2007年4月9日 星期一

曲奇製作 --- 新手小貼士



雖然我「焗齡」唔短,但因為怕麻煩又懶,所以「產品款式」真係十隻手指都數得晒,餅點方面,至叻都淨係識得焗曲奇同埋雪芳蛋糕,仲要係外型求求其o個o的,唧花、裝飾全部唔識,真見笑 ... 哇哈哈 ...

 

曲奇做得我「十大餅點」之一,梗係因為佢易上手喇   查實最初一兩次,我都焗過一o的唔食得o既物體出來架   幸好網上有好多煮食討論區,各界高手都不吝嗇分享他們的意見和心得,令我呢個天資不甚聰穎o既初班阿茂最終都成功左!

 

Blog 友李小姐咁o岩問起,等我分享一下我所知o既曲奇製作技巧喇 ~ 如果各位高手都有獨門秘訣,請多多指教補充,等我可以繼續進步 ~ 感謝感謝 ~

 

笨 B 媽媽的曲奇小貼士

  用料 --- 麵粉

-   焗曲奇最好選用低筋麵粉,可以令曲奇較鬆脆。

-  如果買唔到低筋麵粉,可以 80% 普通麵粉混合 20% 粟使用

-  食譜中有加入發粉 (Baking Powder),如果用自發粉代替亦可。自發粉就是預先混合好的麵粉和發粉,比例大約是 100 克麵粉加 1 茶匙發粉。

-  我慣用特惠牌的自發粉,不用另加粟粉,因經驗所得,佢都已經係低筋 ... (麵粉的筋性視乎麵粉中的蛋白質含量。有個小貼士 ... 愈高筋的麵粉,嗅起來的「麵粉香」愈重 ~)

   用料 --- 糖

-   好多曲奇、蛋糕的食譜都話用糖粉或糖霜,因為質地柔細,容易打勻。我都試過用普通砂糖,其實問題也不太大

 

 

   用料 --- 蛋

-  有些曲奇食譜用全蛋、有些只用蛋黃。一般都係講緊中蛋 (約 55 克)。如果咁o岩屋企只得大蛋,我會扣起少少蛋白 ... 用o黎敷面 ... 哈哈哈

   用料 --- 牛油

-  牛油是曲奇的靈魂,所以必須揀隻好o的、香o的o既牌子。有朋友特別訂o的超靚牛油來造曲奇,但一般都是用超市買到的就算啦  

-   用低脂牛油冇咁香、用植物牛油含反式脂肪更多更損健康 ... 所以,寧可少o的整,要整的話,都係用番全脂普通牛油喇

 

   用料 --- 其他配料

-  如焗製含有乾果或芝麻的曲奇,如可先焗香配料,會更好味。用低溫 (120 度) 焗 10-15 分鐘至香氣溢出就 ok 啦

-  如配料是提子,建議先用冧油浸過提子 (之前整

麵包布甸時有介紹)  咁提子就冇咁乾兼帶有少少酒香,好味好多架!


   加麵粉

-   麵粉務必篩過才用,可以增加空氣含量,令麵糰冇咁實 

-   加麵粉時分兩三次來加,令材料混合起來更容易、更均勻  

   切拌法

-   如用手動,攪拌曲奇麵糰時最好用「切拌法」,千祈唔好將麵糰當成造麵包般搓,否則會令麵糰壓得死實,做出來的曲奇就會好硬架啦  

-  顧名思義,「切拌法」就好似切野咁,用手拿著膠勺一邊切一邊翻動,令材料自然融合。千萬要避免壓實麵糰

-   理論難明,都係真人發聲 video 易明o的 ~  所以我拍左條短片給大家看啦  

   整型

-   先將麵糰做成一個長條,方便雪凍後切片焗製曲奇

-   如果想做出來的曲奇較方型,可以用小工具 (e.g. 保鮮紙、鍚紙包裝盒) 輔助,將四邊輕力壓平

   攤涼

-   曲奇出爐後要放在鐵架上放涼,千萬不要就咁放在碟上或枱上,因為碟面或枱面冰涼,會令熱辣辣的曲奇蒸發出來的水氣又倒吸在曲奇裏啦!

-   我手上沒有放涼架,所以用大碟和筷子自製了一個臨時版 (如果有正式的放涼架,最好連錫紙都去除,令效果更好)

-   放涼後的曲奇,可以放入密實袋/ 密實盒保存

-   如想曲奇更脆 (或在潮濕天氣時) 建議可做多一個 step --- 翻焗。將放涼後的曲奇再入爐以較低溫 (150 度) 焗多十分鐘,可以令曲奇內的水氣更少,口感更脆。但要小心焗燶啊!


 

 ----   Happy Baking!----





 

1 則留言:

由於不常在 blog,如需找我,請到 www.facebook.com/bbmamababa 私訊,謝謝!

Linkwithin

你可能對以下文章有興趣: