2007年9月17日 星期一

阿媽出手

尋日陳師奶突然出現,仲自攜 ... 豬手一隻!超過斤半重

嘩 ~ 點整呀 ~ 未試過喎  ~~~~

仲有烚蛋四隻 + 生果一包!呢個配搭咁詭異o既

哦 ~ 原來佢尋日朝早去左黃大仙拜神

佢話平時o係屋企冇機會整野食,o黎我呢度先有得發揮!呵  ...

所以,尋晚我地就有呢碟「阿媽炆豬手」勒!

用左高速煲,15 分鐘已經好入味好軟淋!

唏 ... 都叫陳師奶唔好敲到個蛋咁碎架啦 ... o的蛋殼散入湯汁裡面啦 ~ 哈哈,我媽果然和我一樣 ... 誠意有加、具有基本技巧、唯廚藝有待改進!哇哈哈哈

其實,呢煲炆豬手都 ok 好食的,不過陳師傅炆o既更加香 ... 之嘛 !咩叫珠玉在前,咪呢o的囉  ...

不過,我同笨 B 爸爸非常捧場,我地三個人將呢隻巨大豬手掃清光呀!

P.S. 因為被骨膠原迷惑了,所以我而家好鍾意食豬手,大家有冇必勝食譜,記得話我知啊!多謝!

 

後記:

今天有點忙 ... 寫得 blog o黎覆唔切留言又巡唔切 blog ... 欠住先!



37 則留言:

  1. no.1 嘩!好大隻豬手哦,但何解豬手會有d咁幼0既線綑住佢0既? 我媽通常用瓦煲炆冬菇。

    回覆刪除
  2. 我最近都有學整豬手,我參考左好多網上的食譜,得出以下呢個好味嘅德國咸豬手,係度同你分享下吖!希望你滿意! 德國咸豬手食譜

    回覆刪除
  3. I love that! So yummy.... ah! I miss my mommy!!!

    回覆刪除
  4. d雞蛋一定好入味....好好食﹗

    回覆刪除
  5. 我前兩日都炆完 - 我自己覺得唔錯 - 第1次來說 材料係豬手, 冬姑, 豆卜 先將薑片蒜頭炒香 再加入冬姑炒香(冬姑要浸啦) 然後加入豬手 (通常豬肉佬會幫你斬件) 兜兜後, 加入生抽,老抽,少少糖 (OR 冰糖) & 蠔油(可加,可不加,我冇加) 然後加入清水 (要蓋過所有材料) -- 試都岩味就OK! 我用普通爐就用中火炆 2小時..再焗20-30分鐘 好好食^^ 我係潮洲人 - 食唔哂D 豬手會整 "豬手凍", 好似JELLY咁, 好正架 不過我有1個問題.. 豬手同豬腳係咪唔同野??? 我果次買既$10 一隻ONLY.... (新鮮)....

    回覆刪除
  6. 唔.......個樣好好味! 做薑醋更正

    回覆刪除
  7. 見妳紥住隻豬手以為妳整熏蹄 tim 我最鐘意整南乳豬手 , 最 easy , 4 隻豬手 , 1/2 斤花生 , 半撙南乳 , 炆到好既時候試味 , 唔夠味再加南乳就 ok !

    回覆刪除
  8. 其實豬手都好正吖!不過係陳師傅太勁,咁對陳師奶唔公平wor! P.S.15分鐘就炆到咁靚豬手,搞到我都心思思想買返個高速煲。

    回覆刪除
  9. 睇落都好好味吖~

    回覆刪除
  10. 嗶, 正! 我都鐘意食豬手!

    回覆刪除
  11. b媽 乜陳師奶今次咁好雅興又咁得閒 自攜豬手入黎煮飯呀? 陳師傅竟然唔一齊入黎?

    回覆刪除
  12. 嘩..睇落好正喎, 好耐無食過豬手喇, 至從生完食薑醋之後~~~

    回覆刪除
  13. 好似好好味呀! 骨膠原?! 我都好鍾意, 亦都好需要啊....

    回覆刪除
  14. 好正呀! 不過我怕肥都唔敢食!

    回覆刪除
  15. I cook pig feet once in a while too, even though I know eating it is exactly like committing "suicide"!

    回覆刪除
  16. 嘩! 好大隻豬手 你碟阿媽炆豬手好正呀!睇到我....

    回覆刪除
  17. 骨膠原 <-- 簡直係女人的恩物呀! 不過點解d雞蛋唔「meet」殼?

    回覆刪除
  18. 我是超級喜愛吃豬手- 仲有 骨膠原 !! 好好味呀!!

    回覆刪除
  19. 蛋殼= calcium 炆豬手好好食﹗

    回覆刪除
  20. 估唔到陳師奶都咁掂......... 但點解無教點整?

    回覆刪除
  21. 一路都只見你提陳師傅嘅廚藝了得...原來陳師奶一出手都非同小可喎...碟餸睇到我流晒口水喇 ...陳師奶

    回覆刪除
  22. 小敏/ carlo:因為要原隻攞去拜神好睇o的云云 ~ Sylvia:多謝!我會過來參考參考 Southern Gal:不怕,你自己出手做吧!我見都不是太複雜 UB:係啊,雞蛋都好香好入味,有點吃茶葉蛋的感覺 nyako:$10 一隻咁平? 陳師奶話 $20 一斤,係咪你隻豬手好細?or 你買左豬腳 (後腿?) 聽說豬手多肉較好味、後腳多筋但較膻 Madame Pi:噢!我都是在想同一樣野 ~ 我都好鍾意食薑醋 小胡子:高速煲其實用途好多,個個都話值得投資呀 朱一樣/ minicorgie/ katherine/ 金星/ Andrea/ Ah Chui:好奇怪,我細個時好怕食肥豬肉、豬手、魚肚等滑嘟嘟的東西,大個時就愛得不得了 ~ 都話是骨膠原迷惑了我,令我的潛意識控制了味蕾! (不過查實真係幾好食,係我以前唔識欣賞) 小魚兒:陳師傅去了深圳呀 如果有佢o係度,佢一定又o依o依哦哦 Rachel/ Thoughts:我發覺豬手唔係好油 全都是膠質來的 ~ 當然,我相信熱量應該不低 Mui 家姐/ mommy dearest:yeah ~ 蛋殼有 calcium ~ 不過在這菜式上應該沒啥用處 miu miu:嘻 ... 因為陳師奶的做法較普通,我覺得不及陳師傅的香 有機會食到陳師傅炆豬手時再 post 他的版本

    回覆刪除
  23. 好勁呀!!你有個咁勁的母親,你的廚藝都了得呀!! 回應....等你呀!!如果你入來我blog重好呀!!

    回覆刪除
  24. 我曾经照着食谱做“姜醋”,味道很好呢,一点也不油腻。 我的问题和陈师奶一样——厨艺有待改进,我教会我妈炒“蚝油西生菜”(典型南方菜,我吃过港式茶餐厅,回来在网上找到做法),她马上可以做得比我好吃,让我十分郁闷。

    回覆刪除
  25. 嘩, 蚊豬手, 好正呀...........好想好想食呢

    回覆刪除
  26. 露絲公關手記2007年9月18日 上午9:27

    原來你隻摩打手係因為食得豬手多.......以形補形

    回覆刪除
  27. 豬手實在太肥! 我只會久唔久食一次半次 但陳生就一定唔食... 咁... 可能要等我到我生bb先有食囉

    回覆刪除
  28. 嘩...真係好正...陳師傅有10粒星...你都有7粒啦....

    回覆刪除
  29. 又會咁o岩o既????? 我昨晚整左豬手啊, 因為茄子人好鍾意食, 我為佢而煮咋, 自己唔係特別好. 我屋企個爐極細火都去水去得好鬼快. 燜唔到長時間所以味道好好可惜入唔到味.激死. 我會繼續試架!

    回覆刪除
  30. 原隻豬手? 屋企把刀切得到既咩?

    回覆刪除
  31. 第一次留言,之前都有睇開你blog 不過冇account所以冇留,多多指教^^ p.s 隻豬手真係好大~同我隻肥豬手有得揮~wakakaa

    回覆刪除
  32. 睇左你個blog之後, 見到高速煲煲湯又快. 炆野又快, 可唔可以介紹你O個隻高速煲的牌子和價錢?? 在什麼地方買..唔該哂 (因為我兩個電磁爐相繼壞咗..所以好急要買)..

    回覆刪除
  33. 骨膠原? 食牛筋或者雞腳湯啦!

    回覆刪除
  34. 小腰豆 , 電磁爐有保養 ma ? 我前日打去 , 昨日整好了 !

    回覆刪除
  35. 小腰豆:我在木耳湯那篇覆了你

    回覆刪除
  36. 想食啲冇咁"漏"嘅豬手,可以好似我之前 醉咗~~~~嘿嘿嘿 咁整,我都有買咗兩磅豬手整o架,好爽好好味,冇 影相 post 啫

    回覆刪除
  37. 1. 豬蹄切到自己喜歡的大小,放到鍋裏飛水 ; 2. 砂鍋內爆香薑片後 , 放入豬蹄 , 加冰糖 , 黃酒,生抽(多),蔥(整根),八角,桂皮 ( 可不放 ) 及少量水煮開 , 開中高火燉半小時 , 轉小火燉 。中間如果水不夠了,適當加點燒的水(不是冷水),但每次少量,保證豬蹄不爛。 3. 等水慢慢收幹,豬蹄也上色了 , 出鍋! 這時候的豬蹄應該是酥韌而不爛,色澤飽滿,香飄滿屋了。

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: