2007年10月31日 星期三

村姑的第一次換季

呢兩日,突然涼左好多 ...


朝早感覺特別涼,一起身要立刻套件晨褸


反而黃昏至夜晚不太涼,可能下午陽光的熱量這才從牆壁散發開來



今朝睇晨早新聞時,天氣預報仲話下星期會跌至低過 20 度


以前在市區,聽到如此消息會不甚了了


因為舊屋位置瑟縮在眾高樓大廈中,基本上都唔會太大風太凍


但家陣做左大西北村姑 ... 一定要為入冬做好準備


 


之但係,一想起眾多尚未拆袋,應該皺過鹹魚的冬天衫,要逐件攞出o黎熨返直,我就頭痛啦!!!



 


後記:


我成日話自己到今時今日仲未執好屋,係真架 !通常朋友就咁聽就唔信,o黎到現場 ... 咪信囉


 

2007年10月30日 星期二

原來 ...

... 原來 ... 鮮淮山係咁o既樣 ...


(按:我只是吃過中藥的淮山片,未食過新鮮淮山,所以唔好問我咩野味  話時話,日本人叫的「山藥」就是鮮淮山)



... 原來 ... 鮮淮山同牛蒡真係幾似樣 ...


(按:我以前都以為係同一樣野 ...原來山藥是新鮮淮山,主要功能是健脾胃;而牛蒡則是利尿去濕解毒)



... 原來  ... 平民區的西環,竟然有荷蘭超迷你冬瓜賣 ...


(按:我鍾意行路,天氣唔太熱時,坐完地鐵去上環,會行路返西環陳師傅家,一邊行一邊八下街上有甚麼新奇野。呢個超迷你冬瓜,就是如此發現的 )



... 原來 ... 幫粟米做個 water mask 後才包錫紙,可以令粟米濕潤兼冇咁易燶


(按:大娜姐教的,燴出來的粟米果然好濕潤飽滿!不過燴太耐都會燶,唔可以旨意晒佢啊!)



... 原來 ... Rosemary 係經唔起西斜陽光的猛烈照射的 ...


(按:明明買o既時候店主話可以狂曬 ... 坤我o既 ...)



... 原來 ... 西斜的陽光殺傷力驚人,淋少一日水都死畀你睇咁樣


(按:其實好多要曬的植物,都未必經得起西斜架 ...)



... 原來 ... 呢o的蕃薯係黃心o既 ...


(哈!仲以為佢係紫心!燴完先知!)



... 原來 ... 燒魚皮餃煙煙韌韌都幾好食 ...


(按:黃夫人 & 黃老爺教o既 ... 唔好解凍,就咁串住來燒,燒到出油「令立立」容光煥發就 ok,可搽蜜糖再燒一陣。燒太耐個皮會硬,留意)



... 原來 ... 可以在燒烤蜜糖個蓋度篤個窿,防止支蜜糖掃潛水,兼且黏到一手都係蜜糖 ...


(按:鳴謝小 blue 爸技術指導,果然好駛好用!話時話,今次係為左炭精而買蜜糖...) 



... 原來 ... 盛放的白蘭花真係好香 ...


(按:真係好香,一行出露台就聞到,身心舒暢呀!)



... 原來 ... 無良的介殼蟲連怕羞草都唔放過 ...


(按:太可惡了!太過分了 !萬惡o既介殼蟲!)



... 原來 ... 小朋友都要有個伴


(按:本來恰眼訓兼發脾氣的小 Blue,一見到姐姐就開心到震精神百倍 ;鳴謝樓下小妹妹上來陪小 Blue 玩,兼化身樹幹畀呢隻樹熊又抱又攬;小 Blue 媽,查實你真係要認真考慮下生多個 )



... 原來 ... 我都有鋪寫菜譜癮 ...


(按:因為星期六下晝出外,諗住交帶落o的準備工夫畀笨 B 爸爸,點知都係 ... 哼!)



 


... 原來 ... 我咩都影得一餐!


(按:呢篇純粹係為左相機中無無聊聊又唔知 de 唔 delete 好的相片而寫的,多謝捧場  ~ )

2007年10月29日 星期一

健康豆渣薯蓉 (附祕製青口做法)

呢「零時十分」的薯蓉,係我星期五晚漏夜做的,用來鋪在青口下面,等o的青口在運送途中唔好碌來碌去


因為第一次做,唔敢預咁多份量,所以做得太少了


好在味道唔錯呢!下次可以大量製作了


 


【下圖】加了 30% 豆渣的薯蓉,香氣和口感絕對不遜真薯蓉,還多了豐富的蛋白質和大豆異黃酮,對女性特別有益呢!



【下圖】只用了簡單的材料,比傳統薯蓉簡單一點,也低脂一點



【健康豆渣薯蓉】 


材料:


薯仔 2 個 (我用普通中國薯仔,中型 size)


豆渣 適量 (我蒸熟薯仔壓蓉後,拿了薯蓉 50% 量的豆渣)


洋蔥 半個


牛油 適量 (視乎你有多喜歡牛油味,我下了約 15 克吧)


牛奶 適量 (一邊煮一邊下牛奶,視乎你想要的濃稠度。我下了半包蒙牛)


香草海鹽 適量 (可以改為普通碎香草 + 淮鹽)


 


準備:


(1) 先準備薯蓉 - 薯仔去皮切片,放蒸架上大火蒸到腍身 (高速煲只需 8 分鐘,用鑊蒸大概四倍時間,即 30 分鐘吧 ... 你可用叉試試腍身程度) 拿出用匙羹壓成薯蓉


(2) 洋蔥切蓉


 


做法:


(1) 易潔鍋裡下牛油,炒香洋蔥蓉


(2) 下薯蓉及豆渣,拌勻


(3) 一邊兜炒一邊下牛奶,直至適當的濃稠程度


(4) 下香草海鹽調味,攪掂!


 


【同場加映 - 焗青口 toppings 二味】


1. 地中海式香草焗青口


1.1 青口洗淨,汆水備用 (水裡放鹽及檸檬片,可去雪味)


1.2 塗上芥末醬


1.3 拿適量的麵包糠、蒜蓉、橄欖油、海鹽、碎香草拌勻,塗在青口上


1.4 放進預熱 200 度的焗爐,焗 10 分鐘至金黃,攪掂!



2. 蒜蓉煙肉辣青口


2.1 青口的準備方式一樣


2.2 toppings 是蒜蓉 + 牛油 + 煙肉碎 + 辣醬


2007年10月28日 星期日

祕製焗青口

今個 weekend 真係馬不停蹄,由星期四忙到星期日


而家才有少少時間蛇王上來看看


 


星期六下午參加了一個美食派對,可惜只可以參加半場


試唔晒咁多位高手的美食,真是可惜呢!


參加者每人都要帶至少一款自家美食,


主人家講明《例牌菜不准進入》,


所以我唯有發揮下小宇宙,做左呢兩款焗青口,


個面 (topping) 同個底 (薯蓉) 都係祕製架!


做法可參考健康豆渣薯蓉一文



 


 


同場加映:


因為我只參加了半場,所以影唔晒亦試唔晒所有美食,可惜也可惜也!


各位如欲一睹高手美食風采,可到以下「相關 blog 友」處參觀參觀


2007年10月25日 星期四

身負「重」任

今個星期六,奶奶有節目 (嘩,好押韻)


就是 ... 來我家 BB 蕉也


冇錯,呢個係我入秋後第四次,10 月份第三次 BB 蕉 ...


不過,屋企人叫到,我係唔會 say no 的


況且奶奶和叔仔佢地未試過我的認真 BB 蕉,梗係要全力以赴,做到最好



 


認真 BB 蕉,要兩日前開始準備


所以,今日就去左採購,兼返來煲緊酸梅湯


今晚要擺o的凍肉去保鮮格解凍


噢!我簡直是 pro --- fat --- 純 --- 爐 ---


 


今日又研究左o的野 ...


到底,我每一次買餸可以負重幾多呢


嗱 ... 今日我一次過買晒八人份量的燒烤食品,未計炭 (因為屋企附近士多有)


 


我架「私家車」(買餸車) 有 12 kg = 26.4 磅  



我膊頭上揹的環保袋有 6 kg = 13.2 磅



噢!原來我獨力抬左 39.6 磅返來 ...


順道把自己也秤一秤


啋 .... !咩 .... 重左咁多架 !!!


BB 蕉 ... 果然是增肥活動


唔得咯唔得咯 ................. 再咁落去收唔到科咯 ..........



 


【同場加映 1 - 魚皮餃】


黃夫人話 BB 蕉必試燒魚皮餃,咁我今次就買來試試喇!



 


【同場加映 2 - 美味 BB 蕉背後的 best kept secret】


一個月幫襯三次,我已經變左凍肉店 VIP 咁滯


以下呢句說話,我倒轉背都得咁滯 ---「紐西蘭青口一盒、紐西蘭西施骨羊扒一排、鯖魚一條、豬扒兩磅唔該」


大西北街坊們,我發現左一間超正凍肉批發店,佢o的肉好靚好新鮮,貨色和叔婆 (City Super) 的一樣,價錢平一半,絕對係筍野!好多外國人知椗摸去買架!真係多謝街坊丁茶阿媽o既好介紹  


因為太感動的關係,下次要特登開篇 blog 頌讚下佢先!而家畀住個大約地址大家


店名:兒興泰食品公司


地址:又新街,公園仔對面


備註:


(1) 佢其實主要做凍肉批發,所以門面得一排排銀色冰櫃,完全睇唔出有野賣咁 ...   照行入去得架啦!裡面的姐姐好 nice 的


(2) 你講得出o既凍肉佢地都有,不過唔係樣樣有散貨,有o的一大箱,一個人無可能買到咁多 e.g. 串燒雞軟骨每盒 50 串、虎蝦每盒 3 磅 ... 若然我有兩個雪櫃,我一定幫襯!不過我冇哩 ...


(3) 因為佢地業務繁忙,去幫襯有時可能要耐心稍候


(4) 如果姐姐問起邊個介紹,你話o個個臉圓圓口多多一個月食左三次 BB 蕉成日拖住架烈火戰車o既村姑,佢就知架啦 (哈哈,講笑)


 


【下圖】紐西蘭青口  每盒 $38  



【下圖】紐西蘭西施骨羊扒 (本來成排的,佢有切肉機幫你即場切埋) $40 一磅


一排約 2 磅,可切 8-10 塊,你預大約 $10/ 一塊喇


嘩!想當年我o係叔婆度買幾塊羊扒與初拍拖的笨 B 爸爸賀生日,每 100 克就要 >$30 了!計落每塊 >$20 架!(生日大餐回顧 - 香草煎羊扒)  當然,佢有幫你用香草醃 ... 車 ... 我而家都識喇


話時話,兒興泰也有中國羊架,價錢平o的添,兩隻都嫩滑,但紐西蘭羊扒有少少羊臊味,中國羊扒完全冇臊味,視乎你鍾意食邊隻。我兩隻都試過,都係鍾意紐西蘭o個隻多o的



【下圖】日本鯖魚 ~ 以重量計,呢條約 $22


好厚肉好肥美多汁,一o的腥味都冇,絕對係靚貨! 



【後記】鵝肝也是超筍必買之選,叔婆賣 >$100/ 100 克的,兒興泰這裡是 $180/ 一磅 (!!!) 不過一買要買成個,好巨型 (約 2 磅) 要搵人分甘同味至得,否則食到嘔白泡都未食完



致:各方好友


由於我 BB 蕉 B 到滯左,所以我暫時不接受新 booking,各位朋友唔好搵人暗算我   我重出江湖時,必定第一時間通知大家

Linkwithin

你可能對以下文章有興趣: