2007年8月24日 星期五

阿摩豆腐花

 

呢煲豆腐花,其實整左好耐,不過覺得唔夠完美,所以未 post 上來

不過既然畀師姐發現左

,咁我都唔收埋咁耐啦,寫住先喇!等大家一齊實驗下個做法都好!

嗱嗱,你地邊個有必勝配方 or 必殺技,唔該寫上來話我知呀!我好鍾意食豆腐花架!

 

以下呢個方法,係賣豆漿機的 sales 姐姐教我的,我都係因為即場睇左佢示範,先至咁爽手買左部機架o乍!  所以話呢 ~ 做 demo 示範o既錢真係唔慳得!

覺得唔完美o既地方,係因為我撞出o黎呢o的唔夠凝結 (大家睇下個邊位 ... 係咪散散地咁呢?) 我估可能未控制好粉o既份量  ~ 同志繼續努力!

豆腐花

材料:

剛煲好的豆漿  1300 毫升 (剛好我那豆漿機一煲的份量,大家如有不同,請按比例自行調較)

熟石膏粉 2 茶匙

生粉 3 茶匙 (我失敗了那次是用了粟粉代替 ... 唔知係咪一定要用泰國生粉呢?)

凍滾水 2 湯匙

做法:

1. 拿一個大容器,放生粉 & 熟石膏粉撈勻,用凍滾水調勻 (唔好用熱水,o的生粉會即時變左一餅!)

2. 將剛做好的豆漿沖入,不用攪拌 (最好唔好郁到佢添!)

3. 蓋上蓋子,靜候 30 分鐘,攪掂!

 

用熟石膏粉和鹽滷做豆腐有咩分別?

以前間唔中都在網上見到有人問用熟石膏粉和鹽滷做豆腐的分別 ~ 有人話用熟石膏粉造的豆腐含有更豐富鈣質、有人卻話用熟石膏粉對健康唔好 ... 有人話鹽滷造的豆腐好味o的、有人卻話熟石膏粉造的好o的 ...

Anyway ... 既然而家有部豆漿機可以做豆腐花甚至 豆腐,咁都係時候查明一下究竟啦!

 

我呢,習慣左有咩唔識,都係問左陳師傅先o既,然後再上網摷料查證 ... 因為我覺得佢生活經驗豐富,應該畀到o的貼士我o既 ... 點知,佢識答之餘,仲即場攞左樽 ... 自製鹽滷出來!嚇得我 ... 咁都得!點解我阿爸好似一個百寶箱咁!

 

哦 ... 後來發現,原來鹽滷和熟豆膏粉,都是用來入藥的。怪不得佢兩樣都有喇!佢話呢o的鹽滷係整o黎畀陳師奶皮膚痕癢時外用的呀!

我問佢點整,佢話 very easy,只要在潮濕天氣的日子買一大堆海鹽返來,搵個盅裝住佢,佢受潮後就會有呢o的液體出來架啦!

呀,話說o的鹽可以繼續用來煮餸的呀!唔好倒左佢呀!

噢!我以前成日以為o的鹽潮濕左唔用得架添,原來潮濕左不單止用得,o的液體仲係寶o黎架添!


好,問完陳師傅一大輪,又係時間走上網查證一下 (well ... 唔係唔信陳師傅,只係我習慣多角度查證事情o者!一來知多o的,二來避免出錯丫嘛) 

 

20070825 Update:

話說陳師傅呢個製造鹽滷的方法,當然不是正宗的製造方法喇。其實鹽滷是海水製鹽的副產品,不是從鹽粒做番轉頭的。不過,以前的人就是有這種靈活變通的本領  

我 challenge 陳師傅,他那些到底是「鹽水」還是「鹽滷」,他說是鹽滷,因為這些液體拿去做豆腐可以凝結,如果用鹽水拿去做豆腐就結不成啦。

我仲問左幾條問題

Q1  用熟石膏粉和鹽滷造豆腐有咩分別?

A1  用熟石膏粉造的豆腐較滑,但豆香較少;用鹽滷造的豆腐豆味較重,但質地較粗糙 (噢!唔怪得知我覺得有o的街市檔o的豆腐咁鞋喇 ~)  食邊種視乎個人喜好喇。不過,熟石膏是寒涼之物,體質虛弱或畏寒o既人就不宜食咁多。

Q2  點解有o的人講用熟石膏粉有毒,唔好食o個o的豆腐?

A2  因為o的人一知半解,兼且斷章取義囉!講熟石膏粉「有毒」,係中醫藥學裡的概念,有將o的「攻病愈疾」o既藥物定義為「有毒」,而非對人體會造成甚麼傷害;熟石膏粉係屬於「寒毒」一類,專用來治療熱病的。如果真是危害人體,咁就應該一早禁左喇!可能有o的人只聽到「有毒」,又唔知咩野毒  ...

Q3  鹽滷用來外用,有咩功效?

A3  至於給陳師奶外用這件事 ... 因為陳師奶有皮膚敏感,有些時候不知吃了甚麼「毒野」就會發作,經常搔癢搔到皮破血流,無比膏都好似唔係好大作用   於是陳師傅就畀自製鹽滷畀佢止痕囉 ~ 不過,陳師傅話鹽滷只有止痕效果,不能根治,所以大家如有皮膚痕癢的問題,最好都係去睇醫生啦!

 

至於網上查證的結果 ~ 因為網上資料比較零碎,有很多還是比較商業性的,有點偏頗。我看了比較多,覺得

中國豆製品商務網這段比較持平而且深入,可以作為較好的參考:

【鹽鹵】是海水制鹽後的副産品,主要成分是氯化鎂。鹵水中的氯化鎂含量變化較大,使用時最好通過試驗確定適當的添加量。用鹵水作凝固劑,蛋白質凝固速度快,蛋白質的網路結構容易收縮,製品持水性好。鹵水的成分比較複雜,除主要成分氯化鎂之外,還含有一定量的氯化鈣、氯化鈉、氯化鉀、硫酸鎂和硫酸鈣等。不同産地、不同季節、不同批次,其成分的差別也很大。隨著海洋污染的日益加重,海水中的有害物質在濃縮的海水副産品中,對人體構成危害,所以專家建議不使用鹵水,而改用精製氯化鎂作凝固劑,或者採取妥善措施防止海水污染,也可限定食品用鹵水的生産基地。

【石膏】也就是硫酸鈣。豆製品使用的主要是熟石膏,也稱煆石膏,是把生石膏加熱到100℃以上,失去部分結晶水而得到的白色固體。主要成份是硫酸鈣。

使用熟石膏作豆製品凝固劑,豆漿的溫度不能過高,否則豆腐發硬;豆漿溫度過低,而豆腐過軟,容易破碎。需要注意的是:豆製品企業在使用石膏作凝固劑時,一定要選用適合豆製品加工中使用的,符合衛生標準的熟石膏、以確保豆製品質量的優良和消費者食用的安全。

 


 

沒有留言:

張貼留言

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: