2008年6月29日 星期日

豆o靚娃娃菜

話說我好大個時,先第一次從同事口中聽到「豆o靚炒生菜」呢味菜式

原來係香港經典家常小菜之一,正式o黎講好似係炒 A 菜 (油麥菜)

試過一次,真係好好味架喎!濃味o既「豆o靚」(豆豉鯪魚罐頭) 加菜香清新味道清淡的油麥菜,真係絕配,炒到熱辣辣咁上檯,可以下飯三大碗


時移世易,風水輪流轉,以前覺得 cheap cheap 的豆豉鯪魚已升格為超市近 $20 一罐的高貴罐頭 (但我會在凍肉店買 ...  $14)

我今次用呢罐係上年某年某日低水購入,賺晒!不過只得一罐咁大把,早知入多幾廿罐投資

屋企存倉只有娃娃菜,就用佢o黎炒喇

先爆香豆o靚,然後加入菜,猛火快炒,快靚正



話時話 ... 「豆o靚」同「娃娃」呢 ... 好襯!係咪要將個菜名改做「兩小無猜」呢下?

2008年6月28日 星期六

防雷拖板

可憐的小兄弟被 certified 了!嗚!

問過維修中心,換過塊底板,同買過部新機的價錢差無幾!

唉!小兄弟,點解你咁唔爭氣啊!好壞唔壞,o岩o岩過左頭一年全包零件保養期先壞!



話說家中小弟聽見我的悲慘遭遇,即刻走去買左個防雷拖板送畀我!

原來,只要登記左,就可以終生保用 --- 即是畀雷劈壞左個拖板,可以攞返去免費整!



咁都好o的 ~ 如果唔係成幾百蚊一個,都幾重皮啊 ~

除左保護電線外,仲有天線和電話線的插孔

仲附有揭蓋,插好插頭後冚埋蓋,咁就美觀又整齊勒!yeah ~

多謝細佬 ~

2008年6月26日 星期四

我的露台不水浸

今年真係非常多雨,仲要經常都係暴雨級,淨係六月都唔知出左幾多次黃紅黑色暴雨警告 

記得上年搬入來不久,有村姑 blog 友 (太耐以前的事,唔記得邊位) 提醒我小心露台水浸,佢話平日落大雨都算小事,加埋颱風o個o的就大劑,去唔切一定浸晒入屋

為此,我曾向【小屋仔.大 Project】的幕後總工程師笨 B 爸爸查詢過,佢再而三的 re-assure 不會發生水浸事件,就算人地間屋浸左,都未到我地間屋云云

佢答得咁肯定,原因係在起屋時,佢堅持去水位一定要設在露台外側 (如下圖)、而斜水就當然也是向外斜的。記得那時候他還和 J 先生爭論了一番,因為 J 先生說所有村屋露台的去水位都是設在近牆身那邊的。如此設計,當然斜水也斜向屋內的方向。

不明白為何一向的村屋都是這樣設計 ,笨 B 爸爸認為以 common sense 諗下都知唔 good,若然去水位塞左,咁o的水就一定流晒入屋喇 !而笨 B 爸爸這個向出的去水位,就算塞左,由於斜水是向外的,o的水積到咁上下,頂多從露台邊緣向下流走,不會流入屋的。



今年是在這間屋度過的第二個夏天,今年經歷的暴雨,以雨量和次數計都比上年厲害好多。尤其是剛走那個「風神」,o個幾場狂風大驟雨,真係唔係人咁品。但我屋企依然滴水不侵,天台露台窗邊全部都冇事 。所以,我覺得係時候上來表揚一下笨 B 爸爸當年對去水設計和防水層的嚴格監工 (當然也要多謝 J 先生一班師傅的好手工) 

【後記】

風神真係好強,竟然連露台那棵人咁高的白蘭花都吹到向前行左兩步!  好在冇斷到o者 ~ 否則清場都有排攪

6 月 25 日清晨 6 點,我畀窗外極大的風雨聲嘈聲,知道呢場風雨唔係人咁品,就冒雨走出露台將花架的花收起放在露台地上,以免吹落街扑親人。嘩,一開露台門,簡直企唔穩咁滯啊! 

我份人細膽至極,其實我驚爆玻璃多過水浸 幸好夏季颱風多是東南烈風,不是向正我露台吹 (今次是由左吹向右,吹到所有植物全部右傾) 否則咁大塊玻璃,一定嚇到我食唔安坐唔落咯


Calling 村姑們 ))))))))) 你地屋企又點啊?大唔大風啊?




2008年6月24日 星期二

DIY 有機驅蟲噴霧

我家的那一株薄荷藿香,是看了上年 10 月 sasa 發表的一篇網誌後立刻買的


她說可以用來自製驅蟲噴霧,對蚊滋很有效


 


不過因為懶惰和事忙的關係,我種了半年才第一次利用,哈哈


 


【下圖】薄荷藿香的葉子 --- 搓一搓,會有些驅風油的味道   難怪可以驅蚊啊



【下圖】做法很簡單啊,都是用攪拌器把葉子加水打碎



wow ~ 打碎後有更強的驅風油味 ...



隔渣後將液體裝入噴水壼 (可稀釋一點),就可以拿去噴植物啦 ~



【下圖】我的試驗 --- 那天正好看到有一朵白蘭花被黃色蚜蟲圍攻 (可是其他又沒有喎,奇怪),立刻屠殺一輪 ... 後來好像發現消失了  


話時話,放在地下的盆栽,好像也沒有以前的蚜蟲和小蟻的問題了  


(P.S. 不知道和我現在全都種植香草植物、兼且換過晒o的消毒泥有冇關呢?上年初初種野時,經常受到蚜蟲和螞蟻的煩擾)


2008年6月21日 星期六

台灣美食 --- 【香菇肉燥】

戀愛的過程中,最令人魂牽夢縈的部分,莫過於「估估下」的階段 ... 大家認同嗎


這個菜,是跟一本台灣食譜做的。那本食譜,就是笨 B 爸爸某次去台灣買畀我的


話說我地兩個o個時仲未拍拖,仲要係一個月才會睇戲 or 食飯一次,間中講下電話,有點生疏 ... 都唔知佢想點   唉 ~ 好一棵十月芥菜


我知道佢要去台灣,就成日話要佢買手信畀我 (平時的我不會叫人買手信)


就是想睇佢有冇心記得,同埋會買o的咩畀我  


因為我知佢從來唔會氹女仔,正常來講亦唔會婆婆媽媽地去買手信畀人


笨 B 爸爸返來後約我食飯 (定我搵藉口約佢食飯?呃 ... 唔記得咯 ...)


佢遞上台灣食譜一本和鐵蛋一包


我個心即刻 ................................... 甜晒 喇 (原來佢去旅行時有諗起我啊 )!  呵呵呵 ....


(話雖如此,我地好似都係幾個月後才開始拍拖  所以仲有好多「估估下」的故事架)


************************************************


 


開場白講完,講返呢個餸先


話說收食譜o個下就心甜,揭開o個下就 ...  ...


因為樣樣餸都鬼咁難,我o個時仲係唔駛煮飯架添 (做女嘛,梗係日日食陳師傅飯)


所以幾年來,本食譜都係o係書架封塵,仲搬左三次屋添 (由我屋企 --> 笨 B 爸爸屋企 ---> 而家屋企) 都未整過任何一樣  


 


結婚後開始要煮飯,廚藝亦慢慢在改進中,終於可以挑戰一下了


效果非常好,好香好惹味!用o黎送飯、拌麵或煮菜都一流  


笨 B 爸爸大讚好吃仲食唔停口,仲話比上次做的台式滷肉更好味  (其實我覺得兩款都好好味)


好在我分了小碗裝,可以放入冰箱做存倉精選,又防老公吃得太多變大肥佬



【香菇肉燥】(參考傅培梅「美味台菜」P.37,自己加少少修改)


材料:


五花腩  1 斤、香菇 6 朵、香蔥粒 10 個、蒜蓉 2 大匙


調味:


米酒 1/4 杯、豉油半杯、糖 3 茶匙、胡椒粉 1 茶匙、五香粉 1 茶匙


 


做法:


(1) 五花腩切粒、香菇洗淨用熱水浸軟 (留起香菇水) 切粒、香蔥頭切片


(呢個步驟攪了我一個鐘 !用五花腩切粒較有口感,貪方便的話,也可買半肥瘦返來做絞肉版本   街外的台灣食肆多用絞肉版本)



(2) 用 3 大匙油以大火煸炒肉碎至收乾狀、並有少量油份滲出。盛起。



(3) 用鑊裡的餘油爆香蔥片和蒜蓉,至香氣溢出時加入冬菇粒,再兜炒至香菇味滲出  



(4) 加入米酒、豉油



(5) 加入肉粒,並將香菇水倒入 (加清水至 3 杯分量)



(6) 將材料移入高速煲內


* 若無高速煲,就用鑊或細煲用細火炆 1 個鐘,期間小心乾水



加壓炆 15 分鐘



(7) 開煲後,加入糖、胡椒粉和五香粉拌勻,再用細火炆 10 分鐘至湯汁濃稠即可



 


食法:拌飯、拌麵、夾包、煮菜均可


儲存:按每次食量分開幾份,未吃的放入冰格冷藏,可放一個月

Linkwithin

你可能對以下文章有興趣: