2008年1月13日 星期日

好味雲南小菜館【大救駕】

呢兩日 Yahoo Blog 又好似出事,上載相片和 video 都好有問題,出新 blog 或寫留言就更有問題!噢!


************


星期六和笨 B 爸爸出旺角辦點事,辦完後打算行去地鐵站之際,被大大個紅色招牌吸引著 --- 大救駕 --- 原來你o係呢度!


事緣 blog 友 sasa 曾經介紹過,話呢間雲南小菜館質素不錯,抵食又有特色!而家好日都唔出城食飯,擇日不如撞日,既然今次咁o岩經過,一於試下喇


【下圖】就是這個大大個紅色招牌 (我忘了影相,借 sasa 的相片一用 )



【下圖】我覺得大救駕的小食做得好出色,特別得來又好好味,仲好平添 (多數是十多元一碟) 好難得呢!份量不多,


下面呢個係雲南風乾肉,灑了七味粉和花椒粒,辣辣地麻麻地好惹味!



【下圖】呢個係水晶肉,真係估佢唔到!因為食落一點腥臊味都冇,好清新好爽口,我地仲以為係粉皮之類的東西!叫了侍應來問,他說這是用豬肉做的 (我估是豬皮的膠質吧?好似水晶肴肉的水晶部份?) 嘩!即是養顏啦!簡直要狂吃 ...


上面淋了醬油和鮮蒜蓉,又是極惹味!大力推介啊



【下圖】這好像是香酥排骨米線 ... 排骨相當好味,米線口感一般,但湯底都唔錯,整體來說是幾好味!



【下圖】黑白椰子氣鍋雞 ... 這是細煲的份量,兩個人飲剛好一人一碗。味道唔錯啊,好香椰子味,我都要試下在屋企煲先  ~



【下圖】笨 B 爸爸本來唔畀我叫呢個「騰沖大救駕」,因為佢話炒年糕有咩咁好食?仲要係皇帝落難時就快餓死救佢一命o既野,唔慌好食 (哈哈哈 ... 其實佢又講得幾有道理o既,諗起都係幾攪野)


我話佢店名叫「大救駕」,一定有o的野o既 ... 一場o黎到試下啦 (這句頗有容易受騙的師奶仔風格)


上菜時,被那片煎蛋笑死了 ... 這個菜式的賣相真是好攪笑呢!果然是炒年糕,但好夠火候,我覺得幾好食喎!話時話,落難時吃到的東西來說,有肉有蛋,算是好幸福啦!



【大救駕】


地址:旺角西洋菜街南107號地舖


電話:3580 8833


消費:兩個人吃了約 $120


 

25 則留言:

  1. 豬肉可以做到好似 "水晶" 咁, 好利害!我都好想食呀

    回覆刪除

  2. 這個我們也常吃,叫做豬皮凍。是豬皮煮后凝成的,易煮味道又好。

    回覆刪除
  3. 要煮汽鍋雞,要先買汽鍋——煮的時候,鍋里不放水,湯是從鍋中間小孔出來的蒸汽凝結而成的,所以特別香濃。

    回覆刪除
  4. e............的確好吸引啊 ~ 而且價錢好ok呢

    回覆刪除
  5. 你又私人o左篇 1.11 既blog 呀 ?
    噢 ~ 好彩果日有幸上blog留言咋

    回覆刪除
  6. 呢間我有次食對面o個間米線都見到.. 不過仲未試呢... 睇睇下都唔錯咁

    回覆刪除
  7. 嘩!食咁多嘢先百二蚊真係超值,過兩日我都要去試吓先!
    水晶肉同埋個椰子氣鍋雞好吸引呀!多謝晒!

    回覆刪除
  8. 好抵食啊!

    回覆刪除
  9. 水晶肉d汁好似好正咁啊~椰子烏雞未食過,但椰子雞湯好好味,我諗差唔多卦~
    笨b爸爸果個理由好有歷史道理

    回覆刪除
  10. 5 個送 , 其中一個係湯 tim , $ 120 - 抵
    多謝分享

    回覆刪除
  11. 其實我都一直好想去試呢間,有朋友去過話好正,加上方便我,不過一直未有機會去

    回覆刪除
  12. 雲南菜
    我鍾意喎
    下次出開去一定要試試!

    回覆刪除
  13. 那麼多道菜,才HK$120??超抵食喎!!我已抄下地址,一定會去試試。謝謝你的推介。

    回覆刪除
  14. 我都是剛搬到村屋居住,因為有小朋友,想問如何滅蚊?

    回覆刪除
  15. 嘩, 兩個人都係食o左 $120, 好抵喎~ o的菜仲好有特色, 唔錯呢! 真係好介紹呀!!

    回覆刪除
  16. 濃情朱古力碰上士多啤梨2008年1月14日 上午5:25

    你好似食左咁多野都係120元真係好食呀..等我搵日都去試試先...

    回覆刪除
  17. 兩個人都係$120, 抵呀! 個「騰沖大救駕」唔多覺有年糕既?

    回覆刪除
  18. 去完雲南, 我簡直愛上她的一切!
    連佢地唔好食的飯餸, 我都愛上
    你下次都可以去試雅蘭中心的阿詩瑪, 佢地啲物資全部都由雲南飛運抵港的.
    你呢間, 等我都去試吓先

    回覆刪除
  19. 多謝介紹 .
    雲南的麻辣食物一流 . 有時間笨 B 媽媽去玩 . 包你喜歡

    回覆刪除
  20. 唔好意思,想借問聲 blogger阿婷 話果個豬皮凍易煮味道又好, 其實係咪即係可以自己響屋企整到架? 可唔可以教我呀? 我成日掉晒D豬皮,因為我唔識點煮點用囉!! 你地又講得呢個豬皮凍咁好味, 唔該呀

    回覆刪除
  21. 真係好經濟同賣相相當唔錯, 經過我都會試吓架, 多多分享

    回覆刪除
  22. CraZy Katie~曦媽咪2008年1月18日 下午3:01

    大救駕個鬼雞都好正o架(鐘意食辣o岩晒)~重有優質過穚米線都好好食o架~

    回覆刪除
  23. 北方豬皮凍做法(由烹飪高手高老師提供)
    新鮮豬皮切小塊,飛水,在鍋內放適量水(豬皮:水=1:4)、鹽、糖、料酒、蔥段、姜片、八角、花椒等調料(分量可以根據自己的口味增減),像煲湯一樣慢慢煲,煲到豬皮軟爛(用筷子輕輕就可以扎透),然后撈出蔥姜等調味料,連湯帶豬皮一起放在大小合適的容器里,放雪柜雪一晚。豬皮的膠質會讓湯凝結成凍。吃的時候切片點蒜醬吃即可。
    *豬皮也可以換成豬腳,味道更加好。我們家每年過春節的時候高老師會煮一大鍋,大家都很喜歡吃呢。

    回覆刪除
  24. 謝謝阿婷和笨B媽媽, 等我試下成唔成功先

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: