2007年9月14日 星期五

練膽

我發覺,我愈來愈大膽了

 ~

剛搬入來住時,見到師姐送我的雀仔花爬滿了螞蟻,就大驚失措,嚇到立即將盆花倒左,十萬個罪過

而家?哼,畀我見到一條躝下躝下的蟲

雖然都會毛管戙,但至少我可以忍住驚惶將佢處理

見到新奇o既品種,我仲會研究佢一輪先將佢處死添

(當然,唔係即場五馬分屍大屠殺,咁血腥o既場面我仲未受得住,我會將佢逐隻沖落廁所,都幾費時失事)

 

【事件一】白蘭花蟲害事件

話說某一日出露台淋花時,望見我棵白蘭花 ...

咦,因乜事你咁多窿呀

?!陰公咯  ...

記得咪咪吉教過我,白蘭花o的蟲好鍾意匿埋o係葉背,要逐塊葉 check ... 唔,有發現!蟲屎呀!

繼續大搜查,終於畀我o係一塊崩左o既葉上面搵到一條蟲

咦朋友,乜你個外型咁似蝸牛o既?

將塊葉剪落o黎,方便近距離研究一番 ... 佢又唔郁喎!係咪真係好似蝸牛呢!

本來,呢條蟲唔係咁樣衰,本來都冇整到我驚叫

我將成塊葉拿去廁所,準備用竹簽將佢撩跌落去馬桶時 ...

嘩,o個下嚇到我彈起

因為我一直以為細o個邊係頭,大o個邊係 pat pat

點知我用竹簽撩佢個「頭」時,佢個「pat pat」無啦啦郁喎,仲露出個蟲頭望住我添 (見到口器)

嚇到我差o的將塊葉飛左出街

好在,我抑壓左我o既驚嚇,然後繼續呢個處死行動

 

 

 

 

 

第二日,o係另一棵上面又見到呢種蟲,今次仲唔畀我斷正 (你o趙緊我塊葉!)

當然,亦係第一時間處理左

大自然真係神奇,隨左保護色之外,原來造型都會扮鬼扮馬,等敵人攻擊時,要害中招程度減低

可惜,佢今次係遇著最有智慧o既生物 ... 人 ...

 

【事件二】雀仔花蟲害事件

我呢棵自來花,開得非常燦爛,驟眼睇真係 perfect

若然唔係有一日淋少左水,o的枝條彎晒露出底蘊,我都唔知發生蟲害

又係你 ?!!

上次我棵蕃茄,就係死在你手上!

雖然你個樣唔太恐怖,但 ...

若然每條枝條都黏滿了,粗略估計有超過

100 隻 在一棵植物上

你都咪話唔驚嚇

超級無敵毛管戙添呀

!而家見到張相都仲毛管戙-ing!


大家估我唔到o既係 ...

今次蟲害咁嚴重,我竟然冇將呢棵雀仔花處死

我仲忍住頭皮發麻,拿著小鉗子逐粒拑走!救左雀仔花一命 !今次都算捨己為花咯!

 

後記:

成日聽到人地講蕃茄易有蚜蟲侵害,上次盆蕃茄又係好多呢o的蟲,所以我一直以為是蚜蟲

今天在網上搜尋一下 (因為想找防治方法),才發現原來蚜蟲唔係呢o的,而係呢o的 --->

蚜蟲

至於白色一粒粒呢o的,原來係介殼蟲的一種,叫太平洋臀紋粉介殼蟲 Citrus Mealybug (嘩,你個名駛唔駛咁型 ) 雌蟲每次可以產數十至數百粒卵,孵化期短則數小時 ,長則達月餘 ... 嘩!唔怪得知可以無聲無息咁佔據晒成棵花我都唔知喇 !啋 ...

下下咁捉都唔係辦法,睇o黎我都要快o的去買支盆栽植物殺蟲水番來咯!





42 則留言:

  1. Just passing by. Hope you'll have a nice and wonderful Friday!

    回覆刪除
  2. 今次仲唔畀我斷正 (你o趙緊我塊葉!) 你講花講蟲都笑死我喇

    回覆刪除
  3. 你真係越練越大胆呀!要處理咁多蟲,認真頭痛。 我果幾棵黃皮同蘿蔔都仲OK,但番茄同怕羞草就唔多好,睇住佢一日比一日枯萎,都不知點算好!

    回覆刪除
  4. 我見到個topic就估到又係d蛇蟲鼠蟻 ,不過又忍唔住好奇心要睇喎。結果....... 驚死我。

    回覆刪除
  5. MY KT HOME:Thanks and same to you see:哈哈,我平時講野o既風格都係咁上下架 ~ 同一樣野講得幽默o的,聽o既講o既都開心o的 小胡子:唔知係咪因為意大利蕃茄難種o的架呢 因為黃妹妹和我o個o的都分別瓜晒柴咯 至於怕羞草,我發現佢原來要好多水,否則太陽一曬佢就燶架啦 ~ 我早晚都餵佢飲水架 ~

    回覆刪除
  6. 我睇到頭痕ar~~~

    回覆刪除
  7. Mui 家姐:A..... 睇得多就慣架啦,我就諗住 train 下你之嘛 傻婆英格列:睇相遠不及睇實物咁頭痕呀 如果想親身體驗,不妨種番o的植物玩下,其實除了蟲害,gardening 都係一件幾有趣的消閒活動來啊

    回覆刪除
  8. 係呀, 我都有同樣既問題, 之前種果盆又係見到尼款蝸牛既物體, 跟住成盆嘢都死埋, 我已經有落殺蟲水都唔得, 死晒lu.

    回覆刪除
  9. 咦! 咁唔知我啲雀仔花有無事呢? 明天趁有陽光要攞上天台睇睇先!

    回覆刪除
  10. 雖然我住大廈, 我種既植物一樣有虫患, 我一見到就會揾下家中有乜材料來製造天然殺虫水, 我通常會盅爛啲辣椒整辣椒水又或盅爛啲蒜頭整蒜頭水(我自己多數用呢個), 一嘖在佢哋身上, 佢哋個身就會立刻(拿)到跌落地, 到時你可以慢慢掃 . 若得閒, 還可以定時嘖蒜頭水在植物上防止 butterfly 來生 bb. 如果遇著 ant, 又唔知佢個竇係邊, 這時最好用辣椒水大量周圍嘖當淋花.

    回覆刪除
  11. sasa:我都聽過蒜頭辣椒水啊 ~ 不過未試過,你的份量用多少呢?

    回覆刪除
  12. 笨B媽, 我估你好快脆可以獲頒贈蟲蟲研究學榮譽博士學位啦!

    回覆刪除
  13. 你影果d蟲蟲響我天台0既花花草草上都有呀 第一次見真係覺得好嘔心 之後用盆栽植物殺蟲水就攪掂左佢地 不過久唔久都會翻發0羅 ...我都係元朗人家呀

    回覆刪除
  14. 亞b媽~你可以做一個蟲蟲專家喇

    回覆刪除
  15. 今次真係捉虫呀... 咁多虫o既... 話時話我屋企後山都好品種o既飛虫... o係塊透明膠片望到好多...如果佢地飛晒入屋都幾驚... 快o的冬天就好...到時就可以訓覺開窗呀...

    回覆刪除
  16. 你真係勇敢! 如果係我, 我諗我顛左都似, 我極怕蛇蟲鼠蟻, 我朋友都係住村屋, 佢話至恐怖係見過一隻起埋兼刀有手臂咁大既螳螂......我聽到都驚!!

    回覆刪除
  17. 我都係住村屋而且種咗好多花草樹木,果D虫係超憎!!!!! 我咪買D毒藥水嚟噴死佢囉, Work 架!

    回覆刪除
  18. 哎吔吔…我啲頭皮豎起晒!

    回覆刪除
  19. 笨B媽, 我睇到都起雞皮 , 乜你咁勇可以逐隻消滅佢, 果然係勁

    回覆刪除
  20. B媽B媽....D蟲蟲好恐佈好核突嗎!!我見到都頭皮發麻!! 好驚呀!!

    回覆刪除
  21. 我自己通常會用兩三粒蒜頭或四、五隻紅辣椒盅爛放入300ml 的噴壺. 若家中有蝸牛, 可以用整碎咗既雞蛋殼 post 在泥上, 用之前要去掉蛋殼的 (e), 放在滾水中消毒. 這樣便不會野蚊滋. 又可作肥料.

    回覆刪除
  22. Wei wei ... 真係要定時滅蟲 ga!

    回覆刪除
  23. 我小时候就不害怕毛虫一类的虫子,还敢拿来玩!!不过蚜虫这类小虫子就怕怕,看到鸡皮疙瘩都起来了!

    回覆刪除
  24. 睇到頭皮發麻添~

    回覆刪除
  25. 白蘭花? 係唔係好香果d呀? 唔係樹嚟o架咩?! 種過有蟲植物, 就算棵植物丟左, 都硬係覺得有d見唔到o既蟲/菌仲留o係個盤度; 之後用番黎種下一盤都好驚...同不予厚望....殺蟲水又驚整死埋棵植物....快d介紹下好方法啦~

    回覆刪除
  26. 你係練你個膽?定係讀者既膽呀? 我嚇到傻左喎

    回覆刪除
  27. 究竟哪些蟲蟲有什麼恐怖了? 你可知道黑色的小蟲蟲是蝴蝶的幼蟲? 它之後變了綠色正正是因為吃了寄主植物的葉 到了這個階段不需再過多久蟲蟲會變蛹然後再羽化成蝴蝶 它吃了你的葉子, 葉子會再生出來吧 可是你卻把它們撩落馬桶.......... 對自己的植物有愛心, 也應該對其實大自然動物仔有愛心吧? 況且蝴蝶幼蟲的存活率根本不高, 你想養它長大成蝴也不是容易哩~ 我有一棵桔, 有個時期有二十條蟲蟲孵出, 到最後一條也沒變成蝴蝶哩 因為俾雀仔食晒 可是我也曾經成功看見一隻蝴蝶成功羽化, 好神奇哩! 下次你再見到佢地, 又唔想佢食你d 葉, 你去樓下搵d 相同的植物放生佢地啦 或者你買一棵芸香科的植物, 專俾蝴蝶產卵都得! haha 芸香科的植物係好多鳳蝶(即係大大隻, 最靚果d)既寄主植物 例如四季桔呀橙呀柚咁 嘗試看見他們不要大驚少怪吧, 你驚佢食左你咩 佢驚你多過你驚佢啦? 至於那些介殼蟲....毛管戙都係應該既, haha

    回覆刪除
  28. 可以用細枝既香將的白色細虫殺死, easier than 拿著小鉗子逐粒拑走.

    回覆刪除
  29. 住村屋真係會令人大膽d....因為我男朋友都係住村屋,有次我竟然大膽到掃走條蛇仔添呀 ﹗

    回覆刪除
  30. 我都好怕昆蟲. 覺得佢地細細隻, 避無可避. 好似隨時爬上你身一樣!!!

    回覆刪除
  31. 好得人驚呀咁多怪蟲、重得人驚過睇三級鬼片呀

    回覆刪除
  32. B媽!話說當年我盆雀仔花都開得好燦爛,買回來後仲開多次花,之後有蚜蟲(同好而家一模一樣),之後狂噴盆栽植物殺蟲水,最後盆花同蚜蟲一鑊熟 ...(真是反面教材)

    回覆刪除
  33. 笨b媽, 唔好買個d殺蟲劑啦...
    用得太多植物又死, d害蟲又會有抵抗力....orz
    好似學sasa講用蒜頭水效果幾好ga
    不過我男友係用開既係garden supply賣個d garlic 噴劑, 唔係自己整
    (一字既之曰懶.... )
    我睇唔知咩文章講
    驅蟻最好用薰衣草, d蟲好怕個隻味


    珮夫人

    回覆刪除
  34. 其實我都想再講多樣野, 若你的植物是用來吃的, 就不要用殺蟲水, 都係用返天然野好啲.

    回覆刪除
  35. 你真係好大膽呀, 我一見到D蟲蟲已經依嘩鬼叫...

    回覆刪除
  36. 我屋企棵白蘭都成日有呢de蟲架, 有時重係青bb成條手指gum大條, 好鬼恐怖架

    回覆刪除
  37. 雖然你的花有蟲, 但係我見到的葉都好綠下, 的花都好燦爛喎, 睇黎真個村姑做得非常成功呀

    回覆刪除
  38. 有機蟲害防治材料

    http://www11.discuss.com.hk/viewthread.php?tid=1526574&extra=page%3D1%26amp%3Bfilter%3Ddigest


    辣椒水制作
    http://hk.myblog.yahoo.com/carolandy_hk/article?mid=368&fid=15

    回覆刪除
  39. 綠田園-有機耕種基礎知識-蟲害防治

    回覆刪除
  40. SORRY, MISS THE LINK http://www.producegreen.org.hk/agronomy_14.htm#topic7

    回覆刪除
  41. b媽 大鑊 我今日都發現的啲雀仔花藏咗好多呢隻蟲呀! 你嗰棵花而家點呀? 我今日捉咗成日蟲呀!

    回覆刪除
  42. 我今朝修剪葉時, 比我見到你講既蝸牛虫...超嘔心 , 我將塊葉&虫掉咗落街, 我真係好驚..驚魂未定..之後幫其它植物沐花啦..打算一手羅住盤花將佢放落地, 一手"汁"返剪咗既枯葉, 見到我腳底有條鹽蛇..嘩.. 成個人彈起..晨早樓樓就比條虫同鹽蛇嚇死..

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: