2009年11月30日 星期一

村姑獨有福利

仲以為係時候凍定晒 (o聽日就 12 月啦喎!)
點知星期六熱到要著短袖衫出街

陽光好好,曬得我呢條懶蟲都郁番,搬件被上去天台曬下先
曬完太陽o既被褥好香,簡直係村姑獨有福利



一不做二不休,攞埋兩個枕頭上去曬
話時話我咁耐以o黎都慕名試過不少牌子的枕頭,有o的仲幾貴下 (以下呢兩個好似係  Sealy) ... 但始終未搵到隻o岩啊   


2009年11月27日 星期五

超級巨蟲

溫馨提示:此網誌內有不可怕仲有o的得意 ... 但都係昆蟲的相片

+++++

某天幫露台的花花淋水時,發現其中有一盆有o的異樣 ...
咦?!點解o的花蕊冇晒?!!

以為係咪有雀仔百厭偷食花花 ... 點知 ....



嘩!  超級無敵大肥蟲呀呀呀呀呀 ...

   <== 個樣真係有o的似佢!

初為村姑見識少,真係第一次見到咁大條的蟲!幾乎有我手指咁大條!



平時呢,我見到盆栽上的蟲蟲通常是 1 cm 左右,好幼好細條的
blog 友說是蝴蝶的幼蟲
平時呢,我通常把牠們都沖落廁所    有點殘忍 ...
蝴蝶會傳播花粉,但牠的幼蟲卻以超快速度把葉子吃掉 ... 到底是益蟲還是害蟲啊    (抱歉 ... 我的小學自然科學都交回給老師 n 年了 ...)

總之,今次遇到的這條這麼大,真係第一次見,我覺得佢應該係一條好特別的蟲,身負偉大的任務吧 (莫非牠長大後會做左蝴蝶界的首領)
既然如此,今次行行好事,把它養下來吧,反正我未見過蝴蝶變身的過程
(突然間變番一個求知慾強的小學生)



初看時有點毛骨悚然,但望多兩眼順眼左,仲覺得佢幾「得意」
仲 ...

見到佢大便 ... (綠色o個粒)
見到佢條尾 ... (原來佢有尾架!大家睇下佢 pat pat 位那條黃色的尾!)
見到佢食完野清理手指 ... (真架!佢用個咀逐隻手啜呀 ... 棗紅色o個幾隻手呢)



原來佢仲帶左一個朋友o黎呀 ...  (花蕊旁邊有隻青 bb 小東西)



但可惜,我同佢o既緣份只維持了一晚 ...
放心,我冇殺佢,佢亦冇死到 ...
只係因為佢絕食抗議我囚住佢 ...
第一晚,我屋企只有芥蘭,佢唔食好正常,因為芥蘭苦苦地
第二晚,笨 B 爸爸同我一齊癲,放工特登去超市買左包小棠菜返來,小棠菜最甜美架啦 ... 都唔食!
唯有前番同一棵盆栽的葉俾佢 ... 但都唔食!

哼 ... 敬酒唔飲 ... 丫嗱
但我一早已諗住唔殺你 ...
咁唯有送佛送到西,將佢攞落樓下草叢放左佢 ~
後事如何,我都唔知啦 ~ 希望佢吉蟲自有天相啦!



【後記】

大家唔好以為我救番條蟲,又寫了篇昆蟲 blog 就以為我唔怕蟲
其實我仲係超級怕    好怕好怕o的軟淋淋o既物體
只係呢條比較「好樣」,有o的似小學養過的蠶蟲,所以先冇咁驚

剛才在網上想找一張卡通蟲蟲的圖片貼上來
第一次 search 時,只用了個「worm」字
點知出左一大堆 ... 蚯蚓相!!!!!!!!!!!!!!!
超級恐怖 !!!!!!!!!!!!!!!!!!!!!!
救命救命救命 !!!!!!!!!!!!!!!!!!!!
即刻九秒九把該頁關掉,才舒一口氣
我想我雖然變身村姑,但還是不能種田的,因為我實在太怕蚯蚓啦
雖然蚯蚓係農夫的好朋友,又係益蟲,但我實在接受不了呀呀呀呀

2009年11月25日 星期三

元朗終於有屏風!

以下呢兩張照片是從巴士車窗向外影的,所以影唔晒成組樓,但好明顯見到,望上去已經唔見左個天

估唔到屏風樓都殺入元朗,在一眾矮小的樓房與村屋中,顯得突兀非常  
城市發展,真的要如此嗎?





(相信元朗街坊們應該認得出以上的屏風 ...
外區朋友們,這是 YOHO Mid-Town 啦)

2009年11月23日 星期一

博君一粲

收到朋友送我的聖誕禮物 (不是一件,是一整箱 ... 老遠寄來添!)
裡面有一個小東西好可愛
等我攞o黎借花敬佛,博大家一笑啦  

+++++
這個豬豬鎖匙扣,外表已經很攪笑,原來仲內有乾坤



原來按下去時,兩隻眼珠會突出來!



哎吔好醜樣呀你 ...



被擠壓的豬豬,露出不同的表情,時而痛苦、時而無奈 ...
真佩服設計者的心思啊

今天太陽伯伯出番來,心情都好好多!Have a nice day to you all



2009年11月21日 星期六

麻辣雞翼串燒

聖誕將至,大小派對排住o黎
都係時候搵定o的派對小食傍身

呢款係幾個月前做的「麻辣雞翼串燒」,個麻辣醬是亂來的,但都唔錯呢!



生平等一次將o的雞翼去骨,雞手鴨腳呢,去得好唔乾淨
後來問番大少奶,原來唔駛好似我咁低能用把刀慢慢將o的肉和骨分離的
只要在雞翼一端剪左個頭,然後將裡面條骨擰兩擰,就可以擰出來了



調味是亂來的,但萬變不變其宗吧 ... 都係有鹽呀豉油呀糖呀做「膽」
然後再加辣醬、黑椒鹽同埋即磨的花椒
咁就好麻辣咁 feel 啦



隻色好吸引啊 ~



我貪得意塞左o的三色椒入去,但其實塞唔塞野都 ok 架





串好的雞翼,只要用光波爐或焗爐焗 15 分鐘就得架啦 ~




2009年11月19日 星期四

我的第一棵果樹

說來慚愧,搬入o黎村屋咁耐,都未好好佈置一下個天台   丟空左實在可惜
最近在同益街市附近買餸時,在新街一間小小的園藝店看到一盆人參果樹
只要 $120,好似好抵
所以便買左返屋企




真係有果子架,好開心    (不勞而獲 )



可惜,才擺了這盆果樹未夠一個月,就開始刮北風啦 ~
某日上天台收衫,竟發現一地樹葉



最「瀨野」的是,我把果樹放在木地台上,所以,樹葉都落在縫隙裡了,掃唔到啊,要逐塊執!



可以執的都執了,原來小小的一棵樹也有這麼多葉啊!難怪住在外國的人,天天掃落葉掃到嗌晒救命了

但攝在牆邊的好難執,我諗搵日要攞部吸塵機上去吸啊



至於果子嘛,之前見到得意,又好似好細粒,所以不捨得摘。現在有些都掉在地上了

人參果味道麻麻,難怪這果樹賣得咁平啊!(話時話我當日還見到一棵富士蘋果樹!有我咁高,已經有十個八個青 bb 的富士蘋果在上面,超得意!但要成千蚊啊!唔捨得買呢!我現在還是種植幼兒班,費時暴殄天物啦!)






Linkwithin

你可能對以下文章有興趣: