2007年9月30日 星期日

深圳美食之旅 【四川菜 @ 滿庭芳】

深圳實在係太多美食了


以前住市區時嫌舟車勞頓,又對深圳治安有點偏見,所以從來沒能享受這些口福 ~ 家陣搬左入大西北,上深圳仲快過出市區,熟絡後又發現深圳其實相當安全 ~ 最緊要o既係,佢地o既川菜做得夠地道,令我地呢o的麻辣派食得相當高興!


今次試呢間「滿庭芳」,是笨 B 爸爸的朋友介紹的,只有一間分店,非常旺場!我地沒有訂位,七點去到時都要排了半小時,但我們入座後,見到人更多,擠滿了整個入口處!噢!原來咁多「同道辣人」架喎



門面好大 ~ 深圳好多食肆都係咁



非常富有中式味道的裝修


還有中式 live band ...  好好聽架!


每周十大 ... 樣樣都好想食啊

!可惜我地得兩個人!


(話時話,國內餐館的碟頭普遍較大,如有三四個人同行會o岩份量o的 ~ 兩個人就次次都食到好飽!不過我地又懶約人,兩公婆即興想去邊就去邊 ~ 冇計

)



蘿蔔豬骨湯 --- 超鮮甜

!極好味!舊骨大過我個拳頭呀,又係可以用飲管啜骨髓!


P.S. 餐牌的「小煲」份量已夠 4-5 人用 (RMB88),但好彩侍應話可以叫 2 碗 (RMB44) 咁就唔駛飲到嘔白泡喇!




水煮魚 --- 不愧為每周十大榜首,我見檯檯都有的!好大碗,成個洗面盆咁大!


魚肉非常滑溜,湯底夠麻夠辣 (放心,我冇癲到攞來飲

)  攪攪下仲發現有紅薯粉條,好 Q 好好味,嗜辣的朋友一定一定要試!(唔嗜辣的朋友 ... ohhhh!what a pity!!!)




樟茶鴨 --- 好香,連骨頭都是脆的!




擔擔麵 --- 這個有點失望,因為諗住佢是更正宗 (莫非因為佢正宗

??)  所以湯底是夠辣,只可惜少了點花生香!所以不夠香港的擔擔麵香濃 ~



【滿庭芳 --- 川菜火鍋館】


地址:深圳東園路 148 號玉福樓


電話:86-755-2594 3066/ 2594 3166/ 2594 3266


交通:從皇崗乘的士約 RMB18 (去東園路近國企大廈),地鐵科學館站


消費:今晚兩個人食左 RMB180



深圳美食之旅【飲茶篇 @ 春滿園】

算起來,都有一陣子沒有北上吃喝了

見到

小魚兒介紹春滿園,又攪得我們心癢癢

今日得閒,就來個即興美食之旅吧!

今天吃得很滿足,午餐和晚餐都極高水準,下午還享受了非常舒服的三小時按摩,真是人生一大樂事

~

 

春滿園其實是一間茶樓/ 餐館,但小魚兒推介的那分店位於一家五星級酒店內,所以環境特別舒適

本來我們以前北上都喜歡去

香格里拉的春宮飲茶,但因為搬屋後較少經羅湖過關,二來後期太多人去了 (不會是因為我介紹了吧
) 服務質素有點下降跡象,而價錢也提升了少許
(二人埋單約 RMB200) 所以我們搬屋後也很少去了

今次試的春滿園實在非常好,論服務的體貼和細心程度竟比國際級的香格里拉還要好 ,食物質素相當高,價錢卻很便宜 (今次我倆才吃了 RMB100),真是非常驚喜!我們以後再上來的話,一定會再來啊

小魚兒:真要奉你為北上消費娛樂大使呀!你每次介紹的都是超正的,信得過呀! 

 

【下圖】兩個人飲茶,通常只可以點很少款式。但春滿園最大的優點是很多點心可以只叫 2 件,所以我地今日都試左好多款!款款都好好味添呀

從左至右,上而下:

枸杞豬肝粥 --- 粥底好綿、豬肝好滑

川北涼粉 --- 好滑的涼粉,汁醬惹味,超正

蔗蝦 --- 有鮮蝦味,難得甘蔗還是有汁的,不是乾爭爭的木條!

流沙奶皇包 & 麻蓉軟糍 --- 兩款的餡都做得好好,最正是可以只叫 2 件,唔駛淨係食包都橕到飽晒

手撕雞春卷 & 蘿蔔絲魚餅 --- 很特別的款式,香港吃不到,一定要試下

飄香榴槤酥 --- 明顯上笨 B 爸爸自己獨享晒兩件!佢食到 lam lam 脷,我就聞到好大陣榴槤味!

韭菜浸豬紅 --- 豬紅好滑,一o的都唔腥

潮州粉果 --- 想像唔到o係五星級酒店,會食到 $1 件的點心 (最少叫 2 件)!但質素一點不賴,還是即叫即蒸的,好好味啊!

生炸妙齡鴿 --- 每 2 人才可點一只的,肉質鮮嫩,炸得香脆,食到豎晒手指!

 

【下圖】唔影底呢張消費清單,我都唔記得食咁多款名稱   服務員很好,周不時過來望下你張消費清單,睇下有冇野漏

【春滿園 --- 東方世紀大酒樓店】

地址:深圳華強北路聖廷苑酒店世紀樓 2 樓

電話:86-755-8336 6688/ 8336-9333

前往方法:因為今次唔知椗,所以從皇崗搭的士去,約 RMB25。其實都算接近地鐵華強路站。

其他春滿園分店:

http://www.chunmanyuan.cn/websites/chunmanyuan/cn/Contact/index.jsp


同場加映:

酒樓內提供深圳特區報供借閱 ~ 見到樓盤廣告,國內的雖然都用了不少浮誇字眼,但至少都有個資料詳盡的實用圖積睇下!好過香港o個o的,睇完個廣告後,連個樓盤o係邊都唔知

由於後來要去番羅湖關口找按摩店的接駁車,所以去了搭地鐵 ~ 嘩!不是推出了「深圳通」了嗎 (類似香港八達通)?怎麼還是咁長龍的?











 

2007年9月28日 星期五

天啊 ... 請還我一盒 ... 普通月餅!

今年食過最難食的月餅


真係好憎呢o的「水果餡」

都唔明點解家陣o的月餅呀、鳳梨酥呀咁古靈精怪

雖然我咁慳家,但 ... 真係食唔落 ... sorry

好在還有細妹買回來的唐閣奶皇月餅,超好食 不過個包裝太靚了,非常厚身的硬皮紙盒,雖然不是用鐵做,但感覺依然好浪費哩 (話時話,鐵盒可以拿去回收) 要諗辦法 reuse 下個盒至得

我發覺,自己除左變身村姑-ing 之外,仲變身老餅人添啊 ~ 鍾意食舊式食物,鍾意聽老歌,鍾意o依o依哦哦

2007年9月27日 星期四

【私人網誌】打 MMR

【私人網誌 for 家人、朋友 only】


 


前陣子驗了血,醫生說「你的身體一切正常,只是德國麻疹的抗體不夠,要補針啊」


才醒起上次打針,已是小學六年級,即是 21 年前的事!!!


 


姑娘說,母嬰健康院和家計會都有 MMR 打,前者 $1,後者 $100。嘩,差 100 倍?


我咁慳家,梗係 ... 去左母嬰健康院喇!不過 ... 最後冇打到就走左!


點解?因為我研究左一輪,我諗兩種針應該是有點不同,才有價錢上的差異


anyway,最後我在中秋佳節o個日,走左去元朗家計會都啪左支 MMR


唔知係咪因為做節,所以成間院都係得我一個人


哇哈哈哈 ~ 唔駛排隊 ~



中秋 BB 蕉【後傳】

中秋節晚,和奶奶一家玩得好開心

一家人吃吃笑笑玩玩賞賞月光,真是人生一大樂事

早知天氣咁好,我拉埋陳師傅 & 陳師奶來湊熱鬧喇

不過,第二天的清潔工作就好甘

要洗晒o的拖鞋 (因為又炭屎又蜜糖咁,再用就會踩到通屋都係 )

要鏟起滴在地上的蠟 (點燈籠滴下的,幸好沒有玩煲蠟,哈哈哈 )

要吸塵洗地,從二樓洗到天台,一共 1950 尺加三條樓梯 (呢樣超級甘 )

沒有試過沒經驗,原來 BB 蕉一次,要兩天一夜的工夫呢

幸好渣渣和糖糖那場 cancel 了,否則真的應付不了啊   ~

 

*************************************************************************************

同場加映:逃出生天的健身單車

《路邊社報導》一輛五個月前被困牆角的健身單車,終於在中秋節晚被兩名英勇市民 - 笨B爸爸和長江一號救出。在缺乏千斤鼎的協助下,兩人徒手將重如磐石的戶外木傢俱移開,救出奄奄一息悶到發呆的健身單車。事後,戶外木傢俱被送上天台還押監牢,而健身單車則被掛上色彩繽紛的楊桃燈籠慶賀一番 ~


Linkwithin

你可能對以下文章有興趣: