2007年11月30日 星期五

火鍋副產品 x 2

平時兩個人橕檯腳打邊爐的話,我地會煲個清清地又有益的湯底,


然後買o的健康天然 & 唔肥膩的材料


一來唔怕脂肪超標,二來可以飲埋啖湯!


(溫馨提示:雖然吃得清淡但始終有油,建議使用隔油勺隔去湯面泡沫和肥油,那是食物中融解出來的蛋白質和脂肪)


 


不過那次開爐大典確是準備得比較多食物,所以飽得滯食唔晒


唯有將o的湯和剩餘材料留到第二日用埋佢



【午餐 - 豬骨湯麵線】


應用物資:豬骨湯底


今次呢煲係豬骨湯,混埋羊肉、海鮮的味道,湯頭鮮甜無比


煲番熱個湯,加一束麵線煮一分鐘已攪掂,快過變魔術!


大蒜和麵線係好朋友,落左好食好多



呢隻係陳師傅御用麵線,手拉的特別有口感,煮完還不會糊掉,好 good



【晚餐 - 節瓜海鮮湯飯】


應用物資:帆立貝、鮮蝦


夏天鍾意食湯飯,因為方便又清淡,用冬瓜消暑又生津


冬天鍾意食湯飯,熱辣辣好暖胃,改用節瓜較正氣


 


呢個湯底唔係豬骨湯了。我將煮蘿蔔湯的秘技,應用在節瓜上:


(1) 先將冬菇、金華火腿、瑤柱仔、魷魚仔乾洗好用小煲加水煲半小時出味


(2) 節瓜切小粒,用薑片起鑊炒香,除去薑片,加入湯中即成美味湯底


(3) 帆立貝和鮮蝦先用鹽稍醃 5 分鐘,煮好湯後放入滾 3-5 分鐘至熟。帆立貝較厚較難熟,可以先放


(4) 加入預先煮好的飯,攪掂!


 


呢個湯飯,又係一o的調味品都唔駛落,但食到笨 B 爸爸 lam 晒脷  大成功! (呢個奄尖 sir 好麻煩架,成日踐踏我煮o的野架) 


【私人網誌】Bingo!

【私人網誌】


 


日期:2007-11-30  早上 7:45


 


嘻,終於忍唔住,都係 check 啦!


成晚訓得唔好,今朝 7:30 am 就爬起床了,


因為想笨 B 爸爸出門上班前知道結果哩


 


第一次用,手忙腳亂兼緊張,好在冇跌左支棒入廁所


(因為上網查話用朝早第一次小便 check 最好嘛,冇計,尋晚訓著左 feel 到 急急地都特登唔起身去廁所添呀 !)


 


說明書話 2 分鐘內會有結果,最多 5 分鐘,太耐之後睇的答案則不可作準


所以我一試完,就金睛火眼地瞪著支棒


見佢慢慢先出右邊條直線 (係人都有的)


然後左面條線 .. 淡淡的 ... 淡淡的 ... 浮出來了


 


喔噢!我地得左啦!!!!!


2007年11月29日 星期四

【私人網誌】Do-test

【私人網誌】


 


日期:2007-11-29


 


今次 auntie visit 遲了七天啦喎


走了去萬寧買了呢支 D 仔


第一次 ... 好緊張哩 ...


本想去藥房買平o的,但市中心o的藥房企檯全部都係男仔,佢地又冇經驗、我又尷尬,費時嘞 ...


 


丫 ... 其實我想講


我 auntie 份人幾唔準時,周不時都遲到 (1~5 天不等),話左佢好多次都係咁


所以呢 ... 我都唔知幾時驗好


開爐大典

朋友們,你地今年開左爐未呀


我地就梗係 ... 開左喇 !咁鬼凍,凍死人咩  ... 唔食番煲火鍋暖下身點得喎!


近來事務繁忙,唔得閒執屋又唔得閒準備咁多野,所以唔約人啦,兩公婆玩自閉橕下檯腳,好開心呀


 



【下圖】今次用左杞子蘿蔔豬骨做湯底,先用高速煲煲 20 分鐘出味才拿來用,o的蘿蔔已經軟晒啦 (平時飲湯煲 30 分鐘,但攞o黎做火鍋湯底的話蘿蔔會太軟) 



【下圖】笨 B 爸爸負責切的脆鯇片



【下圖】呢o的火鍋羊肉片係我在兒興泰的新發現,好滑好有羊味,超正啊!



【下圖】海蝦和帆立貝都是存倉精選,但極鮮味



【下圖】墨魚丸同蟹柳都係可以做存倉精選的!噢!咁我以後要打邊爐就方便好多啦 ~



【下圖】唔知大家有冇咁o既經驗,就係用電磁爐打邊爐時,打打下會熄機 (因為在朋友家試過不下一兩次)。我自己屋企就唔會有呢個問題,原因係我每次都會搵個硬淨的蛋盤墊底,讓爐底的熱氣容易散走,唔會過熱


由於電磁爐有大有細,大家想用呢個方法的法,要試下自己個爐企唔企得穩。我呢個就o岩o岩好的。否則,用硬咭紙或報紙代替都可以



 


【同場加映】在兒興泰的新發現


上個 weekend 其實未算太凍,但咁o岩經過兒興泰嘛,咪走入去八下


咁o岩我比較相熟o個位靚女o係度,我就問「我想打邊爐啊,有冇野o岩我買?」(我以前都講過,唔係樣樣野都有細貨嘛)


佢就推介左以下呢四樣,共 $155 (因掛住吹水,唔記得問獨立每樣幾多錢,下次問番喇)


 


1. 火鍋羊肉片一磅 ($20):大家睇下幾新鮮!街市凍肉店o個o的差好遠啊!



2. 帆立貝 ($77):每包約有 30 粒,用來打邊爐又得、煮麵又得,係存倉精選,以前都唔知有呢o的筍野



3. 墨魚丸一公斤 (2.2 磅,$42):呢隻墨魚丸好好味架!我仲食到墨魚鬚添呀!好足料!



4. 蟹柳 ($18):靚女話呢隻好味,不過唔係特別野,街市凍肉店好似都有



之前已經介紹過兒興泰,大家可以用搜尋功能搵到架!

教你如何整靚個 blog - 【傻豹網誌】

經常有好多 blog 友留言問我點整靚個 blog


其實我想答 ...


丫 ... 其實我只係識得幾樣簡單的,大家在我 blog 一眼睇晒喇 ...


丫 ... 其實我只識用電腦,唔識教電腦 ...


丫 ... 呢個係 YBLOG小編緝o既工作o黎架喎 ... 我搶左去做唔係幾好意思 ...


 


哈哈!講笑o者!


我若然識得o既話,又有時間o既話,我會盡量答o既!


 


不過,家陣我可以偷懶咯!因為我發現左有個 blog 友 Pink Panther,大家想問的問題,基本上佢已經全部寫過晒,仲寫得好簡單易明精彩詳盡添呀!呢o的咁有 heart o既 blog 友,我覺得要掌聲鼓勵呀!


 


2007年11月28日 星期三

請不要在巴士上剪指甲

 


某次搭巴士途中,遇見對面的乘客在 ... 剪指甲


其實呢 ... 我好想同佢講 ...



沖完涼先剪容易好多架!下次唔好在車上剪啦!


 



其實呢 ... 易唔易剪係一回事


我覺得剪指甲係相當私人兼且會影響到別人的事


萬萬不可在公眾地方做呢!


只是,我很 R 頭,以前在辦公室也間中聽到上司、同事的剪指甲聲


令我好懷疑,大家o係屋企係咪真係忙得咁緊要呢?


 

2007年11月27日 星期二

未識煮野,都識得煲的【南北杏冰糖雪梨】

前晚開始翻風,o的北風吹到呼呼聲咁


大西北有著大漠氣候,中午有太陽曬住時,就會熱到「慶合合」,件外套除都除唔切


但太陽下山後,再加上北風吹一吹,真係凍到打冷震!


 


今晚煲呢個糖水,相信大部分朋友在中學時代都可能煲過


去宿營、BB 蕉必備喇!超易煲,又好味


不過o個時好似冇落南北杏,好似係求其柴娃娃去買o的雪梨、冰糖就煲一餐


但成班朋友飲得不知幾高興!大家唔知有冇相同經歷呢


家陣呢,連雪耳都要揀過,要買黃色的樟州雪耳才對路啊,白雪雪那些用過漂白劑,唔好買啦!



材料:雪梨、雪耳、南北杏、冰糖


若煲二人份量的話,可以用 2 個雪梨 + 半個雪耳 + 1 湯匙南北杏 + 適量冰糖 + 適量水,煲 2 個鐘就得。我用高速煲只煲了 30 分鐘



阿爸教落,買野唔好貪靚樣,要防範無良商人為左整靚個樣而落左o的唔知咩


揀雪耳呢,就要揀呢種顏色自然偏黃、結實完整的樟州雪耳。千祈唔好買白色大大舊o個o的,一來可能用左漂白劑、二來煲完會溶,好似漿糊咁好難食啊


樟州雪耳好易搵,又唔貴,我呢o的在市中心買的,十元一包都有唔知五六個咁啊 ...



呢期o的雪梨平到出奇,$10 有 8 個仲要好靚

good
... 夏天的話我會就咁食,冬天的話始終怕寒涼,煲成糖水食就好穩陣啦!


我將 8 個雪梨煲晒,share 埋畀樓下一家分享,哈哈,又有當年和同學仔一齊飲雪梨水的感覺


丫 ... 係呢 ... 點解雪梨煲左之後會粉紅色架呢  ~ 丫唔係 ... 係蝦肉色 ...


Linkwithin

你可能對以下文章有興趣: