2008年3月31日 星期一

犯罪證據

原來 Yahoo Blog 明天和後天要暫停


咁我今日寫埋呢篇先,因為我最近發現左一單犯罪證據,好想話過你地知,


 


【下圖】因為我家裝了蚊網,遮擋了一些視線,唔行近都唔會睇到窗框邊


所以,間唔中行埋去窗口睇下,都會有些驚人發現 (上次係畀我發現左一個雀鳥公廁,大家仲有冇印象


幾日前,畀我發現左飯廳窗邊有古怪 ...



【下圖】咦?乜東東?手帶?!!莫非o的小朋友o黎我屋企玩o既時候放入去o既?冇理由丫,佢地冇理由夠高可以打開蚊網



【下圖】咦?!!啷啷?!!



【下圖】集齊一套 ... 噢!貓貓的頸帶!!!


唔怪得知,露台呢期o的植物落咁多葉喇!我都覺得事有 QK 架啦 (喂喂 ... QK 點寫呀?唔記得左呀 )



致:親愛的鄰居們


大家快o的睇下屋企隻貓,邊個唔見左個頸圈的 ...


就咁 ...


頸圈爛左攞唔返架啦,不過想你幫我打佢 PP o者!


 

2008年3月30日 星期日

春祭

一年易過又清明,又係春祭o既時候了


睇開我 blog 的朋友,都知道我每年都跟奶奶一家春秋二祭


仲要係位處山明水秀的大嶼山某山頭


不單要徒步行山、仲要帶備鐮刀和剪草機「開路」的地方


 


【下圖】今日好大霧,好彩冇落雨!


係咪好有富士山 feel ... (P.S. 我諗呢座係鳳凰山,在心經簡林附近)



【下圖】徒步行山之前,先要搭巴士上山


唔知點解,我突然間想唱譚校長首金曲


我 ~ 墮入情網 ~ 你卻在網外看 ~ (但歌詞其實同個景冇咩關係)




【下圖】咦哇 ... Chanel ... 朵山茶花呀!



【下圖】未開的山茶花,好似個波



【下圖】小 Blue 已曉行曉走了,仲開始識講好多野



【下圖】當大人在忙於拜祭時,佢就會自得其樂地騰來騰去


今日佢o既自娛活動之一,就係逐一邀請大人們陪佢捐入呢個祭台 ...  不過我驚自己捐左入去之後爬唔番出來,所以婉拒了她的好意


2008年3月27日 星期四

點解你咁蠢架!(2008 版)

*** 內容含有昆蟲相片,恐怖程度屬低級 ****


 


做左村姑就快一年了,我發覺自己愈來愈大膽


至少而家見到昆蟲,唔會嚇到彈上天花板


有時見到佢地身陷水深火熱之際,


仲會做下好心,拯救下佢地添


(當然,只限於我在室外見到的昆蟲。夠膽死侵佔我地頭的,依然格殺勿論 )


 


 


 


 


 


今日,被拯救的幸運兒,係一隻好蠢的甲蟲*  (原來牠是臭屁蟲 ... 請看後記二)


佢唔係第一個了,我發覺甲蟲真是好蠢的


經常都見到反轉左o既甲蟲,典來典去,典足成個鐘都反唔到身


我唔救佢?變甲蟲乾都似



哎o也,幫佢反身,佢竟然噴口水 (唔知係噴口水定拍翼將身上的水拍左出來)


哼!好在冇噴落我度,否則我會 ... 將佢反返轉



 


後記一:


2007 版的「點解你咁蠢架」經典o的。未睇過的朋友可以睇下:


(註:相片驚嚇程度屬中級)


http://hk.myblog.yahoo.com/jw!e0jZeDOfHxs_quoBjPAp4g--/article?mid=16403


 


後記二:


哼,原來牠是臭名遠播的「臭屁蟲」,真是救錯人   千祈唔好畀我發現佢地在我的衣物上生蛋,否則我一定誅佢九族

2008年3月26日 星期三

大頭菜滾魚片湯

唔醒起小魚兒話過,尋日個 Yahoo Blog 「又」有o的問題  


佢尋日玩「食字」,打完晒o的字要 post 時先冇晒!嗚哇!


 


我尋日打左一篇故事,其實係有關我大頭蝦的故事


同呢個大頭菜真係好襯


因為呢個大頭菜,係陳師傅過年前 (?!!) o黎我屋企時放入我雪櫃的


用超市膠袋袋住、仲要袋口打左結,所以我一直以為係椰菜


直至有一日買齊材料想煲羅宋湯,打開膠袋時才發現佢唔係椰菜


又諗唔到點煮,塞番入雪櫃 ... 加加埋埋擺左幾乎 2 個月,真係存倉精選呀!



成個都係肉,唔怪得知咁重秤!


兩個人,用一半已經夠晒數!



先煎香魚片、加入大頭菜兜炒一下,再加 2 大碗水滾十來分鐘,就成了呢碗鮮甜味美o既大頭菜滾魚片湯啦   唔得閒煲老火湯的日子,飲下滾湯都 good 架!


2008年3月24日 星期一

第一次去流浮山

做了大西北居民大半年,還是第一次去流浮山吃海鮮


之前聽過不少人介紹了,不過我同笨 B 爸爸冇揸車,


自己搭車去好像比較轉折,所以搬左入來咁耐都未曾去過。


今次受友人邀約,仲車埋我地去,原來它就在「遙遠的附近」  就在天水圍再入些少


感覺好似南丫島,先經過一條狹長的小街,兩邊佈滿海味、零食小檔口


然後就會見到十數間海鮮魚販店和海鮮酒家,任君選擇


 


我地除左大鄉里出城扮遊客周圍影相,仲買左乾鴨腎和賴尿蝦,好似好香好好食咁呀!



選購海鮮,友人推薦正大街 64 號的「許照記海鮮批發」,新鮮又抵買


至於烹調,友人今次選了一家未試過的店子,手勢 ok,就是不及他們一貫吃慣的那家「小桃園」好,所以一邊吃一邊後悔沒帶我們去小桃園


我說不要緊啦!一大班朋友難得聚在一起吃飯,都是志在開心熱鬧嘛 ~



後記:


原來流浮山的海鮮又平又正,以後唔駛山長水遠去遊客區鯉魚門、西貢了 ~


 


 

2008年3月23日 星期日

巧遇「豪華的士」(原來唔係 ...)

某年某月,在新聞聽到話香港出左「七人的士」


但行蹤詭祕,唔知邊度有、唔知點樣 call、在網上又查唔到  ...


 


如是者,另一個某年某月,


竟然畀我在元朗街頭發現,梗係唔執輸影返張相


哦 ... !原來要 call 呢架的士,係要 call 「英偉車行」... 2478-8511*


哦 ... !原來呢架的士唔係叫「七人的士」,係叫「豪華型無障礙的士」


雖然由七人車改裝,但只可坐五個人,因為預留空間擺放行李或輪椅


全香港暫時只得兩部,費用以時租計算,最低消費兩小時


 


【下圖】呢張係我影o既 ... 咦 ... 不過 ... 點解架車o既形狀同太陽報 (請看下面) 影到的那架 Alphard 好似又唔同的?呢架好似係拉長版的普通的士 ... RRRRRR 頭  


*後記:blog 友 Ian + Ryan 媽已指出呢款原來唔係「豪華的」,係普通加長版可載輪椅o既的士也!










 


豪華的士方便輪椅客
資料來源:太陽報







23/06/2007










【本報訊】兩輛由七人車改裝成的豪華型環保無障礙的士,將於下月中投入服務,為亞洲首部設有輪椅座位的士,包括輪椅空間、上落斜板及輔助軌道等。豪華型的士亦是全港首次在車尾及車頭設有攝錄機,拍攝車前盲點位及車尾情況,司機透過身邊的平面電視可全面監察路面情況,並減低倒車意外事故。

新界的士小巴權益關注大聯盟主席黎銘洪批評,由兩年前籌備至今,政府皆「不聞不問」,他表示今次「拋磚引玉」,希望引起政府關注及主動提供資助,減低新的士成本。

電話預約 每小時百元
新無障礙的士為豐田七人車,由日本製造及引入,成本四十二萬元,比舊有的士貴一倍。七人車改裝而成的新的士雖然與現時的士一樣只設五座位,但多出的車廂空間可容納輪椅乘客或安放大型行李。為支持環保,減少廢氣排出,新的士改用混合能源,以電及汽油推動,簡稱混能車。

第一架新的士已通過運輸署檢驗,批准行駛,第二架亦正檢驗中,預計下月中便可正式投入服務,但服務初期只接受電召包車服務,市民需打電話預約,收費以時間計算,每小時一百元,最低消費兩小時共二百元。黎銘洪表示,由於新界的士牌照費用較便宜,故選擇以新界作試驗點,但未來個多月會引入多十八架車輛,部分車輛會安排作市區的士。黎銘洪補充,若反應理想,會考慮不久將來採用咪錶,收費與一般的士相同。

第一位試搭新車的傷殘人士李子瑜認為,現時本港交通工具提供給傷殘人士的設備不足,而生福利及食物局只提供二十七輛復康巴士,並需早半年預約,去年約有三萬名傷殘人士被拒絕乘搭復康巴士。李子瑜試搭後表示新的士的傷殘設施仍有改善空間,例如車尾門僅高一點二五米,需低頭進入車廂;而且固定輪椅的輔助軌道較窄,需花較多時間調校位置。




2008年3月22日 星期六

好大個鳥巢

某天,村姑甲行經某地,見到自然生態奇觀,不禁又大鄉里出城,舉起相機大影特影一番


 


村姑甲:咦?木棉樹上的是甚麼東東啊?咁大舊o既?



拿著傻瓜 DC zoom 近o的 ~ 哦 ....



再 zoom 近少少 ... 嘻!原來是鳥巢!仲有位雀仔先生在站崗-ing!


村姑甲:咦哇 ... 數落都好多樹枝喎 ... 阿雀仔先生你叼左幾耐先起到呢間屋呀?



雀先生:影夠未呀?!!我老婆o係裡面孵緊仔架!拆你菲林丫嗱!



村姑甲:雀先生你唔駛咁燥 ... 我部傻瓜 DC 來o者,zoom 盡都係得咁多,唔會影到你老婆喎!放心!

Linkwithin

你可能對以下文章有興趣: