2009年3月18日 星期三

覺得幸福,就會幸福

寫 blog 以來,分享了生活裡的大事小事
很多時會聽到 blog 友們說「你好幸福啊」「好羨慕你啊」之類
撇除有些可能只是說來逗我高興
我想大家基本上也是覺得我是幸福的吧

當然,我也是覺得自己幸福的啦
否則我不會常常都嘻嘻哈哈 (嘩咁押韻o既)

不過,這篇 blog 不是想用來曬命的
反而想告訴大家一些「秘密」... 有關我的
看後,大家可能會有些體會啊
(在每一點的下面,我都寫了自己的想法,但用白色字體隱藏了。原因是想大家看完全部事件才看我的想法 ... 反白了就可以看到呢)

1. 我是一個幾乎出唔到世的 bb,嚴重程度是大人們已決定若有甚麼差池寧願「棄小保大」了。出來時面色已紫青 ...
笨:今日我咪又肥肥白白!
(我是在一個窮鄉僻壤出世的,是好像民初劇集裡的原始式生育,沒有手術刀也沒有氧氣箱的。我真係算大命!陳師奶都算大命!)
(我並沒有因此而覺得自己很幸運 or 很幸福,反而會想到陳師奶為了生我受了好多苦幾乎命都冇!一定要更孝順她)

2. 小學時莫名其妙高燒兩星期,已陷入混混沌沌狀態,被送進醫院全身照過晒都唔知點解救,插晒喉又敷晒冰 ...仲俾醫生們捉左去做教材   (即是參與了醫生的 tutorial,好像標本咁任人舞 )
笨:好在冇燒壞腦!
(查實我覺得個個細路細個都發過高燒架啦 ... 所以我自己不覺得有甚麼特別 ... 但我諗當時大人們應該嚇傻了)
(也證明中醫解救小兒發燒係叻過西醫的 ... 因群醫束手無策,最後是陳師傅暗裡塞左o的羚羊角粉俾我食,第二天竟乜事都冇晒可以出院)
(查實o個時住醫院好開心啊,我住在小兒科,清醒的時候好多人同你玩的。好記得那時候剛巧是聖誕節,醫生和護士都扮了聖誕老人和聖誕姐姐派禮物!)
(出院後竟然好掛念住院的日子,果然是年少低 B)

3. 上了中學才沒幾天,竟然被貨車撞到!做了兩次全身麻醉手術 + 住了醫院幾個星期 + 物理治療一年!
笨:好在手手腳腳全部o係齊度 ...

(不是我亂過馬路啊,而是我站在路邊等過馬路,有架貨車轉彎時唔夠位,司機旁那人又訓著覺沒留意我的存在,所以把我夾在貨車與欄杆中間了!腳掌還不知道是否被轆過或是夾過了,因為斷晒啊o的骨)
(我是好驚,但嚇呆那個是陳師奶 ... 她說她接到電話時幾乎心跳停頓)
(我某一隻手指好像劏魚般被劏開了 ... 但急症室竟然說我的傷法唔死得,所以我由放學出事的 4pm 等到半夜才被推進去做手術)
(當年咩都唔識,若是在今天的社會,受到如此對待,應該會鬧到上頭條吧) 

4. 中三時,無啦啦發現手肘骨頭裡長了一個骨瘤,要做大手術 (即有手跛的危險,兼做了七、八小時的手術)  之後又物理治療一年!
笨:好在隻手家陣冇事!
(大家話我唔孝順父母點得呢?有個咁o既女,陳師傅陳師奶心血少o的都唔掂啊!)
(好在是良性,惡性的話那是骨癌啦!)
(手術後左手裝上支架兩星期,好像機械人)
(幸好遇上良醫。好記得當年拿 X 光片到馬會診所,那裡的醫生竟睇來睇去唔知o個個陰影係咩!後來去了某私家醫生,他二話不說寫紙直接把我送入瑪麗仲即刻安排手術了。那時我的手骨已被侵蝕得只餘左右各一小支在支撐著,若不小心跌到或撞親應該會跛左啊)
(今次,我又成為標本一名。陪醫科學生上了好幾課 tutorial 啊。我都算為了香港醫學界作出左些少貢獻
)
(所以我長大後也很努力捐血的,因為我曾用去人家不少血啊)
 

哈哈,聽落係咪都幾「杰撻撻」先!以上的故事,我的小學同學/ 中學同學會略知一二,不過我長大後好少同其他人講番。

所以呢,若講「順風順水」的話,我諗我應該稱不上吧。其實長大後都有幾單野的,我身邊的熟朋友會知道,在這裡不寫啦 (免得太多私人野 ... 或許幾十年後我又會當古仔講)。

而家當古仔講,目的不在搏同情 (因為我自己都不覺得自己慘,我覺得四肢健全家庭健全有飽飯食有機會受教育有時間上網吹水仲嗌慘是很 #^$@^#$#的),只是想分享一下,原來大家眼中咁開心愉快的笨 B 媽媽,其實都曾經遇過好多麻煩野的啦。但這些麻煩野,我只是純粹「記得」,好多時仲會係記得當中開心o既部分添 (竟然有)

所以,我並不是特別幸運的。我只是樂天知命,也相信性格改變命運,你只要覺得自己開心,你就會開心的了。你開心,身邊就會圍繞開心的人,那你就會更加開心

祝大家都幸福快樂啊!



沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: