2007年4月7日 星期六

同小肥羊有得揮的【深圳 - 小羔羊】

笨 B 爸爸趁著復活節假期,又把我拉上深圳去「尋寶」,今次仲停留左一晚添!嘩,呢兩日行到我呢   ...  唔係笨 B 爸爸唔畀搭車,而係我地今次o既目的又係睇傢俬、燈飾、建材等,而每一個項目,都有十幾萬尺o的廣場可以行 (仲唔止一個添!)  真係大開眼界,眼都突埋!surprise 

 

如果唔係笨 B 爸爸之前做左探子,我諗我都未必肯上去逛 (因為我好怕逼火車,兼且成日偏見深圳治安唔好 )  其實人家已發展得一日千里,不知幾咁先進呀!

 

因為我唔記得左 print 定o的 blog 友介紹o既深圳美食介紹出來帶,唯有在路上買一本「新假期」睇下,好在今期o岩o岩就係講緊深圳美食 !書中介紹一間叫「小羔羊」的火鍋店,記者話係同小肥羊同期出道的,不是翻版,更係專食更嫩滑的羔羊肉架添!咁梗係要試下喇!

 

笨 B 媽媽試食報告:

   「新假期」果然好介紹,o的火鍋料好好味呀!我少食羊肉,唔識比較,但覺得真係幾嫩滑架喎,最緊要係羊騷味唔重,o岩晒我!

   我地 7:30 pm 去到,唔駛等位呀!雜誌話因為新開所以未爆喎 !咁各位要試趁早勒!

   服務員態度良好,仲會提點我地點得太多野添呀!佢總共叫我地刪左 3 碟野呀,最後果然o岩o岩好喎 good

   今次我地食左總共 RMB 180,佢地只收現金

   今次去到才發現,查實小羔羊位處o個一帶 (八卦一路) 非常多食店 !仲要間間都好大、好具規模咁呀!如果大家去開深圳又唔知食乜好,不妨叫的士司機駛到八卦路一帶兜一兜!

 

 

基本資料:

店名:小羔羊

地址:深圳福田區八卦岭八卦路 13 號 610 棟  (從羅湖搭的士約 RMB 30)

電話:86 - 755 - 8226 - 4422

 

【下圖】我地叫左個鴛鴦鍋 ~ 清湯o個邊超好味呀,笨 B 爸爸成日偷飲!哈哈!

【下圖】咁大碟「一級羔羊肉」都只係 RMB 18 
!服務員話肥肉與瘦肉比例是 1 比 1。貴少少的「精選羔羊肉」(RMB  22) 的肥肉與瘦肉比例是 3 比 7 。

我覺得雞肉片無甚特別,大家可以唔叫呀!留返個肚專攻羔羊肉喇!

【下圖】好 juicy 的手打羊肉丸子,一定要試下啊!

【下圖】鱔片好嫩滑,推介!蒙古粉好煙靱有口感,搵麻辣o個邊o黎淥,正正正

【下圖】烤羊棒 ~ 灑o的孜然粉上去食,非常香酥。

【下圖】烤羊肉串,羊騷味冇咁重,都好好味架!


【下圖】自助沾醬櫃

【下圖】o係香港未飲過的「上清飲」,在國內好似好有名

【下圖】餐後送的西瓜,顏色唔紅但味道 ok


【下圖】估唔到食左 RMB 180 元會有 RMB 40  coupon 送!勁抵!(話時話,如果大家要去的話可問我攞呢兩張券,因為我想下次試下其他食店嘛!)


38 則留言:

  1. 好介紹....過幾日北上一定要試. thx for sharing

    回覆刪除
  2. sam sam:不用客氣,有好野梗係要八埋畀大家知 話時話,你都可以去關口的 香格里拉 飲茶,每位 78 元任點,o的野好好味架!

    回覆刪除
  3. 好吸引呀, 好想去食~~~

    回覆刪除
  4. 你介紹過後早巳試咗....我班老死讚不絶口. 多謝你 "苯b 媽媽"....還有你介紹那个 倉頡篇 非常有用. 我日日都要上去做功課.希望有你磨打手...十份二就心滿意足 多謝你.....坦白説我日日要看過你日誌方安心入睡.. 閣位我是真心......"苯B媽媽" 多謝你........

    回覆刪除
  5. 巫婆:真係相當唔錯架 ~ 得閒去試下! 食到飽飽到係 RMB 100/ 人,勁抵呀! sam sam:嘩 ~ 多謝你咁大力支持啊!我尋日都要去食 lunch,但超多人,笨 B 爸爸話「係咪你o係個 blog 寫左後,攪到佢地生意做唔切啊?!攪到我地要等位啊?!」 話時話,尋日去到時,發現已加價到 RMB 78 一位啦 仲有,真係多左好多客,攪到o的點心上得好慢!我地捉左個部長哦左一輪呀

    回覆刪除
  6. 雖然苯b爸爸把口這樣說 但相信他是非常為你驕傲的. 因為他認為這麼多人...生意那麼好..心中早巳認定是你介紹的原故... 即是認同你啦........ 只不過不好意思說啫.

    回覆刪除
  7. sam sam:哈哈 ... 奄尖 sir 笨 B 爸爸才不會咁好誇獎我啊!他剛才看了你的留言,就即刻講 「你唔好唔記得,當初帶你去香格里拉o個個都係我哦!」

    回覆刪除
  8. 笨 B 爸爸: 還要多謝你至真.......無你預先調查....安排.....我地一定無機會吃這些美食. 笨 B 爸爸.....我都要多謝你

    回覆刪除
  9. 小羊羔? 我地呢度好似無,我們有小肥羊~

    回覆刪除
  10. 可惜我哋唔食羊啦,唔係想可以上去試試!Wei Wei, 你行咗咁多地方,對腳係咪好攰呢?當你行傢俬、建材嘅商場,有冇影相,會唔會報導吓?By the way, 你諗住點用你個天台??

    回覆刪除
  11. 廣東小彥彥:噢!唔緊要,小肥羊都好好味呀! Fiona:我 ... 簡直有腳跛o既感覺添啦 今次唔係影左好多相,因為實在太多啦 (數以百間)!自己未幫襯過的,唔敢推介畀大家啊 當中有幾間幾好的,或者我會幫襯,到時 assure 左 quality 再報導畀大家知 我個天台 ... 主要功能係晾衫 + BBQ + 談情賞星用 上次逛 B & Q (百安居) 時見到個篷頂 tent 和千秋都幾好,應該會訂購呀!另外我在元朗都訂了一個晾衣架 ~ plan 好晒架啦

    回覆刪除
  12. b媽 估吓我喺邊? 我而家身在上海呀! 係咪估唔到呢? 呢間酒店有免費上網架! 我日日都有睇你架 不過日日都玩到好夜 無心機打字留言呀! 今次北上有無收獲呢? 我在上海大有收獲呀 回來後再詳細匯報吧!

    回覆刪除
  13. 小魚兒:哇哈哈!好驚喜呀 你竟然去到上海都掛住我,真係開心呀 你快o的過去 Walkie Talkie 呢篇 blog 度睇下,阿 Yee 話電磁爐煎太陽蛋唔會燶呢,我地o個部 Rasonic 如何呀?

    回覆刪除
  14. Fiona:我之前有介紹過 B&Q (百安居) ,o係深圳好似有幾間分店,聽講遲下會在九龍灣開番間呢!

    回覆刪除
  15. 笨b媽媽, 我都係為咗深圳先買咗本新假期呀!! 不過你就好啦, 本來我都想去試吓小羔羊, 但係龍少唔想即日來回咁趕 我又唔想留一晚... 所以... 冇囉!

    回覆刪除
  16. 咪咪吉:唔緊要,深圳咁近,下次食過啦 ~ (喂喂 ... 你下次去時,我可以畀o個 40 蚊 coupon 你喎 ) 話時話,春風路都好多餐廳!FiON 介紹的毛家飯店都在那兒 ~ 今次 miss 左 (因在後期才發現) 下次再去過先! 呀 ... 今次住左間四星 (可能係自己畀自己四星 ) 的金碧飯店,我覺得唔多 ok 啊 ... 你有冇住過邊間平平地又 good 架?

    回覆刪除
  17. b媽 睇咗喇 呢倨問題係同個鑊有關 只要有好嘅鑊就無問題嘅喇 放心喇!

    回覆刪除
  18. 我今日都去左深圳玩,啱啱先返落黎。我都食左好野,一枱海鮮三個人食都係百幾蚊咋!

    回覆刪除
  19. 多謝介紹呀 e..........咁你o地有冇買到嘢俾屋仔呀

    回覆刪除
  20. 好攪笑呀﹐笨B媽媽! 請問小肥羊同小羔羊係唔係兩兄弟黎呀!!!????

    回覆刪除
  21. 贂落有九成似小肥羊wor

    回覆刪除
  22. hey b ma when i still in hk i always went to 春風路 with my fds for massage ar... really good and clean next time if u r too tired of walking go to do some "ma sa chi" la

    回覆刪除
  23. 好彩笨b 媽係腳破,對手未破,咁先可以咁快同我地報導美食。 笨B媽﹕你有冇放一桶熱水浸腳呀?,浸完會冇咁痛架﹗仲有,唔好著高跟鞋返工住,未得痛上加痛呀﹗

    回覆刪除
  24. 唉也,我上一個留言唔係咒你,係想話,你好鬼抵錫姐, 對腳破破下都出blog 。 唔好誤會呀,B媽﹗

    回覆刪除
  25. 真係好正咁喎, 我都好鐘意食小肥羊架

    回覆刪除
  26. 小魚兒:咁就好啦 ~ 最驚唔夠鑊氣啊 Chloe:咁正?快o的報導下啦 等我下次又跟你介紹去大食一番 GG:我地今次純粹八卦,本來諗住在 B&Q 訂購o的戶外傢俬,但可以唔駛咁急,搬左先訂都未遲 提子太太:我以為係「翻梘」來呀,但睇新假期介紹,原來佢同小肥羊係同期出道 (但小肥羊的分店多好多) Ivany:真係相當似呀!不過食物質素都相當唔錯,又唔駛排長龍,都食得過呀! Angel n Devin:係咯 ... 諗諗下 ... 點解我地冇去「馬殺雞」(massage) 架呢下?! ( 笨 B 爸爸o係旁邊嘰咕話唔知邊度好丫嘛 ... 你有冇邊間好介紹 ?) 小倫:哇哈哈,我梗知你唔係咒緊我啦 好在我全程都係兩手 fing fing,所以對手還可以活動自如打下 blog 果然老了,勞動了幾日,周身骨痛呀陰功 KT:你唔食得辣呀?噢 ~ 可惜也 ~ 不過清湯都好好味的! Karen:我在香港都幾鍾意去小肥羊架!不過香港較貴,最好多o的人去,share 起來先抵o的。否則兩個人開一鍋打邊爐,其實唔係幾化算

    回覆刪除
  27. 如果冇人介紹, 齋睇鋪頭名都怕入咗黑店, 變咗小羔羊

    回覆刪除
  28. 笨b媽媽, 係咁就多謝定你先喇~ 我地通常北上都係住 "如家快捷" 架! 因為實在超平, 而且房間都唔差, 好乾淨好舒服... 連我依d潔癖人都讚好!!! 而且剩係深圳都有3間分店. 而我地只係住過深圳火車站店 行去地鐵站都要十幾分鐘 龍少話依間係民居入面, 夜晚都安全d! 不過衰就衰在地點通常都唔就腳!! 你可以上網book, 如果做埋佢地member訂房仲會平d, 又可以儲分 如果你下次你想試吓又唔想做會員住, 叫龍少幫你地訂都ok架~~~ http://www.homeinns.com/program/index.aspx

    回覆刪除
  29. d沾醬放入櫃仲乾淨過香港果d就咁放向樹

    回覆刪除
  30. 深圳間小肥羊抵食咁多! 睇到我口水都流埋!

    回覆刪除
  31. 我honey好鍾意食羊ga,下次真係好試下。

    回覆刪除
  32. hehe,,其實7/4我都有同d朋友去小羔羊打邊爐(同你一樣時間),我哋坐咗地下那層,但唔發覺你哋,下次有縁的話我會再留意身邊的人 再同你打招呼

    回覆刪除
  33. iwkw:哇哈哈,你講得o岩啊,如果唔係新假期介紹,我都會以為係翻版呀 話時話,深圳都好多羊肉火鍋店啊 ! 咪咪吉:多謝你的情報,下次再上去過夜時試下先! 泳琪@小朋友:香港係就咁放o係架咩?我太耐冇去小肥羊了,唔記得左 .. . Madame Pi:喂喂 ~ 搭錯線 ~ 我講緊小羔羊呀 ~ 不過同小肥羊o的 quality 有得揮啊!至於邊間平o的我就唔知,因為我未去過深圳的小肥羊哩 ~ 總之兩間都應該比香港平好多 小野貓:咦 ~ 鍾意食羊o既人可能會鍾意羊騷味重o的架喎 我覺得羔羊肉冇咁騷啊 hoi2:咦喂 ... 你地坐下層嗎 ... 會唔會係那一枱大約 6 人、有男有女的一群年青人?張枱好近正門,在一條大柱旁邊的? 如果是,那我就在你們上面呀

    回覆刪除
  34. 我哋坐係下層離門口第三張到,其實我哋都係後生(學譚校長話年年25年永遠不老) 有男有女4個人那張,本想坐上層但只是後來告吹 ,如果唔係可以見到你同笨b爸啦 你要努力呀,因為我經常睇你同maMa個blog 呀,,努力 ,下次再見

    回覆刪除
  35. 依幾次去福田的小肥羊, 感覺沒有驚喜的味道! 食食o下覺得個湯底好咸. 看左妳的介紹, 我想下次有頭緒了.

    回覆刪除
  36. 前日(16/11/2007) 去左 八卦路, 諗住搵你推介的 小羔羊, 點知搵極都搵唔到, 之後問人, 人地話執左, 都唔知係咪真! 究竟而家間 小羔羊仲o係唔係到呢? 如果o係到, 又o係邊度呢?

    回覆刪除
  37. 你可以在八掛一路試吓嗰間蘇武木羊都好好味

    回覆刪除

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: