2007年8月8日 星期三

純素食的【豆渣芝麻脆餅】

哈哈 ~ 我終於決定特別開個大豆美食館暨研發中心o既新分類啦


因為我決心要令豆漿機極速回本 (證明畀笨 B 爸爸睇

,我話得要買o既野,就係好有用,絕對係 value-for-money,唔好成日哦我亂買野
)
兼且發揮物盡其用o既精神 (豆渣唔係廢物來啊,好有營養架,大家睇下美國 USDA 的營養檢測報告 
~)


所以,我一定會繼續攞o的豆渣攪攪震o既

 (笨 B 爸爸心裡面一定話緊:我又放長雙眼 ~ 睇下你有幾多恆心
)
! 大家要橕我啊!


點解我叫呢個分類做大豆美食館,又要話暨研發中心呢下?事緣有o的食譜係跟別人的食譜做的 (e.g. 召藥師 & 小米桶,她們都做了不少豆渣美食

),有o的就係我亂咁來,未有參考資料的 (e.g. 今次呢款脆餅)  但我試過味道 ok 才會 post 上來
~ 至於食譜方面,我會將是次「研發嘗試」的分量和做法放上來,將來重做時如發現甚麼地方可以改進,就會上來 modify 個食譜  


 


當然,非常歡迎大家也試做一下,也在回應欄裡分享下你的「試驗成果」呢

4729297d.gif



豆渣美食研發實驗 (一) 豆渣芝麻脆餅


試驗日期:2007 年 8 月 6 日


 


材料 (可做 20 塊直徑約 4cm 的小脆餅)


豆渣 50 克


低筋麵粉 100 克


砂糖 50 克


泡打粉  1/4 茶匙


梳打粉 1/8 茶匙


植物油 25 克


芝麻 (黑、白均可) 適量


做法


(1) 將低筋粉過篩,然後混合其餘材料 (芝麻除外) 用膠刮拌勻


(2) 用手取少量麵糰 (如大粒波子 size) 輕力搓圓


(3) 用碟子裝起芝麻,將 (2) 放入,滾滿芝麻。然後輕力按扁約 3mm 厚,逐一排放在焗盤上


(4) 用 180 度焗約 12-15 分鐘至表面金黃即成


 


心得:攤涼後吃才會脆呢!如果覺得不夠脆,可以以 150 度翻焗一次 (約 10 分鐘,留意睇火)。我翻焗了,放到第三天都仲係脆的。


 


下次想改善的地方:想輕身o的,更脆口



後記


尋晚未訓著時諗下諗下,我終於明白點解細個時用攪拌機做豆漿,剩下來o的豆渣咁難食啦 ~


個分別就係 --- 豆漿機會先加熱o的水 & 豆,然後才攪,所以攪出來的豆渣特別滑兼且冇豆腥味


以前用攪拌機,通常都係落凍水攪,攪出來的豆漿隔渣後再拿去煲


可能生豆攪得冇咁綿,兼且生豆好重豆腥味


剩下來的豆渣真係超難食 ~ 原來係咁 ~


解開左呢個謎,令我非常高興


但至弊又順道激發埋我諗食譜的興致


又攪到訓唔著了


 

30 則留言:

  1. 但係個餅餅賣相非常好呢!! 努力研制多啲啦! 另外, 你的朋友對你非常厚愛, 建議了一系列笨b媽之家綠化計劃, 請到 敝卜之禁地篇comment一下. 呵呵!

    回覆刪除
  2. 好味道呀…唔知賣相同味道係唔係一樣咁正呢?!咁食落去係咪好重豆味架?其實我都想買,但廚房太細喇!放唔落咁多嘢!得閒睇你新作當自已整咗仲好

    回覆刪除
  3. minicorgie:你唔好被班榴槤狂魔教壞呀! 佢地傻架 奀豬媽媽:呢個餅好似冇咩豆味,可能因為畀濃香的芝麻味掩蓋左 落豆渣整的原因是想營養o的健康o的,因為豆渣含有豐富膳食纖維哩 ~ 星期日整o個個豆渣麵包就有大豆的香甜味,就算糖分少,都好好味啊

    回覆刪除
  4. 笨b媽媽, 你好犀利呀, 其實你係一個烹飪天才嚟o架, 加油! 呢款脆餅, 我會週末試吓做先, thanks for sharing~

    回覆刪除
  5. 你個餅好好好味咁啊! 無牛油最岩我!! 豆渣可以用來做有機肥嗎? 有係發達囉

    回覆刪除
  6. Karli & Coco:傻啦,你見我整o個o的野,就知我水準去到邊喇 你咁講,我會畀人笑架! 你整完話我知結果喎 ~ 嗱,呢個係「研發食譜」來o乍,如果你發現更好的做法,記住報料啊! 冬菇:豆渣通常都是拿去做動物飼料 (esp 餵豬) 和做肥料的 (就是豆麩啦) 好正架!我尋晚都落左一堆在我的蕃茄苗度

    回覆刪除
  7. 豆渣既又一研究制成品............. 加油.......支持你

    回覆刪除
  8. 我都经常看小小米桶的blog呢!偶尔也会照着她的食谱来做好吃的呢,嘻嘻。 豆渣不能直接当作肥料的,要发酵之后才可以(因为发酵是产生热量的过程,放在花盆里的豆渣在发酵时产生的热量会把花苗烧伤),快点拿出来啦!

    回覆刪除
  9. 我都覺得D餅好美味呀!!笨B爸爸又有口福啦!!

    回覆刪除
  10. b媽 原來芝麻餅都係用豆渣整架? 好味呀! 我仲以為係一般的脆餅添! 豆渣綿唔綿 同煮熟與否應該是無關的 因為我部豆漿機係生豆打架 一樣都係咁綿 所以我覺得應該係同部機的摩打及刀片的硬度及鋒利程度有關 不過都係我估的 唔知啱唔啱呢? 另外我下川的遊記出咗喇 有時間去睇睇

    回覆刪除
  11. 嗯...呢個可以試下 , 起碼唔使好似尋果個要好得閒至整得

    回覆刪除
  12. 笨b媽媽...無問題 一定可以回本... 繼續努力keep going~

    回覆刪除
  13. hi, b媽媽~~你好 好「唐特」咁勇闖左入你個blog呀, 睇左大半日,真係忍唔住要入黎講幾句呀, 三個字黎形容下你個blog, 「正」「正」「正」 你真係好勁呀, 除左「正」&「勁」, 我真係再諗唔到其他字眼黎形容你個blog呀 我去冷靜下先 我會日日黎遊下架

    回覆刪除
  14. 笨b媽媽, 你真係超勁呢~~~ 再儲多幾個食譜, 你可以考慮出版食譜添呀,因為市場真係好少有呢啲食譜!

    回覆刪除
  15. d 豆渣可唔可以用黎做阿茄佢地 d 肥料呀? 種出黎 d 茄又會唔會有豆味呢....

    回覆刪除
  16. 笨b媽媽我支持你呀! d男人成日都話女人買埋d無謂野架啦!! 你要繼續努力呀!

    回覆刪除
  17. 笨b媽媽醒,笨b媽媽勁...笨b爸爸有個咁知慳識儉ga老婆,佢真係幸福呀...應該鍚你都黎唔切啦...哈哈哈哈...

    不過今次笨b媽媽ga餅真係唔錯呀...又可以物盡其用...對一d愛食零食但係又愛靚ga女仔黎講簡真就係救星黎添啦...不過如果係材料中加朱古力粉應該都唔錯...等我叫我媽媽下次留d豆渣俾我試下先...

    回覆刪除
  18. 好叻呀﹗加油呀﹗等待更多豆渣美食。

    回覆刪除
  19. 各位:多謝大家橕我! 笨 B 爸爸頭先睇完呢篇 blog 後,果然不出我所料, 哼 左我一聲呀 (我 哼 你就真呀 ~ 冇我呢個實驗家,邊個餵到你肥肥白白 ) 阿婷:原來豆渣發酵後才能做肥料的嗎?哎o也o也 ~ 跳左 step 添!好在落得唔係太多 等我又上網摷下點樣整呢o的有機肥料先

    回覆刪除
  20. 個樣咁靚, 改個好聽d嘅名得唔得呀?!

    回覆刪除
  21. hello, 咁又有可能, 生豆, 腥味會重d. 我都係用攪拌機整豆漿, 渣通常都唔要. 成日都覺得豆味唔係好濃, 我比例已經係 豆1杯 : 水2杯 ... 今次比你提一提. 如果我將沈好既煲熟先, 再做豆漿, 咁再去煲. 咁d豆漿又會豆味濃d, 豆渣又綿d滑d羅!!! 笨B媽媽, 你話成唔成立呢!? 好, 等我星期六試下先! C

    回覆刪除
  22. Madame Pi:冇計,豆渣一向被貶為低下層的東西,所以冇人咁好心機幫佢改個咁好聽o既名 日本人好o的,叫佢做 okara ~ 唔 ~~ 不如你幫佢改番個法國名丫,提升下豆渣身價都好 C:嘻嘻,我都係估下,咁你實驗完記住報告下喎 ~

    回覆刪除
  23. 好一個充滿研發精神的笨B媽媽, so 我一定撐你啊

    回覆刪除
  24. 預祝你這個 大豆美食館暨研發中心 有更多創新而好味嘅新研究發表!加油啊!

    回覆刪除
  25. GG:我咁有研究精神,係咪應該 ... 入實驗室o禁緊急制 墨西:我會努力架啦!希望多o的 blog 友一齊參與,發掘多o的有益又健康的大豆美食

    回覆刪除
  26. 你真係好有體育精神, 勁.

    回覆刪除
  27. 笨B媽媽, 我今日試左煲左d黃主呀豆再去整豆漿,答案係唔得的. 我已經連豆連水煲, 結果完全冇豆味. 但係好奶味!!! 一d豆味都冇. 呀....好失主呀..... d豆渣係好綿,但豆味都唔重. 可能都係要放棄佢地. 本來想用嚟做 cookies. ..... 唔開心呀!!!

    回覆刪除
  28. 笨 B媽媽 :琴日星期一跟你做左呢個豆渣脆餅 ,好脆呀 ,因為我係比小小朋友做小食 ,我將糖份減左少少,我冇用芝麻,改左用提子乾 ,我用375度焗18分鐘,我個大孫女好鍾意食 ,跟本冇機薈比 D餅放到不夠脆,佢一口氣食左6塊 ,今日我再做多D,多謝你的食譜分享 !

    回覆刪除
  29. 哈哈, 我岩岩買左部豆漿機, 就係煩緊d 豆渣點用... 搵到呢個blog真係有用. 謝謝!

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: