2009年12月30日 星期三

最好味車仔麵【榮記粉麵】

話說我的姑姑早年移居外地,一直十分掛念香港美食,而車仔麵是其中一樣
前陣前跟她說起,將來她回來,我一定要帶她去吃最好味的車仔麵

為了這個承諾,我先搜集資料,問定朋友們邊間車仔麵最好味,而位置又方便
很多人推舉這家位於渣甸坊的榮記粉麵啊!
所以我上個月經過銅鑼灣時,便特地去視察視察 (其實係為食去試吃)
已過了中午繁忙時間,但都有少許人龍,勁啊

門面很小,頗為逼狹呢。不過有兩層,所以很快便有位了 (人人都要搭檯的)



配料很多款啊!有些還很特別、別家沒有的。
很久沒有吃車仔麵,幾乎唔識揀
望住個餐牌一大輪,卒之揀左豬紅、蘿蔔、雞翼尖和墨魚頭。然後揀了粗麵。平時好少食油麵,但覺得車仔麵要粗麵o岩 feel o的

味道如何???
我想話 ... 家陣望住呢張相,我仲回味-ing 囉!!!
真係非常好食呀!難怪成日都咁多人啊!
湯底加了腩汁,極為濃香惹味。豬紅和墨魚頭都很新鮮、蘿蔔很甜很林、沒渣,索晒o的湯汁一流!滷水雞翼尖滷得非常入味,啜得不亦樂乎!



結論是,這是我多年來吃過最好味的車仔麵 (留意:但我唔係食過好多 ...)

不過令我有「叮」一聲的感覺,我覺得可以推介呢!



P.S. 這個四餸的車仔麵要 $28,以車仔麵來說是貴啊!但在銅鑼灣計又好便宜啊。

【榮記粉麵】
銅鑼灣渣甸街 43號地下
銅鑼灣糖街 27 號 A 地下

2009年12月28日 星期一

IKEA 煎魚 pan

上次逛沙田 IKEA 新店,就是買了這個回家,$299.90
點解買橢圓形?ummmmmm ... 就是貪佢得意    同埋我諗用o黎煎魚都幾好丫!



大家都知我用電磁爐架啦 ... 平時煮餸,我多數用生鐵鑊,因為鑊氣較勁
但每次煎蘿蔔糕時,總希望有隻易潔鑊。因為真係用少好多油!
最近陳師傅又整左o的芋頭蘿蔔糕俾我,就攞o黎幫個 pan 剪綵喇

用電磁爐o既好處,就係鑊柄唔會熱,用手揸住都冇問題。煎蘿蔔糕,5 度火就可以了。



電磁爐只有中間圓型的部分直接受熱,但因為這個 pan 傳熱性能不錯,測試結果顯示,呢隻橢圓型煎 pan 都 ok,旁邊的兩塊蘿蔔糕都煎到,只係冇中間o個兩塊咁燶。所以我煎到一半係有將佢地調一調位的,因為我鍾意香口o的



煎完蘿蔔糕,個 pan 幾乾淨!唔駛洗餐懵



不會太燶又不會「油淋淋」的芋頭蘿蔔糕,正啊!


2009年12月25日 星期五

聖誕天台聚餐

平安夜,自己沒有攪聖誕大餐,但去了街坊的天台聚餐
好高興啊,唔駛煮有得食!呵呵呵呵呵

一入屋,街坊即刻奉上無添加蕃茄濃湯一碗
無添加的意思是沒有落茄膏、忌廉或其他調味品
純粹就係蕃茄、甘筍和洋葱三樣野
因為最近蕃茄不當造,所以顏色就偏橙黃了
感覺非常天然,但極好味啊 !我遲o的都要試下!


冷盤方面,有新鮮運到的鮮甜帶子刺身和肥美三文魚刺身



另外就有原桶運來的法國生蠔 ~ 一桶大約有 50 隻吧 (我食左 n 咁多隻)
謝謝我們的「蠔手」F 小姐



很新鮮,充滿海水味。但不及澳洲蠔肥美和 creamy (可惜澳洲蠔現在不當造)



街坊自製的日式沙律醬唐生菜沙律,清甜爽脆,正!



雖然尋晚有好多野食,但我們看到 A-1 法飽還是很瘋狂
用來塗面的有 President 牛油、黑松露芝士 (哎吔唔記得影呢兩樣)
還有極速斷貨的 IKEA 蟹醬和上次遊南丫島買回來的有機蘑菇醬



然後,男主人大顯身手的時候到了
有超甜美的大虎蝦,在兒興泰買的,街坊說 $75 一盒十隻,強力推介呀!



街坊又發現兒興泰改了賣另一款羊架,價錢差不多,但味道仲好過之前 Alliance o個隻牌子啊!非常香非常嫩非常 juicy!眾人大讚啊
(當然,大廚 A 先生控制火候的功力也是美味的原因!)



賓客 B 先生客串燒的肉眼扒,一睇顏色就知道係一流作品!(我不吃牛的所以沒試)



燒雞翼 ~ 我自細鍾意食 ~ (請用星爺腔唱出) 另外仲有粟一燒,真係燒出來的!
呀原來我又影漏左邪惡好味腸



還有美味的甜品 Puff 和幾支靚紅酒,都係掛住食唔記得左影添!

飲飽食醉,大家一齊去欣賞男屋主的精心傑作 --- 摺紙藝術!
嘩我發現我o的朋友真係藏龍臥虎,點解個個都咁勁架!!!

聽講男屋主從沒學習過這項技藝,只係細路仔時玩下玩下自學得來的!
而紙製品的材料全都是廢物利用啊!

以下呢隻恐龍,聽講係二十年前的作品!!!



非常、非常精緻!好多 details!!









這是屋主應老婆大人要求而做的卡通版女仔,雖然容貌不算漂亮,但造工就是極精緻啊!



酒逢知己千杯少,食下傾下講下,一望錶竟然係凌晨十二點半囉 ...!
真係打攪晒、辛苦晒呢 ~~~~   我地玩得好開心啊!!!
仲有多謝晒你地,雖然o係我地「威逼」之下屋主只肯酌量收番少少食物錢
但我諗咁少錢只夠買蠔和刺身!!下次唔該要收足o的啊!!大家是好朋友才不要客客氣氣知嘛






2009年12月22日 星期二

IKEA 沙田新店

而家西鐵接駁東鐵真係方便,搭西鐵都可以去到沙田,方便得很。買了月票的話仲好抵添   額外要付的車費只係六個幾咋!

上個星期六,跟笨 B 爸爸到沙田的宜家閒逛,以前在三、四樓的,原來而家搬左上五、六樓啊!應該是商場新擴建的部分吧?以前都唔係好覺有呢兩層o既?

新店有好多落地大玻璃,好光猛好舒服





當日仲有化妝師幫小朋友畫花臉



仲有波波池



同埋俾小朋友推的購物車,簡直成個兒童樂園咁啊!而家o的小朋友真幸福 ~



呢間新 IKEA,多左好多新產品,我就特別留意廚房野
咦,我見到上次 Vanlily 用o黎整鹹芝士蛋糕o個個馬仔焗盤,原來一套有兩個,一大一小



仲有好似 Le Creuset 的鑄鐵鍋,價錢平好多,呢個大 size 的都只是五百多 ... 如果是 LC,我估要二千吧?





大家估下呢個有咩用?



冇錯,就係防彈油的紗蓋啦 (自問自答中)

平底鑊都好多款喎!



呢個平底鑊好得意,係橢圓形的,可以用o黎煎魚喎!



仲有真o既聖誕樹!好香!好喜歡聖誕樹的香味 ~



一如既往,出口處總有個瑞典美食廊
哈哈,原來可以買呢盒薑餅返屋企自己砌薑餅屋啊!




呢支牙膏型的東西,係蟹醬!可以用o黎搽多士或者整意粉、沙律



呢支係三文魚籽 (?) 咦好有趣喎 ... 唔知味道如何呢?



閒逛完一輪,收穫就係o個個橢圓形的平底鑊了,因為屋企冇平底鑊,順手買番隻
行返去火車站時,竟然見到一個會郁的聖誕樹 ... 哇哈哈哈
仲以為會嚇親o的小朋友,原來又唔會喎!好多小朋友同佢影相添呢




Linkwithin

你可能對以下文章有興趣: