2008年2月28日 星期四

惹味沙鯭魚

上個 weekend 返陳師傅屋企時,畀一陣好香好惹味的味道吸引住了


噢!原來陳師傅在煮這個拿手小菜 --- 惹味沙鯭魚!


沙鯭魚即是「剝皮魚」,但呢種係好細條的沙鯭,貪佢特別嫩滑!


不過準備工夫就稍多一點,因為要逐條剝皮、逐條劏肚呢


我都試整過一次,其實唔難,只係要花一點時間


大家若然未試過呢款魚,不妨試試咁整!真係一試愛上架!



哈哈,我仲走左去偷影佢煮餸過程:


2008年2月26日 星期二

1835000 (更正篇)

《場景:電話錄音》


請o係訊號之後留言,多謝。douuuuuuuuuuuuuuuuuuuuuuu ~


!我係陳春桔呀!


係呀 ~!


剛o岩o係大少奶o個邊八到單有用資訊,講埋畀你聽丫!


若然你唔想再收到電話錄音留言訊息,你可以打 1835000 登記啊!


2、3 字頭的屋企電話、同埋手提電話都適用架啦!


 


喂喂 ~ 係呀!


因為我打電話畀你留言,唔係電腦預錄的留言,所以你冇得 block 我架!知嘛!


好啦!係咁先啦!下次再講啦!bye 啦!


 


***********


(20080227 update)


有一位在電訊公司工作的 blog 友,看了我這篇之後發現內容有點遺漏,可能會令大家誤會,所以特地留言補充以下資料,真是非常詳細,感激不盡啊!


原文照錄:


岩岩睇完您篇post...有d野我想請您係知blog度澄清一下, 麻煩晒...


1835000呢個號碼, 由而家直至3月4咱前都只係for 2, 3 & 6字頭的一電話做登記, 9字頭的號碼,要3月4號起至接受登記。


仲有,由3月26號開始,所有人士,如果係唔想再收junk fax、sms同預錄電話訊息的話,都係打呢個電話登記,but係3月26號之前,大家就要打1835002 (junk fax); 1835001 (sms)了,唔係所有登記而家都只係打1835000就得ga...


 


 

2008年2月25日 星期一

咳咳咳與鹹柑桔

三個咳字,其實代表唔到我呢兩日咳成點


應該有十個咳,咳咳咳咳咳咳咳咳咳咳 ........


 


我一向就算病,都好少會咳,十次都應該冇一次


所以已經唔記得左「咳」係幾咁辛苦!


尤其是喉嚨好痕,好多 「kam kam」時


就點忍都忍唔住


於是,成晚會訓唔到,直頭起身咳飽佢;搭車會停唔到,隔離o個個以為你肺癆


 


話時話,我仲以為自己齋咳,所以狂飲好姊妹渣渣送我的「阿媽牌自製鹹柑桔」


聽講鹹柑桔的化痰止咳效果仲好過o的果皮喎 ~ 篤爛加蜜糖沖來飲,效果神奇云云


不過,後來發現原來我真係感冒呀!唔係齋咳 & 喉嚨痛呀!唔怪得知好似冇咩效咁喇 ...


 


不過,鹹柑桔確係好香好好味

good
!可惜我新年沒有擺桔樹,否則我都要自己浸番樽來送禮自用呀!


韋太有教過鹹柑桔的做法,有興趣的朋友可參考下面網址:


http://irenechanwai.mysinablog.com/index.php?op=ViewArticle&articleId=118967



後記:


大家記唔記得,教識我地喉嚨痕原來係「有 kam kam」,係邊個潤喉糖廣告呀?


我記得o個種潤喉糖係三角型的!當年我覺得好好味架!而家好似消失左咁?


 

2008年2月22日 星期五

紅菇蚵仔麵線

好似已經開始梅雨季節咁啦!又要為洗衫唔乾而煩惱了


 


天氣濕,人都濕;成身骨頭好似腌腌悶悶咁,總係提唔起勁


我同陳師奶一樣,係人肉濕度探測器,天氣一濕就周身唔聚財


每年呢o的時候,陳師傅就好鍾意煲o的去濕湯水 (佢至愛家鄉黑豆煲排骨)


仲有就係煮紅菇啦!


乾紅菇口感粗糙,但風味獨特,而去濕、補血的效果亦很好!


 


蚵仔麵線是福建家傳戶曉的麵食,加左紅菇,增加香味同營養之餘,湯底仲變埋粉紅色,幾靚呀!



這些是屋企常用的貨色,也是陳師傅由鄉下拿回來的,不過香港都有得賣 (聽說價錢是冬菇的 2 倍?)


半年前陳師傅塞左一包畀我攞返屋企,我擺到而家都未煮,真是有負老父所託



下面呢盒野生紅菇,又大又完整、香氣濃郁、仲要係深紫色的,陳師傅話香港好難搵到咁正的貨色。佢吩咐我攞畀奶奶,不過我又係未行動   呢個新抱真係抵打,唔得,今個 weekend 要攞過去畀佢先 ~


 


P.S. 在包裝盒上抄下來的紅菇資料


紅菇據「日本菇類年鑒」,正紅菇乾品含有 90%-92% 的有機物,包括五分之一的蛋白質、五分之三的碳水化物物及人體必須的微量元素、氨基酸和各種維生素、尼克酸、以及抗同血脂、心臟病和腦脈軟化等腺嘌呤衍生物。味鮮美、湯呈紫紅色,寄意吉祥喜氣。另外以此菇加青仁黑豆、赤肉炖服,還可治孕婦貧血。也可搭配各種肉類蒸、炖食用,可補血健體。


2008年2月20日 星期三

「真空雞」試食報告

上星期買的那隻「真空雞」(原來叫「風冷鮮雞」)


為了試真o的味道,我分開兩種唔同煮法呀!幾咁認真啊    (講笑而已,純粹因為只得兩個人兩個胃 )


 


試驗一:雞粥



試驗二:金針雲耳蒸雞



【試驗後感】


果然幾有雞味 ~ 口感仲幾嫩滑 ~ 比冰鮮雞好食、但又應該唔及嘉美雞 (個人感覺,可能有偏見架)


公正o的,分別講下我覺得呢種雞o既優點缺點喇 ~ 排名有分先後架喎!


【優點】


  味道和口感都不錯,好似食新鮮雞  


  真空包裝,買返屋企途中唔會血淋淋整污糟,又襟擺 (據講放在保鮮格可放三四天、放到冰箱可以保存一個月) 解凍後味道和肉質都唔錯,做存倉精選最好


   有免費剝皮和開邊服務,可以買一隻雞叫佢分開兩份再抽真空,可以分兩餐食,唔怕自己劈到爛溶溶,又易於保存


   價錢 ok,比冰鮮雞貴,但比新鮮雞平 (普通的每隻 $60 原來是廣東養的,加拿大空運兼食有機粟米的每隻 $95)


    舖頭乾淨衛生,店員殷勤有禮,我之前混吉兩次沒有買野,但都好用心解釋


    有其他較特別的產品,例如急凍禾花雀、鵪鶉、春雞、去骨雞翼等 ...


【缺點】


    肥膏較嘉美雞多 (不過又比新鮮雞和冰鮮雞少)


    較細隻,我沒有秤過,但感覺比新鮮雞和冰鮮雞細一點。應該和嘉美雞差不多吧


    只有元朗一間舖頭,又沒有網頁 ...


【結論】


 如果是即日要食的,我會去街市買嘉美雞 (因為真係一o的o的肥油都冇,雞皮又好重膠質);但也會間中買些真空雞來做存倉精選


【補充資料】


多謝 blog 友 Joan、梁師奶 和道士的報料,原來「永達農場」在加拿大真是有的,仲幾出名


加拿大o個邊有網頁:http://www.wingtat.ca


另外,大西北代表愛美女生都介紹左元朗網站有呢間店的資料:http://www.yl.hk/wt/


 


【下圖】哈哈,買雞可以儲印仔!儲夠 10 個可以換一隻雞!



【下圖】在印花咭 scan 出來的


2008年2月18日 星期一

貴!

呢排去街市買餸,真係完全感受到咩叫「百物騰貴」...


舉目四望,大部份菜都係每斤十元以上的


以前只有北京的、新界的、或有機的才賣這個價錢


而家連本地菜都咁貴了  (「本地」咪即是廣東,咪呃我  )


最唔抵o既係,菜農並不因此而得益,加了的錢大部分都是入了中間人和地產商的口袋


 


對我地呢o的無菜不歡、兩個人一餐已消滅一斤菜的家庭來說,


消費指數急升了不少


再係咁 ... 睇怕我要開始自己在天台種菜了 


 


【下圖】今天買的芥蘭,$10/ 斤



 


搭訕:


因為那隻「真空雞」分了兩份,所以我會分兩餐煮呀!煮完話畀你地知好唔好食啦!

2008年2月16日 星期六

桃花處處

今天搭車去大埔探小 Blue 一家,途經好幾個花場,見到一棵棵盛開的桃花
簡直就 ... 好像未發過市一樣
真替花農傷心

不知道這些沒賣出的桃花還可不可以繼續種呢?
希望明年好天氣 ~ 人人開心  ~



2008年2月15日 星期五

情人節禮物?

以我同笨 B 爸爸呢o的「視節日如無物」的人來說


情人節當然是沒有慶祝活動喇!


不過,笨 B 爸爸竟然買了情人節禮物 ...



俾陳師奶! ...  ...  ...



哈哈!是呀!是買俾我阿媽,不是買俾我呀


原因是陳師奶的手提壞壞地,又唔好用,n 個月前提起了,


做女的我當然常常掛在心,連女婿也是呢


 


尋晚同笨 B 爸爸經過深水埗,便順道去鴨寮街的電話店看看


我的要求是「最最最易用 + 最最最大聲 +  最最最襟用」


店員哥哥即笑晒口,話佢完全 get 到我想要乜


介紹了我買這部,話我知一定掂,因為佢屋企 80 歲的婆婆都用緊


大牌子、國產 version、全新的 Samsung Anycall 才 $750


鈴聲響、對話聲極大、數字極大、電池可用 4-5 天 ... 掂!應該o岩晒陳師奶要求啦卦  ~


 


雖然呢份情人節禮物係送畀我媽而不是我


但我仲開心過自己收禮物  


因為愛家的巨蟹座,最欣賞別人孝順的呢!笨 B 爸爸孝順岳父岳母,是我眼中「好老公」的先決條件之一呀!



後記:


我實在係一個太實際的人了,若然笨 B 爸爸用那 $750 在情人節買一紮花送我的話


我應該會打他 PP 的呢

Linkwithin

你可能對以下文章有興趣: