2007年4月5日 星期四

安裝廚櫃 Day 2

哈哈,首先公佈左 IQ 題o既結果先 ~

笨 B 爸爸o係新屋裏「片來片去」,就係忙於試電制 & 試燈囉!

  小倫真係冰雪聰明架o者 ~

靜靜雞話畀大家知,起初笨 B 爸爸想帶成條拖板入去,因為拖板o的電制有燈,一試之下便知個電制有冇電 ~ 好在佢背後英明o既賢內助 ... 即是我 ... 腦筋一轉問:「帶個叉電器咪得囉?都有燈架 ... 」 成功贏得呢個奄尖 Sir 一句 「good idea」呀   真開心 ~  

(不過佢之後搭番句 ... 證明你都笨唔晒喎
)   哼!

順手帶左兩個燈泡入去試下o的燈,發覺全間屋有 3 個燈位冇電到、有 5 個燈制開燈方向倒轉左 (正常燈制是向下按時開燈的) ~  我呢個秘書仔負責做紀錄,報番畀 J 先生知

  (oh!一陣又要打個執漏 summary 畀 J 先生 ... 諗起又想訓覺  
  )

【下圖】安裝好的廚櫃 ~ 哈哈!好似揀得淺色左o的啊 (當初因為想光猛o的) 睇o黎我第時都要勤力o的抹廚房先得啦 ...


【下圖】遲下收左樓先裝埋電磁爐上去


【下圖】終於畀我成功說服笨 B 爸爸用雙星盤    但睇睇下 ... 弊 ... 因為雙星盤的關係,大星盤都唔係好大 ...  唔知擺唔擺得落個鑊呢?!


下個呢個,就係

「小怪物」啦 ~  有別於第一代的弧型設計,呢款更能盡用角位空間

同場加映:三樓睡房區的廁所都安裝埋廁所櫃啦!個洗手盤同馬桶,咪係o係

深圳買回來的囉 ~


下面呢個係二樓客廚的廁所 ~ 用了方型的洗手盤 ~ 洗手盤 & 水龍頭是 J 先生負責的,所以我只是放上去預位,等謝師傅幫我鑽定兩個開口 ~


 

後記:安裝埋廚櫃,確定左貨品質素令我滿意,我就可以安心將紀先生介紹畀大家喇!

 

之前亦都提過,我地在訂製、度尺的過程之中,都已經覺得紀先生係一位好有耐性、好專業兼且好細心o既老闆。我地 budget 不多,但也想揀些較好用、較襟用的用料,紀先生不但處處為我地慳錢,仲好有耐性地逐一介紹各種用料和門板的特性、優缺點等,令我地幫襯得好安心!

 

今次我地o既工程總共用了 $19,280,包括以下項目

【廚房】~ $15,000

吊櫃 9 尺、地櫃 13 尺、彩寶石枱面 13 尺、白色無縫雙星盤 1 個、小怪物 1 個

【浴室】~ $ 4,280

地櫃 3 尺 x 2 個、彩室石枱面 3 尺 x 2 塊

【備註】

吊櫃及地櫃均用夾板、面板用「大信板」

 

紀先生的 contact ~   

店名:名匠廚櫃傢俬設計

地址:九龍上海街 638 號海景商業中心 7 字樓

電話:3793-3320/ 3793-3321

 




 

37 則留言:

  1. wow..No 1..I think you new house is so pretty....add oil

    回覆刪除
  2. 嘩, 我好鍾意個廚房呀!有好多柜, 啱哂你放d煮食工具呀!

    回覆刪除
  3. 我覺得兩個廁所的洗手盆太淺,一定要成日抹噴出來的水...

    回覆刪除
  4. 你個廚櫃靚靚 好似我個個咁﹐不過我係全部向宜家訂 呢度邊有香港咁多平選擇呀, 老老套套櫃都要成三千幾蚊美金呀 (檯面﹐星盤全部另計) 仲 有 計人工呢 夷 ? 廁所 洗手盤咁淺用時水會唔會飛到四圍係嫁??

    回覆刪除
  5. WA.... VERY GOOD DEAL WOOO

    回覆刪除
  6. 笨b媽媽, 個廚櫃真係淺色咗d喎~ 仲有, 我個sink盤大過你, 不過都放唔入個獲呀~~~

    回覆刪除
  7. 嘩,話甘快就搞好左個廚房。。。!!! 紀先生連奄尖 Sir 個關都過到,當然好放心搵他搞啦!!  睇到您個廚房,再望下自己個廚房我就“唉。。。。”遲下先再同您呻啦  ~~

    回覆刪除
  8. (私人回應) 呵呵呵。。。我個度要入村架!我要整好個廚房同客用洗手間先敢請您來呀!!呢個階段實在慘不忍睹哦 ~~   因爲趕住搬入來而kiki堅持請他的“不是很懂裝修”的老死來裝修,重知搞到一pat嘢啦!到現在我都唔敢請我的朋友過來,只有kiki唔介意他的朋友過來 ~~ 

    回覆刪除
  9. 你個廚房相信好多人都想擁有一個

    回覆刪除
  10. 洗手間個洗手盤好似好淺... 怕唔怕啲水彈到四圍都係??

    回覆刪除
  11. i love your kitchen! and the bathroom too!!

    回覆刪除
  12. 嘩﹗紀先生咪好多謝你幫佢賣廣告?哈哈﹗話時話,佢知唔知你係blog介紅人呀? 仲有,點解試有冇電到要用叉電器?乜唔係用電筆既咩?

    回覆刪除
  13. b媽: 你放心個鑊一定放唔入個盆, 因為我屋企都係咁, 仲有個鑊底會成日整dirty個盆邊添. 帶條叉手提電話線唔係仲輕d咩?

    回覆刪除
  14. 我都好想要返個(小怪物).....咁就唔使我成鬼日塞個頭入櫃底先拎到o野喇~~~

    回覆刪除
  15. 笨B媽媽果然聰明,我以前D厨櫃比裝修佬包做。

    回覆刪除
  16. 洗手間個洗手盤好有型呀~ 不過我都覺得淺左D... 如果係我,一定淺到一地都係水  個”小怪物”好正~

    回覆刪除
  17. Dear 笨b媽媽 &各位, 祝復活節快樂!! 我同老公著左你送既拖鞋, 很舒適呀!

    回覆刪除
  18. 好正噃!個洗手間一流!

    回覆刪除
  19. 雙星盤好呀!方便好多,其實都唔係好多星盤可以擺得落個鑊個喎!我又覺得廚櫃淺色係好架!廚房光猛d,人都醒神d啦!

    回覆刪除
  20. Winnie/ Madame Pi/ GG/ tata:thank you ~ 我們沒有豪裝,只係簡簡單單的,住得舒服就得啦 亞 Li:係呀,鍾意煮食o既人通常都勁多雜物,有多o的櫃就好o的! 巨寶大寶小寶寶/ Yan Yan/ 喵噢:我收到實物後第一個感覺都和你一樣 冇計喇!既然買左番來,唯有用住先 ~ 真係非常唔好用的話,要換過都唔係太複雜o既 KT:嘩 ~ 你o個邊好貴啊 ~ 我諗大部分都係去左人工度啦 Angel n Devin:因為我地揀左o的比較經濟的物料嘛 ~ 不過出o黎個效果都 ok 喎 咪咪吉:笨 B 爸爸指正左我,佢話鑊就一定放唔落架喇 (而家屋企個星盤咁大都只係將鑊耳架在星盤邊) 佢只係驚連湯煲都放唔落o者!我話冇咁誇張嘛 ~ 睇落應該冇問題啊 Mrs Kwong:嘩,你講到個廚房咁唔掂啊?咁你快o的整下佢啦 ~ Mm & Jj:呵呵,其實呢個只係普通廚房一個而已,但比起我在市區那個超小的,已經好心滿意足架啦 我的 dream kitchen 是有一個 island table 在中間那種呀 ... 努力努力 ... 小倫:哈哈!我冇電筆丫嘛 ~ 費時特登買一支喇 我打左電話話畀紀先生知,但佢唔識用電腦啊,睇o黎我都要 print 出來畀佢睇先得 ! 亞 B:咦喂 ~ 你個 idea 仲 good 喎 ~ 洗手盆o既問題 . .. 哈哈 ... 用住先喇 ... (笨 B 爸爸話我一味貪「靚」,佢一早話左我架啦 ) MC:我都好似係近一兩年先見到呢款,以前o個o的半圓形用唔盡空間,所以都冇諗過要裝架 lotaitai:我地諗住搵個專門做廚櫃的來做,會做得更好、價錢又會更抵丫嘛 古月:哈哈,o岩用就好啦 ~ 小胡子:我地都係咁諗 ~ 查實煮完每餐之後 anyway 都要抹一餐架喇,影響都唔算大o既 ...

    回覆刪除
  21. hihi..笨b mama 妳好啊.. 有野想請教下你啊 我想問下你去深圳買果d燈呀..浴室馬桶果d野個地址啊.. 可以比我嗎.. 麻煩曬你啊 my email: angiedon1019@yahoo.com.hk

    回覆刪除
  22. 靚太: 廚櫃好靚啊, 我覺得果色唔錯, 淺色D好, 感覺光猛D, 廚房大D咁, 我諗過用白色, 不過都係淺木色會好D, 白色好易熏黃 ~~~ 星盤無可能放到一隻鑊, 將就下啦, 都洗到架, 不過我話比你知, 2個盤係好過一個盤既 !!! SHEENA爸睇完你廁所既洗手盤, 就話洗面一定會彈到周圍到係水, 佢話一定唔用呢隻, 唉! 幾靚都無用, 佢要老土款~~~ 我想問櫃面既彩寶石係第幾級? 楊師傅quote左隻最好既比我, 不過我覺得真係好貴, 想cut budget整隻平d ~~~

    回覆刪除
  23. 有隻日本牌子既廚具啲星盆係可以放到成隻鑊黎洗 , 但就好鬼貴 . 我以前都係用佢 . 厨房我都係鐘意淺色 , 有時去睇啲示範單位 , 用黑色 , 真係嚇死我 , 有乜放左係枱面都可能會睇漏眼. 紀師傅做得好好, 遲下我都會搵佢幫下手 , 幫我媽咪執下個厨房同厠所. 係呀 , 我都覺個洗面盆淺左啲 , 如果我女用 , 真係要日日放條毛巾係側邊搽水先得.

    回覆刪除
  24. b媽: 妳套廚柜拍爛手掌呀 我做左村姑好多年lu, 不過, 妳豪好多, 住house

    回覆刪除
  25. 個廚柜好靚呀, 台又大大長喎~~! 我現在才知道廚柜是這樣砌出來的喔~ <-鄉下婆~ 不過我見到O的灰塵就諗返起以前新居入伙...有排抺了~~我最怕, 頭暈了~~

    回覆刪除
  26. Hello! 笨b媽媽 路過看到你的靚廚房,仲要是在HK呢,真喺好開心 如果返HK都可以有個版參考, 多謝你呀 日青身在花旗国都和你一樣正努力健立我們的home 我哋整緊個Ikea廚房 :)

    回覆刪除
  27. Sheena 媽:收到o個兩隻星盤時都「兀左一兀」,因為起初冇諗住咁淺 ... 呢個就係睇 catalogue 買野的問題啊! 第時買野一定要睇實物 ~ 今次笨左添 (笨 B 爸爸又講:你不嬲都咁笨架喇 ... ) Eliza:我對黑色又唔係太抗拒的,都幾型丫 ~ 但我的廚房只有一隻窗,為了睇落光猛o的,都係揀番淺色好 ~ 何況我牆身、地磚都揀了深色哩 山口:你又記錯了 ~ 我不是 house 耶,是二三樓而已 Maggie:exactly ... 睇o黎我都要搵o的 part time 家務助理o黎幫手清下個場先得,自己抹一定會反肚啊 日青:歡迎光臨啊 ~ IKEA 廚房的款都幾靚呀!不過在香港,找間普通的廚櫃店訂製的會比較便宜哩

    回覆刪除
  28. hi: 笨b媽媽 有一樣問題想請教,妳們用鋪管石油氣 / 叫一鑵鑵石油氣?? thanks

    回覆刪除
  29. 笨b媽媽: Can 找間普通的廚櫃店訂製的會比較便宜 ... that's why I miss HK so much...BTW our kitchen cabinets' handle are the same style hehe... Good taste! Good taste!

    回覆刪除
  30. pp:好多村屋都係叫一罐罐石油氣的,如果較大型屋苑可能會預先鋪埋石油氣喉 ~ 至於我o個度,因為我唔鍾意擺罐石油氣o係屋企、亦唔鍾意放出面 (因為太陽晒住,我怕有危險)、又懶得換石油氣 ... 總之鬼咁多藉口喇 所以我「逼令」左笨 B 爸爸用電磁爐啊 ... 呵呵呵 而家o的電磁爐火力夠、又安全,都係唔錯o既選擇來呀 ~ 如果你有興趣知道多o的電磁爐的野,你可以在我 blog 內 search 下呢個 topic 來看看 日青:yeah 呢款簡簡單單的手柄,最好的地方是可以做埋毛巾架!哇哈哈

    回覆刪除
  31. 笨B媽媽, 唔知妳仲記唔記得我呢? 我尋日都去左紀生度做櫃呀!

    回覆刪除
  32. 嘻嘻, 我有撻妳個朵呀! 妳係咪周太呀? 不過唔知我造得算唔算抵呢? 因我唔係好識同佢講價呀!

    回覆刪除
  33. 笨B媽媽:個廚櫃同厠所櫃用咗一輪,so far有冇咩問題呢?因為屋企搬屋都要做廚櫃同厠所櫃,請俾啲comment for my reference. Many thanks!!

    回覆刪除
  34. 笨B媽媽,多謝你一直以來的寶貴意見!
    我之前都走左去搵紀生,仲介紹左另一個朋友,原先大家都覺得佢唔錯,所以決定幫襯佢。我朋友間屋個幾月前整先,我地現在至開始。點知朋友個廚櫃搞到好大鑊。紀生無度清楚個位,應承左我朋友可以在大眼雞洗衣機前面加門(其他公司都話唔得,所以我朋友一聽到佢話無問題就幫襯左佢),結果不但無同佢加門,連大眼雞旁邊的廚門開時都會撞花部大眼雞。咁佢地叫紀生改啦,起初都無乜野,點知後來佢發惡閙我朋友兩夫婦。後來又死死地氣話會改,點知最後CALL極都唔應,結果連尾數都唔收,當然錯左的就無改啦。我朋友都好無奈。幫佢做野的師傅話其實佢老闆(即紀生)份人係好衰,好惡死架!
    其實我朋友的廚櫃另外有2-3個問題,不過佢地師傅都好好改番晒,唯獨紀生係令我地最失望,不但度錯野唔專業,仲鬧人兼爛尾。我都覺得好對唔住我朋友。現在我間屋都決定唔搵佢。
    在此發表意見,希望大家小心啲!

    回覆刪除
  35. hi,笨b媽媽,請問有冇聽過首選廚櫃氦俬設計中心,都係你幫親紀生樓上(25樓).知唔知佢D嘢 得唔得.因為佢D價錢仲比紀生便.

    回覆刪除
  36. WHAT IS 大信板? SAME AS GERMAN板?

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: