2007年9月13日 星期四

【我要食 Pi 呀!】家鄉炒米

大家請跟我讀一次 --- Pi ---

呢個字o既中文點樣寫,其實我都唔知

只係由細聽到大,知道佢代表「鍋焦」,炒飯炒米炒麵都會有的

陳師奶的炒菜技術經常被陳師傅質疑 + 踐踏

不過佢o既福建炒米就做得好好,好香好乾爽,值得讚掦

陳師奶每次炒完後都會問

「邊個要食 Pi 呀?」(冇錯,雖然我屋企係講廣東話,但周不時會夾雜福建詞彙)

我就會一馬當先衝入廚房報到

將又香又脆的鍋焦吃個清光,哈哈哈!

 

阿女我今日長大成人,有自己o既家庭,不過有時都會緬懷下兒時情懷的

所以我前晚炒米粉,特登炒得慢o的,等佢形成鍋焦

等我有得食

Pi

 

【下圖】技術所限,我整的 Pi 是散收收的,陳師奶o個o的一塊塊好似食暴暴飯焦咁架 (當然是薄好多的)

【下圖】我下左旨呢個月要食多幾餐抗戰白粥,儲番o的 quota for 「中秋 BB 蕉」,不過又忍唔住整左個高熱量炒米,罪過罪過!

福建炒米的材料好簡單,全部都係存倉精選

(Mui 家姐留意啦!) 海味係屋企必備,炒餸煲粥煲湯乜都得,而椰菜係咁多類葉菜中比較耐放的 (紹菜都係),放足一個星期都冇問題架!

【材料一覽】

份量隨意,米粉用左三片 (每片 ~ 75 克) 食到飽飽!

不過我好似買錯左米粉 ... 呢隻太幼

我見陳師奶多數用孔雀牌米粉 or 江門排粉炒的  

【準備工夫】

準備適量的魷魚仔乾、蝦米、蠔豉仔 & 冬菇,洗乾淨後用熱水浸 1 個鐘 (o的水要番架)!用廚房剪剪碎備用。紅葱頭切碎備用。

【製作過程】

1. 米粉先用滾水浸 3 分鐘,然後過冷河,瀝乾水備用

2. 椰菜要先用蒜蓉炒熟備用。唔係驚佢會出水,而係驚加落米粉度難炒熟呀

3. 鑊中加油 & 紅葱碎爆香,然後加入海味 & 浸海味的水煮滾

4. 加入米粉,用鑊鏟 & 筷子 (or 燒烤鉗都非常好用 ) 快速兜炒,一邊叉鬆米粉,等佢索晒o的海味汁之餘,亦防止黏成一餅

炒的過程中一邊下豉油、麻油調味 (我當然會落埋陳師傅私房辣椒醬) 一邊試味

5. 炒到米粉乾身,加入先前炒好的椰菜兜勻便可上碟

6. 我估應該要生鐵鑊先做到鍋焦效果   明顯上我孤寒落得唔夠多油,所以o的鍋焦又燶又唔完整 ~





35 則留言:

  1. 经常在超级市场看到有米粉卖,不过不知道怎么吃法,这次一定要买来试试呢!

    回覆刪除
  2. 阿婷:用海味來炒米粉原來好香 ~ 在香港的館子很少吃到的。你買米粉記著要買排粉啊,我這些太幼,炒起來略嫌軟身了一點 冬菇:你見唔見呀 ... 我攞左你o黎起鑊呀

    回覆刪除
  3. 粉麵飯我唔鐘意食炒嫁~ 因為太多油! 但唯獨炒米粉!! 就算去酒樓明知佢肥都一定會叫! b媽你炒得好乾身啊 ~ 仲有pi !! 我又要啊!!

    回覆刪除
  4. 你既家鄉炒米好吸引呀! 我都要學你炒米粉食 !

    回覆刪除
  5. 好香咁喎.....家鄉炒米最令人懷念的! 又令我諗起........ 童年時我與你家鄉中相見天未亮......你與我永遠心意也一樣....
    嘻嘻....嫁咗人, 特別掛住屋企....好鍾意懷舊的....

    回覆刪除
  6. Andrea:你試下丫,一o的都唔難,只得一個字 --- 勤力,因為要雙手並用,一邊不斷咁炒,一邊叉鬆佢,可以順道練二頭肌 金星:呵呵 ~ 是啊 ~ 未嫁前我日日撓埋手等食架o乍

    回覆刪除
  7. 私人 呢个礼拜都忙到呕呀!今天推左同事食lunch 先可以偷闲上网留言乍! 我都要事食pi !! 29 日如果唔洗返工的话,我要哥哥家呢!您约了什么时间?或者上来8下先!超想来啊!

    回覆刪除
  8. 係喎!!! 咁我咪要收番....版權費先?

    回覆刪除
  9. 哈!食Pi, 呢篇blog好生鬼有趣!

    回覆刪除
  10. (私人)我會買定D材料架啦,你人來就得啦!大小B都係一般細路口味,唔鐘意食青椒之類,我會落波羅、香腸、火腿、洋蔥同芝士等。

    回覆刪除
  11. 你嘅米粉炒得好乾身好正,睇見都想食呀,其實我好鍾意食炒粉、炒麵,但喺外面食又嫌太多油,自己整又整得唔好,唔夠乾身,之前試過整 豉油王炒麵 ,始終都係炒到又濕又林,激死!

    回覆刪除
  12. 多謝笨b媽媽的推介呀。我一直只知道紹菜耐放 (細個見亞婆買黎「澤」年嘛),乜原來椰菜都係呀! 咁我要買定一個放係屋企至得。

    回覆刪除
  13. celia:要開猛火 & 不斷咁叉鬆先會乾爽呢,否則好易燶,又好易黐埋一餅,到時真係成餅 Pi 囉 Mui 家姐:係啊,椰菜就咁用蒜蓉炒又好食 (加o的甘荀絲,就十足十日本料理店咁) 用o黎煲蕃茄雜菜湯又得!如果你一次過用唔晒成個,但又想再擺耐o的,可以在第一次用時逐層剝左出面o個o的o黎用先,然後將裡面剩番o個o的又放入雪櫃,又擺多幾日! ~ 小棠菜呢類唔襟擺的葉菜,我有時買一斤番來,想煮一半先,都會逐棵剝左出面兩三塊來用,然後將o的芯又收番埋架,咁又可以擺多幾日

    回覆刪除
  14. 我鐘意食Pi, + XO sauce 啊!!

    回覆刪除
  15. 呢隻米粉幾幼喎... 食起黎都好味o的呀.... 能量牌?

    回覆刪除
  16. 其實我都係福建人黎架

    回覆刪除
  17. mommy dearest: yes yes yes, Pi + XO 醬極之好味!!!仲要係李錦記特辣 XO 醬喎 ~~~ 諗起都流口水 ~~~ 阿懶:我就係嫌佢幼得滯,有點「淋身」啊,我下次會買江門排粉來炒! pang:咦 ~ 同鄉喎 咁你屋企興唔興炒米粉炒到有 Pi 架 ?

    回覆刪除
  18. 幸福小女人- Diana2007年9月13日 下午12:01

    咁你地過時過節會唔會整D類似雜菜,, 然後用春卷皮包住食,, 內有花生糖碎個D?? 其實我唔係福建人, 但我係福州人... 所以我都好鐘意食呢D家鄉菜!!!

    回覆刪除
  19. 嚇死我, 以為你要 食我一家添

    回覆刪除
  20. b媽 我鍾意幼身米粉架 貪佢夠入味呀! 不過老公唔鍾意炒米 只愛炆米 所以我都無咩機會炒米了!

    回覆刪除
  21. 我都試過炒, BUT 失敗左...

    回覆刪除
  22. 好好味咁喎~ 我好鍾意食炒米粉架~ 不過完全唔識整,睇完好想即刻就去試吓呢~! 多謝你啊!

    回覆刪除
  23. Diana:我知你講邊o的,不過我從未在家裡食過,怪哉 ~ Madame Pi:哈哈,我寫o既時候都有諗起你,但放心我唔會食左你,你太瘦啦 我會食左肥煎! 小魚兒:梗係喇,你個炆米咁足料,仲自己熬埋湯底,無得彈呀!我咁懶,笨 B 爸爸應該無機會食到 咪嘈!薯:咦,點解失敗左呢?太濕? 墨西:唔難呀,只要夠勤力猛咁叉鬆o的米粉就得啦,否則好易黐埋一餅 試下啦

    回覆刪除
  24. 我都係福建人呀! 不過聽唔明"pi" tim... 碟粉好好味咁wor, 有淨仲可以做埋lunch box. 我最鍾意食江門排粉炒嘅米粉, 如果放湯, 我就要食廈門米粉...

    回覆刪除
  25. 0個隻米粉原來係孔雀牌 我仲成日叫鵝牌添

    回覆刪除
  26. 炒米~我至愛

    回覆刪除
  27. 能量米粉的質地跟孔雀牌有很大分別

    回覆刪除
  28. 笨B媽有事要請教,我家中的"獲"炒親野都會痴底呀有咩解決方法呢? "獲"是新買架...

    回覆刪除
  29. 我未食過Pi 呀 我仲以為係 pizza 既簡稱tim

    回覆刪除
  30. 我媽媽整0既炒米都有好多"Pi"嫁~ 雖然炒到好黑嘛嘛好肉酸咁,但又真係好好食嫁喎~

    回覆刪除
  31. 原來小棠菜可以用你的方法另佢耐放d ga。咁我以後食菜的時候知道點做啦。thx.

    回覆刪除
  32. 笨b 媽媽, 紹菜同棷菜, 我成日放過月都ok 呀! 因為我買餸唔方便呢~

    回覆刪除
  33. 敏敏敏:紹菜我就知一定耐 ... 原來椰菜都得!多謝你話我知呢 因為我次次都驚佢爛 (始終係葉菜) 所以一個星期左右我就會煮左佢架啦 good,今日去買餸又買個椰菜番來責下袋先

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: