2009年7月29日 星期三

遇上 ... 仁稔

前陣子在雜誌常看到美食家們談到「仁稔」,說這東西奇味飄香引人入勝,是人間美味
但產期極短,每年只有最炎熱的七月至八月間幾個星期才有
就算當造期也不常在街市見到
更令我想找找它

某次路經大埔舊街市 (露天那個) ,竟被我看到了
$18 一斤,阿姐教我買埋子薑,話用來整仁稔醬好好味
我完全沒有概念,所以買了子薑、仁稔、肉排卻又忘了買麵豉 ...



翻找家中雪櫃,只有日式麵豉醬,還是鰹魚風味的,我諗唔係太對路吧 ...
看見上次買來點烏頭的普寧豆醬,是好鹹的但也有豆香味,配肉排應該不會太奇怪吧
好,就用仁稔、子薑和普寧豆醬蒸這肉排!

肉排先按平常做法調好味,仁稔拍扁去核、子薑切絲
嘩,仁稔真是好香好香好香!那香氣真是很獨特的啊



把材料撈好然後拿去蒸 ...
(老實講那一刻這是有點擔心 ... 因為這是第一次煮仁稔,但材料又唔o岩,若味道古怪今晚就要白飯送烚菜了
)



蒸了 12 分鐘,樣子 ok 喎!
懷著戰戰兢兢的心情試食 ... 咦,味道還不錯啊!酸酸甜甜的,又有仁稔的香味,好在合格呢!



【後記】

我很喜歡仁稔的香味,我想明年再見到的話會買多些來吃呢 (或者乾脆去九龍醬園買些仁稔醬) 大家有其他仁稔的食法介紹嗎?

2009年7月26日 星期日

大孖醬園辣腐乳

由於我的 blog 經常都會提到一些日常小菜,大家不知道會否以為我們每天也會吃得很豐富的呢? 

雖然我們喜歡在家自煮,但有時因為工作或與朋友見面,每星期都有一兩次要在街上吃的 (有時更多),也一定有一晚會返陳師傅家吃。所以每星期自煮的晚餐大概只有三至四頓而已。而這三四頓之中,一定會有一至兩頓是吃得很清淡,清淡到係一碗白粥 + 半斤烚菜 + 兩磚腐乳!

別以為這種「抗戰餐」很慘,我覺得是非常美味的呢!特別是外食較多的時候,來一餐白粥腐乳,真係非常醒胃的啊。若一星期沒吃上一頓這樣的抗戰餐,我會周身唔聚財的。

至於送粥的腐乳,我以前是吃得很求其的,都是惠康十元八塊的貨色。但認識笨 B 爸爸,他媽媽 (現在的奶奶) 家附近有一家「廖孖記」腐乳,所以我就試過廖孖記的美味,自此回不了頭  

最近轉吃「大孖醬園」的辣腐乳,又係大埔新街市二樓賣湯丸那後生仔介紹的,他說大孖就是廖孖記的大哥啦!$28 一樽,比起超市貨色真是貴好多呢。但味道是絕對的讚啊!  喜歡吃腐乳的朋友一定要試試呢!



(p.s. 抗戰餐的來源是陳師奶的"抗戰粥",我忘了詳情,大概是說以前在鄉下的老一輩常提到八年抗戰的事,那時候全中國人也一起勒緊褲頭吃清粥,把資源都貢獻給國家抗戰了)

2009年7月23日 星期四

邪惡情報

今日又去了大埔入貨,竟被我發現吉之島的 Johnsonville 邪.惡.好.味.腸 (邪惡是因為熱量高 ... 好味是因為真係好好味) 大減價!原價 $48.90 一包,而家只賣 $34.90 啊!!!仲好齊款添啊

我以狂風掃落葉的姿態殺了四包:
左上角:Hot Links --- 辣味
右上角:Beddar Cheddar --- 芝士味
左下角:Jalapeno & Cheese --- 香辣芝士味,有點 pizza 的味道,新口味啊
右下角:Polish Sausage --- 蒜蓉味

溫馨提示:
  由於好邪惡的關係,同埋好大條,每次建議食用份量每人 < 2 條,否則好滯
  慢火煎熟或用焗爐烤熟,有需要的話煮熟才切。烹煮時唔好切開或界花,否則肉汁會流失
  好多肉汁,食o既時候小心咇汁!
  個人認為邪惡好味腸 + 冰凍 Coke Zero 是人生一大享受  



吉之島真係好多有趣o既貨品,我仲買左呢包「星星月亮太陽薯餅」啊   (好像是 $14.90)  好在今日心血來潮帶埋冰袋出街!



青衣魚柳 $39.90  想用來整粟米魚塊



逛完吉之島掃埋過去大埔墟新街市,搵二樓的後生仔買湯丸 ~ 每次我都係一去到即嗌「兩盒湯丸唔同味丫唔該」(即是一盒花生、一盒麻蓉) 因為每星期都買一次的關係,佢已經認得我,仲話「你真係好鍾意食湯丸啊 ...」  ($16 一盒)  我仲話佢知佢有好多網上 fans



呀 ... 查實今日去街市o既主要目的係買冬瓜去濕水o既材料架   點知買埋一大堆其他野!

每次我跟菜檔阿姐講我要煲冬瓜去濕湯,佢地就會塞舊兩三斤的冬瓜頭俾我 (即是唔俾我買一圈圈一斤一塊o個o的),話好o的云云!我次次都話得兩個人飲食唔晒啊 ... 但佢地都係照塞   好在我有好鄰居小魚兒幫手一齊飲o者!

但我竟然唔記得影碗湯囉 ...



事關我掛住食嘛 ... 我有食神,打俾小魚兒叫佢飲湯時,佢話正研發緊牛肉餡餅和生煎包!

我不吃牛肉的,這兩個餡餅就益左笨 B 爸爸啦



生煎包和鍋貼,煎的脆卜卜地,好香口呢!小魚兒謙遜說今次的皮做的不好,我覺得還不錯啊 (當然我會鼓勵你繼續進步啦!得閒再搵我試味,呵呵


大家係咪好羨慕我有個鍾意煮野食o既好鄰居哩 ~






2009年7月22日 星期三

醒胃蕃茄湯飯

今年的夏天非常熱,令戰鬥力大大下降,包括食野和煮野食
所以菜式都以簡單為主,務求盡快離開廚房出返大廳嘆冷氣

最近很喜歡用蕃茄湯底,酸酸甜甜好醒胃,顏色仲非常奪目
有時煮蕃茄湯會加罐裝的地捫茄膏以為好味o的,但笨 B 爸爸卻嫌過於濃稠
用於西湯做法或煮意粉會好正,但對於講求清新的湯飯來說會較厚重
所以這湯飯的蕃茄湯底是用煙肉 + 洋蔥 + 蕃茄 + 茄汁

先將煙肉和洋蔥炒香再下蕃茄,然後加水和茄汁煮 10-15 分鐘,再下鹽調味即成
蕃茄量要多,每人份量要一隻大肉茄,若細隻的話要用兩隻才夠蕃茄味呢

今次的湯飯配料用了存倉精選的鮮蝦和兒興泰墨魚丸,唔駛出街買餸都煮到啊

2009年7月20日 星期一

深閨的雀雀

Hello! 大家好!我是雀雀啊,大家記得我嗎?
我住o係陳師傅屋企呢

唔知點解主人次次影親我都矇查查的,唔開心啊!



當年係笨 B 媽媽買我返屋企的,不過因為係買o黎送俾陳師傅,我諗我算係陳師傅o既寵物啦
但我為左報呢個「知遇之恩」,始終記住笨 B 媽媽朕除,平時我唔出聲的,但笨 B 媽媽每個星期返o黎食飯時,我就會唱歌,有時又大嗌,總之嘈喧巴閉冇時停啦

笨 B 媽媽以為我想同佢玩,聽到我嗌就會開門口伸隻手指入來同我玩,但我一時睬佢一時避佢,激到佢紮紮跳
佢以前成日放我出來周屋飛,好自由自在的。但我而家年紀老啦,又成個波咁,都飛唔郁咯 ... 所以只係企o係門口睇一陣風景就返入去繼續攤抖架啦



我幾多歲?我都唔識計呀?但佢地話雀仔o黎講我都算老了,話我 keep 得好好喎

我都唔記得左主人係 2000 年定 2001 年買來返去架咯
淨係記得o個日係 1 月 1 號囉 大家唔駛同我慶祝生日架啦,我家主人唔興架    祝我福如東海壽比南山得架啦

好,又吹完水了,bye for now ~


Linkwithin

你可能對以下文章有興趣: