2008年4月5日 星期六

10 蚊碗 ~ 大大碗 ~

物價飛漲,勤儉的小村姑,為左食好野,不惜捐窿捐罅,發掘平靚正食材


下面呢碗大大碗泰式沙河粉,只係十蚊雞


當然,係未計燈油火蠟、同埋我o既人工


 


細細個,陳師傅教落,一定要學識煮少少野


至少唔出街都唔會餓親啊!



雖然係十蚊雞,但絕無欺場架!落左全城最好味的墨魚丸 (下面有介紹),出街畀幾十蚊食的一碗河粉都未有咁好食啊!


上碟後,灑了一些泰國辣蝦乾 + 香蔥,一碗簡單又好味o既湯河就完成啦!



今次用的是方便包泰式沙河粉 (清湯味),是好友 P 推介給我吃的,其實佢一口氣買了幾款唔同味道送給我,不過為食的我已把冬蔭功和酸辣湯味的殺清光   實在是太口味了!河粉又滑、湯底又好味,飲埋o的湯又唔會口渴,very 吉 !下次我去東南亞小店買回來再影相給大家看


P.S. 為何如此好味的泰式包裝粉麵,在超市沒得賣的?!



「全城最好味墨魚丸」,是我話的。第一次食已經驚為天人,之後變成我家雪櫃長期存倉精選。爽口、彈牙、鮮味無窮,仲要係有 chunky 墨魚肉!!!冇得頂呀!!!


墨魚丸在兒興泰有售,加左價都係 $45 一包,有成 1 kg (2.2 lb) 啊!!!我除左買畀自己,仲癲到由元朗買去西環畀陳師奶添呀!



後記:


點解咁山長水遠由元朗抬包墨魚丸去西環 (當然要帶備冰袋),皆因陳師奶鍾意食墨魚丸,但市面出售的墨魚丸,雖已廿多三十元一磅,但仲係食到成口粉、又腥,所以陳師傅一向話陳師奶笨,兼且一口咬定「墨魚丸一定是難食的」!我為左滿足陳師奶的口腹之慾,兼且畀陳師傅見識下原來墨魚丸可以咁好味 ,所以不惜千里送墨丸


陳師傅試過之後,都激讚呢隻墨魚丸呀!以佢咁咀刁,佢o既評語,非常有參考價值架


話時話,我有o的擔心呢篇出左之後,我會更難買到墨魚丸 ... 因為之前介紹過後,已經間唔中出現斷貨情況  不過我又唔會因為咁樣而唔攞出來讚,因為我覺得有質素又誠實的小店,一定要大力支持啊


P.S. 我太愛兒興泰了,之前介紹了幾次啦。若大家想找它的資料,在我 blog 或是 google 搜尋「兒興泰」都會即刻見到的了。


 

沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: