2010年1月31日 星期日

過橋麵檔的滷水拼盤

原來過橋麵檔不止鹹雞好吃,滷水也很出色的

五十多元一個拼盤,足夠二人享用。唔得閒煮飯時,買一個回家送飯已很正



為了讓大家看清楚有咩,我特登將o的餸移晒落隻碟啊 (其實也方便我翻熱)


從左到右,上至下
雞腎、牛舌、蛋、豬寸骨、
腐皮、豬耳、鴨舌
還有墊底的椰菜

好滿足啊



過橋麵檔之前寫過了,大家可翻看舊 blog
http://hk.myblog.yahoo.com/bb-mama/article?mid=7398

2010年1月27日 星期三

開心又美味的大茶飯 @ Al Pasha

嘿嘿 ... 大家一定以為我忘了要繼續寫吧
(或是以為我被人綁架了?)
不好意思,最近工作實在太忙了

好,上回提到我跟我的好姊妹們一年一度都要食餐好o既
今年我忙到講野都唔得閒 (沒誇張 ... 我就快冇氣了)
糖糖又忙於拍拖
所以今年選餐廳的責任就交左俾渣渣了
佢竟然發現了尖沙咀一個新商場叫 K11 (其實尖沙咀近來開左三個新商場囉 ... 我今個月先知) 裡面有間餐廳叫 Al Pasha 的,裝修好有特色,仲有表演云云
咁吸引,大家一致讚好



Al Pasha 是吃新彊菜的,羊肉是主角
但也有其他特別的羊類 (e.g. 馬肉腸、駝鳥肉、兔肉等) 豬呀牛呀雞呀當然也有
但在這裡吃羊,當然是最出色的

有新彊烤全羊食,$1380,但要提早預定



有各種的 Kabab 可叫,我地點左羊肉和牛肉。還有很多款的。

肉串都用了孜然粉來調味,很有大漠風情。不會太濃烈 (孜然粉不是人人受落,但慢慢接受後,會覺得好香) 強烈推介羊肉,燒得很夠火候,但肉質還是很嫰滑啊   而家睇番呢張相都會流口水,真的好好味



呢個好似叫「饢餅」(naan),其實有不同款式的。本來已經想叫,但餐廳竟然話請我地試食


我想話呢 ... 好好食架!o的饢餅新鮮出爐的,好香好鬆軟,用手掰來吃,兩個 dippings 分別係橄欖油和雞肝,非常好吃



都說羊是重點,愛吃羊的我們,當然是點羊雜湯喇,原來是濃濃的蕃茄湯底,然後有些羊雜絲,味道很香但不會很臊,好好喝



有一位與會者唔係咁鍾意食羊,所以另外多叫了一碗海鮮蝦湯。睇o黎好足料。



得幾丁人食唔到烤全羊或烤羊脾 (況且又冇預訂),退而求次點了烤羊小腿,一碟是 4 支的,但我地有 5 個吃羊,所以加多了 1 支。又係燒得好出色!好好味!






新彊古法烤春雞

我發現這裡每一款烤肉菜式,上菜時,石製的長方碟一角都會有一掇額外的辣椒粉、孜然粉和幼鹽,讓食客自己再加味。

烤春雞又係好出色 (呢間餐廳實在令人感動) 又香又嫩,就咁食已經好好味,再自行點些調味粉又再昇華


Al Pasha 是吃清真菜的,餐廳佈置充滿新彊大漠 (?) 風情,情調好好啊 ^^ 話時話,Al Pasha 的消費比我們想像中便宜,叫左咁多個餸,仲有叫飲品 (相對菜式價錢,飲品價錢就真係幾貴下),埋單總共 $1074, 即每人平均 $180。在尖沙咀最貴名廈「名鑄」樓下商場喎!仲要樣樣都好好食,所以我覺得超值哩。



烤兔半只,純粹想試下

兔肉和雞肉差不多味,但沒雞肉咁鮮嫩,其實也是好吃的,但我覺得若叫了烤雞,又未必要叫烤兔了



雜菌煲。不知總共有幾多種菌,很香甜,味道絕對唔寡,非常值得一試!



據說每晚有兩場肚皮舞表演。很精彩啊!!!強烈推介要看 ~



飯後一杯茶,醒神
這壼是石榴茶,有獨特的香氣,有點似羅拔臣啫喱粉!哈哈!但好好喝的



新彊鹹奶茶,都是用牛奶沖的,但有濃郁的奶味



提子乳酪梳打,味道竟有點似小學食o個o的一條條的冰棒 ...哈哈



水果乳酪
聽講乳酪是自製的。但奶味偏淡啊。



這頓飯有得吃有得看表演,食左咁多款野,結賬不用 $1100,平均每人 $180。在尖沙咀區最貴豪宅名鑄樓下啊 ~ 真是十分物有所值 (重點係樣樣都咁好食!!!感動)

結論:
環境一流、氣氛一流
表演很好看
烤肉類非常好吃,特別是羊肉,正正正
菜式價錢非常合理,反而是飲品和甜品定價偏貴
非常滿意,下次一定會再去

地址:尖沙咀河內道18號K11購物藝術館401舖
電話:3122 4444


2010年1月24日 星期日

【大茶飯】的典故

話咁快又到新年。話咁快又食「大茶飯」了!
我以前都提過「大茶飯」這個「習俗」,不過有些新 blog 友可能唔知,等我又簡介一下先

為了呃 post   今次我會寫大茶飯的典故,下次再寫今年去左邊度食

【大茶飯典故】

笨 B 媽媽與兩位好姊妹渣渣和糖糖,自中三起每年一度新年的聚餐。讀書時代冇咩錢,所以大家會努力儲起零用錢和利是錢,新年時一起去食餐好o既。由於錢得來不易,大家都好有「美德」,有不成文規矩,唔準o徙野食淨的,大家仲會互相「監察」。所以年年大家都會食得好飽

好記得第一次的大茶飯只是 KFC 的烤春雞套餐,在太古城吉之島美食廣場吃的。現在的年青朋友見到我寫 KFC,應該會笑吧   但那時候的我們是很少出街玩的 (大家都是深閨的學生啊 ) 而且當年各類的連鎖店都還未入侵西環,所以去太古城 KFC,是盛事啊。

之後幾年好像是吃過一些扒餐、也吃過打邊爐自助餐。中學時代的大茶飯,都是選較平價的選擇。

出左社會工作,大家收入多左,曾經一度追求豪華,講明要食o的平時唔捨得食o既野。所以會去會展吃高級自助餐、也試過去東海鋸鮑魚。

又過左幾年,大家開始有家室,生活也漸趨平實,大茶飯就唔再追求貴價了,轉向追求真材實料和特色菜。重點依然係「一定要有好野食」 

由中三到而家,經歷了這些年 (真係有 n 年咁多 ) 雖然大家生活工作都變忙了,食好野也不再是甚麼稀奇事,每年但我們每年都很期待這餐大茶飯,因為它是我們這三個好友之間的「習俗」  每年臨近新年時,都會不斷談論,是很珍貴的回憶哩。


【今年的大茶飯】
... 下篇再續

2010年1月21日 星期四

旺角

旺角真係冇改錯名,真係好旺
旺到好似行年宵咁
旺到由街頭行到街尾都不禁滴汗
旺到講電話係完全聽唔到對方講乜

對於歸隱田園的我,已經慣左靜靜地
出到旺角真係會頭痛
這算不算村姑症候群呢?

2010年1月19日 星期二

xx 後

最近 80 後被人擺了上檯,令全城鎂光燈都照向這群小伙子
作為 70 後,老老實實我覺得自己跟他們真的是有點 generation gap
(咁我應該講埋我跟 50 後 60 後都有 generation gap
免得好似標籤化)

對於他們勇於表達自己意見,我認為是件好事;因為上一代人太多事憋在心裡,壓力好大
可是,活了不夠三十年的光景,入世未深,可能很多還未體驗「上有高堂、下有妻房」,為了保住穩定工作收入、為了妥善分配家中有限資源、為了維持和諧家庭而受的生活磨練。所以,不免覺得他們思想有點不夠成熟。

家庭是社會的縮影,我非常相信古語說的「修身、齊家、治國、平天下」
顧好自己份內事的同時,自自然然就會發展出另一層次的能力
這是一個自我「升呢」的次序
也是一個責任承擔的層次

每個世代的人,都有他們面對的困難、也有時代獨有的機遇
不要只羨慕別人擁有的,而忽視他們曾付出的
死霸著位置的 50代、60 代固然有
但因不思進取而中年失業中年危機的 50 代、60 代也有不少
因為賺了好多好多錢而最後落得家族爭產老死不相往來的也有不少
所以,不是有錢或有權就代表好叻好開心

我們的上一代,好不容易才找到香港這片安定繁榮的土地,安心發展家庭事業
作為香港小市民,我們享有發聲權力,也可以監察政府的行為
好應該珍惜眼前的一切

經濟是有周期的,市場也在不斷轉變
新一代人也可以創造上一代人沒有的優勢
無論是 xx 後,大家都努力吧!

P.S. 這篇的標題【xx 後】是抄 marblema 的,因為她寫的那篇非常好啊!觀察透徹、中肯到肉,大力推介啊
  (已引用,請按下面的連結觀看)

P.P.S. 年輕人們,若你們不瞭解上一代曾經歷過的,大力推介你們看看以下兩本書。
(1) 龍應台 --- 【大江大海 1949】
(2) 張戎 --- 【鴻:三代中國女人的故事】













2010年1月16日 星期六

泰式青檸汁

最近很忙啊 ... 非常忙啊 ... 忙到目無表情啊 ...
然後發現這裡三天沒 update 了
摷o的舊相o黎用下先

以下呢張相,一睇就知主角係前面碗汁,而唔係後面碟白灼蝦
點解?唔駛解架 ... 因為 ... 白灼蝦有咩好寫呢
但那個青檸汁,配搭海鮮或燒豬頸肉,真係 very very 吉架



咁講下前面碗汁喇
查實係某年某月某日在圖書館借了靚仔廚師 Jacky 的【囍宴】
裡面有類似這個汁

後來有一次在朋友家 BBQ,想整呢個汁但冇食譜在手
所以靠印象亂咁撈,一邊撈一邊試味,試到好味為止
所以份量都唔係好記得了   但就記得有以下材料

(1) 指天椒 (一隻紅、一隻青都夠了)
(2) 蒜頭幾瓣 (後來發現原食譜內是用葱頭 ... 但用蒜頭都好好味)
(3) 青檸半個榨汁
(4) 魚露幾茶匙
(5) 糖幾茶匙
(6) 凍開水少量 (原食譜是沒有的但我覺得太少水份,狂加魚露又太鹹,所以加了水)

就係咁簡單了!一定整到的,若太鹹的話加多點糖、若太甜的話又加番魚露,總之攪攪下就會o岩口味的了
(係咪好不負責任 ...
)
(其實我想話呢 ... 煮野食都係一理通百理明架啫 ...
唔駛驚,失敗乃成功之母啊 )
(又,若然你要跟足食譜的話才安心的話,可以去圖書館找找我說那本書呢)

Linkwithin

你可能對以下文章有興趣: