2007年10月24日 星期三

高速煲 - 快速減壓法

哈 ... 呢期唔知點解,突然間有幾個朋友同時對高速煲有興趣


似乎我都介紹左唔少生意畀電磁爐 & 高速煲供應商  


 



之前提過,我用緊的高速煲牌子是 fissler,是好友送的入伙禮物。用左幾個月,簡直是愛上左喇!兩個人煲少少粥我都會出動佢架,因為又快又慳能源,實在太合我心意了  


 


話說高速煲又名壓力煲,顧名思義,係利用左高壓令沸點提高,從而加快煮食速度的原理。而壓力就來自蒸氣。高速煲o既設計非常密氣,所以「鎖煲」後,蒸氣就困在裡面,不斷增加後形成高壓。


 


煮o既時候加左壓,咁煮完固然又要減返壓 ... 未減壓,係開唔到個煲o既!


 


一般來講,可以用自動減壓或手動減壓兩種方式。


 自動減壓者,就係由得個煲擺o係度,待煲內壓力自己下降。


 手動減壓者,就係由使用者推動閥門,讓蒸氣排出,減低氣壓


 


製造商一般會建議用自動減壓,因為手動減壓會令煲內的膠邊加速老化 (放心,唔會有危險,只是彈性變差,咁就會鎖唔實o的蒸氣,氣壓咪唔夠高囉。若遇到咁o既情況,換過條新o既就得架啦 ... 只係要花錢囉) 但自動減壓呢,好多時都需要 15 分鐘或以上,心急者如我,有時會覺得度日如年,尤其是肚餓趕住食飯的時候


 


如是者,某年某月某日我忽發奇想 ... 自動減壓的原理,都是等煲內的溫度下降,蒸氣減少吧


若然我唔想推動閥門放氣 (因為噴出來的蒸氣好熱好熱,有時都驚彈親自己。尤其是煲白粥時,絕不能用手動排氣,因為白粥的黏糊性質,會有火山爆發的效果 ... 我試過!就算唔彈親自己,都會漿住o的排氣孔,要洗好麻煩) 咁我不如幫佢降溫喇!


降溫的工具 = 濕毛巾 

 + 冰袋


 


好似發燒敷冰袋的原理也 ... 如下圖



結果:平時要 15 分鐘才能完全減壓的二人份量白粥,用呢個方法,7 分鐘就攪掂了!即是快一倍


 


溫馨提示:


 冰袋是在 Jusco 十元店買的,$20 一個,買大個o的有著數


 濕布不妨濕o的,因為煲的溫度極高,好快蒸發晒o的水份


 敷左一陣後不妨洗一洗毛巾 (小心,極熱),以及反轉冰袋


 唔好就咁用冰袋而唔墊濕毛巾,都話個煲極熱咯 ... 溶左你呀


  這個大冰袋,每次任務完成後都會暖晒 (真係辛苦晒  ) 若然你想效果更好,可能有兩個冰袋接力會仲正


  blog 友可可貓的活板門提議,若無冰袋的話,用浸了冰水的毛巾一樣 good


 


以上純粹我以村姑有限小宇宙諗出來的小方法 ~ 大家若然有更好的方法,請拿出來交流交流啊


 


呀 ... 話時話,查實個冰袋本來係諗住「一袋傍身」,放定一個o係雪櫃,發燒撞瘀都敷得 (哎 ... 點會諗埋o的咁o既野架 ... 實在太無聊了  ...) 哈哈,家陣畀我諗多個用途畀佢,幾好


 


20071029 update:


因為見到幾位 blog 友話 fissler 冇得手動排氣,我覺得好奇怪,因為我間唔中都有用架喎   大家睇番上面o個幅高速煲o既圖片,手柄上係咪有個藍色推制呢?向上推就會排氣架啦。我睇番說明書第 27 頁,都有講架 (第 2 點 --- Release steam)


呀 ... 話時話,Fissler 的說明書好厚,咩語言都有,就係冇中文!呢樣大家可能要考慮下呢,因為買o黎畀阿爸阿媽用的話,你可能要做人肉翻譯機


話時話,豬太太@二人三貓剛買了 Lagostina,兼且好認真地做了一個高速煲大比併,有需要的朋友,記住過去研究研究 (按此)




 


後記:間唔中都會見到一些 blog 友留言問一些之前出過的話題 (熱門問題除了高速煲外,還有電磁爐、隔熱層 ... 之類) 雖然時間充裕時我很樂意逐一回答,不過有時忙起上來,未必有覆得咁快啊!


其實,大家可以先用「搜尋網誌」功能,看看我有沒有出過相關內容才再問哩 ~ 咁咪快o的囉,嘻

39 則留言:

  1. 多謝哂!!!!
    成日麻煩你,真的不好意思了

    回覆刪除
  2. 你好有 heart....

    回覆刪除
  3. 真係笨B媽媽好有heart呀,我已經睇埋你那篇意見搜集,我明天會再去永安睇下,haha,不過我其實已去過永安4次,吉之島1次,千色店1次,再加問過SOGO, UNY, 先施,千色,永安,JUSCO的價,我先知,應係永安最平,由明天開始做4日,之後應到年尾呀
    仲有sales話Fissler 08年1月起,約+$300
    仲有你介紹的電磁爐今天已送了我屋企,haha,不過佢現在個款冇了4條邊

    回覆刪除
  4. 我真的服了妳 ,用冰袋都被妳想到。。。嘩
    自從我的壓力煲死了後,我就用兩個thermal媽媽煲代替,現在我老公在我旁邊,看到妳的介紹,叫我快速要番個啊

    回覆刪除
  5. 小妹我未為人婦未為妻,唔識煮食亦唔多曉煮食,但睇左你既blog幾個月,真係忍唔住要留個言話你知,我決定遲d做人老婆時都要好似你o甘叻,識煮亦肯煮o甘多野食!仲有,因為你對高速煲有o甘詳盡o既介紹,亦令到我想結左婚之後都要買個黎煮下野食,哈哈!!!

    回覆刪除
  6. 唔錯, 哩個的確係好方法
    不過我成日聽人話高壓煲好危險, 又話塞煮個出氣口會爆煲
    我都剛結婚, 但未諗著用高壓煲, 因為怕怕~~~ 睇張相, 你都係用電子爐喎, 香港唔係用gaz 爐咩?

    回覆刪除
  7. 先頭我仲以為你會放個煲入凍水降溫,原來係凍個蓋都得 ,
    b爸有冇話你啲係師奶仔諗頭呀

    回覆刪除
  8. 我都好想買高壓煲呀, 其實真係好環保, 慳電慳資源, 最緊要好快有得食, 真係要氹氹老公送個比我

    回覆刪除
  9. 唔該晒呀 見你地用得咁正我都稔緊買高速煲好耐 點知呢度賣都係叫壓力煲(pressure cooker) 我見識小唔知高速煲同壓力煲係咪同一樣野 多謝你既解答呀 我都好似通記話頭聽人講話壓力煲好危險呀 咩塞煮個出氣口爆煲噴晒的野出黎有排洗呀 好驚嚇咁 所以個日outlet見到減價一百蚊一個我都唔敢買呀 唔知你有無呢個問題呢?

    回覆刪除
  10. 犀利喎! 用冰袋都俾你諗到!

    回覆刪除
  11. 你冇得頂呀!其實有冇商戶聯絡你叫你幫下佢地架

    回覆刪除
  12. Suddenly I thought I am visiting "Tsang Sir"'s blog or something... fixing things with tons of ideas! hahaha....
    I guess "DAI Siu Lai" can publish a cookbook... and you can publish a "How to" book with different cool ideas!

    回覆刪除
  13. 我都用左這套煲成年. 真係好好用.而且套煲都巳升直成成千元. 因為我都有介紹給朋友用.
    今天永安做promote, 一套好似要$2500.00 還有$100減.
    (有兩個煲).
    我家每天都用佢來當電飯煲, 我用佢來蒸飯, 重好過西施飯煲.
    我有網友叫我寫高速煲食譜, 你知啦, 煮飯係工人做, 我只係
    口講叫佢整的. 我要真係好得閒先去諗下.

    回覆刪除
  14. 好正嘅生活智慧呀!

    回覆刪除
  15. 今日減價係咁,大的10L煲連蒸架等 = $18XX
    如果連埋4L 煎PAN (但記住個pan冇蓋跟的) package就 2890 x 9折 = 2601
    總括所有都係正價再7折
    special pacakge就係 6L + 4.5L 各一,共2蒸架 = 2390

    回覆刪除
  16. 謝謝笨 B 媽媽的精彩示範。
    是我的新婚太太介紹我看妳的網站,雖然我倆是廚藝初哥,但正努力嘗試學習妳介紹的菜式。很開心。
    我倆亦想買一個高速煲,可以省點能源,菜式變化亦多一點。正想買 Fissler 或 Lagostina 其中一個牌子。看過了很多網上留言,但各人對兩個品牌爭持不下,很難作出決定:
    Fissler
    優點:鋼水較好,蓋較易放上,煲口較闊方便蒸送,套餐附一個煎鍋,一物兩用,(樣好一點)
    缺點:沒手動排氣,手柄位礙地方,沒安全活門
    Lagostina
    優點:有手動排氣,有安全活門
    缺點:鋼水較差,煲口較窄,蓋較難放上,(樣衰)
    本想買 Fissler 8 公升,但怕在放工後炆送/煲湯後仍要傻等近半小時排氣,有點猶豫。另,如排氣時間長,多一個煎鍋作用可大?
    如方便,請分享一下妳的意見。十個謝謝。

    回覆刪除
  17. 見過你上一篇紋野快咁多,真係好令人心動,好想買返個壓力煲。haha!
    你的生活小智慧真係好有幫助耶﹗想再快d坐冰水都得。

    回覆刪除
  18. 我都打算買個煲, 但就唔知買真空煲或高速煲好? 可以比啲意見我嗎?

    回覆刪除
  19. 我有個9L的Lagastina,不過主要係用黎煲湯。試過一次煲完粥之後手動排氣,真係好似火山爆發咁,抺到我死呀,陰功。

    回覆刪除
  20. 我都想買一個高速煲...呢兩隻牌子 Fissler 或 Lagostina 我還在選擇中。

    回覆刪除
  21. 笨B媽媽,
    我真係覺得你好惦,真係非一般的村姑,你分折力好強,我得笨B爸爸同你,真係好強,一個諗,一個做,實在太好了。你個網誌我都有介紹給我朋友們看,你真係入得廚房,出得廳堂。

    回覆刪除
  22. 笨 B 媽媽 ,
    我睇左你個blog有一段時間,最鍾意你介紹元朗有乜好野食,我都係即將嫁搬入去元朗鄉下地方呀,不過我吾係住村屋.hehe.
    我剛剛0係台灣買左個lasgotina 7L 高速煲,都係$1400,仲送埋專用清潔劑同手套tim. 返黎香港去千色店睇要成$2000

    回覆刪除
  23. 笨B媽媽,你真可愛啊!我想知你就可以一呼百應,兼且資料詳盡,
    真是感激!
    醒起原來自己曾經都問過同一個問題,真是人老記性差,事隔幾個月忘記了,
    所以又再來問,sorry呀,唔好怪我煩呀!
    Sunday 要去永安逛逛先............係呢,買幾多L 的最好用呢?( say for 4 people )

    回覆刪除
  24. 嘩!11L 咁大呀?如果平時煲湯用會唔會太大呢?
    我咁懶,一定唔會煮 11 個人飯啦,怕辛苦呀!
    不過若然買得太細,會否不夠好用呢...比喻蒸餸、煮雞之類?

    回覆刪除
  25. 一個煲攪掂的話又幾好喎,你說得幾有道理。
    想問那麼用它來煲湯,要好像我們平時煲老火湯時加多點水預揮發嗎?
    煲湯兼同時蒸餸?煲湯時間長,但蒸野時間很短,怎可同時進行呀?

    回覆刪除
  26. 咁多位.我都係用 lagostina 既高速煲.其實唔係我買架.係我媽媽買比我架.佢話我知2000幾.我第一個反應就係.你有冇比人搵笨架.不過又唔敢講.都係佢一番心意嗎.佢話我要返工冇時間煲湯唔得架.真係好甜架個心.咁就用下喇.用落又幾好喎.上個月我仲自己買左一套添.
    一個7升高速煲.一個30cm平底鍋.4619大元.送左一個好似係20cm既煲.一個高速煲既煲蓋.一個湯匙.
    佢話唔買遲d要加價.買唔返架.咁就買左.不過個平底鍋真係好好用架.

    回覆刪除
  27. 我今日放工去永安買左喇 !!
    我買左 8L Fissler – 永安折實 $2421 ,有一個蒸架,一個 4L 煎 pan 跟 ,個煲蓋可以比埋 煎 pan 用架。
    多謝笨B 媽媽 和 豬太太@二人三貓 的推介和資料搜集 。

    回覆刪除
  28. 可可貓的活板門2007年10月26日 下午4:39

    笨 B 媽媽 ,
    你果然 smart ! 我買fissler時個promoter教我用呢個方法!
    如果心急d, 你可以將條濕毛巾浸冰水, 比包冰袋仲快dd

    回覆刪除
  29. Dear 笨B媽媽,我昨天在永安買了。原來永安100周年大減價呀,我去到嚇了一跳,點解咁人山人海?點解咁多女人買煲?莫非是此篇blog的效應?
    我終於買了個7L的Lagostina,減價為$1880,掋呀!我鍾意它的煲蓋設計,是內堪式的,不怕爆煲飛蓋,兩邊短耳柄比較慳位,煲身也較輕,方便清洗和使用。
    本來一到步便被Fissler 的sales游說,叫我買個6L+4L兩個煲最掋,我唔想要個4L的話,幫我找其他客人同我share..........咁師奶hard sell.........怕怕。不過最唔鍾意它太重了,再加埋水就太誇了,隻手柄又長很阻地方,而且煲蓋要對準位才可關上,我怕大意的工人姐姐唔識。還有發覺它是沒有手動排氣的............記得你話有的嘛!所以我就游了去lagostina 的counter, 個sales見我拿着Fissler的單張在手,告訴我她們賣的是舊款.........而Lagostina才是銷量第一的名牌子,從來都不會有大減價...............見她示範了兩下開蓋我便買了。
    永安大減價呀!各位太太快快去逛,包大家滿載而歸。笨B媽媽你星期六有貴賓,就星期日去啦,其他家居用品都在大搳價,真是價廉物美。而我就買了很多其他電器用品,比豐澤還要平呢!
    Anyway, 多謝你的意見和回覆啊!

    回覆刪除
  30. 我都買咗,仲出咗report,多謝你呀笨B媽媽
    http://hk.myblog.yahoo.com/Mrs-Chu/article?mid=210

    回覆刪除
  31. 用冰水浸毛巾蓋住蓋面,真work呀!多謝晒!真係七分鐘就掂。不過會唔會對個煲唔好?

    回覆刪除
  32. Hi, 苯 b 媽媽, 我都係昨日 search 高速煲時, 睇到你介紹開始訂閱架, 仲有電磁爐介紹真係好有用, 令我對電磁爐及高速煲改觀,
    特別係高速煲, 好想買番個黎用, 去先施睇過, 兩大名牌, 我會 買 Fissler , 因為無自動放氣制, 好似簡單易用 d , 太貴, 仍在考慮中,
    你提供的實用資料, 簡直可以出書

    回覆刪除
  33. Sorry, 第一次留言就寫錯,
    Fisser 無手動放氣制, 得自動放氣制, 對我呢d 初哥全自動安全 d

    回覆刪除
  34. That's why 我以為是舊款,而lagostina 的sales 也是這樣說。
    你指手動排氣制是那個藍色的?但永安的sales說那個推上的制只是用作普通煲或翻熱用途的,而蓋的孔是全密的,看不到有排氣孔。她說是沒有手動排氣function。
    而Lagostina 是很明顯另外有一條排氣桿,有安全device 拉起, 也可拆出清洗,但特別提醒不適用於五穀類............例如煲粥、紅豆沙之類。
    笨B媽媽呀,我買了很多厨房電器,其中是個很靚的豆漿机,它有其他 menu button 煮不同類型的糖水和糊。所以很期待跟你學豆譜呀。
    還有個三層電蒸爐,想到一次過可蒸9隻大閘蟹大宴親朋,好開心!
    丈夫陪我買的,他好像比我還興奮,因為知我重新投入這些新玩具,他有口福了!

    回覆刪除
  35. 我好驚呢啲煲,成日覺得好似好危險咁

    回覆刪除
  36. 我都係用呢個心急方法減壓!

    回覆刪除
  37. 我都有這個煲,就因我比較心急(要等排氣 )所以就好少用,不過見到你這個方法好正呀,等我再戰Fissler高速煲先得.

    回覆刪除
  38. 我想問下果煲會唔會好嘈呀?

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: