2008年8月30日 星期六

熱過沖涼水的水喉水

逢星期六日,皇恩大赦,可以訓到黃朝八晏先起身

走入浴室洗面刷牙

嘩 ... o的水熱到呢   

肯定熱過我平時用o黎沖涼o的水 (38 )

熱得滯,洗落塊面度會「辣」親塊面啊

仲要流好耐都未涼番,但咁做又好o徙水 .... 唔,最o岩呢個時候去煲水,一定好快滾,慳電呀



為左試驗一下o的水有幾熱,我又做左個無聊測試   攞個紅外線測溫器出來玩下先

首先,先量度下一隻未裝水o既杯表面溫度有幾多度 ...

33.9 ... 正常丫,同室溫差唔多



然後擰開水喉裝一杯水,再量度下

嘩!45.9 呀!!!!!唔怪得知我覺得就快淥熟我塊面咁喇



再去試下電熱水瓶出來的熱水有幾多度先 ... 原來只得 80.5

唔怪得知陳師傅話搵電熱水瓶o的水沖茶唔好味喇,一定要擺上爐頭再稍為加熱,o的茶先會出味架



影埋個測試時間俾大家睇先

呵呵 ... 其實我今日真係訓得好晏啊    爽呀 

2008年8月29日 星期五

大大支慳家墨水

嗨 ~ 大家記得呢盒墨水嘛?我上次自己去逛「鴨記」時買架呢 ~

話說一套 $350,墨水量是標準的 10 倍  

平時一套四色原裝墨要 $200,代用墨都要 $125,咁計法,呢個 ink system 真係非常抵



我開左o黎用啦!

安裝一點也不困難,我呢o的機器白痴都識

用開小兄弟 (brother) o既朋友都應該認得,相片前方呢四個墨盒,同原裝o既 size 係一樣o既 ~ 咁即是好似平時換墨咁,將呢o的墨盒插返晒入適當o既位置就得啦



買o既時候,哥哥仔教我要將大支墨上的膠塞拔開,然後將呢o的透明o既「氣鼓」塞住。作用係平衡返樽外同樽外的氣壓,否則o的墨唔識流架啦



攪掂 ~ 食碗麵 ~



仲有,佢話o個四支大墨水的擺放位置要和打印機同一 level 先得架!



哎o也!整污糟手指添!

不過以我o既粗心大意性格,呢撻污漬算好細架啦



試用報告:

打印效果和平時用的墨水一樣,掂!

又慳番o的錢,又慳返o的時間,醒!


溫馨提示:

(1) 若然大家屋企係用 inkjet (噴墨式打印機),唔好以為慳得就慳成日唔印野,甚或乎熄埋部機用來「供奉」喎   因為我以前讀書時代試過,o個時比較少用 printer,也唔太捨得用 (因為當時的墨水相對仲貴呀) 耐左唔用,個墨頭乾晒!印唔出野呀!成套墨要換晒,好傷心 ~  

(2) 呀仲有,若用墨量不高,又唔好以為買定o的墨以防不時之需喎,因為我又試過,未開的墨因存放過久 (~ 1 年),攞出來用時,又係乾左!都唔知係咪當年o的墨唔好,定係我唔好彩!嗚 ~

(3) 呀又講開,若大家都係用小兄弟的話,平時 print 野不妨設定為「fast normal」,印出來的效果相去不遠,可以慳o的墨呀 (唔好問我慳幾多啊,我唔知呀...反正是慳左喇 )!


報告完畢 ~ 多謝各位收看 ~

2008年8月27日 星期三

終於買返條膠邊了

Fissler 個代理都唔知攪咩鬼

搵呢條膠邊,搵左我足足成個月,行晒永安、先施、崇光

問題一,就係佢承諾左的到貨日 (現場 promoter 說 8月8日) 仍沒有貨,害我白走一趟。須知道,我這類村姑是好少出城的,出城還要特登去買,去到買時竟然沒有,你話我幾無奈

問題二,就係銷售攤位沒有完善管理,我問佢任何一位推廣員,另外仲有邊度有得賣,佢地冇一個答到。唔緊要,小職員或許不知道,給我一張咭片或傳單,我自己上網查可以吧?點知,原來係咩資料都冇,連網頁都冇。

問題三,順手講埋,一條價值 $158 的膠邊,真不是便宜的,可否耐用少少呢?須知道一個煲用十幾廿年或更久,若一年要換一條膠邊,真係好重皮啊

估唔到,一個動輒二三千元的煲,竟然售後服務咁差勁 我諗我唔係要求高吧!有關人士睇到呢篇 blog,唔該盡快改善下,唔該晒



【下圖】 花了好多工夫終於買了條 26cm (for 8L 煲) 的膠邊

終於有得用啦 ~


2008年8月25日 星期一

一年一度暴食 Pizza Hut

平日兩個人一齊出街食飯,通常都唔會想到要去 Pizza Hut 的

原因是太多澱粉質了,每次吃完都會過飽   次次食完都會後悔兼滯足一年

但好神奇,每年總會想暴食一次,一次咁大把

然後咀咒式地滯足一年,屢試不爽

第二年先會再想食佢o的 pizza



本來是想食 $69 的二人常餐的,但原來星期一至五才有,仲要係晚餐時段冇

被逼食貴價兼極大份套餐,今次叫o既係「環球美味 Pizza 二人套餐」

兩個人食 Pizza Hut 食左 $256,算好貴架啊



【飲品】加錢換的,每杯加多 $10,但超好飲,surprise!
前面那杯是我的,芒果沙冰;笨 B 爸爸的是菠蘿沙冰




【沙律】是雞沙律,算新鮮啦,麵飽粒也好脆



【湯】是海皇湯,好濃,有少少腥味,但都 OK



【環球美味 Viva 批】是這個套餐的主角啦。笨 B 爸爸叫我唔好點呢o的「鬼五馬六」的批,但我又為食想試,佢唯有就範啦 ...



話說環球美味批有 A、B 兩款,每款裡面有三個國家的風味。因為 A 批有牛肉,我唔食牛肉o既,所以叫左 B 批。

嗱,話說呢 1/3 係中國風味的「京醬大蝦」



中間呢 part 係德國風味的「芥末肉腸」



另外 1/3 就係印尼風味的 「沙嗲雞肉」



個批好唔好食?

well .................. 我覺得可以接受啦

但我覺得 vanlily 整o既好食o的喎!點算先 ............



【甜品】呢個係迷你忌廉 puff,每杯竟有成 5 粒咁多,唔夠鬆化但也可接受



結論:

仲駛問o既?年年o既答案都係一樣架啦!

咪就係 .................. 好滯囉!

下年再見!多謝 ~

2008年8月22日 星期五

笨宅風暴消息之四:【身在風眼中 @ 3:30PM】

三點半,突然風平浪靜

想必是身在風眼中 ...

趁風不大,趕緊上天台視察一下

wowwwwwww ... 我個晾衫架呀    估唔到佢會被吹成咁

因為佢得o的支架,理應不太受風  

趕快把它拆散倒在地上,以免吹落街!





圖片來源:香港天文台 http://www.hko.gov.hk/wxinfo/currwx/tc_posc.htm

Linkwithin

你可能對以下文章有興趣: