2007年7月30日 星期一

美食與狗 ... 我所愛也!

上個 weekend 實在過得太愉快啦!因為兩日都有美食、兼兩日都有狗玩!

(本 blog 只描述星期日在 minicorgie 家o個場 - 特別鳴謝 minicorgie、飛 e、冬菇、梁太提供美食!)

講多無謂,睇相至實際!(因為我個 picasa 唔係好 work,唯有逐張相 post!以出場時間先後排列)

 

最先出場o既,係熱情無比兼貪玩的阿寶 (哥基犬),我一踏入主場,佢都未分清敵我,已經捐入我裙底
  阿寶尋日兌換左唔少「按摩卷」,我出手、飛 e 出腳,輪流按到佢非常疏乎!

第二位出場o既係阿肥 (約瑟犬),估唔到佢成 17 歲!
  阿肥好斯文,唔似阿寶咁黐人 & 爭寵 ~ 經常好乖咁自己伏埋一邊訓覺 ZzzZzzzZzzz

估唔到大家準備左咁多野,我淨係整左一碟添
 不過心意搭夠啦哈哈 ~ 因為係星期六晚十二點返到屋企先漏夜整架!

呢碟係好似山咁高o既雞絲粉皮「走粉皮」版 (因為唔知元朗邊度有得買新鮮粉皮卷,所以用左芋絲代替),超級易整,不過將所有材料切絲、搣絲好花時間

大隻兄親手泡製的茶餐廳奶茶,真係好香好滑,無得彈!聽講茶葉係特別渠道才能買到的,係幾種唔同茶枼混合而成,for 專業奶茶架!

跟住輪到整麵包!卒之有機會跟 vanlily 實習整麵包,實在太太太開心啦!我卒之明白搓麵包o既手勢了,多謝你呀!

我勁似一個上麵包班的小學生,第一件事就係整隻豬頭出來 ... 送畀笨 B 爸爸!

我地就地取材,仲整左芝麻腸仔包、肉桂卷、朱古力蛋糕卷、紅莓包 & 芝士包!款款都好好味,好有滿足感呀!

跟住就到戲肉啦!!!為左慶祝 vanlily 砂糖冬菇小姐生日,飛 e & minicorgie 準備左好多美食,十足十去食自助餐咁!

我諗臨時有事而要甩底的笨 B 爸爸見到以下呢o的相,一定會極度飲恨!

我地有大大隻的澳洲生蠔 ...

極鮮美的翡翠螺 ...

勁多膏、勁鮮味的加菲蟹 ...


淡口少少但都係勁多膏o既麵飽蟹 ...

芒果汁底o既龍蝦沙律 ...

開左兩支 Rose,但唔飲得o既我,只可以試一小杯。好香、好易入口,正呀!

梁太特別親自拿來的肥美鵝肝,好香好甜,一啖入口,真係忍唔住嗌左句「好 ~ 幸 ~ 福 ~ 呀」

因為我和飛 e 都係唔食牛的,主人家特別獻出佢o既「第一次」--- 烤左隻全雞畀我地食!旁邊o既係自製o既芒果甜椒 salsa 醬,好醒胃!

壽星女 + 主人家就食呢塊勁大的 T 骨扒 ~ 用鵝肝油煎的,應該勁香!




壓軸出場o既,梗係壽星女o既生日蛋糕 ... 仲要係佢自製o既添呀 (我地都有柴娃娃幫手) 係榛子脆脆 mousse 蛋糕,人間美味呀!!!

第一次目睹餅后造餅,真係好有大師風範!(仲好有做 miss 的潛質 ~ 因為會一邊做一邊自言自語,將o的 steps 同埋秘訣講晒出來!)






尋晚的一餐真係好豐盛、好開心!多謝晒 minicorgie 的熱情招待!!!




 

 

後記:

大家信唔信呢篇 blog 攪左我足足 2.5 個鐘?講都唔信哩?!簡直想撼頭埋牆呀

(事緣:desktop 傻左,暫時用住 laptop。但唔知係部 laptop 唔夠 RAM,定係笨 B 爸爸 load 左幾個 anti-virus 程式入去,system resources 勁低,開親 picasa 即死!我成個下晝就o係 hang 機與 boot 機之間糾纏左好耐 ...)

2007年7月27日 星期五

豬肉咁貴,煲完湯唔好浪費呀!

記唔記得我幾個月前寫過一篇攪笑版經濟向好後遺症

 

o個時去買豬肉都已經覺得

貴左 (sorry,o個時我唔多買餸,記憶尚停留在兩大超市打交鬥賣 $19 一斤豬肉的時代),買幾蚊豬肉都畀人窒 
~

家陣,如果話買幾蚊,可能佢會以為我係

白痴 ...

因為家陣o的豬展竟然成 $39 一斤呀!哇哇哇!

搶 ... 咩 ...

 

幼承庭訓,粒粒皆辛苦,千祈唔可以浪費食物 ~

兼且煲湯最多只可獲得湯料的 50% 營養 ~

所以,細個時大人必定要我地食晒o的湯渣落肚

~

其實我相信係有好處的,大家睇我咁壯健就知道
...

不過,發育完成以後,唔想亦唔需要再咁快高長大

所以每次對住一大碗煲湯肉,都有食之無味、棄之可惜之感

好在,

上年o係大少奶o個度睇到佢整豬肉鬆 (冇錯,真係差不多一年前)

o個時得個睇字,因為仲未晉身合格煮婦,淨係黐陳師傅 & 奶奶的湯水,自己好日都唔煲湯

家陣搬遠左,湯水得靠自己,所以隔幾日就煲一次

兩個人買一斤肉來煲湯,湯頭就甜了,但湯料就沒法吃得完

就有樣學樣,將o的煲湯肉整碎來炒豬肉鬆 ~

果然 very good 呀!

一o的都唔難,仲可以製作出個人風格的豬肉鬆,咁我以後都唔駛出街買喇!yeah ~

材料

煲湯肉 

(試做完第一次後,我發現用瘦肉會易o的。豬展較多筋 & 膠質,呢o的都要除去,一來麻煩,二來浪費了。唔 ~ 咁我識啦
!下次買少少豬展 + 多多瘦肉,豬展留在湯裡一併吃掉,可以吸收下o的膠質;而瘦肉可用來炒豬肉鬆!正正正)

調味料

豉油、老抽、糖、鹽及自己喜愛的調味

(因為煲湯後的豬肉的肉味會淡左,兼且可能帶有少許其他湯料的味道,所以建議用一些較惹味的調味料 e.g. 咖喱粉、五香粉、辣椒粉)  

做法

(1) 先將豬肉弄碎 (可用人手撕,而陳師傅就教我用石舂舂散,確係幾方便,值得參考)

(2) 不需落油,用白鑊細火炒乾豬肉絲。一邊炒一邊弄鬆。 我用兩隻鑊鏟兜炒,容易o的)

(3) 一邊炒一邊落調味料。一邊試味。

除左基本調味外,我今次仲落左咖喱粉、辣椒粉 & 陳師傅私房辣椒醬 ... 又係慌死唔夠辣咁!哇哈哈!

(4) 炒至豬肉絲變乾身就完成了!放涼後可以用密實盒保存。





2007年7月26日 星期四

今次真係捉蟲

到底,我部電腦係咪中左毒呢?

我在網上找到一堆資料 ... 咦,中左一條喎!

 


電腦中毒前的徵兆有哪些 (來源:雅虎知識堂)

 

在電腦病毒已不再陌生的今天,電腦病毒已經由原始的磁片帶入,變爲現在的諸多渠道同時攻擊。你也許一直都在擔心,我的電腦中毒了嗎?下面就將電腦中毒時可能出現的症狀匯總如下:

 

1、電腦運行比平常遲鈍,反應相當緩慢,出現藍屏或死機。

2、程式載入的時間比平常久,有些病毒能控制程式或系統的啓動程式,當系統剛開始啓動或是一個應用程式被載入時,這些病毒將執行它們的動作,因此會花更多的時間來載入程式。

3、對一個簡單的工作,磁片似乎花了比預期要長得多的時間。例如:儲存一頁的文件若需一秒,但病毒可能會花更多的時間來尋找未感染的文件。

4、出現意外的聲音、畫面或提示資訊及不尋常的錯誤資訊及亂碼。尤其是當這種資訊頻繁出現時,表示你的系統可能已經中毒了!

5、當你沒有存取磁片,但磁片指示燈一直在亮。硬碟的指示燈無緣無故一直在亮著,說明電腦這時已經受到病毒的感染了。

6系統記憶體或硬碟的容量忽然大量減少。有些病毒會消耗可觀的記憶體或硬碟容量,曾經執行過的程式,再次執行時,突然告訴你沒有足夠的記憶體可以利用,或者硬碟空間突然變小。

7、可執行程式文件的大小改變了。正常情況下,這些程式應該維持固定的大小,但有些病毒會增加程式文件的大小。

8、文件奇怪消失。

9、文件的內容被加上一些奇怪的資料。

10、檔案名稱、副檔名、日期、屬性被更改過。


但,我個腦得番o個幾十 mb,我驚再裝防毒軟件會死機呀

 (話時話,我部腦係有裝 Norton Virus 和 Zone Alarm Pro 的,唔知係咪唔夠 update?)  

笨 B 爸爸尋晚研究完一輪,都無咩發現 ... 佢話都係鏟左個 Windows 再裝過最乾手淨腳!不過又係最o徙時間!

唉 ~ 我無咩意見 ~ 我唔識捉電腦的蟲,連捉真o既蟲都唔係好掂!大家睇下 ...

 

 

失敗的捉蟲記

兩個星期前影的,當時我好奇怪,點解有棵蕃茄苗總係發育不良咁o既呢

?人地快高長大,佢就生極都咁細 ~ 仲有好多
白色一點點 ~ 我開初以為發霉呀!

搵支牙簽撩下 ~ 野 ..... 郁架

!!!

好在,呢o的蟲好鬼笨,郁得鬼咁慢,又唔識飛,只識好緩慢咁移動,所以唔算驚嚇!

我起初搵牙簽撩下撩下,但佢地跌落o的泥度,我心諗唔係辦法 ... 容乜易佢地呢埋o係o的泥度?咁咪仲弊?

於是,我就懶醒咁 ... 用支點著o既香辣佢地!辣到佢地死晒!

不過,最終呢棵蕃茄都救唔番,唔知係咪中毒太深,or 畀我支香辣親 !所以我呢次都真係算

捉蟲 ...

P.S. 另外o個幾棵蕃茄苗已換盆,遲下畀大家睇!

Linkwithin

你可能對以下文章有興趣: