2008年7月31日 星期四

泰式冬蔭功

我和笨 B 爸爸的口味很相近 (噢 ~ 真幸福啊   呵呵)

大家都很喜歡吃香喝辣,尤其是泰菜和川菜

當年拍拖時也不避嫌一起去吃辣,一個吃得滿頭大汗鼻水都出埋,另一個就狂吞冰水大呼過癮 (大家估到邊個係我、邊個係 B 爸嗎?)  真係既冇儀態又唔浪漫啊   呢兩個人,到底是不是拍拖的啊

婚後,間中都有煮下泰國菜,當然手勢冇泰國菜館咁正宗喇 ~ 但泰國菜算是易煮,只要真材實料,就咁撈埋都已經好好味

其中一樣我比較常煮的,就是冬蔭功湯啦 ~

橙橙紅紅的顏色,係咁見到都好開胃先



笨宅的冬蔭功湯喜歡落蕃茄的 ~ 也會下些茄醬,湯底更美味

香茅、檸檬葉、南薑和青檸可在街市的泰國食品店買,話畀檔主知兩人份量的冬蔭功湯,佢識執畀你架啦 ~

平時檔主會執多包冬蔭功醬畀我,但今次我話唔駛啦 ...



因為我有成罐啊!!!

話說係上年奶奶和叔仔們去泰國旅行時買回來的手信啊

估唔到開左個罐,裡面竟然是一袋辣椒油的物體 ... 我之前仲估應該是麵豉醬質地的膏狀物體呢

可以用來做冬蔭功湯、也可以用來醃野、做沾醬、炒餸等

我好似在香港都見過,唔記得係泰國食品店定係叔婆 (City Super)



幾經辛苦,終於抽到佢出來了 ... 幾驚整爆個袋啊



用了半斤鮮蝦 ~ 當然是先雪藏再剝殼喇,易好多架

想靚o的,留了蝦尾、起了雙飛



仲留起埋蝦頭添!攪咩鬼呢?

請留意,蝦頭是剪去了一部分的 ... 剪去了前半部尖頂位 (連蝦眼)



因為用蝦頭來煲個湯底啊 ~

重點一:先用少許油炒到蝦頭變橙色才落水



重點二:唔好以為煲得愈耐愈正,其實只要 10 分鐘

你睇,湯底都變了橙色了,是蝦頭流出來的蝦膏呢   這是普通蝦而已,我諗用大頭蝦會更正啊!



10 分鐘後,撈起蝦頭丟掉



之後的程序沒有影相 ...

重點三:青檸在熄火上檯時才擠汁加入,太早加入,青檸汁加熱後會變苦啊

重點四:鮮蝦不用太早加入,最後才加,加完煲到滾便可,否則縮晒水又鞋架啦

重點五:應該一早講 ... 南薑切片、香茅切段,呢兩樣都要拍扁才出味啊



Calling 小魚兒 & 大娜姐))))) 這個辣椒膏不太辣,用來煲冬蔭功卻好味。你們要拿一點試試嗎?


2008年7月29日 星期二

洗蚊網

蚊網係村姑o既好朋友 ~ 冇左佢,我諗會成屋奇珍異獸

但有左佢,都唔係冇煩惱o既

煩惱一,因為蚊網太細孔,令通風差左,屋內感覺悶熱o的

煩惱二,係蚊網好黐塵,過左一年半載,就會覺得污糟得不得了



尤其是廚房的蚊網,油煙加上塵,感覺更嚇人 (嘩!押韻)

我每一次煮飯時望到佢,我都發誓要「搵日」洗洗佢

搵日搵日,搵搵下就一年,真係光陰飛逝

尋日卒之拆左落o黎洗,用藍威寶和刷子努力刷



洗完後 ... 噢!爽呀!乾淨晒!



行動成功,但僅限於廚房的蚊網,

因為廚房的蚊網是左右趟門式,可以整塊連框拆落o黎,

可是屋內其他蚊網,卻是向上捲式,不能連框架拆,只能拆網

但我又唔想拆塊網落o黎洗,洗到皺晒咁裝番上去,好肉酸架

暫時的處理方法,唯有是用吸塵機吸下上面o的塵,但很難吸

噢!各位村姑們有咩好提議呢?你地屋企o個o的點洗架啊?



【同場加映】

尋日個天好似有 smog (塵霧),一片昏黃迷濛連對面座山都睇唔到,熱到透唔到氣咁,原來成 36 度啊?  噢賣葛!



2008年7月28日 星期一

Y!Blog 生活誌

星期五那天,Yahoo 已特派專員將這本新鮮出爐的【Y!Blog 生活誌】送到我家

因為我家位置對市區人來說不易找,我還要用電話做「人肉 GPS」

頭頂九個太陽在鄉村找路,真係辛苦晒!



尋晚才抽到時間細閱 ~ 是一本很精美的書呢,謝謝 Yahoo 各位台前幕後的努力

噢,床頭書陣又高了 1 cm 了



生活誌裡刊登了兩篇自選文章,我當然選了【小屋仔.大 Project】的文章啦!

笨 B 爸爸的肉照又給我出賣了



丫 ~ 唔知 K 先生會不會發現原來自己也上鏡了呢?



還有我跟大少奶、Vanlily 一起做的訪問 ~ 阿蓮的文筆很好,把我們想說的都寫出來了 ~ 只是因為我們是第一 group 的訪問,攝影師似是未 warm up 好啊 ~   相片有點怪怪的,不太像我們平時的樣子呢 ...

Anyway,有幸成為受訪者之一,兼且和我的 blog 中好友一起做訪問,是一樁難忘的事呢。謝謝 Yahoo 一班同事幾個月來的辛勞 ~  我會把這本書珍藏的

2008年7月26日 星期六

熱.極熱.超級熱

一個字 ... 熱!

兩個字 ... 極熱!

三個字 ... 超級熱!

簡直係 ................................冇事唔好行出街

(P.S. 張相星期二影的,但呢幾日日日都係咁上下溫度!)




2008年7月24日 星期四

床頭的書陣

好耐冇執屋了,屋企亂到好似地震咁

奶奶千祈唔好突然殺到,否則我呢個新抱仔就要吸黑豬印了



其中一個千年未執o既地方,就係床頭

噢!睇疊書個樣,好似就o黎冚咁啊  

不過其實大部分都係壹周刊

一個星期都係得兩冊之嘛

所以話 ... 有數得計,我有幾耐冇執過屋呢呵

不過間屋幾亂都好,個地板依然保持乾淨

因為我有自動吸塵機械人日日定時定候幫我吸塵

..........um ..........都係小露寶唔好,攪到我懶晒啦  

 

Linkwithin

你可能對以下文章有興趣: