2008年6月9日 星期一

「亂咁執求其辣肉碎」生菜包

上個星期六的慈善 Gathering,幫手做了一個小食


話就話係「泰式肉碎生菜包」


但查實,個肉碎係「亂咁執求其辣肉碎」(inspired by 林海峰 )  同泰國冇咩關係


一味夠辣,因為我一邊炒一邊試味,o岩我口味  


點知大家都話好好食,連唔太食辣的朋友們都一包接一包


多謝大家咁賞面啊!錫晒你地啊!


 


(從「夏金城」小姐處搶來照片一張   多謝晒)



既然話係「求其辣肉碎」,材料就真係求其執的


因為成個禮拜都大風大雨,想出城補給物資都唔方便


除了豬肉,全都是在家裡摷的物資,所以冇額外開支


附合大少奶話要「平、靚、正、快」的主旨  yeah ~


 


28 人的份量 (不過唔知係咪個個有食),買了 1.5 斤豬肉


雖然不按章法,都總有些自家秘技o既


 


重點一: 不要買免治豬肉,太碎了,咩口感都冇晒!自己在家開動攪拌機,至少可以控制唔絞咁耐嘛。豬肉用椒鹽和豉油醃半小時就 OK 了


重點二: 蔥頭、炸蒜茸 & 辣椒是靈魂啊。話時話,香蔥真係香過普通蔥頭架喎。(香蔥的圖片在此)


 


家裡沒甚麼材料可用,唔想淨係得豬肉咁寡,又想香口o的,所以加了些蝦米,先浸軟切碎


那樽「香辣脆油辣椒」是在深圳超市買的,香港不知道有沒有。夠香夠辣夠勁,冇得頂!  這才對路嘛!香港的辣椒醬全都太溫和了   當然,你們家沒有的話,也可用普通辣椒醬或指天椒代替啦



重點三:火候要夠。大火、快炒。


先開鑊爆香部分香蔥片 (部分留在最後灑面),香氣溢出後加蝦米繼續爆炒,然後才加豬肉。不斷兜炒、同時弄散豬肉,令它乾身


 


重點四:要夠濃味


由於辣肉碎是用生菜包著吃的,調味方面濃一點會更匹配


豬肉炒至乾身、分離後,可以加辣醬、指天椒調味,如有需要可再下椒鹽。一邊炒一邊試味



臨吃前才灑上餘下的香蔥片和脆蒜茸,攪掂!


菜方面,若用西生菜就爽身脆口o的,但太脆的關係,菜葉一摺就爛。用唐生菜就冇咁脆,但也冇咁易爛,視乎大家喜好啦 ~


沾醬方面,用現成的「泰國雞醬」就好好味架啦!


 


(下圖是上年做的泰式肉碎生菜包,好明顯冇今次咁濃味 ~ 難怪朋友 Bee 話我進步左 )


沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: