2007年10月7日 星期日

失魂事件 2007


呢個 ... 似唔似梳乎厘 ...

似哩 ...

但若然我話畀你知 ... 佢有 8 寸直徑 ... 呢個係一個雪紡模  ...  

係咪想暈 ...

 

其實,我咁大個女,都未整過梳乎厘

連食譜都冇 (皆因我成日以為係好難o既野,唔o岩我 level !)

但竟然 ... 今日出現o係我個焗爐裡面  ... 真係始料不及

哈哈,當年發明梳乎厘o既人,唔知係咪都係o係失魂o既情況之下發明架呢  ?

 

【事情始末】

話說星期六有朋自遠方來,本想做個雪紡蛋糕畀佢地帶走,

但我o個朝早唔知做咩,心不在焉

一邊整一邊諗野

到混合蛋黃糊和蛋白霜時,覺得個蛋黃糊有o的奇怪

點解咁稀架呢?(但好野在,我仲未察覺係有問題!)

由於蛋黃糊好稀,都花左一o的工夫將蛋白完全混合

倒埋入雪紡模添

攪好晒,打算將容器拿去星盤浸洗時,發現 ....

errrrrr!點解 .... 點解 ....

o的麵粉 ...

仲o係度架?!!

原來我唔記得左落麵粉呀!

天呀 ... 點解會咁架 ...

我真係有諗過成兜倒左佢,

但回心一想,

既然o黎到呢個地步,nothing to lose 喇

就放佢入去個焗爐度睇下點!

 

【下圖】咁稀o既麵糊倒入甩底雪紡模 ... 梗係會漏喇!

咪就係咁 ... 我發現原來梳乎厘係咁整出來架囉 ...

丫 ... 原來梳乎厘係幾易整架喎

可惜,大家都知道,梳乎厘一離開焗爐即塌

所以我不能攞佢o黎款待客人

唯有和笨 B 爸爸啃左佢

嘩!8 寸呀!滯死人啦

 

【下圖】 一攞出爐就塌晒,點見得人 ... 我覺得味道唔錯,但笨 B 爸爸唔鍾意食o的咁甜耶耶的甜品,所以梳乎厘應該唔會再響我廚房出現 ... 尤其是 8 寸大的



沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: