2010年2月25日 星期四

惠康都有寧波湯丸賣啦



呢張相係新年前影的,那晚才能擠出少少時間去辦點年貨
(查實也不是甚麼年貨,只是買點糖 )

發現原來我跟笨 B 爸爸最喜歡吃的寧波湯丸,而家o係惠康都有得賣了
以為呢款湯丸只有少量製造才能咁高水準
一擺入超市,儲存期長了許多,應該冇咁煙靭卦?

因為貪吃的關係,買回去沒兩天已煮來吃了
口感味道跟以前買的沒兩樣,仍然是很煙靭啊!
不知是否因為第一批來、新鮮做的貨才這樣好?
因為糯米做的點心,好像放久了會沒那麼煙靭的

希望這款超市版的寧波湯丸水準能夠維持 (遲o的再買來試)
如果 ok,咁我以後就唔駛老遠去大埔或銅鑼灣買啦
P.S. 惠康特價 $16.90,出面唔駛特價 $16

2010年2月22日 星期一

家鄉手信

新正頭,陳師傅和陳師奶返左福建鄉下度歲
本來我都打算跟佢地返去的,但後來計過時間太緊逼,所以作罷
(因為我鄉下好遠 ..... 香港沒直接車前往,從深圳搭長途巴士也要 8 小時!)

陳師傅每次返鄉下,都會帶好多手信返來
全都是不值錢的東西,但香港很少看到的

大家估下係乜?(答案在圖片下面)


米粿 (類似上海年糕,切片煮湯或炒)


麻棗 (麻花糖)


金桔


花生糖,表面的是白糖製的


綠豆餅

2010年2月19日 星期五

恆溫熱水澡

呢幾日,真係凍到要「拑」救命鐘   暖毯暖水袋暖爐暖手蛋咩都出動晒
不過,都好似冇我地第一年搬入o黎時咁凍
好記得o個年,睡房裡面都係得 6 度!!!

講起暖爐,我想報告下,2年前買的 JSA 牌發熱光管式暖爐已燒掉,渣斗!
而 3 年前買的 Bionaire 米格熱能還是性能良好,抵讚!
我估因為光管始終有壽命吧!第時都係唔買光管式暖爐了,兩三年丟一個,好唔環保啫 ~
又話時話,我想問下,用緊二合一冷暖氣機的街坊們,你地部機好嗎?
我成日想裝,但笨 B 爸爸聽朋友講呢類機好易壞啊 ~

呀 ... 講返正題
今次係講沖涼   因為咁o岩有個 blog 友追問我們電寶恆溫熱水爐好唔好用

影埋相俾你睇 ... 雖然佢身價尊貴 (都要五千幾一部啊,貴過我個雪櫃 ),但都只係「蝸居」o係我家浴室洗手盤底個櫃裡的   因為佢實在好細部呢!

至於好唔好用,我的答案是「好用到沒話說」,非常可靠,鍾意幾多度就幾多度,唔會時凍時熱,又唔會唔夠熱。尤其是呢o的凍冰冰的日子,沖一個即熱兼恆溫o既熱水澡,簡直一邊沖涼一邊要大叫「siawase」(好幸福啊) ~~~

我覺得就算其他慳o的都好,每天都用得著的電器產品我是一定不會慳的,原因好簡單,就因為日日都用嘛!若然貪平買左個唔好用的,盞篤口篤鼻啊!



後記:
(1) 如果大家想用即熱式電熱水爐,屋企要係三相電先得啊
(2) 否則用煤氣的恆溫熱水爐也很好用,我十年前一見到新出,就已率先買左了 (o個時要七千多一部啊!) 仲買多一部俾陳師傅添。哈哈,我當時唔係發左,只係印證左,我幾咁睇重「沖涼」呢個活動
(3) 有街坊問,即熱式電熱水爐成 18000火,好似超耗電唔捨得用。我的答案是,每天沖涼都係頂多幾分鐘至十分鐘啫,不會很用電。我地兩口子,用埋電磁爐煮食,冬天電費都係一期九百幾蚊啫 (兩個月)。平過住港島區時好多好多啊。
(4) 有關電寶即熱式恆溫熱水爐的資料:http://www.hotpool.com.hk/en/products001.php?sort1=2
要買就要買有液晶顯示呢款,最貴但真係好好用。






2010年2月16日 星期二

霹霹啪啪賀新年

親愛的 blog 友們  

恭喜發財、新年進步、龍馬精神、虎虎生威!!!

上一年忙到年卅晚,所以今年初一至初三,都窩在被窩裡面度過了
幾天沒掂過電腦了,感覺有點與世隔絕,但一點也不「悶」
因為隔離左右的鄰居們,初一、初二、初三大清早都會放炮仗的
這家霹霹啪啪完一輪,又到另一家霹霹啪啪
醒獅會敲著鑼鼓兜著村子裡轉,挨家挨戶去拜年
夜裡間中還會有 fom ~~fom~~fom 的煙花聲
這聽來不像在香港發生的情景
可竟真是在香港啊
一向沒有甚麼節日意識的我,倒是十分喜愛這些偶爾的熱鬧哩 ~




2010年2月8日 星期一

最近更新

最近更新是 ... 我還存在,沒有被外星人綁架
不見了許多天,是因為年底工作上有些事突然令我好忙好忙 (正確來說,是瞎忙一場)
我想我要混亂到年三十晚

故此,如我不能在這幾天再出 blog 的話
就先恭祝大家虎年笑口常開、事事順境
今年好過舊年!
希望我都係喇!

過年後見 ~

2010年2月3日 星期三

粥底火鍋 @ 煮館 (銅鑼灣)

這陣子忙,除了工作忙之外,還有是因為移居外地的師姐 F 回來了
兩個星期裡,竟跟她見了三四次面、吃了兩頓 lunch 兩頓 dinner 一頓糖水
真係見陳師奶都冇見得咁密  
沒辦法,我地太多話要說了,講極都講唔完啊!
話咁快佢又要回程了,要再等幾個月才能見啦!

跟師姐 F 去了銅鑼灣一家叫「煮館」的餐廳吃粥底火鍋



這類有三款套餐可預訂:肥牛鍋、北寄貝鍋和蟹鍋
我們預訂了蟹鍋,三個人吃

鍋子上方那分便是蟹鍋的什錦拼盤了,而另外的蟶子、鴛鴦牛肉和豬頸肉是另外叫的



蟹鍋拼盤全相 ~ 其實都唔少架!基本上三個人都已經夠食 (但我地眼闊肚窄見到咩都想食 ... 卒之咪攪到反肚囉 )



蟶子啊!隻隻有手板咁長,仲郁緊架!才 $68,好抵食!



超超超好味的「一口豬軟骨」,本來已煮到半熟,只需要淥一淥便可以食了
睇番張單,係換購價 $18



肥牛和滑牛的鴛鴦牛肉拼盤。聽說滑牛超正,肥牛一般 (睇o的顏色都知)



因為滑牛太好味的原因,佢地另外追加左一碟淨滑牛 ($38)。但非常大碟,食唔晒啊。



生肉眼筋 ($28) 頗有肉味,而且很有口感



日本帆立貝 ($48),很新鮮



新鮮魚腐 ($28)



打邊爐飲 Lime Soda 特別正!所以飲左兩杯   我見隔離檯飲那杯超巨型的抹茶紅豆,好正好正好正!可惜我食到最後已飽到反肚,所以不能一試。



淥完配料,壓軸緊係食粥喇!呢個鍋很方便,一拎起來,下面的鍋就剩下乾淨滑溜的淨粥水了

我想話呢,呢煲粥水真係甜到痺啊!!!所以飽到反肚都灌了三碗!!!我見隔離檯係打包走的啊 ~



埋單是 $662,跟一般出街打邊爐的價錢差不多。其實我覺得當晚叫的份量是 4 人的。如果兩個人拍拖去,叫一個特色鍋已經夠了!

用粥底打邊爐的地方好像很少,這家的好處是配料食得出很新鮮,好味之餘仲令到最後滾出o黎o個啖粥極鮮味,值得一試呢 ~

【煮館】
地址:銅鑼灣波斯富街 48 號優食橫町 3 樓 E 店
電話:3173-8193


Linkwithin

你可能對以下文章有興趣: