2008年1月20日 星期日

嘉美雞雲腿翅骨湯

前陣子陳師傅給了我一包海味,我目不識丁,仲以為佢畀包魚翅我,推卻一番話「我都唔識整,唔好浪費啦!」


陳師傅話:「你幾時有見過我o係屋企整翅o者?呢包係翅骨o黎架!用來煲湯好正架!湯底味道同翅一樣,營養又差唔多,cost efficient 呀!」 


咁又係喎!生活淡泊的陳師傅,從來都唔會在屋企整鮑參翅肚的 ~ 不過,雖然佢慳家,但食野咀刁又重視營養,知道咩係好野!佢介紹得o既包冇錯!咁我就唔客氣啦


P.S. 我唔知陳師傅買左幾多錢 (因為佢成日話自己有「靚仔價」  買野實平o的咁話) 我在新元中百佳見過,每兩 $25,一片大概一兩。不過我諗在街上買應該會平過百佳  ~



陳師傅話,呢o的翅骨出一出水就用得,好方便!可以配搭豬肉或雞肉煲湯,鮮美無比!


尋日同笨 B 爸爸拍拖行街市 (冇錯,我地o既日常拍拖活動係咁上下 ) 買左一隻嘉美雞,用了半隻來煲這個湯,半隻留番今朝用來煲嘉美雞粥做早餐 ~ 話時話,家陣o的野真係貴左好多,一隻嘉美雞要 $115 呢   想當年住深水埗時,經常在北河街街市買半隻才 $35-40 的   不過嘉美雞實在太好味,兼且保證無打激素安心好多,所以返唔到轉頭咯,唯有食少o的、但食好o的喇!    (P.S. 有關嘉美雞的好處已寫過幾次,大家在我 blog 搜尋「嘉美雞」就會見到)


今次呢個湯煲得好好味,一飲入口,簡直有「叮」一聲的感覺 !真係飲過番尋味啊



【嘉美雞雲腿翅骨湯】 4 大湯碗份量


嘉美雞  半隻


翅骨  3 片


金華火腿 (切幼條) 適量


薑 4 片


鹽 少許吊味用


 


【做法】


1. 嘉美雞洗淨切件備用


2. 翅骨出水備用


3. 金華火腿切幼條,用熱水稍浸 5 分鐘,除去部分鹹味備用


4. 高速煲內加 5 大碗水煲滾,把拍扁的薑片、雞塊、火腿絲和翅骨放入


5. 加壓煲 15 分鐘,減壓再煲 10-15 分鐘 (可以令湯底濃稠一點),加少許鹽吊味,攪掂!


 


【備註】


  因為高速煲不會蒸發很多水份,所以要煲 4 大碗的湯,下 5 大碗水已夠。


 若然用普通煲,要下 6-7 大碗水,煲 1-1.5 小時


 若煲得太耐,翅骨會融化不見了,沒得吃。但煲得不夠,翅骨還會帶有「骨感」,很難吃。我們這次拿掐得剛好,翅骨軟化了可以吃,湯底又好鮮甜  這要自行掌握一下 ~


 

24 則留言:

  1. 第一有無得飲番碗先!
    嘉美雞 + 金華火腿,,個湯一定好甜呀!攪到我都好想煲tim~~~
    翅骨都係好介紹,搵日我都買黎煲下先!
    嘉美雞真係健康又好味,雖然貴d,但都值!我多數買2斤鬆d,都好似係要$100左右!

    回覆刪除
  2. 什么是翅骨呢?

    回覆刪除
  3. b媽

    真巧,我尋日都煲咗一煲雞鮑翅
    尋日只煲個湯底,未落翅,老公已食到"lamlam脷"
    今日等埋奶奶,先落翅再燉燉它呢!
    翅是奶奶N年前送我們的,以前一直沒有煮
    去年才開始用來煮呢!
    至於隻急凍鮑魚,就是媽媽給的
    自己也是捨不得買呢!

    回覆刪除
  4. 多謝B媽分享.等我呢個懶人都試下先.我都好怕煩.翅骨係好的選擇.

    回覆刪除
  5. 我都好鍾意飲翅湯呢!
    下次試下呢隻翅骨先

    回覆刪除
  6. 我細細個媽媽還在酒樓打工的時候,偶然都會拿一些酒樓不要(即棄掉不用的下欄)的翅頭回來(翅頭即比翅骨還要差一點,似軟骨織組),用雞加瘦肉煲湯,嘩﹗真係好味到不得了﹗味道不會比翅差,最重要是煲出來的湯有很多膠質,感覺喝了後會補充不了骨膠元,皮膚靚靚呢﹗
    不過我們煲出來的湯是奶白色的,膠一點,不像你那個是鮮清湯,可能我們用的翅頭份量比較多吧。

    回覆刪除
  7. 看起來好「黏」口呢...好想試.... 笨 B 媽媽 ,,THANK YOU

    回覆刪除
  8. 這個我也想試,謝謝提供

    回覆刪除
  9. 噢!我又試下搵黎買先
    晌街市咩類型既檔口買呢?

    回覆刪除
  10. 笨B媽媽, 我想問下食落口會唔會真係好翅FEEL 架? 因為我見好似好好味咁呀 ~

    回覆刪除
  11. 嘉美雞實在很好味。我試過用嘉美雞來做碗仔翅。骨做湯底,手撕雞肉,黃耳背,素魚翅,金華火腿。煲出嚟同酒樓有得比㗎。

    回覆刪除
  12. sounds GREAT!

    回覆刪除
  13. oh~ 咁不如我個餐就換左呢個翅喇!
    夠睇頭啊

    回覆刪除
  14. 等我又去搵下睇下d海味鋪有無先.

    回覆刪除
  15. 好美味呀,我都要試吓.

    回覆刪除
  16. 好吸引呀
    不過近依2年真係好少煲依d咁愎雜嘅湯囉
    畢業啦, 一畢業就煮返d好野俾龍少食先!

    回覆刪除
  17. 好似好正喎!!! 等我試吓 chinatown有冇呢d 料先! 我想問吓金華火腿是不是立味? 金華是否只是 brand name?

    回覆刪除
  18. 我依家病左,食普通雞唔係太好,因為唔知有無打針!但嘉美雞有保證一定唔會,仲有呀!嘉美雞真係無咁肥好正呀!煲湯時真係洗下就落得煲,唔似普通雞要勁去肥膏!
    仲有妳下次可以試下嘉美少爺雞ar,好似仲無咁肥架!但我多數清煎,肥少少好味d,所以買番嘉美雞。

    回覆刪除
  19. 嘉美雞都係我"飛佛"黎架...我多數整手撕雞...

    回覆刪除
  20. 濃情朱古力碰上士多啤梨2008年1月22日 上午4:10

    嘉美雞好味呀...我都好鐘意..你用黎煲左湯..一定係勁甜啦..你重加埋 金華火腿..嘻嘻..我都想飲返碗呢

    回覆刪除
  21. 嘉美雞成100隻,重要係預定先有呀!!!哈....真係咁好食...等我下次預定一隻來食下先,不過我又唔識整......買隻雞做咩呀!!!

    回覆刪除
  22. 嘉美雞响邊度買呀?
    高速煲係咪=真空煲呢? 有時見NEWS話會爆炸...唔敢買,但又心思思覺得好方便,買邊隻好呢,係咪好貴架?

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: