2007年8月23日 星期四

破解電磁爐唔夠火候之謎:普通專用鑊 vs 生鐵鑊的分別


之前講到電磁爐的缺點時,用左相當篇幅解構電磁爐唔夠火候之謎 (不在這裡重複了,有興趣的朋友可再次閱覽)  一早已認定係因為電磁爐平面設計的先天不足,配合只得一塊圓鐵片底的中式鑊,受磁 & 發熱o既範圍大大減低,所以就算功率有 2800W,都好似唔及一般 2400W 的氣體爐咁好火 ~

 

我搬屋後最初 3 個月,都係用 Rasonic 電磁爐附贈的一套煲煮食的。所以,我也面對「不夠火力」的問題,但未諗到解決方法。後來,小魚兒講起佢都係用同款同牌子電磁爐,但覺得好夠鑊氣,仲示範過炒蛋畀我食添!一言驚醒夢中人,原來 ... 生鐵鑊 就係重點所在!

【下圖】大家 feel 唔 feel 到道氣 ... 好勁架

而家炒餸要收細番o的火數添呀,否則好易燶晒 ~

【下圖】碟小炒係咪好有鑊氣咁呢 ...

【下圖】來個近鏡吧 ... 真係燶架!

 

為左解構用生鐵鑊點解會咁有鑊氣,我地o黎個科學化少少o既比拼

 

【下圖】 咁o岩我隻新鑊 & 舊鑊一樣係 34 cm 直徑,形狀又一樣,夠晒公平喇!

我每邊倒左 24 安士水落去,然後開火

【下圖】 大家開始起泡的時間差不多 (因為都係鐵底,理論上受熱情況差不多),但滾後的狀況就有點分別啦 ...

【下圖】電磁爐專用易潔鑊的氣泡範圍較小 ... 唔 ~ 原因可能是底部的鐵片造得比較小

這類易潔鑊的原料是不受磁的 (是鋼嗎?anyway,總之吸引不到磁石的) 只有底部的鐵製部分才受磁,那就是轉化熱能的部分。其餘不能受磁的部分,就只有靠中心的熱點慢慢傳送熱力上來   

【下圖】至於生鐵鑊,很明顯地,氣泡範圍較闊

雖然生鐵鑊的氣泡範圍較闊,但一定不會和使用氣體爐一樣,整個水面都滾到飛起的 ~ 因為電磁波的力度與距離成平方反比,所以接觸不到磁區的部分,基本上都不太發熱的。

【下圖】我們再仔細看看 ... 電磁爐專用易潔鑊的氣泡是較細的

雖然電磁爐專用易潔鑊的鑊底都是鐵,理論上和生鐵鑊的受熱程度一樣。但我估係因為這種鑊成個都係用鋼造,先要底部外加的鐵片發熱,然後才傳到鋼料那層,所以受熱沒那麼快、也沒那麼勁。

【下圖】而生鐵鑊的氣泡就較大

哈哈,我還拍了短片 ... 不要話我無聊啊 ~ 有聲有畫,清楚o的嘛 ~ 

 







 

結論:

  如果追求鑊氣的朋友,就要轉用生鐵鑊啦!你可以去百貨公司買 >$2000 的法國名牌 Le Creuset,或者去街坊雜貨店買 $100 祖國製的生鐵鑊 ~ 視乎你o既要求 & 消費能力喇

  用生鐵鑊炒餸好易燶,所以要小心控制火候呢!我地又要重新適應一下了

 如果好怕油煙的朋友,你都係用番電磁爐專用的易潔鑊喇 ~ 鑊氣 ... 同油煙係好朋友o黎架

 

沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: