!   我覺得仲正過燒三文魚頭呀 (查實係因為我唔識食魚頭 ... 次次都只吃旁邊的肉
)



話時話原來吉之島超市做緊 9 折,唔怪得咁逼人 ... 不過要有 Jusco 咭先有,即係唔關我事

邪惡好味腸 $88/ 2 包,如果我有 9 折就會買,但我冇,所以唔買   我話左一定要跌破我心理關口 $40 先買架 ~ 哼 ~




Linkwithin

你可能對以下文章有興趣: