2010年12月30日 星期四

笨 C 的新玩具 - Jumperoo

上次咪提到想買個 Jumperoo 俾笨 C 玩o既 ~

因為可以鍛練腿部肌肉,又可以 occupy 下佢o的時間和精力

可以做少一陣貼身膏藥 ψ(`∇´)ψ

 

所以,難得一次我話要買o既野,笨 B 爸爸都冇反對

我當然拿拿聲做野啦

我o係網上搵到一個二手的,好新淨,才 $400 啊



笨 C 第一次坐上去,神情相當緊張



唔係好敢亂郁 ...



望住o的玩具唔知點算好



但慢慢地,笨 C 發現個原來可以 un 下 un 下 ...



慢慢試下左腳踏下、右腳又踏下



彈來彈去好過癮,好似坐緊飛船



哇哈哈 ~ 媽呀 ~ 呢個玩具好盞鬼呀!



呼!跳到索氣,要抖抖先 ~



以下四張從 movie 中取出的截圖,可見笨 C 對呢張彈彈椅幾咁滿意






想睇晒全片,就按此到 facebook 睇喇 ~


我的 facebook 專頁,緊貼每天心情 + 芝麻綠豆大小事 ~











2010年12月29日 星期三

有機佳品

上次咪提到,我妹大力推介呢款有機雞湯o既 ~
我平時就冇特別買開有機野o既,聲稱有機但賣到貴一貴o既更加唔會買
但呢款確實係幾好飲,而且定價比較合理
做特價個價錢同史雲生差唔得太遠添
我就會乘機入貨   可惜食用期唔係太長,要留意呢



估唔到咁o岩 PR 小姐又搵我試飲佢其他款o既有機湯
哈哈我當然樂於奉陪喇!



仲有一份好別緻o既產品介紹,打開o黎係一個火鍋
原來佢地推介用呢o的湯o黎打邊爐 ~
不過我冇咁做,因為覺得搵西湯o黎打邊爐好似怪怪地
就咁煲熱o黎飲,好滑好香,係真材實料o既味道,連笨 B 爸爸都大讚



順道介紹埋另一款又係幾抵用又有質素o既有機產品
就係 Avalon Organics o既 lotion 同埋 shower gel
一打開o黎聞,香味好濃但唔造作,感覺都幾天然
最估唔到係佢個價錢,正價都係賣 $59.90 一支,呢期特價竟然只賣 $29.90
真係要通知大家快o的去買
(o岩o岩上百佳個網站睇過仲做緊,不過唔知去到幾時,要買就真係要快快手,因為通常o的 promotion 係做到星期四架咋)
==> 按此觀看



【笨 C 近況】
最近天氣凍,笨 C 日日著住件厚厚o既睡袋,想啜手仔都唔得,唯有自行發明左另一玩意   ==> 去片


我的 facebook 專頁,緊貼每天心情 + 芝麻綠豆大小事 ~



2010年12月27日 星期一

冬至 x Oisix 鹽釡鯛

上回提到,冬至時我地食左一條好特別o既魚
就係呢條o係 Oisix 訂o既「鹽釡鯛」啦



包裝得非常骨子,用o黎送禮一流



鯛魚在日本一直被視為幸福的象徵,在婚宴上通常唔少得。除了意義深遠,牠的食法更為多變,可被做成「鹽釜鯛」,即是用海藻提煉出來的藻鹽緊緊包實焗熟,魚肉味道帶鹹鮮,可配以柚子醬油醋來吃,鯛魚頭和骨可熬成高湯。



包裝內附埋一把木槌,用來敲碎鹽殻的
話時話,原來呢o的鹽唔係普通鹽,係海藻鹽來的



日本人真細心,為左最佳地表現食材o既味道,連醬料都會幫你準備好
原來呢條鯛魚,配會柚子醬油o黎食係最 good o既



敲鹽殼呢樣咁好玩o既野,梗係留俾小 Blue 玩喇
佢敲得開心時我地睇得興奮,呢條魚真係聚會佳品呀

<按此觀看影片>

小 Blue 出晒力敲碎鹽殼後,笨 B 爸爸就將佢解體了



露出藏身在內的鯛魚 ~ 原來唔係好大條 (盒上寫 500g,即是差點一斤重)



拆開鹽殼後,我地將條魚攞去叮左一陣 (因為喜歡熱食)
雖然貎不驚人,但呢條鯛魚真係好好味!
因為係鹽焗o既關係,魚肉係比較乾身的,但食落好有口感。魚味非常甘香鹹鮮,用o黎送飯真係令人回味無窮 ~



呢條魚真係好值得一試,但最可惜o既係,呢條魚產量好少,所以每年只有一次的訂購啊 (所以大家暫時只可以流口水 ... 因為我剛睇過網頁,想訂都已經冇啦 )。如果唔係做左會員收到 email news,我都試唔到呢條咁特別o既鹽釜燒呢 ~ 所以,有興趣o既朋友,我建議你地可以 sign up 左做會員先 (按此填寫表格),明年收到 email news 時第一時間訂o黎試下啊!

【鹽釜燒的故事】(來源: Oisix 網頁)

日本戰國時代,豊臣秀吉將軍對朝鮮出兵,戰事之際不忘以鯛魚向母報平安及表
達心意。為了避免鯛魚在運送途中變壞及損毀,用鹽緊緊包裹鯛魚才送給母親,
聊表孝心。」自此,鯛魚成為高級品的象徵,塩釜鯛也變成孝敬父母的送禮之選。

Oisix 香港直送的真鯛都是產於愛媛縣南部的愛南町,約500g 重。其製作方法頗講
究,先將鯛魚放進冰水令其肉質收緊,然後去除內臟並抹乾,將以混合雞蛋白的
藻鹽緊緊包裹整條鯛魚。接著放入焗爐烤焗至熟透,取出待冷卻後便可進行包裝。

吃前以小木槌敲破藻鹽,然後翻熱。鯛魚皮韌性強且油潤,魚肉則十分緊緻,較
乾身,味道帶鹹鮮。建議以柚子醬油醋調味,更能提升魚的甘香與鹹鮮。吃罷魚
身,鯛魚頭和骨可熬成高湯﹔吃剩的鯛魚不妨加入炊飯或其他煮物之中,食法變
化多端,味道上佳。

我的 facebook 專頁,緊貼每天心情 + 芝麻綠豆大小事 ~



2010年12月26日 星期日

冬至 x IKEA 鑄鐵鍋

嗨 ~ 大家好呀   大家o既假期過成點呀 ~
我呢,一向聖誕節都冇咩攪作o既,頂多去下朋友o既聚會
今年天氣凍又湊住笨 C,就邊度都冇去,留o係屋企過左個好平安o既平安夜啦

今年冬至,因為奶奶在我家,所以冬至飯局就在我家舉行了
上年 IKEA 送我的大鑄鐵鍋,終於可以剪綵了
(等左呢個機會好 ~ ~ ~ 耐 ~ ~ ~ )



小試牛刀,奶奶炆左煲冬菇 + 花膠 + 豬手 + 海參,簡直係養顏聖品
未用過鑄鐵鍋的奶奶,第一次攞上手時,對佢印象唔係咁好 (因為好重)
但炆完呢煲野,佢就讚不絕口了,話呢個鍋非常密氣
炆得好入味,仲好慳燃料添!佢話仲好用過瓦煲呀   竟然如此
咁真係要向大家推介推介
呢個鍋咁大個,o係 IKEA 都係賣五百幾咋!如果係 LC 睇怕至少二千呢
記得上年去 IKEA 睇時,係有唔同顏色 & 大細選擇的



睇相都知有幾 "膠",食落簡直黏住咀咀,正



呢個用鹽焗雞粉整o既蒸雞,非常美味,不過今次一蒸完就斬,所以有點"散收收"



呢碗係湯渣,冇影碗湯
材料係烏雞 + 豬展 + 黃耳 + 淮山 + 杞子 + 蓮子 + 雞腳, 濃到化不開



(待續 ... 呢個冬至飯局仲有一條好正o既魚,下篇再講。我地想趁陽光好帶笨 C 去散步呀 see ya)

我的 facebook 專頁,緊貼每天心情 + 芝麻綠豆大小事 ~




 



Linkwithin

你可能對以下文章有興趣: